2024-05-20
Jesaja 44:22 NLV
Wanneer jy sukkel om jouself te vergewe. Daar word net een onvergeefbare sonde in die Bybel genoem (sien Lukas 12:10). As gelowige het jy waarskynlik nie hierdie sonde gepleeg nie, dus sal God jou vir alles anders vergewe. Wanneer God egter sê dat Hy jou vergewe en jy weier om jouself te vergewe, pleeg jy die sonde van trots, want wanneer God jou vergewe en jy weier om jouself te vergewe, plaas jy jou opinie bo syne.
As jy sukkel om jouself te vergewe, herinner jouself aan God se Woord: ‘Ek, ja, Ek alleen, is die Een wat julle sondes uitwis. Ek doen dit ter wille van Myself en dink nie weer daaraan nie’ (Jesaja 43:25 NLV). ‘Ek het jou sondes weggevee soos wolke verdwyn. Ek het jou oortredings verstrooi… Keer terug na My toe, want Ek het jou gered’ (Jesaja 44:22 NLV). ‘Die goddelose mens moet sy verkeerde dinge los, en die bose mens sy slegte gedagtes. Hy moet terugdraai na die Here en Hy sal hom genadig wees. Ja, draai na God, want Hy sal altyd vergewe!’ (Jesaja 55:7 NLV). ‘Jy sal jou sondes onthou. En dan sal jy stilbly omdat jy skaam kry, dié dag as Ek jou vergewe vir alles wat jy gedoen het, sê die oppermagtige Here’ (Esegiël 16:63 NLV). ‘As ons egter ons sondes bely, Hy is betroubaar en regverdig om ons sondes te vergewe en ons skoon te maak van elke verkeerde optrede’ (1 Johannes 1:9 NLV). ‘Vir hulle wat aan Christus Jesus verbind is, is die oordeel nou heeltemal weggeneem’ (Romeine 8:1 NLV).
Is jy aan ‘Christus Jesus verbind’? Verbly jouself dan; jy hoef nie langer onder die gewig van veroordeling te struikel nie. God het jou heeltemal vergewe, vergewe dus jouself en beweeg aan.
Sielskos: Rut 1-4; Mark 9:38-50; Ps 18:30-50; Spr 12:25-28
2024-05-19
Rut 2:7 NLV
Na tien jaar se hartseer en swaarkry waar sy haar man en haar ondersteuningstelsel verloor het, het God vir Rut aan haar nuwe man, Boas, voorgestel. Waar? In die landerye waar sy elke dag gewerk het. Wie was Boas? Die eienaar van die landerye. Een van die dinge wat Boas na Rut toe aangetrek het, was haar werksetiek. Die voorman het vir Boas gesê: ‘…Sy het nog die hele tyd aanmekaar gewerk, behalwe vir ‘n kort tydjie toe sy daar onder die skuiling gerus het’ (vers 7 NLV). Gevolglik het sy uiteindelik met die baas getrou.
Dis hoekom die Bybel so baie oor die verskil tussen luiheid en harde werk, slordigheid en uitnemendheid, traagheid en stiptelikheid, eerlikheid en oneerlikheid en ‘n positiewe gesindheid en ‘n negatiewe een, sê. Daar is altyd iemand wat jou waarneem wat in staat is om jou te seën. Lees die volgende drie Skrifgedeeltes:
1) ‘Sien jy iemand wat bedrewe is in sy beroep? Hy werk vir konings en nie vir gewone mense nie’ (Spreuke 22:29 NLV).
2) ‘Luiaards begeer baie dinge, maar hulle kry dit nie. Mense wat hard werk, het meer as wat hulle kan begeer’ (Spreuke 13:4 NLV.
3) ‘Mense wat lui is, word gou arm. Hulle wat fluks is, word ryk’ (Spreuke 10:4 NLV).
Deur te veel te verwag en so min as moontlik terug te gee, doen jy nie net jou maatskappy in nie, maar ook jouself. Hoekom? Omdat God belowe om jou te eer wanneer jy jou beste gee. Sy Woord sê: ‘Want uit die ooste of die weste, of selfs uit die woestyn, kom daar geen verheffing nie. Maar God is die regter wat verneder of verhef’ (Psalm 75:7-8 NLV).
Sielskos: Lev 23:15-22; Hand 2:1-21
2024-05-18
Spreuke 3:5 NLV
Wanneer jy jou bekommernisse eerlik evalueer, sal jy agterkom dat jy die volgende doen:
1) Vergeet dat God jou vriend is. Die Psalmdigter het gesê: ‘Die Here vertel vir die mense wat Hom dien, alles wat Hy besluit…’ (Psalm 24:14 ABA). Vriendskap met God word gebou deur jou lewenservarings – elke aktiwiteit, elke gesprek, elke probleem en elke gedagte – met Hom te deel. Wanneer jy dit nie doen nie, raak jy onbewus van sy teenwoordigheid en stem, weerstandig teenoor sy teregwysing en uit pas met sy tydsberekening. Wanneer jy so lewe, is daar net een onvermydelike resultaat – bekommernis!
2) Verantwoordelikheid neem vir dinge waarvoor jy nie moet nie. Peter Marshall het gebid: ‘Vader, help ons met ons neiging om onsself so dun te versprei dat ons aan vrees en twyfel, aan die moegheid en ongeduld wat ons humeure dun laat raak; wat ons van gemoedsrus beroof; wat die lug grys maak wanneer dit blou moet wees en wat ‘n lied in ons harte smoor, blootgestel word.’ Jy verloor die lied in jou hart wanneer jy probeer om almal reg te ruk en aan hulle verwagtinge te voldoen.
3) Nie die verskil tussen die sekulêre en die heilige verstaan nie. Of Jesus is Here oor elke area in jou lewe, of Hy is oor geen daarvan Here nie. Ons sê vir onsself dat God oor sekere dele van ons lewens besorg is en nie oor ander dele nie. Die Bybel sê: ‘Vertrou op die Here met alles wat jy het. Moenie staatmaak op jou eie insigte nie. Vra na die wil van die Here in alles wat jy doen. Hy sal die regte pad vir jou wys’ (Spreuke 3:5-6 NLV). Om op enige ander manier te lewe, is ‘n lewe vol bekommernisse!
Sielskos: Obadja; Mal 1-4; Mark 9:30-37; Ps 18:1-29
2024-05-17
Matteus 6:33 DB
Die sendeling Gladys Aylward het gesê: ‘Die arend wat in die boonste lugstrome sweef, bekommer homself nie oor hoe om riviere oor te steek nie.’ Jy kan nie van bekommernis ontsnap nie; dit sal uit verskillende rigtings en in verskillende vorms kom. Soos die arend moet jy egter bo dit uitstyg.
Jesus het gesê: ‘Moenie gedurig loop en julle bekommer nie. Moenie van vroeg tot laat vra: ‘Gaan ek genoeg hê om te eet?’ of: ‘Gaan ek genoeg hê om aan te trek?’ nie. Die lewe gaan tog oor baie meer as kos en klere. Kyk ‘n slag na die voëls: hulle het nie groot skure waarin hulle elke dag hulle kos bêre nie. Tog is hulle nooit honger nie. God sorg dat hulle elke dag genoeg het om te eet. Weet julle, julle is baie meer werd vir God as al die voëls in die hemel. Daarom help al julle bekommernis net mooi niks. Dit gaan nie julle lewe met een enkele dag verleng nie. Allesbehalwe! Kyk gerus ‘n bietjie in die veld hoe mooi die lelies lyk wat daar groei. Hulle werk nie van vroeg tot laat om so deftig te lyk nie… As God soveel aandag gee aan hoe die veldgras lyk, wat vandag nog groei en môre weer dood is, sal Hy mos vir julle ook sorg… Hou op om te sê: ‘Wat gaan ons vandag eet en drink?’ of: ‘Wat gaan ons vandag aantrek?’ As julle dit doen, tree julle op soos mense wat God glad nie ken nie… Stel God se koninkryk eerste. Doen net daardie dinge wat vir Hom belangrik is. Hy sal vir die res sorg… En los môre se probleme vir die dag van môre. Van probleme het elke dag immers oorgenoeg. Leef vandag voluit vir God!’ (verse 25-34 DB).
Sielskos: 1 Pet 1-5; Mark 9:14-29; Ps 49; Spr 12:20-22
2024-05-16
Job 31:1 NLV
Daar is sekere deure in die lewe wat moeilik is om te sluit nadat dit eers oopgemaak is – pornografie is een van hulle. Soos enige verslaafde het jy toenemende dosisse nodig om jouself tevrede te stel, totdat jy uiteindelik geskok en beskaamd oor die dieptes waartoe jy gesink het, is. Statisties gesproke is die probleem presies dieselfde in die kerk as in die samelewing. Jesus het ons geleer om te bid dat ons van die bose verlos sal word. Hierdie bose is egter nou deur die televisie en die internet in ons huise ingebring. Ouers, beskerm jou kinders van dinge wat hulle gedagtes kan besmet en hulle kanse om gesonde verhoudings te bou, kan seermaak.
As jy aan pornografie verslaaf is, bid die volgende: ‘Here, wis tog my sonde uit (sien Psalm 51:3). Help my om op te hou om myself vir skaamte en mislukking deur die dinge waarvoor ek myself beskikbaar stel, oop te stel (sien Romeine 13:14). Ek bely my sonde en vra vir u verlossing. Onthul die emosionele behoeftes wat ek probeer vervul aan my en gee my die moed, krag en wysheid om dit op ‘n manier wat U eer, te hanteer. Ek wil Job se voorbeeld volg, want hy het ‘n verbond met sy oë gesluit om nie na sondige dinge te kyk, daarvoor te wens of dit te begeer nie. Ek kan dit nie in my eie krag doen nie. Vul my met u Gees. Gee vir my iemand wat ek kan vertrou om eerlik met my te wees – iemand wat hierdie las in gebed met my sal deel en vir my verlossing sal glo. Gee my ‘n verlange na U wat alle wellustige gedagtes sal oortref en vernietig. In Jesus se naam bid ek dit. Amen.’
Sielskos: Deut 32:29-34:12; Mark 9:1-13; Ps 62; Spr 12:18-19
2024-05-15
Kolossense 3:21 NLV
Verbitterde kinders raak uiteindelik moedeloos. ‘n Moedelose kind het minder hoop, is minder entoesiasties, het ‘n gebrek aan vasberadenheid en word maklik om die bos gelei. Deur jou kind se hoop te vernietig, ondermyn jy hulle Godgegewe geaardheid. Kinders word met optimisme, inspirasie, afwagting en moontlikhede gebore. Sonder hoop, is daar niks wat hulle inspireer nie. Hopeloosheid bring depressie en donkerte van hart en siel mee.
Wanneer jy jou kinders ontmoedig, vernietig jy hulle selfvertroue en maak hulle onseker en nie in staat om die lewe te trotseer nie. Selfvertroue is noodsaaklik vir ‘n gesonde selfbeeld, om met ander mense om te gaan en sukses in hulle opvoeding en beroep te behaal. ‘n Moedelose kind verloor hulle sekerheid en word ‘n gebroke gees. Die gees is die kern van die wese. ‘n Gebroke gees produseer ‘n gebroke mens. ‘…’n Neerslagtige mens tap jou krag’ (Spreuke 17:22 NLV).
Ons strate is vol gebroke kinders. Hierdie kinders het nie die vasberadenheid om sukses te behaal nie, om doelwitte te stel en dit te bereik nie. ‘Wanneer ‘n volk nie duidelikheid het oor die wil van God nie, word hulle koersloos…’ (Spreuke 29:18 NLV). Dis jou visie wat jou die innerlike krag gee om iets tot die einde, ten spyte van die struikelblokke wat voorkom, deur te sien. Dit verg ‘n heel, veerkragtige kind om die lewe se struikelblokke te oorkom.
Hoe kan jy hulle help? ‘…voed hulle op met dissipline en teregwysing wat die Here se goedkeuring wegdra’ (Efesiërs 6:4 NLV). Jy moet hulle koester, God se Woord vir hulle leer selfs wanneer hulle onverskillig daaroor lyk, doen wat jy sê, konsekwent met jou reëls wees, hulle laat sien hoe jy God se Woord lees en aanhoudend bid. Moedig hulle altyd aan en moet nooit, ooit oor hulle tou opgooi nie!
Sielskos: Deut 30:1-32:28; Mark 8:27-38; Ps 57; Spr 12:15-17
