2019-02-01
1 Tessalonisense 4:17-18 DB
In die rolprent, Heaven is for Real, was Colton Burpo net vier jaar oud toe hy ‘n nood blindedermoperasie ondergaan het. Gedurende die daaropvolgende paar maande, het hy oor sy besoek aan die hemel gepraat. Hy kon presies sê wat sy ouers tydens die operasie gedoen het en hy het verhale vertel van mense wat hy in die hemel ontmoet het – mense wat hy nooit op aarde ontmoet of van vertel is nie. Hy het vir sy ma gesê, ‘Jy het ‘n baba gehad wat in jou maag dood is, nè Mamma?’ Sy ouers het nog nooit aan hom die miskraam genoem nie; hy was nog te jonk om dit te verstaan. Sy ma het gevra, ‘Wie het vir jou gesê dat ek ‘n baba in my maag gehad het wat doodgegaan het?’ Hy het geantwoord, ‘Sy het, Mamma. Sy het gesê dat sy in Mamma se maag dood is. God het haar aangeneem.’ Sy het gevra, ‘Bedoel jy nie dat Jesus haar aangeneem het nie?’ Hy het geantwoord, ‘Nee Mamma, sy pappa het!’ Sy ma se oë het opgehelder en gevra, ‘Wat was die dogtertjie se naam?’ Die vierjarige Colton het gesê, ‘Sy het nie ‘n naam nie. Julle het nie vir haar ‘n naam gegee nie.’ Net voor hy buite gaan speel het, het hy gesê: ‘O ja, sy het gesê dat sy nie kan wag vir Mamma en Pappa om hemel toe te kom nie.’ Daar is op hierdie oomblik iemand in die hemel wat dieselfde oor jou sê, wat uitsien na die dag wanneer God se familie weer saam gaan wees. Moet ons dan nie dieselfde doen nie? Die Bybel sê: ‘…Daarna sal ons almal vir altyd by die Here bly…’
Sielskos: Gen 4-6; Luk 7:24-35; Ps 107:33-43; Spr 3:27-28
2019-01-31
Spreuke 22:7 NLV
Albert Einstein het geglo dat die Reël van 72 (saamgestelde rente) ‘n belangriker ontdekking as sy relatiwiteitsteorie was. Die reël werk so: Deel 72 deur die rentekoers van jou spaargeld om die aantal jare te kry wat dit gaan neem vir jou spaargeld om te verdubbel. Byvoorbeeld: eenduisend rand wat teen 6 persent jaarlikse rente belê is, sal binne 12 jaar tot tweeduisend rand vermeerder. Kredietkaartverskaffers ken egter ook die Reël van 72. As jy byvoorbeeld ‘n aankoop van eenduisend rand teen 18 persent rente op jou kredietkaart maak en dit nie afbetaal nie, verhoog die balans van jou kredietkaart in slegs vier jaar tot tweeduisend rand. In plaas van om vir jou geld te verdien, verdien jou eenduisend rand massiewe winste vir die kredietkaartverskaffer. Die Bybel sê, ‘Soos rykes oor armes heers, so is die man wat geld leen: Hy is die slaaf van die man by wie hy leen.’ Het jy enige idee hoeveel huwelike in die moeilikheid is, of hoeveel mense op medikasie is omdat hulle in hul skuld verdrink? God wil nie hê dat jy so moet leef nie. Toe God die aarde geskep het, het Hy die volgende reël daargestel: ‘So lank as die aarde bestaan, só lank sal saaityd en oestyd… bly voortbestaan’ (Genesis 8:22 NLV). As jy ‘n oes wil hê wanneer jy dit nodig kry, moet jy saai – selfs wanneer jy nie lus is om dit te doen nie. Wanneer jy ‘n enkele tamatiesaadjie saai, sal jy baie meer terugkry – dis net ‘n kwessie van tyd. Verminder dus jou skuld en wees ‘n goeie opsigter van die fondse wat God aan jou toevertrou het. Dan kan jy op hierdie belofte staan: ‘…my God [sal] uit sy ontsaglike rykdom vir julle voorsien in elke behoefte wat julle het’ (Filippense 4:19 NLV).
Sielskos: Gen 1-3; Luk 7:11-23; Ps 107:23-32; Spr 3:25-26
2019-01-30
Openbaring 22:4-5 NLV
Om te weet hoe ‘n storie eindig, moet jy die laaste hoofstuk lees. In Openbaring 22, die laaste hoofstuk van die Bybel, lees ons oor twee wonderlike vooruitsigte wat deur elke verloste kind van God geniet gaan word. Kom ons kyk daarna: 1) ‘Hulle sal Hom vol in die oë kyk.’ Een van die grootste vreugdes in die hemel sal wees om die gesigte van ons gestorwe geliefdes te sien en ‘n ewigheid saam met hulle te spandeer. Hoe opwindend dit ook al mag wees, kan dit nie vergelyk word met die vreugde om Jesus, die Een vir wie ons die liefste is, se gesig te sien nie. Die gesangskrywer het gesê: ‘Face to face with Christ my Savior, face to face what will it be. When with rapture I behold Him, Jesus Christ who died for me.’ Dis nie al nie; lees die volgende: ‘Geliefdes, ons is nou reeds kinders van God, maar dit is nog nie duidelik wat ons sal wees nie. Wat ons wel weet, is dat ons net soos Hy sal wees wanneer Hy verskyn. Ons sal Hom dan sien soos Hy regtig lyk’ (1 Johannes 3:2 NLV). Ons sal Hom sien, ons sal soos Hom wees en ons sal vir ewig saam met Hom wees. Hoe wonderlik is dit nie! 2) ‘En hulle sal vir altyd as konings regeer.’ Net soos die eindeksamen jou gekwalifiseer het om te gradueer en ‘n lewe te begin maak, so kwalifiseer die toetse en beproewinge van hierdie lewe jou om te gradueer en saam met Christus in die volgende lewe te regeer. Hou jou oë op die prys. Die lewe is ‘n kortverhaal; die ewige lewe is die groot storie – om Jesus van aangesig tot aangesig te sien en vir ewig saam met Hom te regeer.
Sielskos: Pred 9-12; Luk 7:1-10; Ps 107:17-22; Spr 3:21-24
2019-01-29
Markus 4:9 DB
Studies bewys dat ons 50 persent van dit wat ons hoor, onmiddellik vergeet, 80 persent daarvan binne ‘n dag vergeet en 97 persent daarvan binne ‘n week vergeet. Wat is dus die oplossing? Wanneer jy luister, maak dit jou doelwit om te verstaan, nie net om die feite te onthou nie. Wees eerlik. Hoeveel keer het jy al gesê dat jy meer tyd gaan spandeer om na die mense in jou lewe te luister? Begin om dit te doen, want as jy nie vir die lewe se ‘spesiale oomblikke’ opdaag nie, sal daar voor jy jou oë kan uitvee, geen oomblikke meer wees om voor op te daag nie. Die mense wat waarlik na ons luister, word die belangrikste mense in ons lewens. As jy een van hulle wil wees, moet jy drie dinge doen: 1) Kyk direk na die spreker. Moenie iemand verkleineer deur werk te probeer opvang, op die foon te praat of op jou foon te speel terwyl hulle met jou praat nie. Fokus op hulle! 2) Moenie hulle in die rede val nie. Wanneer jy dit doen, dink mense dat jy nie veel waarde aan dit wat hulle sê, heg nie. Of dat jy hulle probeer beïndruk met hoeveel jy weet. Of dat jy te opgewonde is oor dit wat jy tot die gesprek wil byvoeg om hulle te laat klaar praat. 3) Skort jou oordeel op. Wag tot jy die hele storie gehoor het voor jy reageer, anders sal jy dalk die belangrikste dinge wat die spreker te sê het, misloop. Kan jy aan iemand dink na wie jy nie die afgelope tyd geluister het nie? Die goeie nuus is dat dit nooit te laat is om ‘n goeie luisteraar te word nie.
Sielskos: Pred 5-8; Luk 6:37-49; Ps 107:10-16; Spr 3:19-20
2019-01-28
Romeine 6:1 NLV
Hoe sal ons diegene antwoord wat sê dat mense wat te veel oor God se genade praat, ander mense laat dink dat hulle ‘n lisensie het om te sondig? Deur hulle na God se Woord te verwys: ‘Beteken dit nou dat ons in die sonde moet voortlewe sodat die genade steeds oorvloediger kan word? Hoegenaamd nie! Ons is immers dood vir die sonde. Dis tog onmoontlik dat ons nog langer daarin kan voortlewe!’ (verse 1-2 NLV). Soos jy jou nuwe natuur voed en jou ou ene uithonger, sal die ou natuur begin doodgaan. Jy sal minder geïnteresseerd wees om jouself te behaag; en meer geïnteresseerd word om God tevrede te stel. Paulus sê: ‘Ek weet dat Christus se liefde ons almal aanvuur…’ (2 Korintiërs 5:14 DB). Paulus is deur die behoefte om op God se genade wat hy ervaar het te reageer, aangevuur. Hy het gesê: ‘…die wêreld [is] vir my gekruisig, en ek vir die wêreld’ (Galasiërs 6:14 NLV). ‘n Openbaring van God se genade het veroorsaak dat die wêreld vir Paulus sy aantrekkingskrag verloor het, asook andersom. Wanneer dit reg verstaan word, verhoed die genade van God nie goddelikheid nie, maar produseer meer daarvan. ‘God het sy goedheid aan alle mense bekendgemaak. Almal het nou die kans om sy verlossing te beleef. Nou wys Hy vir ons hoe om ‘n Godlose leefstyl te systap en hoe om vernietigende begeertes te laat staan… Daarom sien ons baie uit na daardie wonderlike dag wanneer ons wonderlike God en Verlosser, Jesus Christus, terugkom… Christus het sy lewe ter wille van ons opgeoffer om ons los te koop uit die mag van die sonde. Nou behoort ons net aan Hom. Ons is sy volk. Syne alleen! Nou wil ons net doen wat Hy sê!’ (Titus 2:11-14 DB).
Sielskos: Pred 1-4; Luk 6:27-36; Ps 107:1-9; Spr 3:13-18
2019-01-27
Jakobus 1:8 NLV
As jy bang is om ‘n besluit te neem omdat dit dalk verkeerd kan wees, lees die volgende Skrifgedeelte: ‘Vra vir God as dit nie vir jou duidelik is wat Hy wil hê jy moet doen nie. Hy sal jou eenvoudig daardie wysheid gee… Maar, as ‘n mens bid, moet jy die vertroue hê dat God sal antwoord, want iemand wat twyfel, is soos ‘n brander in die see wat deur die wind aangejaag en heen en weer gedryf word. So iemand kan mos nie dink dat hy iets van die Here sal ontvang nie. Hy is iemand wat nie tot ‘n besluit kan kom nie; op so iemand kan jy nie peil trek nie’ (verse 5-8 NLV). President Reagen het dit geniet om te vertel hoe hy geleer het om besluite te maak. Toe hy ‘n seun was, het sy tannie hom na ‘n skoenmaker gestuur. Toe die skoenmaker vra of hy ‘n ronde of vierkantige toon wil hê, het hy onseker gestotter tot die skoenmaker gesê het, ‘Kom in ‘n dag of twee terug en sê vir my wat jy wil hê.’ Later het die skoenmaker Reagan in die straat raakgeloop en hom gevra wat hy oor die skoene besluit het. ‘Ek kon nog nie kies nie,’ het hy geantwoord. ‘Nou maar goed,’ het die skoenmaker gesê, ‘jou skoene sal môre gereed wees.’ Toe Reagan die skoene kry, het een skoen ‘n ronde toon en die ander skoen ‘n vierkantige toon gehad! Reagan het gesê, ‘Elke dag wat ek vir daardie skoene moes kyk het my ‘n les geleer. As jy nie jou eie besluite kan neem nie, sal iemand anders dit vir jou neem.’ Om sukses in die lewe te behaal, moet jy vir wysheid bid en dan ‘n besluit neem.
Sielskos: Ese 47:1-12; Op 21:22-22:5
