2021-01-11
Romeine 1:12 ABA
Die volgende keer wat jy in ‘n woud stap, stop en dink aan wat reg onder jou voete plaasvind. Soos die wortels van die bome aan mekaar skakel, vorm hulle ‘n ondersteuningstelsel. Een het toegang tot water, ‘n ander tot voedingstowwe en nog ‘n ander tot sonlig. Nie een van die bome het alles nie, maar saam kan hulle groei, floreer en die storms van die lewe teëstaan. ‘…en so [sal ons] in alle opsigte groei om soos Christus te wees. Dit werk so: Christus is die Hoof… Elke liggaamsdeel vervul sy bestemde funksie, en so, deur liefde te bewys, bou die liggaam homself op’ (Efesiërs 4:15-16 NLV).
Sommige van ons sukkel met hierdie konsep. Ons wil alleen vlieg totdat ons neerstort en dan besef ons dat ons ‘n behoefte het aan:
1) Bemoediging. Selfs Paulus het bemoediging nodig gehad: ‘…al die Christene wat uit die provinsie Asië hier aangekom het, [het] my in die steek gelaat… Mag die Here ontferming aan Onesiforus en sy hele huishouding bewys, want hulle het my dikwels besoek en bemoedig. Hy was nooit skaam omdat ek in die tronk is nie. Toe hy na Rome toe gekom het, het hy oral gesoek totdat hy my gekry het’ (2 Timoteus 1:15-17 NLV).
2) Simpatie. ‘…Julle moet regtig jammer wees vir ander mense…’ (Kolossense 3:12 ABA). Ons almal wil verstaan word en bevestiging van ons gevoelens ontvang. Soms is ons so haastig om mense ‘reg te ruk’ dat ons nie tyd het om met hulle te simpatiseer nie.
3) Genade. ‘…Vergewe mekaar soos die Here julle vergewe het’ (Kolossense 3:13 NLV). Wat motiveer ons om genade aan ander te bewys? God se genade aan ons! Onthou, jy sal nooit gevra word om meer genade aan iemand te bewys, as wat God reeds aan jou bewys het nie.
Sielskos: Eks 22-24; Matt 6:1-8; Ps 71:1-16; Spr 2:1-2
2021-01-10
Habakuk 2:3 NLV
Voordat ons met ons reeks oor struikelblokke tot beantwoorde gebede klaar maak, laat ons duidelik wees oor een ding: sommige van ons onbeantwoorde gebede is reeds beantwoord. Die antwoord is ‘wag.’ Omdat ons egter nie van die antwoord hou nie, hou ons aan hoop dat God van plan sal verander. Die waarheid is dat God nie van plan sal verander om ons te akkommodeer nie. Ons het dus twee opsies: 1) Hou aan om by Hom te kla. 2) Begin met Hom saamwerk.
Wat het God vir die profeet Habakuk gesê toe hy antwoorde op sy gebede nodig gehad het om Israel in die regte rigting te stuur? Wag! “…’Skryf my antwoord, die visioen, in groot, duidelike letters op kleitablette sodat iemand wat verbyhardloop dit kan lees… Wag geduldig, al voel dit of dit stadig gaan. Wees seker dit gaan gebeur, dit sal nie onnodig talm nie'” (verse 2-3 NLV).
God werk volgens sy eie plan en skedule en sal nie aangejaag word nie. Wanneer jy voor Hom probeer uitbeweeg, beland jy altyd in die moeilikheid. Abraham het dit gedoen en die eindresultaat daarvan was Ismael. Dis toe Abraham se moeilikheid in alle erns begin het! God weet wat jy kan hanteer en wanneer jy gereed sal wees om dit te hanteer.
Paulus het gesê: ‘Drie maal het ek die Here gesmeek… Hy het egter vir my gesê: ‘My genade is genoeg vir jou, want my krag kom juis in swakheid tot volle verwesenliking’…’ (2 Korintiërs 12:8-9 NLV). In plaas daarvan om Paulus uit sy probleem te red, het God dit gebruik om hom te ontwikkel. Sonder die doring in sy vlees om sy groot talent en potensiële trots uit te balanseer, sou Paulus nie naastenby so effektief in die diens van God gewees het nie. Dink daaroor!
Sielskos: 1 Sam 17:4-51; Ef 6:10-18
2021-01-09
Matteus 5:24 NLV
Die vyfde struikelblok tot beantwoorde gebede is ‘n onversoenbare gees. Jou woede mag dalk geregverdig voel, maar dit kan langtermyn resultate, wat jou kan seermaak, veroorsaak. Wrokkigheid is skadelik vir jou gesondheid en geestelike welstand, ongeag ‘wie wat aan wie gedoen het.’ Jesus het gesê: ‘As jy dus jou offer na die altaar toe bring en dit val jou daar by dat jou medemens ‘n grief teen jou koester, los jou offer net daar voor die altaar en gaan maak eers vrede met daardie persoon. Kom dan terug en bring jou offer’ (verse 23-24 NLV). Satan sal aanhou om jou elke dag van jou lewe seer te maak – totdat jy besluit om te vergewe.
God sê: ‘Ek, ja, Ek alleen, is die Een wat julle sondes uitwis. Ek doen dit ter wille van Myself en dink nie weer daaraan nie’ (Jesaja 43:25 NLV). Vergeet dit, om God se onthalwe; wanneer jy dit aanhou ophaal, pla jy Hom! Is God regtig ernstig hieroor? Ja. ‘Die Here het egter 70 man van Bet-Semes laat sterf omdat hulle die ark van die Here bekyk het…’ (1 Samuel 6:19 NLV). Wat was in die ark? Die Tien Gebooie wat ons almal al verbreek het; die rekord van ons skuld en mislukking. Dink twee keer na voor jy besluit om iemand anders se sonde te ontbloot; jy is op gevaarlike voet met God! Jy sê: ‘Maar hulle verdien nie om vergewe te word nie.’ Niemand van ons verdien dit nie, maar God vergewe ons in elk geval. Sy Woord sê: ‘…Vergewe mekaar soos God julle vergewe het op grond van wat Christus gedoen het’ (Efesiërs 4:32 NLV).
As jy dus wil hê dat God jou gebede moet beantwoord – vergewe en laat dit gaan!
Sielskos: Eks 19-21; Matt 5:38-48; Ps 46; Spr 1:32-33
2021-01-08
Johannes 15:7 NLV
Die vierde struikelblok tot gebed is onskriftuurlike gebede. Jesus het gesê: ‘As julle aan My verbind bly en my woorde ‘n stewige vastrapplek in julle gekry het, vra dan net wat julle wil hê, en julle sal dit kry.’ Diegene wat volgens die beginsels van God se Woord lewe, bid nie om die lotery te wen of vir hulle perd om eerste in die Kentucky Derby te eindig nie. Hulle weet dat dit onskriftuurlike gebede is wat God nie sal eer nie. Wanneer jy bid, moet jou versoek in lyn met sy wil wees.
Nadat hy vir veertig jaar lank die kinders van Israel in die woestyn gelei het, het Moses uiteraard daarna gesmag om die Beloofde Land binne te gaan en dit saam met hulle te vier; om ‘…die wonderlike land aan die oorkant te sien, die mooi bergwêreld en die Libanonberg’ (Deuteronomium 3:25 NLV). Ten spyte van sy gebede het dit egter nie gebeur nie. Hoekom? “Maar die Here was kwaad… en wou nie na my luister nie. ‘Dit is genoeg!’ het Hy beveel. ‘Moenie weer met My hieroor praat nie. Jy kan na die piek van die Pisgaberg gaan en die land daar vanuit elke windrigting bekyk, maar jy mag nie die Jordaanrivier oorsteek nie'” (verse 26-27 NLV).
Gebed is nie ‘n talisman of gelukbringer of godsdienstige formule wat jy kan herhaal om die resultate wat jy wil hê, te kry nie. Wanneer jou gebede in lyn met die Skrif en in harmonie met God se wil is, sal Hy hulle beantwoord. Hierdie waarheid mag dalk nie populêr in vandag se ‘goedvoel’ generasie wees waar almal die voordele van God se koninkryk op hulle eie voorwaardes wil hê nie. As jy egter ernstig daaroor is dat jou gebede beantwoord moet word – lees die fynskrif!
Sielskos: Eks 16-18; Matt 5:27-37; Ps 42:6-11; Spr 1:28-31
2021-01-07
1 Johannes 3:21 NLV
Die derde struikelblok tot beantwoorde gebede is onbelyde sonde. Nadat hulle Jerigo, die sterkste stad in die Beloofde Land, oorwin het, is die Israeliete deur ‘n handvol soldate verslaan. Josua was verpletter! Hy ‘…het sy klere geskeur. Hy het voor die ark van die Here op die grond neergeval en daar bly lê tot die aand toe…’ (Josua 7:6 NLV). Luister na sy gebed: ‘Wanneer die Kanaäniete en almal wat in die land woon daarvan hoor, gaan hulle ons omsingel en ons van die aarde af verdelg. Wat sal dan van u eervolle Naam word?’ (vers 9 NLV).
Hoe het God gereageer? Jy sal dalk verbaas wees. “Die Here sê toe vir Josua: ‘Staan op. Hoekom lê jy daar op die grond? Israel het oortree…'” (verse 10-11 NLV). Wat het toe gebeur? Akan, ‘n Israelitiese soldaat, het van die buit wat aan God behoort het, gesteel. Jerigo was die eerste stad in die Beloofde Land wat hulle oorwin het en God het gesê dat die eerste van alle oeste aan Hom behoort (sien Spreuke 3:9). Die skatte van die volgende nege gevegte het aan die mense behoort, maar die skatte van Jerigo het aan God behoort.
Daar is ‘n tyd om te bid en ‘n tyd om op te hou bid, sodat jy eers die sonde in jou lewe kan hanteer. Jy kan nie bid: ‘Here, wat wil U hê moet ek doen?’, wanneer jy reeds weet wat om te doen, maar nie gewillig is om dit te doen nie. Praat God deur vandag se dagstukkie met jou? ‘Geliefdes, as ons gewete ons nie veroordeel nie, het ons vrymoedigheid om na God toe te gaan. Wat ons ook al bid, kry ons van Hom omdat ons sy opdragte gehoorsaam en dié dinge in sy teenwoordigheid doen wat Hom bly maak’ (1 Johannes 3:21-22 NLV).
Sielskos: Eks 13-15; Matt 5:13-26; Ps 42:1-5; Spr 1:20-27
2021-01-06
Jakobus 4:3 NLV
Nog ‘n struikelblok wat veroorsaak dat jou gebede nie beantwoord word nie, is selfsug. Jy sal nie die woorde: ‘ek,’ of ‘my,’ of ‘myne’ in die Onse Vader vind nie. Jy vind eerder die volgende: ‘Gee ons die porsie brood wat ons vir vandag nodig het. En vergeef ons ons sondeskuld… Bewaar ons… en bevry ons van die greep van die Bose’ (sien Matteus 6:11-13). Kry jy die idee? Die man wat bid: ‘Here, seën my, my vrou en twee kinders: ons vier en niks meer nie,’ sal nie ‘n gunstige reaksie uit die hemel ontvang nie.
Jesus het gesê: ‘…alles wat julle in die gebed vra, sal julle ontvang, mits julle God daarmee vertrou’ (Markus 11:24 NLV). Hierdie Skrifgedeelte is egter nie ‘n blanko tjek nie; God se antwoord op selfsugtige gebede is altyd nee. Jakobus skryf: ‘En selfs wanneer julle vra, kry julle dit nie omdat julle motiewe verkeerd is – julle wil goed hê net om dit self te geniet’ (Jakobus 4:3 NLV).
Miskien dink jy: ‘Maar die Bybel sê wanneer ek vreugde in die Here vind, sal Hy my alles gee wat my hart begeer’ (sien Psalm 37:4). Ja, maar jou hartsbegeertes moet in harmonie met God se wil wees. God het Abraham geseën sodat hy ‘n seëning vir ander mense kon wees (sien Genesis 12:2-3).
God weet wat jy wil hê en Hy weet ook hoekom jy dit wil hê. Is dit net vir jou eie gemak en gerief, of is dit ook om sy doelwitte te vervul? Eers wanneer jy daardie vraag eerlik kan beantwoord, kan jy met vertroue bid. Wanneer jou doel is om ander mense te seën, spring God aan die werk en beantwoord jou gebede op wonderbaarlike maniere. Probeer dit – en sien vir jouself!
Sielskos: Eks 10-12; Matt 5:1-12; Ps 10:12-18; Spr 1:17-19
