2021-06-18
2 Petrus 3:13 NLV
Wat van lyding – bewys dit nie dat daar nie ‘n liefdevolle God is nie? Adam is ‘n keuse gegee: om God te gehoorsaam, of om aan Hom ongehoorsaam te wees. Hy het ongehoorsaamheid gekies en God het gesê: ‘…Daarom vervloek ek die grond. Jou hele lewe lank sal jy met droefheid sukkel om ‘n bestaan daaruit te maak’ (Genesis 3:17 NLV). Dink hoe baie mense aan kanker, Alzheimer se siekte, veelvuldige sklerose, hartsiektes, emfiseem, Parkinson se siekte en ander aftakelende siektes ly. Hartseer genoeg, gebruik baie van ons lyding as ‘n verskoning om enige idee oor God te verwerp, terwyl die bestaan daarvan die presiese rede is hoekom ons in Hom moet glo.
In die begin het God perfekte mense geskape en hulle het in ‘n perfekte wêreld sonder lyding gelewe – dit was hemel op aarde. Toe sonde egter in die wêreld gekom het, het dit die dood en ellende meegebring. Wat is dus die antwoord? ‘Maar ons sien uit na die nuwe hemele en ‘n nuwe aarde, soos God belowe het. Dáár sal almal voor God reg lewe. Daarom, geliefdes, terwyl julle wag… Lewe in vrede met God’ (2 Petrus 3:13-14 NLV).
Lyding het sy hoogtepunt bereik toe Jesus aan die kruis gesê het: ‘Dit is volbring.’ Dit beteken dat dit ten volle betaal is. Dit beteken dat wanneer jy Jesus as jou Redder aanvaar, sal jy hemel toe gaan wanneer jy sterf en in ‘n glorieryke wêreld lewe wat sonder sonde en lyding nuut gemaak is. ‘…Wat geen oog gesien het; wat geen oor gehoor het; wat in niemand se hart opgekom het nie – dit het God voorberei vir hulle wat Hom liefhet’ (1 Korintiërs 2:9 NLV). As jy nie seker is dat dit waar is nie, plaas vandag jou vertroue in Jesus.
Sielskos: Hosea 6-10; Luk 1:39-56; Ps 139:7-12; Spr 13:24
2021-06-17
Genesis 1:26 NLV
Tydens die skepping het God iets interessants oor ons gesê: ‘Laat hulle soos konings heers.’ Met ander woorde, Hy het volle outoriteit in jou geplaas om jou lewe te beheer. Jy dien as sy agent hier op aarde om seker te maak dat sy wil gedoen word. Wees egter versigtig. Satan sal probeer dat jy jou heerskappy aan hom oorgee, of jou mislei om te glo dat jy geen mag het nie en dat hy al die mag het. Hy sal jou ook moontlik probeer oortuig om jou lewe volgens jou eie verwronge oordele en sieninge te regeer.
Eers wanneer jy met wysheid volgens die voorskrifte van God se Woord regeer, sal jy ‘n volkome en volledige besef van sy ontwerp vir jou lewe kry. God heers oor alles, maar Hy het vir jou heerskappy in jou invloedsfeer gegee. ‘Die hemele behoort aan die Here, maar die aarde het Hy vir die mensdom gegee’ (Psalm 115:16 NLV). God bemagtig jou om die regte keuses en besluite te maak en pas sy reaksie by jou aksies aan. Soms sit en wag ons vir God om op te tree, terwyl Hy vir ons wag om ‘n skuif te maak.
Een pastoor skryf dat God: ‘…’n basis van soewereine grense handhaaf; ‘n sfeer wat Hy nie mense sal toelaat om te oortree nie, maar terselftertyd ‘n veld oopmaak waar ons kan regeer en waar Hy dan dienoorkomstig kan reageer.’ As jy byvoorbeeld volop wil oes, moet jy volop saai. As jy vergewe wil word, moet jy ander vergewe. As jy saam met Hom in sy seën wil stap, moet jy gehoorsaam wees. Jy is geroepe om deur Jesus Christus ‘…koninklik oor die sonde en die dood [te] triomfeer’ (Romeine 5:17 NLV).
Sielskos: Hosea 1-5; Luk 1:26-38; Ps 139:1-6; Spr 13:21-23
2021-06-16
Filippense 4:6 NLV
As jou emosies nog steeds in ‘n warboel is nadat jy daaroor gebid het – bid nog. Deur die dissipline van gereelde gebed te kultiveer, sal jy die vermoë om kalm en stil te bly, ontdek. Soos jy op die Here wag, sal jy verligting van vrees se greep op jou gees kry. Jy mag dalk in die versoeking kom om te dink dat jou gebed oneffektief was, of dat jy misluk het omdat jou angstigheid teruggekeer het. Sien aanhoudende angs as ‘n teken dat jy meer tyd met God moet deurbring; om die details van jou probleem te hersien, Hom te vertel hoe baie dit jou pla en soms om selfs te erken dat jy bang is dat Hy dit nie gou genoeg sal hanteer nie.
Wanneer jy jou bekommer, kies jy om oor ‘n probleem te wroeg, eerder as om dit heeltemal aan God oor te gee. As jy dus geneig is om jouself baie te bekommer, moet jy baie bid. Bid die volgende: ‘Here, hierdie is u probleem om reg te stel. Neem asseblief beheer. Laat my weet wat U wil hê ek moet doen as ek by die oplossing betrokke moet wees. Ek sien dit egter as opgelos wanneer ek dit aan U oorlaat.’
Jy het die probleem opgelos deur dit aan God oor te gee en jou verantwoordelikheid is nou om op sy leiding te wag. Wanneer Hy wil hê dat jy moet optree, sal Hy dit vir jou duidelik maak. Soos jy op Hom wag, sal Hy jou gedagtes op die volgende stap wat jy moet neem, rig. As daar niks is wat Hy jou lei om te doen nie, doen dan niks. Hy sal dit verder van daar af neem.
Sielskos: 2 Kon 24-25; Luk 1:11-25; Ps 73:17-28; Spr 13:20
2021-06-15
Matteus 6:7 NLV
Jesus het geweet van ons neiging om dinge onnodig te kompliseer en het gesê: ‘Wanneer julle dan bid, moenie met woorde mors… nie… julle Vader weet presies wat julle behoeftes is, selfs nog voordat julle Hom vra!’ (verse 7-8 NLV). Jesus leer ons hier dat gebed nie lank, luid of moeisaam hoef te wees nie. Hy nooi jou ook uit om ‘n Skriftuurlike belofte te soek wat met jou behoefte ooreenstem en dan daarop te staan.
Charles Swindoll, wat sy tyd in die kar gebruik het om te bid, skryf die volgende: ‘Ek praat dikwels hardop met God. Soms sing ek vir Hom. Met tye is my hele gebed in my gedagtes. Elke keer wat ek myself aan gebed oorgee, kom ek agter dat God my fokus word, eerder as een van my persoonlike probleme. My bekommernisse smelt weg. Ek is in staat om enigiets wat my bekommer te laat gaan, sodat ek heeltemal verlore in sy teenwoordigheid en die vreugde van bediening kan word. Wanneer ek by my bestemming arriveer, is ek opgewonde om God se wil te doen. Ek voel verkwik, verlig en gereed. My gedagtes is gefokus. My hart is voorbereid. My emosies is helder en wat my ookal gepla het terwyl ek bestuur het, pla my nie meer nie. Gebed het dit moontlik gemaak. Ek wens ek kon sê dat ek elke rit, elke dag gebruik om in gebed te deur te bring. Soos baie mense, vergeet ek egter dikwels. My gedagtes sal van een probleem na die volgende spring en eerder as om te bid, broei ek daaroor. Met tye sal ek so angstig wees dat dit nie by my opkom dat ek eerder myself moet ophou bekommer en begin bid nie.’
Gebed: maak dit eenvoudig en gereeld.
Sielskos: 2 Kon 21-23; Luk 1:1-10; Ps 73:1-16; Spr 13:17-19
2021-06-14
1 Timoteus 2:1 NLV
Gebed is eenvoudig kommunikasie met God. Kommunikasie kan gesproke of stil wees. Dit kan selfs in ‘n liedjie uitgedruk word. Baie van die Psalms is net gebede wat getoonset is. Gebed gaan daaroor om met God te skakel. Of dit nou die belydenis van sonde, lofprysing van sy Naam, om sy wil te vra, om vir ‘n vriend in te tree of om jou eie behoeftes te kommunikeer is, moet jou gebede Godgesentreerd en nooit selfgesentreerd wees nie. Dus moet jy genoeg tyd toelaat om te luister en aandagtig voor jou hemelse Vader te wag.
Gebed moet ook jou eerste prioriteit wees. Paulus het vir Timoteus opdrag gegee: ‘Eerstens spoor ek jou aan om vir alle mense te bid. Terwyl jy jou versoeke rig, smeek God se onverdiende goedheid daaroor af en dank Hom’ (vers 1 NLV). Let die woord ‘Eerstens’ op. Voor jy uit die bed klim, voor jy gaan stort, voor jy werk toe gaan, voor jou eerste afspraak: bid, bid, bid!
Elke middag om drieuur het Petrus en Johannes na die tempel toe gegaan om te bid. Hulle het hulle skedule in die middel van die dag vir een doelwit onderbreek: gebed. Wanneer jou dag dus op sy eie pas verbygaan en in sy eie rigting beweeg, onderbreek dit met gebed. Soos jou dag na ‘n krisis toe opbou, stop opsetlik om te bid. Wanneer jou oggend begin verkeerd loop, onttrek jouself vir ‘n paar oomblikke van stilte om God se wil te soek en Hom vir sy instruksies te vra. Wanneer jou houding begin suur word, neem ‘n oomblik om jou houding deur gebed te verander. Moenie wag nie – bid onmiddellik.
Maak gebed jou eerste prioriteit in alle dinge en ten alle tye. As jy dit doen, sal jy uitvind dat gebed jou lewe ten goede verander.
Sielskos: 2 Kon 18:17-20:21; Mark 16:1-20; Ps 80:12-19; Spr 13:13-16
2021-06-13
Galasiërs 5:17 NLV
Die Bybel sê: ‘…Laat julle leefstyl eerder deur die Gees bepaal word. Dan sal julle glad nie aan die begeertes van julle sondige geaardheid toegee nie. ‘n Mens se sondige geaardheid wil dinge doen wat teen die Gees is, en die Gees wil dinge doen wat teen jou sondige geaardheid is, want hulle is mekaar se vyande’ (vers 17 NLV). Klink dit bekend? Hier is vier maniere om die daaglikse stryd tussen jou ou en nuwe geaardheid te oorwin.
1) Wees eerlik. Erken dat jou vlees altyd na bevrediging in die verkeerde dinge sal smag.
2) Wees nederig. Erken dat jy magteloos is om die stryd sonder God se hulp te wen. Deur jouself aan God oor te gee, ontvang jy sy krag in daardie eerste deurslaggewende oomblikke van elke toets. Hoe nader jy aan God beweeg, hoe sterker sal jy word wanneer jy voor versoeking en moeilikheid te staan kom.
3) Wees gedissiplineerd. Dit is ‘n persoonlike kwessie; niemand anders kan dit vir jou doen nie. Paulus skryf: ‘Julle moenie langer toelaat dat sonde julle aardse lewe beheer nie; moenie toegee aan sy verleidelike begeertes nie’ (Romeine 6:12 NLV). As iemand anders jou daarvan moet weerhou, werk dit nie!
4) Wees waaksaam. As soldaat moes Dawid van beter geweet het, maar Satan het hom onkant gevang toe sy weerstand swak was. Gevolglik het hy owerspel met Batseba gepleeg en haar man laat vermoor in ‘n poging om sy sonde weg te steek.
Miskien dink jy dat dit nie met jou kan gebeur nie. Paulus, een van die grootste apostels, het geskryf: ‘Ek brei my liggaam en dissiplineer dit om werklik bruikbaar te wees. Ek wil tog nie, terwyl ek vir ander gepreek het, self deur God gediskwalifiseer word nie’ (1 Korintiërs 9:27 NLV).
Sielskos: Gen 11:1-9;
Fil 2:1-11
