2024-02-09
Psalm 126:2 NLV
Om van mislukking na sukses te beweeg, moet jy die volgende doen:
1) Leer om vir jouself te lag. Maak nie saak wat jy verloor of hoe dikwels jy verloor nie, jy moet nooit jou sin vir humor verloor nie. Wanneer jy jou foute te ernstig opneem, word alles ‘n lewe-of-dood kwessie. Die Psalmdigter het geskryf: ‘Toe die Here die bannelinge teruggebring het na Sion toe, was dit soos ‘n droom. Ons het gelag en van vreugde gesing. Die ander nasies het gesê: ‘Die Here het groot dinge vir hierdie mense gedoen.’ Die Here het groot dinge vir ons gedoen en ons is vol vreugde! Verander tog ons lot, Here, soos strome in die Suidland. Hulle wat met trane saai, sal met vreugde maai’ (verse 1-5 NLV).
Jy mag dalk nie in staat wees om oor jou foute te lag nie, maar jy kan leer om in hulle te lag. Tim Masters sê: ‘Mislukking is die produktiewe deel van sukses. Dit voorsien die pad waarlangs jy nie weer hoef te reis nie, die berg wat jy nie weer hoef uit te klim nie en die vallei wat jy nie weer hoef te deurkruis nie.’ Wanneer ons foute maak, mag dit dalk nie soos ‘Jesus se soen,’ die frase wat Moeder Teresa gebruik het vir die mislukkings wat ons na God toe dryf, voel nie. As ons egter die regte houding behou, kan dit ons lei na dit wat ons veronderstel is om te doen.
2) Leer uit jou foute uit. Die suksesvolle restaurateur Wolfgang Puck het gesê: ‘Ek het meer van die een restaurant wat nie gewerk het nie as van al die restaurante wat suksesvol was, geleer.’ Is dit nie gewoonlik hoe dit werk nie? Jy verloor nie – jy leer!
Sielskos: Num 30:1-32:24; Matt 12:22-37; Ps 125; Spr 4:3-4
2024-02-08
Psalm 3:3 NLV
‘n Christelike leier skryf: ‘Oliver Goldsmith was die seun van ‘n arm prediker in Ierland in die 1700’s. Hy was hy nie ‘n wonderlike student in sy kinderjare nie. Sy onderwyser het hom inderwaarheid ‘n ‘domkop’ genoem. Hy het ‘n universiteitsgraad behaal, maar het heel laaste in sy klas gestaan. Hy was onseker oor wat hy met sy lewe wou doen. Eers het hy probeer om ‘n prediker te wees, maar dit het hom nie gepas nie. Toe het hy die regte oorweeg, maar daarin misluk. Toe het hy op medies besluit, maar hy was ‘n onverskillige dokter en nie passievol oor sy beroep nie. Hy het verskeie poste net tydelik beklee.
Goldsmith het in armoede geleef, was dikwels siek en moes selfs sy klere verpand om kos te kan koop. Dit het gelyk of hy nooit sy weg sou vind nie. Toe het hy egter ‘n belangstelling en aanleg vir skryf en vertaling ontdek. Aanvanklik het hy as resensent en skrywer gewerk. Toe begin hy egter werke oor onderwerpe waarin hy belanggestel het, skryf. Hy het sy reputasie as romanskrywer met The Vicar of Wakefield, as digter met The Deserted Village, en as dramaturg met She Stoops to Conquer, verseker.’
Goldsmith se verhaal klink baie soos die Psalmdigter Dawid s’n – en dalk ook soos joune: ‘So baie sê: ‘God sal hom nooit red nie! Maar U, Here, is ‘n skild rondom my. U herstel my eer, U lig my kop weer op’ (verse 3-4 NLV). Jy mag dalk vandag soos ‘n mislukking voel, maar God sal jou ophef as jy na Hom toe draai en saam met sy plan vir jou lewe werk.
Sielskos: Num 27-29; Matt 12:15-21; Ps 67; Spr 4:1-2
2024-02-07
Spreuke 6:2 DB
‘n Gesiene psigiater het opgemerk dat vier van die hartseerste woorde in die menslike woordeskat die volgende is: ‘As ek maar net…’ Hy glo dat mense wat deur hulle mislukkings vasgevang word, hulle lewens bestee deur te sê: ‘As ek maar net harder probeer het… as ek maar net my kinders beter behandel het… as ek maar net die waarheid gepraat het… as ek maar net…’
Die manier om hierdie denkwyse te verander is om jou woordeskat te verander deur ‘as ek maar net’ met ‘volgende keer’ te vervang. ‘Volgende keer sal ek harder probeer… volgende keer sal ek my kinders beter behandel… volgende keer sal ek die waarheid praat.’
Die Bybel sê: ‘…Deur jou woorde en dade word jy gevang…’ Het jy al ooit ‘n dier in ‘n strik gesien wat sukkel om hulself te bevry? Jou woorde kan dit aan jou doen. Jou woorde affekteer nie net jou nie, maar ook ander mense. Miskien dink jy ons maak ‘n te groot kwessie hiervan. As dit die geval is, lees die volgende: ‘Vriendelike woorde bring lewe, bedrieglike woorde ontstel mense’ (Spreuke 15:4 NLV). ‘Die tong het mag oor dood en oor lewe. Hulle wat lief is om te praat, moet saamleef met die gevolge van hulle woorde’ (Spreuke 18:21 NLV). Jesus het gesê: ‘Dit verseker Ek julle, julle kan vir hierdie berg sê: ‘Mag God jou oplig en in die see gooi,’ en dit sal so gebeur. Al wat nodig is, is dat julle regtig sal glo en nie in julle harte twyfel nie’ (Markus 11:23 NLV).
Wat het hierdie Skrifgedeeltes in gemeen? Hulle bevestig dat ons woorde lewe (of dood) in alles inblaas! In plaas van nederlaagspraatjies, spreek dus oorwinning oor jou situasie. In plaas daarvan om oor mislukking te praat, begin om oor sukses te praat. God sal jou woorde eer!
Sielskos: Num 25-26; Matt 12:1-14; Ps 120; Spr 3:33-35
2024-02-06
Hebreërs 11:34 NLV
Die skrywer van Hebreërs het gesê: ‘…Dit sal veels te lank neem om nog te vertel van Gideon, Barak, Simson, Jefta, Dawid, Samuel en die profete… Hulle het krag in hulle swakheid ontvang, was magtig in die oorlog en het vreemde leërs op die vlug laat slaan’ (verse 32-34 NLV). Sommige van die grootste suksesverhale in die Skrif is oor mense wat met swakhede en karakterfoute gesukkel het. Hulle was vasgevang in oënskynlike mislukking en nederlaag, maar deur God se genade het hulle die struikelblokke teen hulle oorkom. Die oorheersende tema van die Bybel is opstanding – om weer op te staan! Hier is die vraag: As jy nie mislukking kan vermy nie en jy nie veronderstel is om dit te aanvaar nie, hoe moet jy dit dan hanteer?
Eerstens, verander jou houding. Die strokiesprentkarakter Homer Simpson het die houding van baie van ons opgesom toe hy gesê het: ‘Kinders, julle het jul bes probeer en liederlik gefaal. Die les is om nooit te probeer nie.’ Nodeloos om te sê is Homer ‘n klassieke onderpresteerder! Hy skerts in ‘n ander episode: ‘Om te probeer is die eerste stap tot mislukking.’ Homer probeer nooit, dus bly hy soos baie mense vasgevang waar hy is.
Die mense wat sukses in die lewe behaal het geloof en volharding. Hulle weier om tou op te gooi; hulle het besluit dat hulle nie gaan toelaat dat mislukking hulle oorwin nie. Let die woorde: ‘…Hulle het krag in hulle swakheid ontvang…,’ op. Jy mag dalk swak begin, maar deur God se genade kan jy sterk word. Jy kan uit die as van mislukkings opstaan, jou doelwitte bereik en die lewe leef wat God vir jou bedoel het. Hoe weet ons dit? Want God se Woord sê so!
Sielskos: Num 22-24; Matt 11:20-30; Ps 108; Spr 3:31-32
2024-02-05
Spreuke 18:24 NLV
Cicero het gesê: ‘Vriendskap verbeter geluk en verlig ellende deur die verdubbeling van ons vreugde en die verdeling van ons hartseer.’ Die feit is dat dit onmoontlik is om meer as ‘n paar nabye vriende te hê, omdat ware vriendskap tyd, aandag en toewyding verg. ‘Vriende kan mekaar verwoes. Daar kan ook ‘n vriend wees vir wie jy liewer is as vir jou eie broer’ (vers 24 NLV). Die kenmerke van ware vriendskap sluit die volgende in:
1) Vertroue. Ralph Waldo Emerson het geskryf: ‘Die heerlikheid van vriendskap is nie in die uitgestrekte hand, die vriendelike glimlag of die vreugde van geselskap nie; dit is die geestelike inspirasie wat ‘n mens kry wanneer hy ontdek dat iemand anders in hom glo en bereid is om hom te vertrou.’
2) Gee en ontvang. Soms sal een persoon die primêre gewer wees en soms die ander. Ware vriendskap is egter altyd tweesydig.
3) Gedeelde lewens. Helen Keller het gesê: ‘My vriende het die storie van my lewe gemaak. Op ‘n duisend maniere het hulle my beperkings in pragtige voorregte verander en my in staat gestel om rustig en gelukkig in die skaduwee wat deur my ontbering gegooi word, te loop.’
4) Wedersydse genot. In ‘n ware vriendskap bestee jy tyd saam, net vir die vreugde daarvan. Wat julle doen is nie noodwendig van belang nie. Ongelukkig laat die besige lewe ons vergeet watter vreugde dit kan wees.
5) Respek vir mekaar. Hoe bou mens respek? Deur nie toe te laat dat struikelblokke of omstandighede belangriker as die verhouding word nie. Wanneer julle onder druk verkeer, hou julle aan om mekaar met geduld en vriendelikheid te behandel. Wanneer die verhouding sukkel, werk daaraan om dit te behou.
Sielskos: Num 19-21;Matt 11:10-19; Ps 111; Spr 3:29-30
2024-02-04
Spreuke 8:11 NLV
Om aan te hou leer en groei, moet jy die volgende oplet: 1) Suksesvolle mense leer anders as onsuksesvolle mense. Josua het by Moses geleer. Timoteus het by Paulus geleer. Wie het jy gekies om by te leer? Sidney J. Harris het geskryf: “‘n Wenner weet hoeveel hy nog moet leer, selfs wanneer ander mense hom as ‘n kenner ag. ‘n Verloorder wil as ‘n kenner gesien word voordat hy genoeg geleer het om te weet hoe min hy in werklikheid weet.” Dit is alles ‘n kwessie van gesindheid. Dit is werklik merkwaardig hoeveel ‘n persoon moet leer voordat hy of sy besef hoe min hulle weet.
2) Niks is interessant as jy nie geïnteresseerd is nie. Philip B. Cosby skryf in Quality is Free: ‘Daar is ‘n teorie oor menslike gedrag wat sê dat mense hul eie intellektuele groei onbewustelik vertraag. Hulle maak staat op clichés en gewoontes. Sodra hulle die ouderdom bereik waar hulle gemaklik met die wêreld is, hou hulle op leer en begin hulle gedagtes stilstaan. Hulle mag dalk bevorder word, hulle kan ambisieus en gretig wees en hulle kan selfs dag en nag werk. Maar hulle leer nie meer nie.’
Die Bybel sê: ‘En so het Jesus grootgeword en in wysheid toegeneem…’ (Lukas 2:52 NLV). Hy het nie net fisies gegroei nie; Hy het geestelik, verstandelik en emosioneel gegroei. Dis ‘n tragedie as jy jouself in ‘n groef laat verval en nooit daaruit kom nie; jy loop die beste wat God het om te bied, mis. Daarenteen is onderrigbare mense heeltemal by die lewe betrokke. Hulle is entoesiasties oor dinge. Hulle stel daarin belang om te ontdek, te bespreek, toe te pas en te vergroot. Moet dus nooit ophou leer en groei nie!
Sielskos: Eks 20:12; Jer 35:1-19; Spr 1:8; Joh 19:25-26
