2019-07-20
Nehemia 6:3 NLV
Terwyl hy besig was om die mure van Jerusalem te herbou, het Nehemia ontdek dat nie almal rondom hom wou hê dat hy sukses moes behaal nie. Om sy werk te stop, het sy vyande twee dinge gebruik – dreigemente en gerugte. Nietemin het hy Jerusalem se mure in minder as twee maande herbou. Hoe het hy dit gedoen? Hy het op dit wat saak maak gefokus gebly en geweier dat sy aandag daarvan afgetrek word. ‘…Ek het besef dat hulle beplan het om my kwaad aan te doen. Ek het toe vir hulle ‘n boodskap teruggestuur: ‘Ek is met ‘n groot taak besig, ek kan nie nou daarmee ophou en julle ontmoet nie.’ Hulle het die boodskap vier keer vir my gestuur en elke keer het ek vir hulle dieselfde antwoord teruggestuur’ (Nehemia 6:2-4 NLV). In vandag se omgangstaal, het hulle vir hom e-posse gestuur. Hulle het boodskappe op sy Facebookblad geplaas. Hulle het boodskappe op sy selfoon gelaat. Oor en oor het hulle sy aandag met dialoog probeer aflei. Hy het egter geweier om te baklei. Sy antwoordmasjien se boodskap het seker iets soos die volgende geklink: ‘Jy het die huis van Nehemia bereik. Ek is nie hier nie. Ek werk tans aan ‘n groot projek. As dit Sanballat, Tobija of Gesem is, julle mors julle tyd. As dit enigiemand anders is, los asseblief ‘n boodskap na die biep.’ Wanneer jy besluit wat jou lewensprioriteite is, sal hulle jou help om oor alles anders te besluit. Hulle sal jou help om jou oog op die bal te hou. Wanneer dit voel of die lewe teen jou is, vra jouself af: ‘Wat is my grootste prioriteite vir hierdie dag en week?’ Besluit dit in jou gedagtes en fokus dan daarop soos jy die taak wat God jou opgelê het, nastreef.
Sielskos: Hand 24-26; Matt 11:1-9; Ps 1; Spr 16:10-15
2019-07-19
Spreuke 4:25 NLV
Jare gelede het ‘n vliegtuig in Florida se Everglades neergestort. Soos die vliegtuig die lughawe in Miami genader het, het die ligaanwyser vir korrekte ontplooiing van die landingstelsel gefaal. Hulle het in sirkels oor die moerasse van die Everglades gevlieg terwyl die bemanningslede probeer kyk het of die landingstelsel definitief nie ontplooi het nie, en of die liggie van die aanwysingslig nie dalk foutief was nie. Toe die vlugingenieur die ligaanwyser probeer verwyder om te kyk of dit foutief is, kon hy dit nie los kry nie. Soos hulle met die liggie gesukkel het, het hulle nie agtergekom dat hulle hoogte begin verloor nie. Gevolglik het die vliegtuig reg in die moeras ingevlieg en 101 mense aan boord het gesterf. Alles was verlore, omdat die bemanning besig was om met ‘n gloeilampie te sukkel en hulle oë van dit wat die belangrikste was, afgehaal het. In die lewe sal jy in die versoeking kom om te fokus op dit wat dringend is, eerder as dit wat belangrik is. Soos jy probeer om jou oog op die bal te hou, sal hierdie dilemma konstant jou fokus bedreig: ‘Moet ek die beste kies of net dit wat goed is? Moet ek die korttermyn- of die langtermynperspektief kies?’ Jy moenie fokus verloor nie; jou taak is te belangrik. Salomo som dit as volg op: ‘Kyk reguit vorentoe; bly gefokus op wat voor jou is. Merk jou pad duidelik af, dan sal jy seker wees waarheen jy gaan. Moenie links of regs van jou koers afwyk nie…’ (Spreuke 4:25-27 NLV).
Sielskos: Hand 22-23; Matt 10:32-42; Ps 65; Spr 16:8-9
2019-07-18
1 Kronieke 16:11 NLV
In Catherine Marshal se boek, A Closer Walk, skryf haar man Leonard LeSourd oor die begin van hulle huwelik. ‘Catherine het groot aanpassings gehad om te maak. Sy het haar droomhuis in Washington verkoop en na Chappaqua getrek, sodat ek kon aanhou om na my werk in New York te pendel. My kinders – Linda, tien; Chester, ses; Jeffrey, drie – is deur ‘n paar ontstellende jare waar hulle aan ‘n verskeidenheid huishoudsters gewoond moes raak. Hulle het gemengde gevoelens gehad om na ‘n nuwe huis toe te trek en veral teenoor ‘die nuwe ma wat Pappa gaan huis toe bring.’ Catherine se seun, Peter, wat negentien was, was besig om deur ‘n rebelse tyd by Yale Universiteit te gaan. Catherine en ek het so baie dinge gehad om oor te bid dat ons begin het om ‘n uur vroeër in die oggende op te staan om die Bybel te lees en saam antwoorde te soek. Haar dagboek het langs ons oop gelê in daardie tye wat ons voor sonsopkoms gebid het, waarin sy ons veranderende behoeftes en God se onveranderlike getrouheid neergeskryf het.’ Soos die lewensdruk meer word, moet jy meer bid, nie minder nie. Jesus het voor sonop opgestaan om te bid. Soms het Hy deurnag gebid. Ander kere het Hy die eise van die skare agtergelaat om te gaan bid. Hoekom? Omdat jou krag, vrede, vreugde en effektiwiteit direk aan die tyd wat jy in gebed spandeer, gekoppel is. Hoekom bid ons dan nie daagliks nie? Vir dieselfde rede wat mense by ‘n gym in Januarie aansluit en teen Februarie nie meer gaan nie. Gebed verg dissipline wat slegs jy in plek kan stel. Dit bring egter groot belonings mee.
Sielskos: Hand 20-21; Matt 10:21-31; Ps 14; Spr 16:6-7
2019-07-17
Psalm 107:9 NLV
Suksesvolle mense is dikwels net mense wat ‘n bietjie hongerder en dorser vir sukses as die res van ons was. Wat ons begeer het, het hulle nagejaag. Napoleon is in armoede gebore. Sy klasmaats op skool het hom gespot. Hy het homself egter tot sy boeke gewend, in sy studies uitgeblink en die slimste student in sy klas geword. Voor sy lewe verby was, het hy groot dele van die wêreld verower! Wanneer ‘n saailing sy weg deur rotse moet veg om sonlig en suurstof te kry en dan deur storms en ryp moet worstel om te oorleef, kan jy van een ding seker wees: sy wortelstelsel sal sterk en sy hout veerkragtig wees. Die natuur leer ons dat dit onmoontlik is om sukses sonder teenspoed te behaal. As jy suksesvol is en nie swaarkry ervaar het nie, kan jy maar vir seker weet dat iemand anders dit namens jou ervaar het. In alle gevalle, is daar geen prestasie sonder teenspoed nie. Die toets van jou karakter word bepaal deur wat dit neem om jou te ontmoedig en te laat tou op gooi. Dr G. Campbell Morgan vertel van ‘n man wie se winkel in die groot brand in Chicago in 1871 tot op die grond afgebrand het. Die volgende dag het hy met ‘n tafel daar aangekom wat hy in die as en puin van sy winkel opgestel het. Op die tafel het hy ‘n plakkaat staangemaak wat gelees het: ‘Alles verloor behalwe vrou, kinders en hoop. Besigheid is weer van môreoggend af oop.’ Salomo het gesê: ‘Sien jy iemand wat bedrewe is in sy beroep? Hy werk vir konings en nie vir gewone mense nie’ (Spreuke 22:29 NLV. Jy sê jy wil suksesvol wees? Die vraag is – hoe ‘honger’ is jy?
Sielskos: Hand 18-19; Matt 10:11-20; Ps 146; Spr 16:4-5
2019-07-16
Eksodus 18:23 NLV
‘n Goeie generaal weet dat dit ‘n fout is om op te veel fronte gelyktydig te veg; wanneer jy te ‘dun’ versprei is, is jy weerloos! Dieselfde is waar van die lewe. Om onnodige stres te vermy, moet jy weier dat elke klein dingetjie jou ontstel. Met ander woorde, kies jou gevegte. Moenie berge uit molshope maak nie. Voor jy jou tyd, energie en emosie aan ‘n saak toewy, vra jouself eers af hoe belangrik dit is en hoeveel van jou tyd, inspanning en energie dit sal verg. Probeer onderskeid tref tussen die dinge wat waarlik saak maak en fokus op daardie dinge. Leer die verskil tussen groot en klein kwessies. Moses het uitgeput geraak omdat hy elke probleem, dispuut en krisis wat onder die Israeliete voorgekom het, persoonlik hanteer het. Miskien het hy gedink dat hy dit moes doen, aangesien hy die leier van die nasie was. Sy skoonpa het egter in wese vir hom gesê: ‘Hanteer jy die groot dinge en los die klein dingetjies vir iemand anders.’ Hy het voortgegaan om te sê: ‘As jy so maak en God jou lei om dit so te doen, sal jy die vrag kan dra en almal sal tevrede wees. Moses het sy skoonpa se raad gevolg en gemaak soos sy skoonpa gesê het’ (verse 23-24 NLV). Stop en dink daaroor: Jou lewe het reeds meer as genoeg stres en druk, so hoekom sal jy meer byvoeg as jy dit kan vermy? Wanneer jy in die versoeking kom om ‘n ‘geveg’ aan te knoop, tree eers terug en besluit of dit dit werd is en wat dit van jou gaan verg. Moenie ‘n oorlog met geen buit betree nie.
Sielskos: Hand 16-17; Matt 10:1-10; Ps 140; Spr 16:3
2019-07-15
Psalm 127:3 NLV
Wanneer iemand jou lief genoeg het om aan jou ‘n geskenk of nalatenskap te gee, moet jy dit veilig bewaar en dit op ‘n manier hanteer wat hulle eer. Die Bybel sê dat jou kinders ‘n geskenk van die Here is. Dus is hier ‘n gebed vir hulle: ‘Here, ek kan nie begin om vir U te sê hoe geseënd en dankbaar ek vir my kinders is nie. Ek herken hulle as ‘n beeldskone gawe van U. U het hulle vir my gegee om lief te hê en te versorg, om te geniet en te vier, om groot te maak sodat hulle U as die grootste nalatenskap van alles sal leer ken. Dankie dat niemand, nie eens ek nie, ooit so goed vir hulle kan wees soos U nie. Omdat U vir my die voorreg en verantwoordelikheid gegee het om hulle na U toe te bring, leer my die belangrikheid daarvan om hulle elke dag voor U in gebed op te hef. Hou hulle in die middel van u liefde en die doel wat U vir hulle het. Seën hulle met die kennis van wie U is. Help hulle om hulle vertroue in U te plaas en op die lewenspad wat U vir hulle gekies het, te bly. Stel hulle in staat om die gawes en die roeping wat U in hulle geplaas het te herken en om u leiding soos U hulle ontwikkel en hulle vir u verheerliking gebruik, te volg. Laat u genade by hulle wees en u liefde hulle omring. In Jesus se Naam bid ek dit, amen.’ Dien jou kinders die Here? Indien nie, staan op hierdie Bybelse belofte: “‘Daar is hoop vir die toekoms,’ sê die Here. ‘Jou kinders sal terugkom na hulle land toe'” (Jeremia 31:17 NLV).
Sielskos: Hand 14-15; Matt 9:27-38; Ps 133; Spr 16:2
