2018-10-02
Eksodus 3:2 NLV
Moses het vir vier dekades lank in die woestyn geleef: Dis meer as 21 miljoen minute! Sy lewe is deur eentonigheid gedefinieer totdat hy ‘n ondervinding gehad het. Op ‘n dag wat presies soos die 4,600 dae vantevore begin het, het Moses ‘n brandende bos uit die hoek van sy oog opgemerk. Toe het hy ‘n stem uit die bos gehoor wat sy naam roep. Soms sal God jou verras! ‘n Brandende bos is amper so absurd soos ‘n pratende donkie. O wag, God het dit ook gedoen! Een van die inherente gevare daarin om vir ‘n lang ruk die pad met God te stap, is dat jy naderhand kan dink dat jy Hom uitgepluis het. Ons probeer Hom in ‘n boks sit, maar daar is geen boks groot genoeg wat Hom kan inperk nie. Hy sê: “‘My gedagtes is anders as julle s’n, en julle paaie is nie my paaie nie,’ sê die Here. ‘Want soos die hemel hoër is as die aarde, so is wat Ek doen, hoër as wat julle doen, en my gedagtes hoër as julle gedagtes'” (Jesaja 55:8-9 NLV). In plaas daarvan om doelloos deur die lewe te gaan en jou dae ineen te laat loop, het jy nodig om elke dag op te staan en te bid: ‘Vader, dankie vir hierdie nuwe dag. Gee my asseblief nuwe insigte in u Woord wat nuwe aspekte van u karakter openbaar, sodat ek u wil mag doen en U kan verheerlik.’ Word meer oplettend en bewustelik; moenie dit wat God vir jou het, misloop nie. Doen wat Moses gedoen het: “‘Dit is snaaks,’ het Moses vir homself gesê. ‘Hoekom brand die bos dan nie uit nie? Laat ek gaan kyk wat aangaan'” (Eksodus 3:3 NLV). Probeer vandag ‘sien’ wat God in jou lewe doen!
Sielskos: 1 Kor 7-9; Luk 24:1-12; Ps 91; Spr 25:9-12
2018-10-01
Johannes 8:31-32 NLV
Probeer jy ‘n slegte gewoonte afsweer? Jesus wil jou daarvan vrymaak. ‘…As julle in ‘n noue verbintenis aan my boodskap leef, is julle my egte navolgers; en julle sal begryp wat die waarheid beteken, en die waarheid sal julle vrymaak.’ Jy vra, ‘Wat is hierdie ‘waarheid’ wat my sal vrymaak?’ Jesus antwoord: ‘As [jy] in ‘n noue verbintenis aan my boodskap leef.’ Oorwinning word in jou gedagtes bewerkstellig en onderhou. Een dame het gegrap, ‘Dis maklik om op te hou rook; ek het dit al duisend keer gedoen.’ Op ‘n ernstiger noot, hoe kan jy ophou om na ou gewoontes terug te keer? Deur jou van hulle te bekeer, hulle te verwerp en die ou gedagtes wat jou na die gewoonte teruglei met nuwe gedagtes te vervang. Waar kom hierdie nuwe gedagtes vandaan? Jesus antwoord, ‘As jy in noue verbintenis aan my boodskap leef.’ Dit beteken dat jy moet wegbly van plekke wat verkeerde gedagtes kweek en wegbly van mense wat verkeerde gedagtes aanmoedig. Dit mag dalk beteken dat jy dit wat jy op televisie kyk moet verander. Jy sal agterkom dat voordat jy voor ‘n slegte gewoonte swig, jy die gedagtes dink wat daartoe lei. Die Bybel sê, ‘Moenie julle leefstyl aanpas by die gedragspatrone van hierdie wêreld nie, maar laat God julle omvorm deurdat Hy julle denkpatrone vernuwe…’ (Romeine 12:2 NLV). In die vroeë stadiums van herstel van enige verslawing is dit krities om jou gedagtes daagliks met die Skrif te versadig, te bid en gewillig te wees om uit te reik na ‘n vriend se ondersteuning (sien Prediker 4:9-10). Sal jy soms op die pad na sukses misluk? Ja. Oorwinning begin egter wanneer jy besluit om vry te wees en glo dat God jou sal vrymaak.
Sielskos: 1 Kor 4-6; Luk 23:44-56; Ps 13; Spr 25:4-8
2018-09-30
Jakobus 1:14 NLV
Jakobus skryf: ‘Wanneer iemand iets verkeerds wil doen, moet hy nie sê: ‘God verlei my’ nie. Ons weet mos God kan nie verlei word om verkeerd te doen nie, en Hý verlei ook niemand nie. Ons eie sondige begeertes beproef ons, sleep ons saam en verlei ons. As ons sondige begeertes eers bevrug geraak het… gee dit geboorte aan die dood. Moet dus nie mislei word nie, my geliefde broers en susters’ (verse 13-16 NLV). Wanneer jy aanhou sondig en jou waardes skend, kan jy ‘n plek bereik waar dit moeilik is om gemaklik in jou eie vel te wees. Enige aptyt wat te veel gevoed word, kan vinnig ‘n verslawing word. Jy vind dat dit wat jy gister wou gehad het, jy vandag nodig het. Voor jy jou oë uitvee, gee jy jouself oor aan die dinge wat jou lewe beheer omdat dit die enigste manier is wat jy tydelike ontvlugting kan kry. Stop en vra jouself af: 1) ‘Wat is my lewe se doel?’ Wat van die persoon wie God jou geroep het om te wees? Om die vreugde van ander mense te sien, is ‘n konstante herinnering aan die vreugde wat jy misloop. 2) ‘Wat gebeur as moeilikheid my lewe of my familie tref?’ In sulke oomblikke wonder jy, ‘Is ek die oorsaak hiervan?’ ‘n Duisend stemme kan vir jou sê dat dit nie jou skuld is nie, maar diep binne-in is jy nooit heeltemal seker nie. Die enigste manier om ware vrede te vind is om dinge met God reg te maak. Hier is sy aanbod: ‘Vra na die Here terwyl jy Hom nog kan vind. Roep Hom nou aan terwyl Hy nog naby is. Die goddelose mens moet sy verkeerde dinge los… Hy moet terugdraai na die Here en Hy sal hom genadig wees…’ (Jesaja 55:6-7 NLV).
Sielskos: Heb 11:7; Gen 6:9-22; Gen 8:18-22; Matt 24:36
2018-09-29
Eksodus 3:4 NLV
Moses het al die potensiaal in die wêreld op veertig gehad, maar soos ‘n verlore saak op tagtig gevoel. In plaas daarvan om God se wil op God se manier te doen, het hy probeer om God se wil te bespoedig en dit vir vier dekades vertraag! Op ‘n punt in ons lewe voel die meeste van ons dat die lewe ons verbygegaan het. Ons droom lyk soos ‘n verlore saak. Hierdie krisis bied ons ‘n keuse: Gooi handoek in, of gooi ons hoed terug in die ring in. Baie van ons gee op ons drome op omdat ons voel dat God op ons opgegee het. Ons dien egter ‘n God van restorasie (sien Joël 2:25). Moses se lewe is ‘n bewys dat dit nie saak maak hoeveel verkeerde draaie ons maak nie, dit is God se genade wat ons terug op die paraderoete kry. Moses het gedink dat sy verlede hom gediskwalifiseer het, maar God het dit gebruik om hom vir sy doelwit voor te berei. Niemand het die paleis se protokol so goed soos die prins van Egipte geken nie. Hy het immers daar grootgeword. Nadat hy vir veertig jaar skape opgepas het, het hy die wildernis geken – die wildslewe, die watergate, die weerpatrone. Moses het verkeerd opgetree voor hy begin reg optree het en dit mag dalk die geval met jou ook wees. Hier is egter die goeie nuus: God kan jou mislukkings in die verlede gebruik om jou karakter te bou en jou met die krag en wysheid toe te rus wat jy nodig het om jou doel hier op aarde te vervul. Dis wonderlik wat God met ‘n gebroke lewe kan doen wanneer jy vir Hom al die stukke gee.
Sielskos: 1 Kor 1-3; Luk 23:35-43; Ps 54; Spr 25:1-3
2018-09-28
Lukas 6:38 NLV
Baie van ons wil vir mense wie ons liefhet en sake waarin ons glo, gee. Vrees weerhou ons egter daarvan om dit te doen. Ons is bang dat as ons dit doen, ons dalk nie genoeg vir onsself sal oorhê nie. In plaas van om te saai, gaar ons dus ons saad op en loop die oes wat God ons beloof het mis. Hoekom? Omdat ons op ‘n sekere vlak wonder of God regtig iemand soos ons sal seën. Jesus het gesê, ‘As julle gee, sal julle ontvang. Julle gawe sal na julle terugkom in volle maat, ingestamp, geskud om plek vir meer te maak, tot oorlopens toe vol…’ As ‘n bank sulke rente op jou belegging belowe het, sou jy nie vinnig genoeg daar kon uitkom nie! Banke misluk egter en bankiers kan nie altyd vertrou word nie, maar God het nog nooit ‘n belofte verbreek nie! Hier is ‘n belangrike Skriftuurlike waarheid: Wanneer jy jou hand vir God oopmaak, maak Hy sy hand vir jou oop. God se hand is groter as joune! Net soos wat jy moet leer om te gee, moet jy ook leer om te ontvang. Wanneer God aan jou teruggee, doen Hy dit dikwels deur ander mense. Moenie dat trots en vooroordeling jou keer om van ander mense te ontvang nie, omdat God hulle ‘n oes wil gee op die sade wat hulle in jou lewe saai. Moet nooit huiwer om vir ‘n opregte dienaar van God te gee nie. ‘…Glo in die Here, en julle sal vas staan. Glo in die profete, en julle sal suksesvol wees’ (2 Kronieke 20:20 NLV). Wanneer God jou aanmoedig om ‘n saad te saai, is dit omdat Hy ‘n oes vir jou in gedagte het. Moenie dit misloop nie!
Sielskos: Sag 12-14; Luk 23:26-34; Ps 52; Spr 24:32-34
2018-09-27
1 Johannes 5:4 NLV
Die Bybel sê: ‘…elkeen wat God as Vader het, oorwin die wêreld. Die oorwinning wat die wêreld verower het, is ons geloof.’ Om oorwinnend te lewe, moet jy die volgende drie dinge doen: 1) Beperk die Duiwel daarvan om in jou lewe te beweeg. Jesus het gesê: ‘Dít verseker Ek julle: Watter dinge julle ook al op aarde bind, sal in die hemel gebind wees. En watter dinge julle ook op die aarde losmaak, sal in die hemel losgemaak wees. Boonop verseker Ek julle: As twee van julle hier op aarde saamstem oor enigiets wat julle van God wil vra, sal my hemelse Vader dit vir julle doen. Waar twee of drie bymekaar is, is Ek immers ook saam met hulle daar’ (Matteus 18:18-20 NLV). Satan wil nie hê dat jy moet weet dat jy God-gegewe mag het om sy bewegings in jou lewe te beperk nie, maar jy het. Gebruik dit! 2) Durf om te glo en uit te reik na dit wat God aan jou beloof het. Paulus sê, ‘…wie ruimhartig saai, sal volop oes’ (2 Korintiërs 9:6 NLV). ‘n Saadjie is enigiets wat jy vir ‘n gewenste resultaat plant en ‘n oes is enigiets wat jy besluit om van God af te ontvang. Beide vereis ‘n daad van geloof. Nie net is God jou bron van voorsiening nie, Hy is ook onbeperk, onpartydig en vrygewig. 3) Maak die dromer in jou wakker. Die Bybel sê, ‘…Julle oumense sal drome droom. Jongmense sal visioene sien. In dié tyd sal Ek my Gees selfs op slawe en slavinne uitstort’ (Joël 2:28-29 NLV). Jou seisoen in die lewe is geen probleem vir God nie. Vra Hom net om jou geloof weer aan die brand te blaas en jou visie te herfokus. Kies om oorwinnend te lewe!
Sielskos: Sag 9-11; Luk 23:13-25; Ps 34; Spr 24:29-31
