2024-03-11
Genesis 33:5 NLV
Weens die egskeidingsyfer vandag, beide binne die kerk en daar buite, raak paartjies verlief en staar die uitdaging in die gesig om twee gesinne in een te verander. Hier is ‘n paar van daardie uitdagings: besoekregte, hofingryping en betrokkenheid van die voormalige skoonouers. Voeg daarby ‘n berg papierwerk en wetlike spesifikasies en dit is soos om ‘n internasionale vredesverdrag te beding.
Jy het gekies om met jou nuwe eggenoot te trou, maar jou kinders het nie daardie keuse gehad nie. Dit is dus nie genoeg om hulle onder een dak saam te bring en te sê: ‘Wees mooi met mekaar,’ nie. Hulle wêreld is op sy kop gekeer en jy moet hulle tyd gee om die situasie te verwerk en hulle plek in die nuwe omstandighede te vind. ‘Die liefde sal al ons probleme oorkom,’ is ‘n mooi gedagte, maar dis nie waar nie. Jy sê: “Maar die Bybel sê: ‘Die liefde sal nooit vergaan nie…'” (1 Korintiërs 13:8 NLV). Ja, maar dit sê ook: ‘Die liefde is geduldig en vriendelik…’ (vers 4 NLV).
Jy gaan ‘n berg geduld en vriendelikheid nodig hê om die situasie te maak werk. Dus:
1) Berei jouself en jou kinders vir die veranderinge wat gaan plaasvind, voor.
2) Luister na jou kinders se vrese, sonder om te sê: ‘Moenie laf wees nie, alles sal uitwerk.’ Vir so lank as wat hulle nodig het om daaroor te praat, so lank moet jy na hulle luister.
3) Bid, bid, bid! Vra God om vir jou sy plan te gee om hierdie samevoeging so pynloos en stresvry as moontlik te maak. Jou nuwe maat mag dalk aan jou persoonlike behoeftes vir liefde en sekuriteit voldoen – maar onthou dat jou kinders dieselfde behoeftes het.
Sielskos: 2 Kon 1:1-4:17; Matt 22:15-33; Ps 106:24-48; Spr 7:3-5
2024-03-10
Romeine 12:3 NLV
‘n Ou, moeë hond het by ‘n vrou se erf ingestap. Sy kon aan sy voorkoms sien dat hy uit ‘n goeie huis kom. Hy het haar by die huis in gevolg en dadelik aan die slaap geraak. Twee ure later, het hy na die deur toe gestap en sy het hom uitgelaat. Die volgende dag het hy teruggekeer, weer sy posisie ingeneem en vir ‘n paar uur geslaap. Dit het vir ‘n week so aangegaan. Die vrou was nuuskierig en het ‘n nota aan sy halsband vasgemaak: ‘Jou hond kom elke middag na my huis toe vir ‘n middagslapie.’ Die volgende dag het die hond met ‘n nota opgedaag: ‘Hy lewe in ‘n huis saam met tien kinders – lyk my hy het bietjie alleentyd nodig. Kan ek môre saam met hom kom?’ As jy ‘n ma is, kan jy jou hiermee vereenselwig!
Carla Barnhill, die outeur van The Myth of the Perfect Mother, skryf: ‘Ek kan dit nie meer doen nie. Ek kan nie aanhou om SuperMa te probeer wees nie. Ek het probeer om die perfekte kombinasie van toegewyde ma, liefdevolle vrou en goeie Christen te wees… en ek het klaaglik misluk. Selfs al kon ek dit alles regkry, is ek nie oortuig dat enigeen van ons dit moet regkry nie. Ons hoef nie indrukwekkend te wees of ‘n paar willekeurige reëls te volg oor hoe moederskap moet lyk nie. Genade beteken dat ons reeds vir die Een wat die meeste saak maak, saak maak – ons goeie, liefdevolle en genadige God! Kom ons los dus ons mantels, sit ons stralekranse neer, pak ons medaljes weg en laat ons die soms gebrekkige, soms wonderlike mammas wees wat God ons gemaak het om te wees.’
Met ander woorde: ‘…jy [moet] jouself nugter… beoordeel…’
Sielskos: Eks 20:17; 2 Kon 5:1-27; Pred 5:10; Luk 12:13-31
2024-03-09
Filippense 2:14 NLV
Sommige kankers, soos velkanker, is meer opmerklik en jy kan dit laat verwyder. Dan is daar die soort wat onopgemerk groei en jou liggaam vernietig. Om te kla is dieselfde; dit beïnvloed jou gesondheid en saboteer jou sukses. Paulus sê: ‘Doen alles sonder kla of teëpraat.’
Dr Ann Shorb skryf: ‘As jy jouself bevind waar jy negatief en af voel, begin luister na dit wat rondom jou gesê word. Word daar baie gegrom en gekla? Is die mense saam met wie jy tyd bestee gedurig besig om uitdrukking aan ontmoedigende gedagtes en gevoelens te gee? Miskien is jy die een wat grom en kla. Baie keer word ons ons eie grootste vyand deur ‘n kwaai of bitter houding te ontwikkel. Jou gedagtes en houding is jou keuse. Jou gedagtes is jou verantwoordelikheid! Volg die riglyne wat Paulus gegee het om die negatiewe af te gooi en die positiewe aan te trek (sien Kolossense 3:1-15 en Efesiërs 4:20-32). Erken dat daar probleme is, maar moenie daarby stilstaan nie. Doen wat jy kan om die situasie reg te stel. Onthou, jy kan nooit ‘n ander persoon verander nie, jy kan slegs jouself en jou houding verander. Vind die positiewe dinge, fokus daarop en wees dankbaar dat God beloof het om deur die moeilike tye by jou te wees. Deur jou denke te verander, verander jy jou uitkyk en deur jou uitkyk te verander, verander jy jou lewe.’
Vir een mens lyk die wêreld wanhopig; vir ‘n ander lyk dieselfde wêreld ryk en interessant. Wat jy sien, hang hoofsaaklik af van waarna jy soek. Besluit om vir ‘n dag nie te kla nie. Daag jouself dan uit om vir ‘n week nie te kla nie. Jy sal verbaas wees hoeveel beter jy voel.
Sielskos: Op 19-22; Matt 22:1-14; Ps 106:1-23; Spr 7:1-2
2024-03-08
Romeine 12:10 NLV
Raak jy ontsteld wanneer jy nie ander mense kan beheer nie? Of raak jy buierig en geïrriteerd wanneer mense nie doen wat jy wil hê nie? Hoe reageer jy wanneer jou foute uitgewys word? Probeer jy mense forseer om aan jou eise te voldoen? Oordryf jy jou pyn, siekte of behoeftes sodat jy aandag of simpatie by ander kan kry? Kritiseer jy die opinies en keuses van ander en dink jy jy is beter as hulle? Raak jy kwaad en beledigend wanneer iemand van jou verskil of jou gesag uitdaag? Is jy onwillig om ander mense te komplimenteer, maar gou om iets wat jy dink verkeerd is met hulle te probeer regmaak? Probeer jy om ‘n wig tussen jou geliefdes en enigiemand wat naby aan hulle kom, te dryf? Gee jy ‘bevele’ aan diegene met wie jy in aanraking kom, eerder as om mooi ‘asseblief’ en ‘dankie’ te sê?
As jou antwoord op hierdie vrae ja is, is die woord vir jou vandag – moenie ‘n beheervraat wees nie! Die Bybel sê: ‘As broers en susters in God se huisgesin moet julle mekaar in liefde koester en voor in die ry staan om mekaar met respek te hanteer’ (vers 10 NLV). Dit beteken dat jy moet stop en oorweeg hoe jou gedrag ander mense affekteer. Jy sê: ‘Ek het maar net ‘n sterk persoonlikheid.’ Jammer, dis nie ‘n goeie verskoning nie! ‘Die Here se diensknegte… moet goedgesind teenoor almal wees…’ (2 Timoteus 2:24 NLV). As jy dus ‘n beheervraat is, begin jou gedrag verander!
As jy jouself egter toelaat om beheer te word omdat jy bang vir woede en verwerping is, is dit tyd om jou voet neer te sit. Wanneer die beheervraat besef dat jy dit nie langer gaan toelaat nie, sal hulle ophou om dit te doen.
Sielskos: Op 15-18; Matt 21:33-46; Ps 136:13-26; Spr 6:32-35
2024-03-07
Spreuke 22:7 NLV
Dis nie toevallig dat hierdie twee Skrifgedeeltes op mekaar volg nie: ‘Leer ‘n jongmens om die regte pad te kies, en wanneer hy eendag oud is, sal hy nie daarvan afwyk nie. Soos rykes oor armes heers, so is die man wat geld leen; Hy is die slaaf van die man by wie hy leen’ (verse 6-7 NLV). Dis in die haak om geld vir jou kind se studies, ‘n bekostigbare huis en ‘n betroubare kar te leen. Andersins, tensy jy vir iets kan betaal – leer om te wag!
Jesus het gesê: ‘…As enigeen van julle my dissipel wil word, moet jy jou selfsugtige ambisie aflê, elke dag jou kruis opneem en My volg’ (Lukas 9:23 NLV). Ons is nie baie goed daarmee om onsself die dinge wat ons wil hê, te ontsê nie. Tensy jy egter wil hê dat jou kinders jou skuld moet erf, self met skuld moet opeindig en die beginsel van onmiddellike bevrediging aan hulle kinders moet oordra, moet jy nou die siklus breek.
Kom uit die skuld en bly daaruit! Sê: ‘Here, ek gaan nie meer verskonings maak nie. Ek neem verantwoordelikheid vir die gemors waarin ek myself bevind. Ek het te veel spandeer, u beginsels van goeie rentmeesterskap geïgnoreer en ek het berou. Gee my die moed om my skuld in die gesig te staar en ‘n eerlike opname te maak van waar ek staan. Moet my nie toelaat om in ontkenning te leef nie. U het ons gewaarsku om nie onkundig oor Satan se taktieke te wees nie (sien 2 Korintiërs 2:11 NLV). Hy probeer my in finansiële slawerny hou. Help my om op te hou om bykomende skuld te maak. Verlos my van emosionele besteding. Asseblief, help my om uit die skuld te kom. In Jesus se Naam bid ek dit. Amen.’
Sielskos: Op 10-14; Matt 21:18-32; Ps 136:1-12; Spr 6:30-31
2024-03-06
Johannes 15:5 NLV
Selfhelp boeke en motiveringsprekers is soos rasieleiers wat op die kantlyn staan en skree: ‘Jy kan dit doen!’ Hulle kan behulpsaam wees, maar as die ‘jy kan dit doen’ filosofie altyd waar was, sou ons nie vir God nodig gehad het nie. Paulus het dit verstaan. Dis hoekom hy geskryf het: ‘Ek kan onder alle omstandighede regkom deur Hom wat my krag gee’ (Filippense 4:13 NLV).
Om die wil van God te ontdek, verg geloof in die onmoontlike en ‘n kinderlike afhanklikheid van Hom. Die Bybel is vol mans en vrouens wat hul roeping in die perfekte wil van God ontdek het, deur dinge te doen wat gewoonlik onmoontlik op hul eie sou wees. Byvoorbeeld:
1) Noag en sy onmoontlike projek. Noag is opdrag gegee om ‘n skip die grootte van ‘n vliegdekskip – met die hand en op land – te bou!
2) Abraham en sy onmoontlike belofte. God het vir hom toe hy negentig jaar oud was gesê dat sy kinders so baie soos die sterre aan die hemelruim en die sand van die see sou wees.
3) Maria en haar onmoontlike swangerskap. Verbeel jouself jy moet vir jou verloofde sê: ‘Ek is swanger en die baba se vader is die Heilige Gees.’
God het nog altyd gewone mense gekies om ongewone dinge te doen. Elkeen van hulle was geroepe om deel van iets groters as sy- of haarself te wees. As gevolg van hulle gewilligheid om aan God oor te gee en toe te laat dat sy doelwitte in hulle geopenbaar en deur hulle vervul word, het Hy hulle op wonderbaarlike wyses gebruik. God vind behae daarin om dinge deur ons te doen wat slegs Hy kan doen, sodat Hy op die ou einde al die glorie, eer en lofprysing ontvang.
Sielskos: Op 5-9; Matt 21:1-17; Ps 77; Spr 6:29
