2022-06-30
Galasiërs 6:2 NLV
God het ons fisiese liggame met interne stelsels wat mekaar ondersteun, geskep. Dis dieselfde met ons verhoudings. Almal het ‘n ondersteuningstelsel nodig. Soms, wanneer ander mense ons teleurstel, sê ons: ‘Van nou af gaan dit net ek en God wees!’ Dis ‘n groot fout! Dis die skaap wat van die trop afdwaal wat deur die wolf geëet word. Satan sal jou isoleer om jou sodoende te vernietig. ‘En as iemand die een aanval, sal die twee weerstand bied. ‘n Driedubbele tou breek nie maklik nie’ (Prediker 4:12 NLV).
Navorsing bewys dat mense wat sorgsame ondersteuning het langer lewe, vinniger van siekte herstel en die lewe meer betekenisvol vind. Ondersteuning gee ons ‘n sin van verbintenis en aanvaarding, wat kern menslike behoeftes is. Dit voorsien ‘n area waar jy weerloos kan wees; ‘n plek waar jy veilig kan voel om te sê: ‘Ek weet nie,’ of ‘Kan jy my help?’ of ‘Ek het ‘n drukkie nodig.’ Dit is ondersteuning – op God se manier. As jy dit nie in jou eie familie kan vind nie, draai na die familie van God toe.
Nog ‘n gedagte: Moenie vergeet om jou waardering aan diegene wat jou ondersteun, te bewys nie. Onthou om te sê: ‘Ek is dankbaar vir jou hulp.’
Ondersteuning is nie ‘n eenrigting pad nie. ‘Help ander gelowiges wat swaarkry…’ Moenie so verdiep in jou eie probleme raak dat jy vergeet dat ander mense ook probleme het nie. Neem die tyd om ook oor hulle belange uit te vra. Niemand hou van iemand wat net neem nie. Dis in die gee-en-neem van wedersydse ondersteuning wat ons groei en ons Godgegewe potensiaal in die lewe vervul.
Sielskos: Jer 7-9; Matt 22:23-33; Ps 59:9-17; Spr 14:23-24
2022-06-29
Spreuke 23:7 AFR53
c besigheid.’ Hier is egter wyse raad wat op alles in die lewe betrekking het: ‘Let op jou gedagtes!’ Wanneer jy in hierdie area verloor, verloor jy orals anders! Salomo bespreek in Spreuke 23 ses beginsels waarvolgens om te te lewe wanneer dit by jou denkwyse kom.
1) Jou gedagtes bepaal jou karakter. ‘Want soos hy in sy siel bereken, so is hy…’ Voor jy ‘n leuen vertel, moet jy dit eers oorweeg en soos ‘n leuenaar dink. Voor jy egbreuk pleeg, moet jy eers ‘n fantasie daaroor hê. As jy dus nie iets wil doen nie, hou op om daaraan te dink!
2) Moenie jou gedagtes mors op mense wat dit nie waardeer nie. ‘Moenie ‘n dwaas reghelp nie. Jou goeie raad behandel hy met minagting’ (vers 9 NLV).
3) Die eerste persoon wat jy moet lei, is jouself. ‘Maak alles wat die spreuke jou leer jou eie. Spits jou ore om nog meer van die lewe te leer’ (vers 12 DB). Solank as wat jy aanhou groei, kan jy aanhou lei.
4) Maak seker dat jou rolmodelle mense met beginsels en integriteit is. ‘Moenie jaloers word op sondaars nie…’ (vers 17 NLV).
5) Bly vol vertroue dat die visie wat God vir jou gegee het, sal gebeur. ‘Hou altyd jou ontsag vir die Here. Jy sal altyd ‘n toekoms hê. Jou hoop sal nooit beskaam word nie (verse 17-18 NLV).
6) Bly standvastig in dit wat jy weet reg is. Moenie die pad byster raak nie. ‘…luister… dat jy wys kan word. Hou jou hart op die regte koers’ (vers 19 NLV).
Let dus op jou gedagtes.
Sielskos: Jer 4-6; Matt 22:15-22; Ps 59:1-8; Spr 14:21-22
2022-06-28
Psalm 27:14 AFR53
Wanneer ons ongeduldig word en reageer sonder om te dink, kan ons skade aan onsself en ander berokken. Soms wanneer ons bid en God nie vinnig genoeg na ons sin reageer nie, besluit ons om reg in eie hande te neem en dinge raak dan gevolglik erger. Wanneer God vir jou sê om te wag, sê Hy in wese: ‘Vertrou My met die tydsberekening, die maniere en middele, en jy sal ‘n beter resultaat kry.’ Dawid het geskryf: ‘Wag op die Here! Wees sterk en laat jou hart sterk wees! Ja, wag op die Here!’ (vers 14 AFR53).
Dit kan moeilik wees om op die Here te wag. Dis baie makliker om in die hitte van die oomblik jou kalmte te verloor. Stop en dink terug. Hoe het die haastige besluite in die verlede, waaroor jy nie gebid het nie, uitgedraai? Dink jy dat hierdie situasie anders sal uitdraai? Nee, nie sommer nie! Wat wil jy hê? Tydelike verligting of ‘n permanente oplossing?
Hoe meer haas hoe minder spoed. Wanneer jy haastig optree, doen jy dinge waaroor jy later spyt is en verskoning moet maak, of nog erger, moet regverdig! Impulsiwiteit het koning Saul in ernstige moeilikheid gebring. In plaas daarvan om te wag vir die profeet Samuel om op te daag en vir die priesters om ‘n vredesoffer aan God te bring om sodoende hulle oorwinning oor die Filistyne te verseker, het Saul ongeduldig geword, wederregtelik die rol van ‘n priester ingeneem en self die offer gebring. Toe Samuel hom vra hoekom hy dit gedoen het, het hy geantwoord: ‘…Ek het… verplig gevoel…’ (1 Samuel 13:12 NLV). Die resultaat? Samuel het vir Saul gesê: ‘…Dit was dwaas van jou!… nou sal jou koningskap nie voortduur nie…’ (vers 13-14 NLV). Wag dus op die Here.
Sielskos: Jer 1-3; Matt 22:1-14; Ps 21; Spr 14:17-20
2022-06-27
Johannes 10:10 NLV
Het die ervarings wat jy deurgemaak het van jou ‘n ander mens gemaak as wat God jou bedoel het om te wees? Het die mense, doelwitte en plesier wat jy gekies het, gelei tot ‘n gevoel van hopeloosheid oor jou toekoms? Wanneer jy jou sin van waarde verloor, is dit moeilik om te glo dat God vir jou kan lief wees – maar Hy is. Hy weet dat daar binne jou die mens is wat groot dinge vir Hom kan doen. Dis hoekom Hy jou hart roer en jou laat weet dat Hy in jou lewe beweeg. Reageer dus op Hom in geloof. Waag dit om te glo dat Hy jou “‘n nuwe skepping” (2 Korintiërs 5:17 NLV), kan maak.
Vertrou eerder op Hom as op jouself. Of jou wonde nou self toegedien is of deur ander veroorsaak is, Jesus sal jou genees en jou weer ophef. Jy sê: ‘Jy weet nie watter dinge ek al gedoen het nie en hoeveel mense ek seergemaak het nie.’ Jesus doen egter. Hy wil die krom plekke in jou hart reguit maak. Jy moet Hom egter toegang tot elke area van jou lewe gee. Wanneer Hy jou hart binnekom, sal jy nooit weer dieselfde gebroke persoon wees nie.
Dawid se sondes het in ‘n nasionale skandaal ontaard. Toe God hom egter vergewe en herstel het, het hy geskryf: ‘Ek wil die Here prys en nie sy goeie dade vergeet nie. Hy vergewe al jou sondes, en genees al jou siektes. Hy verlos jou van die dood, bekroon jou met liefde en medelye. Hy vul jou lewe met goeie dinge, vernuwe jou jeug soos ‘n arend s’n’ (Psalm 103:2-5 NLV). Let die voordele op wanneer jy jou lewe aan Christus toevertrou: vergifnis, genesing, verlossing van verwoestende gewoontes, liefde, medelye en vernuwing.
Sielskos: Hosea 11-14; Matt 21:33-46; Ps 17; Spr 14:13-16
2022-06-26
Lukas 22:32 NLV
“‘Simon, Simon!’ het Jesus gesê. ‘Let op, die Satan het ernstig geëis om julle soos koring te kan sif, maar Ek het vir jou gebid dat jou geloof jou nie moet begewe nie. As jy weer tot inkeer gekom het, moet jy jou medegelowiges gaan ondersteun'” (verse 31-32 NLV).
Is jy betrokke by dinge wat jy nooit gedink het jy in staat sou wees om te doen nie? Jy het nooit gedink dat jy ‘n buite-egtelike verhouding sou hê nie. Jy het nooit gedink dat jy sou steel, kul en lieg om vooruit te kom nie. Jy het nooit gedink dat jy jou familie sou afskeep of sleg behandel nie. Jy het nooit gedink dat jy aan pornografie, dwelms en alkohol verslaaf sou raak nie. Jy is nie alleen nie!
Petrus het gesweer dat hy Jesus nooit sou ontken nie, maar hy het. Nie net een keer nie, maar herhaaldelik. Was Petrus lief vir die Here? Absoluut. Omdat hy egter swak was, het hy sy rug op Hom gedraai. Wat ‘n verskriklike skuldgevoel om te dra. Geen wonder hy het ‘…buitetoe gegaan en onbedaarlik gehuil’ (vers 62 NLV), nie. Jesus het egter vooraf geweet dat dit sou gebeur en vir Petrus gesê dat Hy vir hom sal bid.
Wanneer jy sondig, bid Jesus vir jou! ‘Gevolglik kan Hy hulle wat deur Hom na God toe gaan, eens en vir altyd verlos. Ja, Hy leef vir altyd om hulle saak voor God te bepleit!’ (Hebreërs 7:25 NLV). Stel jou voor: Jy sukkel met ‘n sondige gewoonte, terwyl Jesus terselfdertyd sy reinigende bloed aan die Vader voorhou en Hom namens jou om hulp en genade smeek. Sal Jesus se gebede namens jou verhoor word? Natuurlik. Hy sal, maak nie saak hoe lank dit neem nie, met jou werk totdat jy volkome herstel is.
Sielskos: Eks 34:29-35; Mark 9:2-27; 2 Kor 3:7-18
2022-06-25
Psalm 112:7 NLV
Daar is ‘n groot verskil tussen om van tyd tot tyd aan God te dink en jou gedagtes op Hom te fokus. In ooreenstemming met die sielkundige William James, skryf die navorser Jeffrey Schwartz die volgende: ‘Die noodsaaklike prestasie van die wil is om aan een voorwerp aandag te gee en dit duidelik en sterk voorop in die gedagtes te hou, sodat al die ander – sy mededingers vir aandag en daaropvolgende aksie – verdwyn soos sterlig wat deur die glans van die son oorval word.’
Het jy al ooit ‘n kontaklens op ‘n mat laat val? Jou intense fokus veroorsaak dat jou brein enigiets wat jou aandag daarvan aflei om die verlore lens te vind, onderdruk – die mat se kleur en patroon en koekiekrummels. Jou gedagtes is gefokus. Dis verstommend hoeveel mense hulself as slagoffers van watter gedagtes ook al deur hulle kop hardloop, sien. Dis asof hulle passiewe toeskouers met geen beheer is nie, wat kyk hoe ongewenste gedagtes oor die skerm van hulle bewussyn blaai.
Verstaan die volgende: Daar is tans ‘n stryd aan die gang wat deur Satan geloods word om die soort gedagtes waaraan jy dink, te beheer. Jy kan nie hierdie stryd sonder God se hulp wen nie. Die uiteindelike vryheid – een wat niemand van jou kan wegneem nie – is die vryheid om te besluit by wat jou gedagtes gaan stilstaan. Die Psalmdigter het die ware geseënde mens as volg beskryf: ‘…hy is gerus, hy vertrou op die Here.’ Wanneer jy op God vertrou en jou gedagtes op Hom gefokus is, sal jy bewyse van sy teenwoordigheid oral waar jy kyk, sien. Jy sal dan met sekerheid kan sê: ‘U goedheid en trou vergesel my al die dae van my lewe…’ (Psalm 23:6 NLV). Hou dus jou gedagtes op God gefokus.
Sielskos: Hosea 6-10; Matt 21:18-32; Ps 8; Spr 14:9-12
