2019-07-26
Johannes 5:6 NLV
Jesus het vir ‘n siek man hierdie ongewone vraag gevra: ‘Wil jy graag gesond word?’ Vir agt-en-dertig jaar het hierdie man se toestand hom geïmmobiliseer, simpatie van ander mense gekoop en miskien vir hom ‘n rede gegee om te sê: ‘Ek is nie verantwoordelik nie.’ Ons almal is egter vir twee dinge verantwoordelik: ons houding en ons keuses. Die feit is dat ons almal op ‘n manier al seergekry het. As jy egter twintig jaar later steeds daarop fokus, is jy nie ‘n slagoffer as gevolg van omstandighede nie, maar ‘n slagoffer uit keuse. Wat presies is ‘n slagoffer uit keuse? Iemand wat dink dat negatiewe aandag beter as geen aandag is nie! Jesus het gesê: ‘Maar wanneer julle besig is om te bid, vergewe eers enigeen teenoor wie julle ‘n grief het. Dan sal julle hemelse Vader ook julle oortredings vergewe’ (Markus 11:25 NLV). Hierdie woorde neem aan dat iemand jou seergemaak het, maar dit hou jou ook verantwoordelik vir jou reaksie teenoor daardie persoon. Jesus het ons geleer dat wanneer jy nie vergewe nie, kan jy ook nie vergifnis ontvang wanneer jy dit nodig het nie. Miskien dink jy: ‘As hulle maar net sal terugkom en om vergifnis sal vra.’ Is dit waarvoor jy wag? Moenie jou tyd mors nie! Die sleutel tot geluk is in jou hande, nie hulle s’n nie. Die sleutel is vergifnis. Wag jy totdat iemand sê: ‘Ek vergewe jou,’ voordat jy jouself vergewe? Wat as hulle dit nooit doen nie? Hier is die resep vir vryheid: 1) Vra om verskoning as dit nodig is. 2) Maak vrede as jy kan. 3) Vergewe jouself. 4) Beweeg aan. Wil jy graag gesond word? Dis die stappe wat jy moet neem.
Sielskos: Deut 8-10; Matt 12:22-37; Ps 78:9-16; Spr 16:25
2019-07-25
Romeine 15:13 NLV
Eerstens, hoe is jou verhouding tans met God? Twyfel jy aan sy beloftes, sy roeping op jou lewe, jou vermoë om sy stem te hoor, sy vreugde in jou en of jy genoeg kan doen om Hom gelukkig te hou? As dit die geval is, is hierdie Skrifgedeelte spesiaal vir jou geskryf: ‘Ek bid dat dié God wat aan ons ‘n toekomsverwagting gee, deur die geloof julle lewens met blydskap en vrede sal vul…’ Let op, wanneer jy ophou om op God te vertrou en begin om op jou eie inspanning te vertrou, verloor jy jou vreugde en vrede. Het jy joune vandag verloor? As jy dit wil terughê, moet jy uit die vertwyfeling en terug in geloof in beweeg! Tweedens, hoe is jou verhouding tans met jouself? ‘n Christelike skrywer sê: ‘Vir jare was die verhouding wat ek met myself gehad het, een van twyfel. Ek het oor my besluite, my voorkoms, of ek die regte ding sê en doen en of ek God en ander mense behaag, getwyfel. Ek het geweet dat ek nie tevrede was met myself nie, so hoe kon God of enigiemand anders met my tevrede wees? Daardie jare van ellende is agter my, omdat ek nou weet dat God se genade my soos ‘n kombers bedek. Ek weet dat dit slegs deur Jesus is wat ek regverdig en aanvaarbaar voor God gemaak is. Wat ‘n vreugde! Ek ken nou die simptome van vertwyfeling en sal altyd daarteen moet waak.’ Paulus skryf: ‘Christus het ons bevry sodat ons nou in vryheid kan lewe. Maak seker dat julle vry bly, en moenie weer onder ‘n slawejuk vasgebind word nie’ (Galasiërs 5:1 NLV). Hou op om oor jou redding, jouself en God te twyfel!
Sielskos: Deut 5-7; Matt 12:15-21; Ps 78:1-8; Spr 16:23-24
2019-07-24
Psalm 119:166 NLV
In sy boek, Traveling Hopefully, skryf Stan Mooneyham: ‘Ek sal gaan, wanneer… Ek sal gee, nadat… Ek sal gehoorsaam, maar eers… – ‘n mens sal altyd redes vind om uit te stel en soms sal dit selfs na geldige redes lyk. Ek en ‘n goeie vriend van my is min of meer op dieselfde tyd geroep om te preek en ons het saam universiteit toe gegaan. Gedurende daardie vier jaar van my studies was ek besig om in die plattelandse kerke van Oklahoma die preekkuns te vermink, maar my vriend het daarop aangedring om eers sy doktorsgraad te voltooi voordat hy die eerste keer sou preek. Dit was meer as dertig jaar gelede. Ek vermink steeds die preekkuns, maar my vriend preek glad nie. Hy het nooit. Voorbereiding is belangrik, maar om te doen is ‘n noodsaaklike deel van voorbereiding. Jy moet jou eerder self afvra: ‘As dit nie ek is nie, wie dan? As dit nie hier is nie, waar dan? As dit nie nou is nie, wanneer dan?’ Dis nie genoeg om te sê dat jy in God se Woord glo nie, jy moet dit ook gehoorsaam. Dis nie genoeg om Bybelse kennis te versamel nie, jy moet hierdie kennis wat God jou gegee het ook in jou daaglikse lewe toepas.’ Jakobus skryf: ‘Julle moet mense word wat dóén wat die woord sê. Moet dit nie net aanhoor nie, dan bedrieg julle julleself… As jy jou egter verdiep in God se volmaakte wet… en jy dóén wat die wet sê en jy vergeet nie wat jy gehoor het nie, dan kan jy God se seën verwag op wat jy doen’ (Jakobus 1:22, 25 NLV). Die seëning kom deur te ‘doen.’
Sielskos: Deut 3-4; Matt 12:1-14; Ps 46; Spr 16:20-22
2019-07-23
Johannes 15:12 NLV
Jesus het gesê: ‘Dit het Ek vir julle gesê sodat julle my blydskap mag ervaar en julle blydskap volkome kan wees’ (vers 11 NLV). Wat is hierdie dinge wat jy moet doen om sy vreugde in die lewe te ervaar? Jesus sê vir ons in die volgende vers wat dit is: ‘Dit is my opdrag: Julle moet mekaar liefhê soos Ek julle liefgehad het.’ Dis ‘n uitdagende opdrag! Jy sal baie moet groei en volwasse word voordat jy aan hierdie opdrag sal kan voldoen. Om die lewe wat Jesus vir jou wil hê egter te geniet, moet jy jouself daaraan toewy om dit te doen! God het verskillende tipes mense met verskillende temperamente en persoonlikhede gekies, dus hou Hy duidelik van verskeidenheid. Toe God die eerste mens geskape het, het Hy gesê dit is goed. Dus is daar nie net ‘n verskeidenheid van mense nie, daar is ook ‘goed’ in elkeen van hulle. Jy is veronderstel om daarvoor op die uitkyk te wees. Baie van ons ongelukkigheid in die lewe word veroorsaak omdat mense nie is wat ons wil hê hulle moet wees nie en nie doen wat ons wil hê hulle moet doen nie. Wat is die antwoord? Hoe kan jy elke dag geniet wanneer jy met irriterende mense te doen moet kry? Deur te besluit om hulle lief te hê. Jy hoef nie van hulle maniere te hou nie, maar jy moet hulle ten spyte van hulle maniere liefhê. Wanneer jy daaroor dink, is dit ook hoe God jou behandel, nie waar nie? Hier is die sleutel om irriterende mense lief te hê: Irriterende mense word gewoonlik deur iets in hulle lewe geïrriteer. Wanneer jy die bron van hulle pyn ontdek, sal hulle beter begin voel en jou beter begin behandel.
Sielskos: Deut 1-2; Matt 11:20-30; Ps 42:6-11; Spr 16:17-19
2019-07-22
1 Tessalonisense 5:18 NLV
Dankbaarheid kom nie natuurlik vir ons nie, maar ‘n gekla en gekerm wel. Niemand het meer rede gehad om te kla as Josef nie. Hy is verlaat, tot slaaf gemaak, verraai en vervreem. Dis die hoofopskrifte van sy vroeë lewensverhaal. Tog, wanneer hy daaroor praat, hoor jy nie ‘n sweempie van bitterheid nie. Jy hoor die teenoorgestelde. Hy het sy twee seuns lewende, lewenslange getuienisse van sy dankbaarheid teenoor God gemaak met die name wat hy aan hulle gegee het. “Josef het die oudste een Manasse genoem, want het hy gesê: ‘God het my al my kwellings laat vergeet, en ook alles wat my familie teen my gedoen het.’ Die tweede een het hy Efraim genoem, want het hy gesê: ‘God het my vrugbaar gemaak in die land van my swaarkry'” (Genesis 41:51-52 NLV). Let twee dinge op: Eerstens het Josef na die verlede gekyk en God gedank vir dit waardeur Hy hom gebring het. Jy moet dit ook doen. Of dit nou dinge is wat ander mense aan jou gedoen het of iets wat jy aan hulle gedoen het, God se genade het jou daardeur gebring. Daar is net een goeie rede om die verlede op te haal en dit is om te onthou hoe God jou daardeur gelei, beskerm en geseën het. Tweedens het Josef na die huidige tyd gekyk. ‘God het my vrugbaar gemaak in die land van my swaarkry.’ Kan jy ‘n tyd onthou wat jy nie geweet het of jy dit gaan maak nie? Toe ander mense ook gedink het dat jy dit nie gaan maak nie? Kyk wat het die Here in jou lewe gedoen! Ten spyte van struikelblokke en teenstand het Hy jou geseën en vir jou gesorg. Draai die kermkraantjie toe en maak die dankbaarheidskraantjie oop. ‘Wees in alle omstandighede dankbaar, want dit is wat God van julle as Christene verwag.’
Sielskos: Hand 27-28; Matt 11:10-19; Ps 42:1-5; Spr 16:16
2019-07-21
2 Konings 3:8 NLV
Die Israeliete het ontdek dat die pad na die Beloofde Land deur die woestyn loop. Een Bybelonderwyser verwys daarna as ‘God se slagveld.’ Hy sê: ‘In die woestynervarings van die lewe, word die dinge wat jou in jou wandeling met God laat struikel, toegelaat om dood te gaan. Daar tref Hy onderskeid tussen diegene wat net ‘n oppervlakkige verhouding met Hom wil hê en diegene wat Hom intiem wil leer ken. Dis daar waar jy leer om op geloof te staan en al jou sorge aan Hom oor te gee, omdat daar niemand anders is om na toe te draai nie. Dis daar waar God sê: ‘Ek het jou uiteindelik waar Ek jou wil hê.’ Soms sal Hy jou skielik in die wildernis in lei. Dit gebeur veral wanneer Hy probeer om jou aandag te trek en met jou oor ‘n roeping wat Hy in jou lewe geplaas het, te praat, maar tot nou toe het jy nie tyd gehad om te luister nie. Skielik besef jy dat God die enigste Een is wat jou deur die situasie waarin jy jouself bevind, kan kry. Hy laat toe dat jy van jou trots gestroop word, sodat jy in nederigheid geklee kan word; van selfgenoegsaamheid gestroop word om jou sodoende by ‘n plek van totale afhanklikheid aan Hom te bring.’ As jy deur ‘n woestynervaring gaan, moenie dink dat God jou straf of dat Hy jou verlaat het nie. Hy laat net toe dat sekere dinge doodgaan, sodat ander dinge binne jou vrugbaar kan word. Wees bemoedig; jy sal hierdeur kom! Deur God se genade sal jy jou bestemming bereik. Die waarheid is dat die enigste manier om die bestemming wat God vir jou beplan het, te bereik deur die woestyn is.
Sielskos: 1 Sam 5:1-6:16; Op 11:15-19
