2024-02-15
1 Johannes 5:13 NLV
Jy sal verras wees om uit te vind hoeveel mense oor hul verlossing twyfel. Kom ons maak dus God se Woord oop om die kwessie vir eens en altyd op te los: ‘…God het aan ons die ewige lewe gegee, en dié lewe bestaan in ‘n hegte verhouding met sy Seun. Hy wat deel het aan die Seun, het nou reeds die ewige lewe… Ek skryf hierdie dinge aan julle sodat julle met die wete kan leef dat julle nou reeds deel het aan die ewige lewe, julle wat aanhou glo in die persoon van die Seun van God’ (verse 11-13 NLV).
Vertrou jy op Christus om jou te red, eerder as om op jou eie goeie werke staat te maak? Dan is jy gered! Jesus het gesê: ‘Ek verseker julle, wie aanhou glo, het reeds die ewige lewe’ (Johannes 6:47 NLV). Twyfel ontstaan altyd wanneer jy na jou gevoelens, eerder as jou Bybel, luister. Jou gevoelens is soos die weer; dit verander konstant. Die duiwel sal jou ook probeer oortuig dat verlossing goed vir ander mense werk, maar dat dit nie vir jou sal werk nie. Die Bybel noem Satan ‘n leuenaar (sien Johannes 8:44). Paulus skryf: ‘…ek ken die Een op wie ek vertrou en ek is seker dat Hy sal bewaar wat Hy aan my toevertrou het, tot op die dag van sy koms’ (2 Timoteus 1:12 NLV).
Wanneer jou geloof dus wankelrig voel, stop en bid: ‘Here Jesus, ek het my vertroue in U geplaas. U Woord sê dat ek kan weet dat ek die ewige lewe sal verkry. Dis nie ‘n kwessie van goed genoeg of waardig genoeg voel nie, maar die geloof dat U waardig is. Ek plaas dus my vertroue in U, kies om u Woord te glo en verwerp my vertwyfelinge.’
Sielskos: Tit 1-3; Matt 13:24-35; Ps 145:1-13; Spr 4:20-22
2024-02-14
Psalm 131:3 NLV
Dawid het gesê: ‘Israel, hoop op die Here, nou en vir altyd.’ Wanneer jy besluit dat dinge hopeloos is, slaan jy die deur in God se gesig toe.
Eerstens: Vra jouself wat jou grootste begeerte is. Verbeel jouself dat jy tagtig jaar oud is en terug op jou lewe kyk. Voel jy tevrede? Indien nie, moet jy jouself uitdaag om met ‘n antwoord vorendag te kom. Hoop moet persoonlik wees. Dit moet vurig genoeg wees om alles wat jy doen, te beheer.
Tweedens: Gee dit ‘n simbool – iets waarom jy jou gedagtes kan sentreer. Jeremia het God se mense ‘n les in hoop geleer deur die land by Anatot te koop (sien Jeremia 32:9). Hy het geweet dat hulle gevange geneem sou word en gedurende daardie lang jare, sou die herinnering aan daardie veraf land in Juda as ‘n simbool van toekomstige vernuwing dien.
Toe Leo Algimas en sy familie tydens die Tweede Wêreldoorlog na ‘n konsentrasiekamp gestuur is, het hulle ‘n simbool van hoop gehad – ‘n klein stukkie papier van ‘n sjokoladeboksie met ‘n Amerikaanse vlag aan die onderkant. Hulle het dit vir mekaar aangestuur, dit vasgehou en vir mekaar gefluister oor die bevrydingsleër wat op pad was. Simbole help ons om ons gedagtes op dit wat moontlik is, te vestig.
Die grootste simbool wat die wêreld nog ooit geken het was die moeilikste om in te glo. ‘n Baba in ‘n stal het God se koninkryk op aarde aangekondig en die mensdom se lotsbestemming verander. Hy kan jou lotsbestemming ook verander. Stippel dit waarvoor jy hoop uit, vra daarvoor in sy Naam en maak nie saak hoe onmoontlik dit lyk nie, verwag dat dit waar sal word.
Sielskos: Ef 5:21-33; Hoogl 2:1-7; Ps 45; Spr 5:15-19
2024-02-13
1 Samuel 17:50 NLV
Chuck Swindoll sê: ‘Goliat herinner my aan die skeel diskusgooier. Hy het nie enige rekords verbeter nie, maar hy het definitief die skare wakker gehou! Elke dag het Goliat rond geparadeer en dreigemente geskreeu. Die enigste reaksie van die Israeliete se leër was die geluid van hulle knieë en tande wat teen mekaar geklap het! Die reus se strategie van vrees en intimidasie het gewerk, totdat Dawid hom aan die Here voorgestel en hom met sy slinger en klip oorwin het. Twee tydlose waarhede bly tot vandag nog staan.
Een: Jy sal nie die stryd wen deur die Vyand se tegniek te gebruik nie. Wanneer jy met die wêreld se wapens veg, word jy soos die wêreld. Die Bybel sê: ‘…Hy het hom getref en doodgemaak sonder dat daar ‘n swaard in Dawid se hande was’ (vers 50 NLV). Dawid se kragtigste wapen – die ding wat hom uniek gemaak en vir hom die oorwinning gegee het – was sy innerlike skild van geloof. Dit het hom vry van vrees gemaak, sy visie helder gemaak en hom kalmte te midde van die chaos gegee.
Twee: Om reuse te oorwin verg vaardigheid en dissipline. Om die slinger en klip van die Gees te gebruik is baie meer delikaat as om die swaard van die vlees te gebruik. Paulus sê: ‘Want ons stryd is nie teen mense nie, maar teen die bose hemelse regeerders en maghebbers, teen die geeste wat mag in hierdie donker wêreld uitoefen, teen die bose geeste in die hemelruimtes’ (Efesiërs 6:12 NLV).
Jy is die Vyand se enigste teiken solank as wat die stryd voortduur. As jy vandag voor jou eie persoonlike reus te staan kom, maak soos Dawid; gee hom aan God oor, tel jou slinger op en laat God die oorwinning namens jou behaal.’
Sielskos: Joh 1-4; Matt 13:10-23; Ps 141; Spr 4:18-19
2024-02-12
Eksodus 33:11 NLV
Wanneer jy met ‘n goeie vriend gesels, is jy ontspanne, onbewaak en oop. Jy kan uitdruk hoe jy voel sonder om te vrees dat jy geoordeel of verwerp sal word. Dis hoe Moses en God met mekaar gepraat het – soos twee vriende wat mekaar vertrou. Hulle het reguit gesê wat hulle dink en voel, sonder om vakwoorde of godsdienstige taal te gebruik.
Die Israeliete het ‘n goue kalf gemaak om te aanbid en God was kwaad genoeg om hulle te onterf en vir Hom ‘n nuwe nasie te kies. Moses het ‘n krisis op sy hande en ‘n ernstige gesprek met God daaroor gehad. In wese het hy vir God gesê: ‘U sien dit op hierdie manier Here, maar ek sien dit op ‘n ander manier – en u perspektief maak my baie ongemaklik!’ Dit klink soos ‘n openhartige gesprek tussen twee vriende. Moses was nie besig om oneerbiedig te wees nie; hy was net eerlik en reguit met God. Hulle het mekaar goed genoeg geken dat hulle kon praat: ‘…soos vriende wat gesels en mekaar in die oë kyk…’
Bid jy so? Het jy ‘n hart-tot-hart gesprek met jou vriend, God? Dis die tipe verhouding wat God met Moses gehad het en dis die tipe verhouding wat Hy ook met jou wil hê! Godsdienstige clichés en die gewone versoeklyste laat jou die geleentheid om diep en persoonlik met God te verbind, misloop. Gesels eerder openhartig met Hom. Sê vir Hom waar jy vandaan kom, wat jy regtig voel, dink en begeer; en luister dan na sy perspektief. Met ander woorde, wees ‘n vriend van God!
Sielskos: Num 34-36; Matt 13:1-9; Ps 138; Spr 4:14-17
2024-02-11
1 Korintiërs 3:9 NLV
Die Bybel sê ons moet mekaar liefhê, eer en saam met mekaar werk. Hoekom doen ons dit dan nie? As gevolg van ons ego’s! Ons dink ons kan alles self doen, maar dis nie die realiteit nie. Die vraag is dus nie of jy alles op jou eie kan doen nie; die vraag is wanneer jy gaan besef dat jy nie kan nie? Die filantroop Andrew Carnegie het verklaar: ‘Dit is ‘n groot stap in jou ontwikkeling wanneer jy besef dat ander mense jou kan help om ‘n beter werk te doen as wat jy alleen kan doen.’
Nadat Hy sy dissipels vir die bediening opgelei het, het Jesus hulle in pare uitgestuur. Hoekom het Jesus dit so gedoen? Om verskeie redes: om mekaar te keer om van die pad af te dwaal, om mekaar verantwoordbaar te hou, om mekaar moed in te praat wanneer dinge swaar gaan en om mekaar se swakpunte met sterkpunte aan te vul. Ons almal het ‘blinde kolle’ en ons het iemand met 20/20 visie in daardie areas nodig om ons te help om dinge op die regte manier te sien.
Toe Moses in Eksodus 17 sy hande opgehou het (wat gesimboliseer het om na God se hulp uit te reik), het Israel se leërs die Amalekiete oorwin. Toe Moses egter moeg word en sy hande laat sak, het die geveg teen Israel gedraai. Wat was die oplossing? ‘…Aäron en Hur het hom op ‘n klip laat sit. Hulle het weerskante van hom gaan staan en sy hande in die lug gehou totdat die son ondergegaan het. Josua kon toe Amalek en sy volk verpletterend verslaan’ (Eksodus 17:12-13 NLV). ‘n Paar vrae om oor na te dink: Wie hou jou hande op? Wie se hande hou jy op?
Sielskos: Eks 20:13; Gen 4:8-16; Spr 18:21; Matt 5:21-22
2024-02-10
Spreuke 23:7 AFR53
Wat onderskei die beste van die res? Het jy al ooit daaraan gedink? Wat onderskei ‘n goue medaljewenner van ‘n silwer medaljewenner by die Olimpiese Spele? Wat onderskei ‘n suksesvolle entrepreneur van iemand wat dit nie maak nie? Wat maak dit moontlik vir een persoon om na ‘n uitmergelende ongeluk te floreer, terwyl iemand anders opgee en sterf? Hulle houding! Die Bybel sê: ‘Want soos hy in sy siel bereken, so is hy…’ Jou houding kan jou grootste bate of jou grootste las wees. Dit kan jou maak of breek. Dit kan jou ophef of jou neervel. Die regte houding mag jou dalk nie in staat stel om alles te doen nie, maar dit sal jou help om enigiets beter te doen as hoe jy dit met ‘n verkeerde houding sou doen.
Die gelukkigste mense in die lewe het nie die beste van alles nie; hulle probeer eenvouding om die beste van alles te maak. Hulle is soos ‘n persoon in ‘n afgeleë dorpie wat daagliks by die put gaan water haal en sê: ‘Elke keer as ek by hierdie put kom, loop ek weer met ‘n vol emmer weg,’ in plaas daarvan om te sê: ‘Ek kan nie glo ek moet elke dag na hierdie put toe terugkom om my emmer vol te maak nie!’
Jou houding het ‘n diepgaande invloed op jou benadering tot die lewe. Vra ‘n chirurg of ‘n pasiënt se houding saak maak wanneer hy of sy daardie persoon se lewe probeer red. Vra ‘n onderwyser of ‘n student se houding ‘n impak het op die toets wat hulle aflê. Jesus het gesê: ‘…Soos julle geglo het, sal dit vir julle gebeur’ (Matteus 9:29 NLV). Geloof put soos ‘n magneet krag uit God se mag uit.
Sielskos: Num 32:25-33:56; Matt 12:38-50; Ps 134; Spr 4:5-13
