2020-10-08
1 Tessalonisense 5:16 NLV
Het jy al ooit jouself gevang waar jy vra: ‘Hoekom ek, Here? Hoekom antwoord U nie my gebede nie? Hoekom werk u Woord nie vir my soos dit vir ander mense werk nie?’
Vriende wat goed bedoel, sê vir jou om jou kop op te tel, dinge sal beter raak, maar jy kan nie lig aan die einde van die tonnel sien nie. Net wanneer jy dink dat dinge nie erger kan raak nie, tel jy jou Bybel op en lees: ‘Wees altyd vol blydskap… Wees in alle omstandighede dankbaar…’ (verse 16-18 NLV), asof jy veronderstel is om jou situasie te geniet!
Alexander MacLaren het gesê: ‘Probeer om ‘n lewendige, vreugdevolle sin van die oormatige goedheid van God in jou daaglikse lewe te ontwikkel.’ Wanneer die lewe jou oorweldig is die laaste ding wat jy wil doen om dankbaarheid te betuig, nie waar nie?
Soos Nancy Leigh DeMoss egter opmerk: ‘Tensy jy mal is oor die gevoel wanneer verantwoordelikhede jou drie uur in die oggend wakker maak, of jou planne vir jou af dag fnuik, of vir jou ‘n onverwagte rekening gee wat nie in jou begroting was nie, moet jy nie probeer om die Christelike lewe sonder dankbaarheid te leef nie. Deur brute wilskrag en inspanning mag jy dalk die regte resultate kry, maar jou geestelike lewe sal hol, skerp en onaanloklik wees. Ware Christelik-gesentreerde, genade-gemotiveerde dankbaarheid pas by die lewe se desperaatste oomblikke en moeilikste situasies. Wanneer daar geen antwoorde is nie, gee dit hoop. Dit transformeer oorweldigde sukkelaars in triomfantlike oorwinnaars. Dankbaarheid is ‘n Bybelse leefstyl wat deur genade deurtrek is en die transformerende krag daarvan word vir diegene wat die Gewer van elke goeie gawe ken en erken; en wat ontvangers van sy reddende genade is, gereserveer.’
Sielskos: 1 Sam 24-26; Joh 1:29-42; Ps 131; Spr 23:1-3
2020-10-07
1 Tessalonisense 5:18 NLV
Deur dankbaarheid te betuig, vul jy jou lewe met vreugde en veerkragtigheid. Die Britse teoloog, John Henry Jowett, het gesê: ‘Elke deug wat van dankbaarheid geskei word, word vermink en loop mank op die geestelike pad.’
Sonder dankbaarheid, word jou geloof ‘n hol godsdienstige praktyk, jou liefde vir ander verdwyn, jy voel van vreugde gedreineer en jy begin soos ‘n martelaar optree. Wanneer Paulus sê: ‘Wees in alle omstandighede dankbaar, want dit is wat God van julle as Christene verwag,’ bedoel hy nie dat elke omstandigheid wat jy teëkom noodwendig God se wil is nie.
Pastoor Jack Hayford merk op: ‘In elke versekeringskontrak is daar die voorwaarde: ‘Tensy dit ‘n daad van God is.’ Kultureel gesproke word dit as die ergste ding wat kan gebeur, gedefinieer. Ek het al gehoor dat mense dit as volg interpreteer: ‘Wel, wat ook al gebeur is die wil van God. Wees dankbaar en loof God.’ Die Bybel sê nie dat alles Goddelik ontwerp is nie, dit sê dat God in dit, deur dit en verder as dit goeie werk kan vermag. ‘Die wil van God in Christus’ is dat ons dankie sê en God te midde daarvan loof. Hoekom sal ons dit doen? Omdat ons goed voel? Nee, ons doen dit omdat aanhoudende gebed ‘n lied van geloof in die situasie vrystel. Om deur dit te worstel en af en toe te bid gaan nie goed genoeg wees nie. Hy kan egter die beste van enige situasie maak, en dis hoekom die Bybel sê dat ons in alle omstandighede dankbaar moet wees.’
In enige omstandighede, kan jy kies om te kla of om God te loof – en jy kan nie God loof sonder om dankbaarheid te betuig nie!
Sielskos: 1 Sam 20:30-23:29; Joh 1:14-28; Ps 29; Spr 22:26-29
2020-10-06
Prediker 11:4 NLV
Moet jy die risiko neem om geld te belê, of moet jy vir ‘n gelukskoot wag wat jou oornag ryk sal maak? Salomo antwoord: ‘Gooi jou brood op die water, want na ‘n lang tyd kry jy dit terug’ (vers 1 NLV).
Dit beteken dat jy met gebed en wysheid beleggings moet maak en geduldig moet wees, want dit mag dalk ‘n ‘lang tyd’ neem voordat jy dividende daaruit sal ontvang. Die word-vinnig-ryk mentaliteit is nie Skriftuurlik nie. ‘Sit jou besittings op sewe of agt plekke. Jy weet immers nie watter rampe die land kan tref nie’ (vers 2 NLV).
Belê dus, diversifiseer en laat ruimte vir markwisselings toe. Jy moet wys speel, nie veilig speel nie. Word deur geloof, nie deur vrees nie, aangedryf. Goddelike wysheid, asook geloof, is die sleutel tot beleggings. Om vir die ‘ideale tyd’ te wag, sal jou verlam. Sukses is nie die afwesigheid van uitdagings nie, dis die wysheid om hulle te bestuur en aan te hou vorentoe beweeg.
Die Bybel sê: ‘As jy heeldag na die wind kyk, sal jy nie saai nie. En as jy na die wolke kyk, sal jy nooit oes nie.’ Die lewe is vol van die onbekende, en net so min as wat jy ‘…die pad van die wind ken, of weet hoe die liggaam lyk in die skoot van ‘n swanger vrou, net so min verstaan jy die werk van God…’ (vers 5 NLV).
Jy hoef nie alles te weet of in staat te wees om die uitkoms te voorspel nie. Vra net na God en tree volgens die wysheid wat Hy vir jou gee, op (sien Jakobus 1:5). Jy hoef nie te verstaan hoe Hy om jou onthalwe te werk gaan nie – jy moet net glo dat Hy sal!
Sielskos: 1 Sam 18:1-20:29; Joh 1:1-13; Ps 92; Spr 22:24-25
2020-10-05
Filippense 2:16 NLV
Jy moet korttermyn bevrediging met langtermyn vervulling vervang. Paulus som sy lewe en bediening in hierdie vers op: ‘…sal ek tevrede wees dat ek nie verniet gejaag en geswoeg het nie.’
Niks in die lewe is belangriker as die keuses wat jy maak nie. Die Bybel sê: ‘…Lot [het] sy tente tussen die stede in die vallei opgeslaan tot by Sodom (Genesis 13:12 NLV), en vir ‘n ruk het dit met Lot goed gegaan. Aan die einde het alles waarvoor hy gewerk het, egter in rook opgegaan. Ons lees volgende: ‘Nadat Lot vertrek het, sê die Here vir Abram: ‘Kyk bietjie rond in alle rigtings, so ver as wat jy kan sien. Hierdie land gaan Ek vir jou en jou nageslag as permanente eiendom gee’ (verse 14-15 NLV). Lot het die verkeerde rigting gekies en verloor. Abraham het die regte rigting gekies en gewen.
Keuses! Wanneer dit by keuses kom, moet jy dit ‘n gewoonte maak om jouself af te vra: ‘Hoe sal hierdie keuse my karakter, my selfrespek en my vrymoedigheid waarmee ek God nader, beïnvloed? Hoe sal dit my invloed en respek by ander mense affekteer? Hoe sal dit my familie en diegene wat in my voetstappe volg, affekteer?’
Die Bybel gee vir ons die antwoord: ‘Met so ‘n magtige skare toeskouers rondom ons om ons in die wedloop van die geloof dop te hou – kom ons stroop alles af wat ons spoed kan vertraag, veral die sonde wat so maklik ‘n houvas op mens kry. Kom ons hardloop met volharding op die baan wat voor ons uitgestrek lê, ons oë vasgenael op Jesus, die Een op wie ons geloof vanaf die wegspring tot by die eindstreep steun…’ (Hebreërs 12:1-2 NLV).
Sielskos: 1 Sam 16-17; Luk 24:45-53; Ps 63; Spr 22:17-23
2020-10-04
Hebreërs 12:1 NLV
Hier is nog twee dinge wat jy moet weet:
1) Die verkeerde mense sal jou seermaak. Daar is ‘n paar tipes mense waardeur jy nooit beïnvloed moet word nie: mense wat altyd jou hulp en aandag nodig het, negatiewe mense, bitsige mense, dreinerende mense, twyfelende mense en mense wat jou aandag aftrek. Wees lief vir hulle en help hulle op enige manier wat jy kan, maar moet nooit deur hulle beïnvloed of gelei word nie. Moedig hulle aan, maar wanneer hulle begin om jou af te trek eerder as om jou op te hef, moet jy jouself van hulle losmaak en hulle aan God oorgee.
2) Die regte mense sal jou help. Wanneer God ‘n taak het wat gedoen moet word, roep Hy ‘n man of ‘n vrou om dit te doen. Hy roep hulle egter selde alleen. Hy roep ander om hulle by te staan en hulle te ondersteun. Dit beteken dat jou gewilligheid om na hulp uit te reik nie ‘n teken van swakheid is nie, maar van krag. Paulus het ‘n hele hoofstuk in die Nuwe Testament gebruik om erkenning te gee aan die mense wat hom gehelp het om sy visie te vervul. Hy het die volgende vir die mense in Filippi gesê: ‘Elke keer as ek aan julle dink, dank ek God. Ek bid altyd in al my gebede met blydskap vir julle almal omdat julle, van die eerste dag wat julle die Goeie Nuus gehoor het, tot vandag toe saamgewerk het om dit verder uit te dra’ (Filippense 1:3-5 NLV).
As jy wys is, sal jy die dinge wat God jou nie gegee het nie erken, dit aan gekwalifiseerde mense delegeer en met jou kernsterkpunte werk. Dit verg nederigheid van jou, maar in die langtermyn betaal dit goeie dividende!
Sielskos: Est 4:9-5:3; Heb 4:7-16
2020-10-03
Galasiërs 5:7 NLV
Jy moet verantwoordelikheid vir jou eie lewe neem, eerder as om ander daarvoor te blameer.
Toe God in die tuin van Eden vir Adam gevra het hoekom hy van die boom geëet het, het hy sy vrou blameer: ‘…maar dit was die vrou wat U my gegee het… wat die vrugte vir my aangebied het, en toe het ek daarvan geëet’ (Genesis 3:12 NLV). Ons lees verder: ‘Daarop vra die Here God vir die vrou: ‘Hoe kon jy so ‘n ding doen?’ ‘Die slang het my bedrieg,’ antwoord sy…’ (vers 13 NLV). Eva het die duiwel blameer.
Het God hulle verskonings aanvaar? Nee. Hy het vir Adam gesê: ‘…Jy het jou deur jou vrou laat ompraat en van die vrugte geëet wat Ek jou verbied het om te doen. Daarom vervloek Ek die grond. Jou hele lewe lank sal jy met droefheid sukkel om ‘n bestaan daaruit te maak. Dit sal vir jou dorings en dissels oplewer…’ (verse 17-18 NLV). Toe het God vir Eva gesê: ‘…Ek sal jou droefheid vermeerder: met pyn en lyding sal jy kinders in die wêreld bring. Jou begeerte sal na jou man wees, maar hy sal oor jou heers’ (vers 16 NLV). Toe hierdie woorde gespreek is, is Adam en Eva uit die Paradys verban.
‘Hoekom het God kwaad geword vir Adam en Eva, as Hy alwetend is?’ vra jy. Omdat nie een van die twee verantwoordelikheid vir hulle aksies wou neem nie! Wanneer jy sondig, sal God jou vergewe (sien Nehemia 9:17). Wat Hy egter nie sal aanvaar nie, is verduistering, rasionalisering, regverdiging, verskonings en blaam. Sy Woord sê: ‘Wie sy oortredings verswyg, sal nie voorspoedig wees nie. Wie sy sonde bely en daarvan afsien, sal genade ontvang’ (Spreuke 28:13 NLV).
As jy dus vorentoe wil beweeg, moet jy verantwoordelikheid vir jou lewe neem!
Sielskos: 1 Sam 14-15; Luk 24:36-44; Ps 51; Spr 22:12-16
