2019-07-14
Jesaja 30:21 NLV
Jesus het God se strategiese plan vir sy lewe verstaan – die verlossing van die mensdom – en het elke dag van sy lewe in die lig daarvan gelewe. Aan die einde van sy lewe kon Hy bid: ‘Ek het U op aarde verheerlik deur die werk te voltooi wat U My gegee het om te doen’ (Johannes 17:4 NLV). Strategiese beplanning is krities vir sukses in enige taak wat mens aanpak. As ‘n verloste kind van God, moet jou strategie van God af kom, anders sal druk en mense jou in die verkeerde rigting kan neem. Jesus se aandag kon maklik deur die eise van die skare en die misleidende denke van sy dissipels afgetrek word. Hoe het Hy dit vermy? Deur nagte in gebed deur te bring en voor die son opkom met sy Vader te vergader om leiding te soek. Jesus het volgens hierdie beginsel geleef: ‘…Ek verseker julle, die Seun kan niks uit sy eie doen nie. Hy doen slegs wat Hy die Vader sien doen. Wat die Vader ook al doen, dit doen die Seun net so… Soos Ek dit van die Vader hoor, oordeel Ek en my oordeel is billik omdat dit nie my wil is wat Ek najaag nie, maar die wil van Hom wat My gestuur het’ (Johannes 5:19, 30 NLV). Wanneer jy ‘n plan vir jou lewe soek, is die eerste boek wat jy moet lees die Bybel. Moenie iemand anders se plan aanneem tensy God vir jou gesê het om dieselfde ding te doen nie, anders gaan jy gefrustreerd opeindig. Jy vra: ‘Beteken dit dat God ‘n strategie en ‘n plan vir my lewe het en dat Hy dit aan my sal openbaar?’ Ja. ‘Jy sal ‘n stem hoor sê: ‘Hier is die regte pad. Draai om en loop hierlangs.’
Sielskos: 1 Sam 21:1-6; Hosea 6:4-6; Matt 12:1-14
2019-07-13
Johannes 21:21 NVL
Die Bybel sê: “Toe Petrus omdraai, sien hy dat die lieflingdissipel Jesus volg. Dit is hy wat by die paasete na aan Jesus se bors oorgeleun en gevra het: ‘Here, wie is die een wat U gaan uitlewer?’ Toe Petrus hom sien, vra hy vir Jesus: ‘Wat van hom, Here?’ Jesus reageer daarop: ‘As Ek wil hê dat hy moet bly leef totdat Ek terugkeer, wat het dit met jou te doen? Volg jy net vir My!’ Hierdie gerug het toe onder die medegelowiges rondgegaan dat daardie dissipel nie sal sterf nie. Jesus het egter nie vir Petrus gesê dat daardie dissipel nie sal sterf nie, maar eintlik net: ‘As Ek wou hê dat hy moet bly leef totdat Ek terugkeer, wat gaan dit jou aan?'” (verse 20-23 NLV). Toe Petrus vir Jesus gevra het: ‘Wat van hom, Here?’ het hy na die apostel Johannes verwys, wat ‘n besondere nabye verhouding met Christus geniet het. Jesus het inderwaarheid gesê: ‘Haal jou oë van Johannes af en vestig hulle op My. Volg My en jy kan ook ‘n nabye verhouding met My hê.’ Mense sal jou teleurstel, net soos jy hulle sal teleurstel. Jesus sal jou egter nooit teleurstel as jy jou oë op Hom gevestig hou en Hom volg nie. Hy ken nie net die pad nie, Hy sê: ‘…Ek is die pad en die waarheid en die lewe…’ (Johannes 14:6 NLV). Hy sê: ‘…Ek is die lig vir die mensdom. Wie My aanhou volg, sal nooit in die duisternis leef nie, maar sal die lig hê wat lewe gee’ (Johannes 8:12 NLV). Die woord vir jou vandag gaan dus oor een van die mees fundamentele beginsels van ‘n Christelike lewe: Hou jou oë op Jesus, nie op mense nie.
Sielskos: Hand 12-13; Matt 9:14-26; Ps 123; Spr 16:1
2019-07-12
Eksodus 33:14 NLV
Oorweldig die lewe jou? Jy is nie alleen nie. Moses, een van die grootste leiers in die geskiedenis, het so gestres geraak oor al die verantwoordelikhede wat op sy skouers gerus het, dat hy wou doodgaan. Jy sê: ‘Dit was sekerlik nie God se wil vir hom nie.’ Jy is reg. Dis egter nie genoeg om God se wil te ken nie, jy moet ook dinge op God se manier doen. Moses het van die oggend tot die aand, ses dae ‘n week, sonder vakansies of af tye gewerk. Hy het in die hardloop geëet, afsprake beplan, spertye gemaak en almal gesien wat met hom iets wou bespreek. Die mense naaste aan Moses was óf te besig om op te let, óf self te behoeftig om agter te kom dat hy besig was om uit te brand. Sy skoonpa, Jetro, het dit egter opgemerk en gesê: ‘Jy hanteer die saak nie reg nie. Jy en die volk sal die pas nie kan volhou nie. Jy kan dit nie alles op jou eie doen nie’ (Eksodus 18:17-18 NLV). Gelukkig het Moses die antwoord in twee dele gekry: 1) Delegeer die werk aan gekwalifiseerde mense en vertrou hulle om dit te doen. Die kern van goeie leierskap is nie om alles self te doen nie, maar om dit deur ander mense gedoen te kry. Soos die evangelis D.L. Moody gesê het: ‘In plaas daarvan om die werk van tien mense te doen, kry tien mense om die werk te doen.’ 2) Maak op God se krag staat, nie op jou eie nie. God het vir Moses gevra: “…’Moet Ek dan self saamgaan sodat jou hart kan rus?'” Die woord ‘rus’ beteken innerlike vrede, gesondheid, sekuriteit en vertroue. Dis God se wil dat jy so moet lewe.
Sielskos: Hand 10-11; Matt 9:1-13; Ps 118:19-29; Spr 15:33
2019-07-11
2 Korintiërs 10:12 NLV
Jesus het gesê: “Twee mense het na die tempel toe gegaan om te bid. Die een was ‘n Fariseër en die ander ‘n tollenaar. Die Fariseër het stelling ingeneem en by homself gebid: ‘O God, ek is dankbaar teenoor U dat ek nie soos die ander mense is nie – diewe, onregverdiges, ontugtiges of ook soos hierdie tollenaar. Ek vas twee keer gedurende die week, en ek gee ‘n tiende van alles wat ek verdien!’ Die tollenaar het op ‘n afstand stelling ingeneem en wou selfs nie na die hemel opkyk nie. Hy het vol skuldbesef op sy bors geslaan en gesê: ‘O God, wees my as sondaar genadig!’ ‘Ek sê vir julle, hierdie man, eerder as die eerste een, gaan huis toe as iemand wie se saak met God reg is…'” (Lukas 18:10-14 NLV). God het die Fariseër se kleed van eiegeregtigheid as ‘vuil klere’ gesien en hom verwerp (sien Jesaja 64:6). ‘n Onbekende digter het geskryf: ‘I dreamed death came the other night and heaven’s gates swung wide. With kindly grace an angel ushered me inside. And there to my astonishment stood folks I’d known on earth; some I’d judged and labelled as unfit or of little worth. Indignant words rose to my lips but never were set free; for every face showed stunned surprise – no one expected me!’ Ons almal word deur genade, nie dade nie, gered (sien Titus 3:5). Ons kom nie in die hemel as gevolg van ons optrede nie, maar op grond van Christus se optrede aan die kruis. Moenie jouself probeer ophef deur op iemand anders neer te kyk nie. Moenie aanneem dat jy die reg het om hulle karakter, hartsmotiewe of geestelikheid te oordeel nie. Wanneer jy dit doen, sê die Bybel dat jy nie insig het nie.
Sielskos: Hand 8-9; Matt 8:28-34; Ps 118:10-18; Spr 15:31-32
2019-07-10
Hebreërs 12:1-2 NLV
Glenn Cunningham is op ‘n plaas in Kansas gebore en het by ‘n skool met net een klaskamer skoolgegaan. Hy en sy broer was verantwoordelik om die skool se vuur aan die gang te hou. Een oggend toe die seuns keroseen oor die gloeiende kole gooi om die vuur voor skool aan die gang te kry, het die stoof ontplof. Glenn het na die deur toe gehardloop, maar toe besef dat sy broer geval het en nie beweeg nie. Hy het teruggegaan om sy broer te help en verskriklike brandwonde in die proses opgedoen. Sy broer het egter gesterf en Glenn is met ernstige brandwonde aan sy bene gehospitaliseer. Dit het gelyk of die tragedie ‘n einde aan sy droom om ‘n naelloper te word, gemaak het. Die dokters het gesê hy sou nie weer loop nie, maar deur sy determinasie het Glenn dit reggekry. Toe het hy begin hardloop. Hy het die myl bemeester. Uiteindelik het hy sy visier op die internasionale rekord van sy afstand gestel en dit verbeter! Wat het hom laat aanhou hardloop? Hy het gesê dat dit die gedagte aan sy broer was. Wanneer jy mismoedig voel en wil tou opgooi, dink aan Jesus: ‘Kom ons hardloop met volharding op die baan wat voor ons uitgestrek lê, ons oë vasgenael op Jesus, die Een op wie ons geloof vanaf die wegspring tot by die eindstreep steun. Hy het ter wille van die blydskap wat daar voor vir Hom gewag het, die kruis verduur. Ja, Hy het Hom selfs deur die skande van die kruisdood nie laat afskrik nie. En nou sit Hy op die ereplek langs God op die troon! Dink aan Hom wat soveel vyandigheid van sondaarmense deurstaan het. Laat dit julle inspireer om nie uit te sak en tou op te gooi nie’ (verse 1-3 NLV).
Sielskos: Hand 6-7; Matt 8:18-27; Ps 118:1-9; Spr 15:27-30
2019-07-09
Markus 8:34 NLV
God is ‘n God wat begeertes skep en dit vervul. Voëls wil vlieg omdat God hulle geskep het om dit te doen. Dolfyne wil swem omdat God hulle met die instink om te swem geskep het. God plant nie verkeerde begeertes in ons nie. Toe Adam Eva vir die eerste keer gesien het, het hy ‘n sterk begeerte na haar ontdek. Waar het daardie begeerte vandaan gekom? Van God af. Dit is waarlik vir God lekker om jou begeertes te vervul. Sommige begeertes word egter deur sonde verwring en moet skoongemaak, gesuiwer en heropgelei word. Dis waarna Jesus verwys het toe Hy gesê het: ‘…As enigeen van julle my volgeling wil wees, moet julle julle eie, selfsugtige ambisie prysgee, julle kruis opneem en agter My aan kom’. Ons moet nee sê vir die begeertes wat ons daarvan weerhou om in God se Gees te lewe. Ons moet altyd gereed wees om ‘n mindere begeerte op te offer om sodoende ‘n beter lewe te lei. Aan die ander kant maak niks ‘n mens so weerloos teen versoeking soos ‘n vreugdelose lewe nie. As God al jou begeertes sou verwyder, sou jy nie menslik wees nie. ‘n Stuk sement hoef nie bekommerd te wees oor die onkruid wat daarop groei nie, maar dit sal ook nooit ‘n tuin wees nie. God se plan is dat ons sal besef hoe goed Hy is, elke keer wat ons ‘n Godgegewe begeerte ervaar. Ons leer hoe Hy ons aanmekaar gesit het en wat Hy wil hê ons in die lewe moet doen; en gevolglik vind ons dat ons Hom net liewer en liewer kry. Dis hoekom die Bybel sê: ‘Beproef en sien dat die Here goed is. Geseënd is die persoon wat op Hom vertrou!’ (Psalm 34:9 NLV).
Sielskos: Hand 3:11-5:42; Matt 8:10-17; Ps 109:16-31; Spr 15:23-26
