2019-02-07
Romeine 12:2 NLV
Wanneer ‘n muishond per ongeluk in jou huis inkom, gaan dit nie help om die vensters oop te maak en lugverfrisser te spuit nie. Daar is mense wat daarin spesialiseer om muishonde te hanteer en dis nogal duur om hulle na jou huis te laat kom om die muishond te vang. Dis egter die moeite werd om van die probleem ontslae te raak. Hoe hou dit met jou denkwyse verband? Eenvoudig: Jou gevoelens is die reuk en jou gedagtes is die muishond! Om jou gevoelens te verander, moet jy na die bron toe gaan wat hulle geproduseer het – jou gedagtes. Gedagtes produseer gevoelens, nie andersom nie. Bekommerde mense is geneig om angstige gedagtes te dink en daardie gedagtes word later so outomaties dat jy, soos ‘n muishondreuk wat in die lug hang, ophou om dit agter te kom en leer om daarmee saam te leef. Jy raak gewoond aan ‘stink gedagtes!’ Jou denkpatrone word ‘n gewoonte, soos om jou tande te borsel. Jy raak so gewoond daaraan om bitter, angstige, selfsugtige gedagtes te dink, dat jy ophou aandag gee. As jy die kwaliteit van jou lewe wil verander, moet jy die manier wat jy dink, verander. Die psalmdigter het gebid, ‘Deursoek my, o God, en ken my hart; toets my onrustige gemoed’ (Psalm 139:23 NLV). God sal jou help om bewus te word van dit wat van oomblik tot oomblik in jou gedagtes aangaan. Hy sal jou na die plek waar die ‘muishond’ bly lei en jou help om dit te hanteer. Nie net sal Hy jou wys hoe om die verkeerde gedagtes te verwyder nie, maar hoe om hulle met die regte gedagtes te vervang deur jou gedagtes te rig op ‘…die dinge wat die Gees gelukkig maak’ (Romeine 8:5 NLV).
Sielskos: Gen 20-23; Luk 8:40-56; Ps 125; Spr 4:3-4
2019-02-06
Romeine 8:5 NLV
Om die mens te word wat God wil hê jy moet wees, moet jy jou gedagtes op die regte dinge ‘rig.’ Jy sê: ‘As my omstandighede maar net anders was.’ Jou omstandighede bepaal nie jou lewenskwaliteit nie; hoe jy daaroor dink, bepaal dit. Die digter Frederick Langbridge het geskryf, ‘Two men looked out through prison bars; one saw mud, the other saw stars.’ Beide mans was in identiese omstandighede, maar hulle perspektiewe was heeltemal anders. Een het skoonheid gesoek en dit gekry; die ander het op die lelike gefokus en dit gevind. Dit werk as volg: Jou omstandighede in die lewe produseer sekere emosies. Hoe verander jy dus jou emosionele reaksie wanneer jy magteloos teenoor mense en omstandighede voel? Deur te verander hoe jy aan hulle dink! Ware verandering begin altyd in jou gedagtes. Die manier wat jy dink, reflekteer onvermydelik die manier wat jy lewe. Om dus die beste weergawe van jouself te word, die persoon wat God wil hê jy moet wees – moet jy “groot” gedagtes dink! Mense wat “groot” lewens lei is mense wat op ‘n gereelde basis groot gedagtes dink. Jy sê, ‘Maar ek kan nie help om te dink hoe ek dink nie.’ Laat God dan ‘…julle omvorm deurdat Hy julle denkpatrone vernuwe…’ (Romeine 12:2 NLV). God se Woord sal jou help om met geloof eerder as met vrees, met gerusstelling eerder as met angs en met vreugde eerder as met negatiwiteit, te dink. Sodra jy jou gedagtes gerig het op ‘die dinge wat die Gees gelukkig maak,’ sal jou lewe ten goede begin verander.
Sielskos: Gen 17-19; Luk 8:26-39; Ps 67; Spr 4:1-2
2019-02-05
Spreuke 22:6 DB
Die joernalis William Hodding Carter het geskryf: ‘Daar is net twee blywende erflatings wat ons kan hoop om vir ons kinders te gee. Een is wortels; die ander een is vlerke.’ Kinders wat weet dat hulle ouers hulle onvoorwaardelik liefhet, het wortels. Gevolglik is hulle dus in staat om teen enigiets wat die lewe hulle mee gooi, op te staan. Op dieselfde manier, wanneer jy in jou kinders selfvertroue aanwakker en hulle aanmoedig om te droom, gee jy vir hulle vlerke. Enige tyd wanneer kinders die wil om te wen gegee word, is hulle al klaar halfpad op die pad na sukses. As jy hulle egter daarsonder laat grootword, is hulle reeds halfpad op pad na mislukking. Dit beteken dat jy as ouer geloof in jou kind moet demonstreer, sodat hulle kan leer om geloof in hulself te hê. Elke kind het binne-in hom ‘n God-gegewe saadjie vir grootheid en wanneer jy hom of haar laat weet dat jy in hulle glo, gee jy daardie saadjie die geleentheid om te groei. Het jy al agtergekom hoe mense in ooreenstemming met jou verwagtinge presteer of misluk? Wanneer jy aanhoudend jou kinders kritiseer, sal hulle negatief en vol vrees grootword en aan hulself twyfel. As jy egter in hulle glo en aanneem dat hulle goed sal doen, sal hulle die ekstra pad stap om aan jou verwagtinge te voldoen. Dis jou geloof in hulle wat die omgewing skep waarin hulle leer om te vlieg! As jy vir hulle geld gee, sal hulle dit spandeer. As jy vir hulle hulpbronne gee, sal hulle dit mors. As jy egter vir hulle geloof in God en hulself gee, is die kans goed dat hulle in die lewe sal uitblink.
Sielskos: Gen 13-16; Luk 8:16-25; Ps 120; Spr 3:33-35
2019-02-04
Handelinge 27:25 NLV
Op pad na Rome het Paulus ‘n verwoestende storm ervaar. Sy verhaal leer ons drie waardevolle lesse: 1) Jou ongehoorsaamheid kan ‘n storm veroorsaak. Omdat die kaptein nie na Paulus se waarskuwing wou luister nie, het hy sy skip, sy vrag en amper sy lewe verloor. Jou ongehoorsaamheid kan ‘n storm in jou gesondheid, jou finansies, jou familie of jou loopbaan ontketen. God begin nie sy gebooie met, ‘As jy lus is, moet jy die volgende doen,’ nie. Nee. Hy bedoel wat Hy sê en Hy sê dit vir jou eie beswil, gee dus aandag! 2) Jy is nie alleen in die storm nie. God is met jou. Paulus het gesê: ‘Verlede nag het daar ‘n engel van die God aan wie ek behoort en wat ek dien, langs my gestaan en vir my gesê: ‘Hou op bang wees, Paulus… om jou ontwil spaar God almal wat hier saam met jou op die skip is. Daarom, hou moed, manne!..’ (verse 23-25 NLV). Met God aan boord, is daar nie ‘n storm wat sterk genoeg is om jou te sink nie. 3) Wanneer jy op God se beloftes staan, het jy sy outoriteit. Paulus het dalk soos ‘n gevangene gelyk, maar in realiteit het hy meer mag as die kaptein gehad. Alhoewel hy met kettings geboei was, was hy die vryste man op die skip. Wanneer jy duidelik van God gehoor het, kan jy enige situasie hanteer, omdat sy Woord sê: ‘Maar geen wapen wat teen jou gemik word, sal iets teen jou kan uitrig nie. Elke aanklag teen jou, sal jy weerlê. Dit is die erflating van die dienaars van die Here…’ (Jesaja 54:17 NLV). Die woord vir jou vandag is dus: Hou aan om op God te vertrou en Hy sal jou deur hierdie storm bring!
Sielskos: Gen 10-12; Luk 8:1-15; Ps 108; Spr 3:31-32
2019-02-03
Galasiërs 6:2 NLV
Almal wat jy ontmoet, steek iets weg. Nie omdat hulle jou wil mislei nie, maar omdat sommige wonde net te persoonlik is om oor te praat. Wanneer jy ‘n harde woord van jou man se kant af kry, kan die pyn te diep wees om dit te bespreek. Of wanneer jou man giftige woorde van jou hoor, kry hy seer maar kan dit nie wys nie. Dus gaan lek beide van julle julle wonde en probeer om aanmerkings en vrae van ander mense te vermy. Is dit waar jy vandag is? Sukkel jy met iets wat te moeilik is om oor te praat? As dit die geval is, onthou dat ander mense dieselfde doen! Dikwels is hulle woede ‘n simptoom van hulle seer en steek hulle afsydigheid net ‘n vrees vir verwerping weg. Jesus het die beste in mense gesien en uit sy pad gegaan om teenoor hulle genadig te wees en hulle laste te probeer verminder. Onthou jy hoe Hy die vrou wat owerspel gepleeg het, hanteer het? (sien Johannes 8:1-11). Hy het haar opgehef, omdat daar tussen onkruid ‘n potensiële roos kan wees! Herinner jouself dat ander mense deur dinge gaan wat hulle nie met jou bespreek nie. Hulle stort trane wat jy nie kan sien nie en voel geïsoleerd op maniere wat jy jou nie kan indink nie. Probeer dus om hulle las ligter te maak, nie om daar toe by te dra nie. Jy mag dalk die enigste geneser wees wat vandag hulle pad kruis. Wanneer jy hulle las ligter maak, sal God joune ook ligter maak. Die Bybel sê, ‘Julle weet mos dat die Here elke mens wat sy werk goed doen, sal beloon…’ (Efesiërs 6:8 NLV). Vra God om jou vandag ‘n lasdraer te maak.
Sielskos: Eks 16:1-35; Joh 6:30-40
2019-02-02
Spreuke 30:8 NLV
Wanneer jy daaroor besin, kan jou rykdom op twee maniere bepaal word: óf die hoeveelheid wat jy besit, óf die hoeveelheid waarmee jy tevrede is. Baie van die huidige skuldkrisis is deur ons onvermoë om met genoeg tevrede te wees, veroorsaak. In ‘n briljante deel van Spreuke vind ons hierdie gebed: ‘Twee dinge wil ek van U vra. Moenie dit weier solank ek leef nie. In die eerste plek, keer tog dat ek lieg. In die tweede plek, laat my nie arm of ryk wees nie. Gee asseblief vir my net dit wat reg is. As ek te veel het, sal ek U verloën en vra: ‘Nou wie is die Here?’ As ek te arm is, sal ek steel en God se Naam beswadder’ (verse 7-9 NLV). Na aanleiding van hierdie Skrifgedeelte, moet ons die volgende ses riglyne volg wanneer ons geld wil leen. Skuld is verkeerd: 1) Wanneer jy dit nie op ‘n tydige basis kan terugbetaal nie. 2) Wanneer dit jou daarvan weerhou om God se regmatige deel vir Hom te gee. 3) Wanneer die skuldlas so swaar is dat jy nie vir die toekoms kan spaar nie. 4) Wanneer dit vir die luukshede in die lewe gebruik word. 5) Wanneer jy ander mense in gevaar stel deur hulle vir jou te laat borg staan (sien Spreuke 6:1-5). 6) Wanneer dit jou huwelik onder finansiële druk plaas. Die finansiële kundige, Larry Burkett, het gesê dat skuld die motiverende faktor in amper 80 persent van alle skeisake is. Dit beteken egter nie dat jy nie familieprobleme sal hê as jy ryk is nie. Dit beteken eenvoudig dat wanneer jy geld eerste en jou familie tweede stel, dit jou niks meer as ‘n ryk mislukking kan maak nie. Voor jy dus geld leen, bid en vra God vir wysheid.
Sielskos: Gen 7-9; Luk 7:36-50; Ps 111; Spr 3:29-30
