2024-03-27
Matteus 6:6 NLV
Jesus het gesê: Wanneer jy bid, gaan na die stilste vertrek in die huis en maak die deur agter jou toe sodat jy daar in jou alleenheid tot jou Vader kan bid. En jou Vader wat alles weet, sal jou beloon’ (vers 6 NLV). Die Christelike lewe kan met die tabernakel in die Ou Testament, wat in drie kompartemente verdeel was, vergelyk word. Daar was die voorhof waartoe almal toegang gehad het. Jy het ook ‘n voorhof; die plek waar jy werk, inkopies doen en speel. Dit verteenwoordig jou uitwaardse voorkoms of publieke persona; die deel van jou wat almal sien.
Die tabernakel het ook ‘n innerlike kamer genaamd die Heiligdom gehad, waar meeste mense nie toegelaat is nie. Jy het ook ‘n Heiligdom wat aangewese persone soos nabye familie en vriende mag binnegaan. Jy besluit wie mag ingaan en wie nie en niemand kan hulle weg inforseer nie. Sekere mense mag beroepsgewys of finansieel gesag oor jou hê, maar dit laat hulle nie outomaties toegang toe nie. Wanneer dit by daardie binnekamer kom, besluit jy wie kom en gaan.
Die derde kompartement in die Ou Testamentiese tabernakel was die Allerheiligste, ‘n klein, versigtig bewaakte plek diep aan die binnekant. Dit kon net deur die Hoëpriester binnegegaan word en daar was net plek vir een persoon en vir God. Jy het ook so ‘n plek binne-in jou. Ons verwys soms daarna as die ‘geheime plek,’ omdat net God daar toegelaat word. Hier is ‘n waarheid wat jy moet weet: Jou vlak van vrede, vreugde, tevredenheid, leiding en oorwinning word deur die hoeveelheid tyd wat jy met God in jou geheime plek bestee, gereguleer. Prioritiseer dit, beskerm dit en bring elke dag tyd daar deur.
Sielskos: Jer 4-6; Matt 27:11-19; Ps 55:12-23; Spr 8:19-21
2024-03-26
Genesis 5:24 NLV
Het die mense in die Skrif wat naby aan God geleef het, ooit gestruikel? Hulle het. Het hulle ooit die pad byster geraak? Ja. Wanneer hulle voete egter elke oggend die grond getref het, was hulle toegewyd daaraan om dwarsdeur die dag saam met God te stap. Hulle het krag uit sy krag geput, daarna gestrewe om sy wil te doen en die doelwit probeer bereik wat Hy vir hulle gestel het.
Paulus skryf: ‘…Laat julle roeping julle leefstyl bepaal’ (Efesiërs 4:1 NLV). Dit beteken dat jy moet weet in watter rigting God jou lei en in pas met Hom moet bly. Wanneer Hy optree, moet jy optree. Wanneer Hy stilstaan, moet jy stilstaan. As gelowige moet jou lewe nie in dit wat heilig en dit wat sekulêr is, gedeel wees nie. Die Bybel sê: ‘Dis tog juis deur Hóm dat ons leef, beweeg en bestaan…’ (Handelinge 17:28 NLV). Jy kan nie sê: ‘In hierdie situasie beweeg ek op my eie stoom, maar in daardie situasie beweeg ek volgens die Heilige Gees binne-in my,’ nie. Die Heilige Gees kom en gaan nie in jou lewe nie; Hy is altyd by jou!
Hier is ‘n Skrifgedeelte waaroor jy moet dink: ‘U is waardig, Here ons God, om die hemelse heerlikheid en die eer en die mag te ontvang omdat U alle dinge geskape het; deur u wil is alles wat bestaan, geskape’ (Openbaring 4:11 NLV). Wat ‘n wonderlike gedagte: Jy is geskape om God te behaag! Een van die belangrikste vrae wat jy dus – gereeld – vir jouself kan afvra is: ‘Here, behaag my doen en late U?’ (sien Spreuke 13:5-6). Wanneer jy dit doen, sal jy ontdek dat die rigting waarin Hy jou neem altyd die regte rigting is; sy tydsberekening is altyd die regte tydsberekening en die resultate wat jy kry, is altyd die regte resultate.
Sielskos: Jer 1-3; Matt 27:1-10; Ps 55:1-11; Spr 8:17-18
2024-03-25
2 Petrus 3:18 NLV
Toe Petrus genoeg geloof uitgeoefen het om uit die skuit te klim en op die water te loop, het hy gesink en slegter as enige van die ander dissipels gelyk. Toe hy Jesus probeer verdedig het, het hy ‘n man se oor afgekap. Toe hy beloof het om lojaal te bly, het hy gefaal. Toe hy vir Jesus probeer raad gee het, was hy die duiwel se advokaat (sien Matteus 16:22-23). Uiteindelik het hy ‘n leier in die kerk geword. Sy gedrag het egter nie vir Jesus enigsins verras of ontmoedig nie. Hy sal nooit ophou om een van sy volgelinge wat opreg probeer groei, te help nie. Hy gee nooit op op ‘n student net omdat hy of sy misluk nie.
As jy byvoorbeeld nie mense gekonfronteer het wanneer jy moes nie, is die kans goed dat jy dit swak sal doen wanneer jy dit begin doen. As jy selde mense aangemoedig het, kan jou aanvanklike pogings lomp wees. As jy nog nooit jou geloof gedeel het nie, kan jy die eerste keer oor jou woorde struikel. Gaan voort en struikel! Mislukking gaan nie daaroor om te val nie; dit gaan daaroor om te weier om te probeer.
Een man het vir sy pastoor gesê: ‘As ek God was, sou ek my nie opgehou het met iemand soos ek nie.’ Die pastoor het geantwoord: ‘Wees dan bly dat jy nie God is nie en ek sal twee keer so bly wees – want ons altwee sou dan in die moeilikheid gewees het!’ Solank as wat jy na God soek, sal Hy met jou en in jou werk. Om in genade te groei beteken dat jy geestelik deur die fases van kind en tiener tot volwassenheid groei. Moet dus nie opgee nie – God sal nie!
Sielskos: Hos 11-14; Matt 26:57-75; Ps 13; Spr 8:14-16
2024-03-24
Matteus 6:2 DB
Jesus het gesê: ‘Wanneer julle besluit om goeie dinge vir ander mense te doen… Moenie ‘n openbare skouspel daarvan maak sodat ander julle kan raaksien nie. As julle op soek is na die applous van ander mense, skuld God julle niks meer nie. Dan het julle klaar julle beloning gekry… Net skynheilige mense doen dit. Hulle maak ‘n groot bohaai wanneer hulle die armes help sodat almal dit kan raaksien en mooi dinge oor hulle kan sê. Onthou: God skuld hulle nou niks meer nie… jou hemelse Vader sien wat jy vir ander doen. Hy sal wel sorg dat jy jou hemelse beloning kry’ (verse 1-4 DB).
Gee vrygewig en graag, maar hou dit vir jouself. Dis niemand se besigheid behalwe jou en God s’n nie. As jy dit iemand anders se besigheid maak, kry jy onmiddellik jou beloning en gee jy die geleentheid om iets groters te kry wanneer jy in die hemel aankom, prys. Jy sal jou beloning daar ontvang, want: ‘God… sal nie vergeet… hoe julle julle liefde vir Hom betuig het deurdat julle julle mede-Christene gedien het… nie’ (Hebreërs 6:10 NLV). Ander mense mag dalk nie jou vrygewigheid raaksien nie, of dit vinnig vergeet, maar God sal nie en Hy sal jou daarvoor beloon.
Die volgende keer as jy in die kerk sit, moet jy besef dat daar getroue mense oral om jou is wat gegee en weer gegee het, sonder om dit ooit bekend te maak. Jy mag dalk selfs een van hulle wees! Elke Sondag kom jy met van die grootste gewers in aanraking wat dit doen ‘…soos vir die Here…’ (Kolossense 3:23 NLKV), deur dit vir hulself te hou en op die Here se beloofde beloning te wag. Ander mense mag dalk nooit weet nie – maar God sal nooit vergeet nie.
Sielskos: Matt 21:1-16; Ps 118:19-29
2024-03-23
Matteus 16:16 NLV
Een van die oortuigendste bewyse dat die Bybel waarlik die Woord van God is, lê in die aantal profesieë wat gedurende Christus se lewe vervul is. Daniël het die koms van die enigste Joodse Messias voor die tempel se ondergang geprofeteer. Die Ou-Testamentiese profete het verklaar dat Hy in Betlehem (sien Miga 5:1-2) uit ‘n maagd gebore sou word (sien Jesaja 7:14), verraai sou word vir dertig stukke silwer (sien Sagaria 11:12-13), aan die kruis sou sterf (sien Psalm 22), en in ‘n ryk man se graf begrawe sou word (sien Jesaja 53:9).
Jesus het self voorspel dat Hy gekruisig sou word en drie dae later uit die dood sou opstaan. ‘Die Jode het daarop gereageer: ‘Oor watter wonderteken beskik jy om te bewys dat jy hierdie dinge mag doen?’ Jesus het hulle geantwoord: ‘Sloop hierdie tempel en in drie dae sal Ek dit weer oprig.’ Die Jode kap toe heftig terug: ‘Daar is vir 46 jaar lank aan hierdie tempel gebou, en jy sal dit binne drie dae weer oprig?’ Hy het egter oor die tempel van sy liggaam gepraat. Toe Hy eers uit die dood opgewek is, het sy dissipels onthou dat Hy dit gesê het en hulle het die Skrif en die woorde geglo wat Jesus gesê het’ (Johannes 2:18-22 NLV).
Napoleon Bonaparte het gesê: ‘Ek ken mense en ek sê vir julle dat Jesus Christus nie bloot ‘n mens was nie. Tussen Hom en elke ander persoon in die wêreld is daar geen moontlike vergelyking nie. Alexander, Caesar, Karel die Grote en ek het ryke gevestig. Waarop het ons skeppings egter berus? Geweld. Jesus Christus het sy ryk op liefde gegrond; en miljoene mense sal vir Hom sterf.’
Sielskos: Hos 6-10; Matt 26:47-56; Ps 116:12-19; Spr 8:10-13
2024-03-22
Galasiërs 5:22 NLV
Jy kan enige verhouding verryk en versterk deur die vrugte van die Gees te ontwikkel en uit te leef. Die Bybel sê dat ons deur die Gees gevul moet wees (sien Efesiërs 5:18), en deur die Gees gelei moet word (sien Galasiërs 5:16). Om met die Gees gevul te wees, beteken dat jy ‘n houer is, terwyl jy ‘n uitdeler is wanneer jy deur die Gees gelei word – ‘n houer wat God kan vul en in ander se lewens kan uitstort. ‘Wat is hierdie vrugte waarvan jy praat?’ vra jy. Die Bybel beskryf dit as volg: ‘Maar as die Gees ons lewe beheer, is die gevolg: liefde, vreugde, vrede, geduld, vriendelikheid, goedheid, getrouheid, sagmoedigheid en selfbeheersing…’ (Galasiërs 5:22-23 NLV).
Kom ons kyk noukeurig na hierdie nege verskillende karaktereienskappe. Die eerste drie – liefde, vreugde, vrede – is vrugte wat die atmosfeer verander. Soos jy jou aan die Heilige Gees oorgee, sal Hy ‘n nat kombers oor die onvriendelike woorde wat jy dalk wil sê, gooi. Hy sal ‘n vuur in jou hart bou wat warmte na ‘n koue atmosfeer en liefde na ‘n bitter, wraaksugtige atmosfeer, sal bring.
Die volgende drie vrugte – geduld, vriendelikheid, goedheid – is vrugte wat jou houding verander. Elkeen van ons het die potensiaal om ‘n slegte houding te hê. God laat ons soms deur moeilike situasies gaan om dit wat regtig binne ons is, te openbaar. Wanneer ons ons eie hulpeloosheid, swakheid en wanhoop sien, laat dit ons uitroep: ‘God, ek het U nodig!’
Die laaste drie vrugte – getrouheid, sagmoedigheid en selfbeheersing – is eienskap-veranderende vrugte. Deur die Heilige Gees het jy krag en vermoëns wat jy aan niemand behalwe God kan toeskryf nie. Jy het ook vrede wat menslike begrip te bowe gaan (sien Filippense 4:7).
Sielskos: Hos 1-5; Matt 26:26-46; Ps 116:1-11; Spr 8:8-9
