2018-07-29
1 Korintiërs 1:23 NLV
‘n Middeleeuse priester in ‘n Europese dorpie het vir sy gemeente gesê, ‘Kom vanaand terug vir ‘n spesiale diens oor Jesus.’ Die gemeente het dit gedoen, maar tot hulle verbasing het geen kerse die kerk verlig nie. Hulle het voel-voel na die kerkbanke geskuifel en gaan sit. Die priester was nêrens te sien nie. Toe hoor hulle hom deur die kerk na vore loop. Toe hy by die kruis wat op die muur hang kom, het hy ‘n kers aangesteek. Sonder om ‘n woord te sê het hy die vasgespykerde voete van Christus verlig, toe sy sy, toe een hand en toe die ander hand. Hy het die kers opgelig en die bebloede gesig en doringkroon verlig. Hy het die kers met een asem uitgeblaas en toe die gemeente verdaag. Dit was nodig om niks meer te sê nie. Christus is vir jou gekruisig. God het sy sondelose Seun op daardie kruis vir jou laat hang. As jy die enigste persoon was wat nog ooit geleef het, sou Christus steeds vir jou gesterf het. Met sy arms wyd gestrek, het Hy gesê, ‘Dit is hoe lief ek jou het.’ Wanneer jy versoek word om te sondig, wanneer jy deur skuld as gevolg van jou sonde oorval word, wanneer Satan fluister, ‘Daar is geen hoop vir jou nie,’ wanneer trots jou op jou eie deugde en moraliteit laat fokus, gaan terug na die kruis toe. Jy kan nie te gereeld soontoe gaan nie. Die lofsanger Isaac Watts het dit met hierdie woorde opgesom: ‘Were the whole realm of nature mine, that were an offering far too small; love so amazing, so divine, demands my soul, my life, my all.’
Sielskos: Matt 5:10; 1 Tess 2:13-3:5; 1 Kor 4:11-13; Op 6:9-11
2018-07-28
Psalm 25:21 NLV
Bobby Jones word as een van die wêreld se beste golfers geag. Hy is egter meer bekend vir dit wat by 1925 se Amerikaanse Ope gebeur het, as al sy ander oorwinnings op die golfbaan. Hy het per ongeluk sy bal aangeraak en vir homself ‘n een-hou boete toegeken, selfs al het niemand anders gesien dat hy die bal aangeraak het nie. Daardie boete het veroorsaak dat hy die Ope met een hou verloor het. Toe toernooi beamptes hom oor sy integriteit probeer komplimenteer, het Jones eenvoudig gesê, ‘Jy mag my net sowel prys omdat ek nie banke beroof nie. Daar is net een manier om hierdie spel te speel.’ Bobby Jones het by die reëls gehou. Punt. Daarmee het hy die integriteit van die spel geëer. Een sportjoernalis het geskryf, ‘In die opinie van baie mense, van al die groot atlete, het Bobby Jones die naaste gekom aan wat ons ‘n groot man kon noem.’ Jones kon die toernooi gewen het, maar hy sou sy integriteit verloor het. Om die Amerikaanse Ope te wen was nie genoeg om ‘n een-hou boete op sy integriteit te plaas nie. Dis epiese integriteit! Dis iets om te vier. Ons lewe in ‘n samelewing wat talent meer as integriteit waardeer, maar dis verkeerd. Talent verloor waarde soos die tyd verloop. So ook intellek en voorkoms. Jy sal op die ou einde jou krag en jou mooi voorkoms verloor. Jy hoef egter nie jou integriteit te verloor nie. Integriteit is die een ding wat se waarde nie met verloop van tyd verminder nie. Niks neem langer om te bou as ‘n goddelike reputasie nie. Niks word egter ook vinniger met een hou van sonde vernietig nie. Dis hoekom jou integriteit bo alles anders gevier en beskerm moet word.
Sielskos: Sef 1-3; Luk 9:46-56; Ps 42:6-11; Spr 19:15-17
2018-07-27
Jesaja 43:18 DB
Alhoewel dit waar is dat ons almal van tyd tot tyd misluk, is dit goed om te onthou: Jy kan suksesvol misluk. Hoe? Deur uit jou foute te leer en wyser en sterker as gevolg daarvan te word. As jy oefen om ‘suksesvol’ te misluk kan jy sukses in die toekoms ervaar. Erken dus jou mislukkings, sien jouself as gereinig deur die bloed van Jesus, laat jou teleurstellings gaan en staan op en probeer weer. Op ‘n punt in Elia se lewe het hy so depressief geword dat hy gebid het om dood te gaan: “…’Ek het nou genoeg gehad, Here,’ het hy gesê. ‘Neem nou maar my lewe, want ek is niks beter as my voorouers nie'” (1 Konings 19:4 NLV). Later is hy deur God se genade versterk en het hy uit sy depressie ontwaak as ‘n nuwe man met ‘n nuwe doel in die lewe (sien verse 15-16 NLV). Nadat hy Christus openlik verloën het, is Petrus vergewe. Ten spyte van sy swakheid is hy herstel en het hy die apostel geword wat sy mede-apostels versterk het en die Nuwe Testamentiese kerk gebou het (sien Lukas 22:31-32). Dis nie ‘n kwessie van hoe erg of hoe gereeld jy misluk het nie – dis ‘n kwessie van wat God met jou kan doen wanneer jy sy genade aanvaar, weer opstaan en Hom toelaat om jou te bemagtig om beter te doen. Petrus is ‘n bewys dat God ons kan gebruik wanneer ons swak is en deur ons tot eer van Hom kan praat en optree (sien 1 Korintiërs 1:28). Sal God jou soms korrigeer? Ja, Hy is ‘n goeie ouer, maar Hy sal jou nooit weggooi nie. Die woord vir jou vandag is dus: Jy kan oor begin.
Sielskos: 1 Tim 4-6; Luk 9:37-45; Ps 42:1-5; Spr 19:12-14
2018-07-26
Spreuke 11:3 NLV
Die tweede kwaliteit wat jy moet hê wanneer jy met mense omgaan is: Geloofwaardigheid. Wanneer mense jou vertrou, luister hulle na jou. In die vroeë stadiums van die verhouding gee hulle jou die voordeel van die twyfel, mits jou getuigskrifte goed is. Om hulle vertroue egter te behou, moet jy geloofwaardigheid demonstreer (betroubaarheid, integriteit en opregtheid). Daar word gesê dat ‘n middelmatige onderwyser vertel, ‘n goeie onderwyser verduidelik, maar dat ‘n uitstekende onderwyser demonstreer. Op die ou einde moet ons almal daarna strewe om die boodskap te wees. In die eerste ses maande van ‘n verhouding, fokus ons op die persoon se kommunikasievermoë om indrukke oor hom of haar te kry. Ons sal byvoorbeeld by ‘n nuwe baas se idees inkoop as hy goed kan praat en ‘n uitstekende visie voorhou. Wanneer ons by ‘n buurman of kollega aanklank vind, voel ons dat ons dalk ‘n nuwe vriend kan hê. Wanneer ons die persoon ontmoet waarmee ons op die ou einde trou, dink ons dat alles altyd sal wonderlik wees. Vir die meeste mense is die wittebrood wonderlik. Maar na die wittebrood kom die huwelik! Soms is dit ook wonderlik en soms is dit nie. Wat maak die verskil? Geloofwaardigheid! Na ses maande raak geloofwaardigheid belangriker as kommunikasie. Wanneer ‘n persoon geloofwaardig is, word dit beter soos die tyd aanstap. Wanneer ‘n persoon egter geloofwaardigheid kort, word dit slegter hoe langer jy tyd saam met hom spandeer. Geloofwaardigheid is soos geld: Daarmee is jy solvent, daarsonder is jy bankrot. Die waarheid is: Met die verloop van tyd weeg die manier wat jy leef veel meer as die woorde wat jy gebruik.
Sielskos: 1 Tim 1-3; Luk 9:28-36; Ps 1; Spr 19:9-11
2018-07-25
Rigters 7:17 NLV
Op die vooraand van sy skouspelagtige oorwinning oor die Midianiete, het Gideon vir sy driehonderd manskappe gesê, ‘…Kyk mooi wat ek doen. Wanneer ek by die kamp kom, moet julle presies maak soos ek.’ Wat sou gebeur as jy dit vir die mense wat jou ken sou sê? Sou jy moes byvoeg, ‘Volg my in besigheid, maar nie in my familielewe nie’? Of, ‘Volg my professionele raad, maar nie my persoonlike leefstyl nie’? Om respek te verdien en waardig te wees om gevolg te word, het jy twee kwaliteite nodig wat saak maak. Die eerste is oortuiging. Oortuiging is ‘n vaste beginsel waarvolgens jy leef en weier om van af te sien. ‘n Man of vrou van oortuiging pas nie sy of haar beginsels en aksies by eksterne invloede aan nie. Een vroeë oggend, is die Skotse filosoof en godsdienstelike skeptikus, David Hume, gesien waar hy jaag om die evangelis George Whitefield se diens by te woon. Toe hy gevra word of hy waarlik glo wat die groot evangelis gepreek het, het Hume geantwoord, ‘Definitief nie! Maar hy glo dit en ek wil ‘n man hoor praat wat waarlik glo in dit wat hy sê!’ Die skrywer Larry Phillips het gesê, ‘Daar is ‘n opmerkbare verskil tussen staal en tin – veral wanneer dit getref word. Opregte, hartstogtelike oortuigings kom eenvoudig oor as ‘woorde van staal.’ Daar is ‘n gedetermineerde voorneme daaraan. Ons moet besef dat ons nie oortuigings kan vervals nie! Mense sal altyd die verskil tussen woorde van staal en die geluid van tin kan onderskei – maak nie saak hoe hard die tin getref word nie!’ Mense ken die verskil tussen jou kernwaardes en jou intellektuele konsepte. As jy nie ‘n diepe oortuiging het van dit wat jy sê nie, hoekom moet hulle dit hê?
Sielskos: Hab 1-3; Luk 9:18-27; Ps 65; Spr 19:5-8
2018-07-24
Amos 5:5-6 NLV
Bet-El is waar Jakob sy lewensveranderende droom gehad het en ‘n eed aan God afgelê het. Gilgal is waar die Israeliete gekamp het nadat God die Jordaanrivier wonderbaarlik geskei het en waar hulle vir die eerste keer die Beloofde Land betree het. Berseba is waar Isak ‘n put gegrawe het en ‘n altaar opgerig het. Al drie plekke het spesiale betekenisse gehad: Hulle was heilige bakens van Israel se geestelike reis. Hoekom het God dan gesê dat hulle Hom nie daar moet soek nie? Die antwoord is eenvoudig: Jy sal God nie in die verlede vind nie. Die Psalmdigter het gesê, ‘God beskerm ons en Hy maak ons sterk, Hy is altyd gereed om ons te help’ (Psalm 46:2 ABA). Wanneer ons te styf vashou aan dit wat God laas gedoen het, mis ons dikwels wat God wil hê ons volgende moet doen. Hy is aan die werk, op hierdie oomblik en op hierdie plek. Hy doen altyd iets nuuts. Gaan dus voort en bou altare en bakens vir heilige oomblikke in die verlede, maar onthou egter dat die doel van altare is om ons aan God se getrouheid in die verlede te herinner sodat ons geloof kan hê om Hom vir die toekoms te vertrou. Wanneer ons in die verlede begin leef, begin ons sterf. Om lewendig te wees beteken dat ons ten volle in die huidige leef. Dit beteken dat jy die verlede in die verlede moet los. Dis hoekom Paulus geskryf het, ‘…ek vergeet dit wat agter my lê, en strek my uit na dit wat voorlê. Ek jaag wenpaal toe, na die hemelse prys wat God aan my wil gee omdat Christus Jesus dit vir my verdien het’ (Filippense 3:13-14 NLV). Strek jou dus uit na wat voor is!
Sielskos: Nah 1-3; Luk 9:1-17; Ps 14; Spr 19:1-4
