2019-04-22
Rigters 14:8 NLV
Een dag het Simson teen ‘n leeu te staan gekom en hom verslaan. Die Bybel sê: ‘Toe hy later weer… terugkom… het hy afgedraai om na die leeu se karkas te gaan kyk. ‘n Swerm bye was besig om in die geraamte heuning te maak. Hy het met sy hand van die heuning uitgehaal en langs die pad daaraan loop en eet…’ (verse 8-9 NLV). Daar is ‘n les hieruit te leer. Wanneer jy die tyd neem om te stop en te reflekteer, ontdek jy ‘heuning’ in jou ervarings wat jy kan eet om sterker en wyser te word. Wanneer jy reflekteer is jy in staat om dinge in perspektief te plaas; jy kry nuwe waardering vir dinge wat jy nie voorheen opgemerk het nie. Min van ons het ‘n duidelike perspektief in die hitte van die oomblik. Die meeste van ons wat ‘n traumatiese ervaring beleef het, vermy gewoonlik ten alle koste soortgelyke situasies. Dit kan ons met onopgeloste kwessies laat. Reflekterende denke stel jou in staat om afstand van die intense emosies van ‘n ervaring te kry en dit met vars oë te sien. Dis inderdaad die eerste stap om van ons emosionele bagasie ontslae te raak. President George Washington het opgemerk: ‘Ons moenie terugkyk nie, tensy ons dit doen om nuttige lesse uit foute uit die verlede te leer.’ Elkeen van ons is deur die ervarings in ons lewe – goed en sleg – gevorm. Die dinge wat ons weier om te hanteer, beheer ons dikwels op skadelike maniere. Wanneer ons dit egter in die lig uitbring en God vir die genade vra om hulle vas in die oë te kyk, verloor hulle hul mag oor ons.
Sielskos: Num 3:1-4:33; Mark 1:1-8; Ps 144:9-15; Spr 10:22-23
2019-04-21
Johannes 11:25 NLV
Hoekom is Christus se opstanding uniek? 1) Hy is die enigste een wat nie weer gesterf het nie. Al die ander wat in die Skrif uit die dood opgestaan het, het weer gesterf. Jesus was die wonderlike uitsondering. Uiteindelik het Hy ‘…’n priester geword omdat Hy nie kon sterf nie’ (Hebreërs 7:16 ABA). Sy getuienis staan sterk: ‘…Ek was dood en kyk, nou leef Ek vir altyd…’ (Openbaring 1:18 NVL) 2) Hy het opgevaar na die hemel om ons voor God te verteenwoordig. Jesus is ‘…priester vir ewig…’ (Hebreërs 7:17 NLV). Hy sit egter nie net en wag op sy wederkoms nie, Hy verteenwoordig ons voor God. ‘Christus het immers tot in die hemel self ingegaan om nou as ons voorspraak voor God te verskyn…’ (Hebreërs 9:24 NLV). Dit beteken dat geen beskuldiging teen ons staande kan bly nie. ‘Wie sal ons veroordeel? Christus Jesus is tog die Een wat vir ons gesterf het… wat op die ereplek langs God sit en wat daar vir ons pleit’ (Romeine 8:34 NLV). 3) Hy het die mag om jou weer lewendig te maak wanneer jy sterf. Jesus het sy dissipels met hierdie wonderbaarlike belofte getroos: ‘Nog net ‘n klein tydjie en die wêreld sien My nie meer nie, maar julle sien My nog omdat Ek lewe en julle sal lewe’ (Johannes 14:19 NLV). Hierdie belofte is ook op jou van toepassing! ‘Wat eerste gaan gebeur, is dat die Here self uit die hemel sal neerdaal en dat die dooies wat aan Christus behoort, sal opstaan… Daarna sal ons wat bly lewe het, saam met hulle op wolke die lug in weggevoer word om die Here te ontmoet en vir altyd by Hom te wees’ (1 Tessalonisense 4:16-17 NLV). Wat ‘n wonderlike dag sal dit nie wees nie!
Sielskos: 1 Kor 15; Luk 24:1-53
2019-04-20
Openbaring 1:18 NLV
Die feit dat Jesus uit die dood opgestaan het is nie wat Hom uniek maak nie. Die Bybel teken sewe ander opstandings aan. Jesus was nommer agt (die Bybelse nommer vir nuwe begin). In twee wonderbaarlike maniere was sy opstanding egter soos geen ander nie. 1) Sy opstanding was die enigste een wat vooraf voorspel is. Dawid het oor Jesus geprofeteer: ‘Want aan die doderyk sal U my nie prysgee, of toelaat dat u getroues in die graf ontbind nie’ (Psalm 16:10 NLV). Jesaja het vir Hom ‘n lewe na sy kruisiging voorspel ‘…Al het die Here sy lewe ‘n skuldoffer gemaak, sal hy ‘n groot nageslag kry en nog lank lewe…’ (Jesaja 53:10 NLV). Jesus het sy eie opstanding uit die dood voorspel. ‘Van toe af het Jesus dit vir sy dissipels begin duidelik maak dat God wil hê Hy moet na Jerusalem gaan… en doodgemaak word, maar God sal Hom op die derde dag weer lewendig maak’ (Matteus 16:21 NLV). 2) Jesus was ten volle in beheer van sy opstanding! Sy vyande het Hom as ‘n hulpelose slagoffer van hul vasbeslote pogings om Hom en sy missie uit te wis, gesien. Hulle was egter heeltemal verkeerd! Hy het gesê: ‘Niemand ontneem My my lewe nie, maar Ek offer dit uit My eie op. Ek het die volmag om dit op te offer en Ek het die volmag om dit weer op te neem…’ (Johannes 10:18 NLV). Al Rome se mag en die haat van sy Joodse vervolgers kon Jesus of sy saak nie tot niet maak nie. In sy dood en in sy opstanding, was Hy altyd in beheer. ‘…Sloop hierdie tempel [my liggaam] en in drie dae sal Ek dit weer oprig’ (Johannes 2:19 NLV). Hy het dit gedoen! Hy lewe vir ewig!
Sielskos: Num 1-2; Luk 23:50-56; Ps 144:1-8; Spr 10:19-21
2019-04-19
Johannes 19:30 NLV
Golgota was seëvierend! Nooit was moed groter of krag sterker nie. Toe Hy gesê het: ‘Dit is nou afgehandel’ (sommige vertalings lees ‘Dit is volbring’), het Hy nie bedoel dat Hy klaar of oorwonne was nie. Jesus is glad nie deur Golgota verpletter nie, Hy het op drie maniere geseëvier: 1) Hy het sy eie menslike begeerte om onbeskryflike lyding te vermy, oorkom: “Hy het… met sy gesig plat teen die grond gebid: ‘O my Vader! As dit moontlik is, neem tog hierdie lydensbeker van My weg. Doen nogtans nie soos Ék wil nie, maar soos Ú wil'” (Matteus 26:39 NLV). 2) Hy het die demoniese magte van die duisternis oorwin. ‘So het Hy die hemelse en aardse magte ontwapen. Hy het hulle in die openbaar bespotlik gemaak deur aan die kruis oor hulle te triomfeer’ (Kolossense 2:15 NLV). 3) Hy het die wet se hardkoppige eise teen sondaars oorwin. ‘Christus is immers die eindbestemming van die wet sodat elkeen wat in Hom glo, vrygespreek kan word’ (Romeine 10:4 NLV). By Golgota het liefde oor die wet geseëvier en ons wat nooit God se wet ten volle sou kon onderhou nie, is vrygemaak. ‘Dit is nou afgehandel!’ was die uitroep van ‘n oorwinnaar, nie van ‘n slagoffer nie! Dit het nie so vir die skare of sy geskokte en hartseer dissipels gelyk nie. Drie dae later het dit egter so gelyk toe die leë graf bewys het dat Jesus die dood oorwin het. Dit kom alles neer op die volgende: ‘Want as jy met jou mond bely dat Jesus die Here is en met jou hart glo dat God Hom uit die dood opgewek het, sal jy gered word’ (Romeine 10:9 NLV).
Sielskos: Gen 22:1-18; Luk 23:26-49; Ps 22; Jes 53
2019-04-18
Hebreërs 9:22 NLV
Derdens was Golgota noodsaaklik! Presies hoe noodsaaklik? So noodsaaklik soos lewe of dood, hoop of wanhoop, hemel of hel. Dis ons enigste manier om gered te word. ‘Daar is geen redding by iemand anders nie. Daar is geen ander naam op aarde wat mense kan aanroep om gered te word nie’ (Handelinge 4:12 NLV). Sonder Christus se dood, sou ons sondes ons vir ewig van God geskei het. As dit nie vir Jesus se dood was nie, sou ons aan die volle straf van God se wet onderworpe gewees het, skuldig aan elke sonde wat ons nog ooit gepleeg het en as veroordeelde sondaars, vir ewig verlore. Paulus skryf: ‘Ons weet dat die wet van toepassing is op almal wat onder die wet is. Daarom kan niemand van ons ons verweer nie en is die hele wêreld skuldig voor God’ (Romeine 3:19 NLV). Geen uitsonderings nie – die hele wêreld, insluitend jy, staan skuldig voor God se aangesig. Omdat Jesus egter aan elke vereiste van God se wet namens ons voldoen het, is ons vergewe en geregtig verklaar. Dis noodsaaklike inligting. Jy het net twee opsies wanneer dit by Jesus kom: aanvaar of verwerp Hom! Hy het gesê: ‘Elkeen wat glo en gedoop word, sal gered word. Maar elkeen wat nie glo nie, sal veroordeel word’ (Markus 16:16 NLV). ‘…wat moet ek dan met Jesus die ‘Messias’ doen?..’ (Matteus 27:22 NLV). Die antwoord is eenvoudig: Plaas jou vertroue in Hom en word gered.
Sielskos: Jak 3-5; Luk 23:13-25; Ps 7:10-17; Spr 10:17-18
2019-04-17
1 Petrus 2:24 NLV
Tweedens was Golgota plaasvervangend. As mens na die kruis deur die lens van sentimentaliteit of bygeloof kyk, mag dit dalk jou emosies affekteer, maar dit kan nie jou siel red nie. As dit egter as plaasvervangend gesien word, kan die kruis enige siel red! Die apostel Petrus skryf: ‘Hy het self ons sondes in sy liggaam weggedra kruis toe. Só is ons vry van die sonde. Nou kan ons lewe omdat God ons verhouding met Hom herstel het. Deur sý verwonding is julle genees!’ As Jesus die kruis geweier het, sou God ons vir ons sondes tot die dood toe moes veroordeel. In plaas daarvan, as ons plaasvervanger, het Jesus ons verdiende straf op Homself geneem om ons vry te maak en vir ons die ewige lewe te gee. Plaasvervanging was histories God se idee om sy mense van die straf van hulle sondes te red. Toe Adam en Eva gesondig het, het God ‘n dier as plaasvervanger gebruik om hulle ongeregtigheid te bedek. Hy het Abel se offer van die ‘…eerstelinge van die seisoen…’ (Genesis 4:4 NLV), en Abraham se ram wat in ‘n bos vasgesit het in ruil vir Isak se lewe aanvaar (sien Genesis 22:13 NLV). Dit is vir eens en vir altyd sonder twyfel gedemonstreer toe Jesus Homself op Golgota opgeoffer het. God was ten volle tevrede met Christus se versoenende dood en het ons rekords geskrap en ons as onskuldig in sy aangesig verklaar! ‘God het Hom wat nie sonde geken het nie, sonde gemaak ter wille van ons sodat ons, op grond van ons eenheid met Christus, deur God vrygespreek kan word’ (2 Korintiërs 5:21 NLV). Alles wat Jesus gedoen het, van sy maagdelike geboorte, sondelose lewe, versoenende dood, wonderbaarlike opstanding, glorieryke opvaring en priesterlike bediening in die Hemel, het Hy as plaasvervanger en redder gedoen.
Sielskos: Jak 1-2; Luk 23:1-12; Ps 7:1-9; Spr 10:16
