2019-01-26
Matteus 28:19 NLV
Tensy jy daar toe verbind is om Christus in elke area van jou lewe te volg, beteken die doop net dat jy droog in die water ingaan en nat en onveranderd weer uitkom. Let noukeurig op wat Jesus gesê het: ‘Gaan dan, maak al die nasies my dissipels, en doop hulle… Leer hulle om alles te gehoorsaam wat Ek aan julle opgedra het. En weet verseker: Ek is vir altyd by julle, tot aan die einde van die wêreldgeskiedenis’ (verse 19-20 NLV). Met die doop verklaar jy in die openbaar dat jy op die dood en opstanding van Christus, vir jou verlossing vertrou. Dit beteken egter meer as om net in water gedompel te word. Dit beteken dat jy: 1) In die beginsels van Christus verdiep moet wees. ‘…Leer hulle om alles te gehoorsaam wat Ek aan julle opgedra het…’ Let wel: ‘alles.’ Dis nie ‘n à la carte spyskaart waarvan jy kan kies wat vir jou lekker lyk en die res kan los nie. Onvolledige gehoorsaamheid – is ongehoorsaamheid. 2) In die doelwitte van Christus verdiep moet wees. ‘Gaan dan, maak al die nasies my dissipels…’ Die doop kan in ‘n oomblik plaasvind, maar dissipelskap verg dat jy Jesus vier-en-twintig uur ‘n dag, sewe dae ‘n week, twee-en-vyftig weke ‘n jaar moet volg. 3) In die teenwoordigheid van Christus verdiep moet wees. ‘…En weet verseker: Ek is altyd by julle…’ Dit beteken dat jy in alles wat jy doen ‘n aanvoeling vir sy teenwoordigheid moet ontwikkel. Sy inwonende teenwoordigheid moet jou bestuur, jou motiveer en jou daarop fokus om sy wil uit te voer.
Sielskos: Rom 15-16; Luk 6:17-26; Ps 104:24-35; Spr 3:11-12
2019-01-25
Eksodus 4:12 NLV
Soms verskoon ons iemand se kritiese houding deur te sê, ‘Ag, sy blaf is erger as sy byt.’ Ja, ‘n hond se byt kan seermaak, maar so ook ‘n hond se blaf. Dit kan ‘n kind traumatiseer en hulle met vrees vul. Dink daaraan – wil jy met ‘n hond vergelyk word? Soms is dit nodig om iemand te konfronteer om sodoende gesonde grense vir jouself daar te stel, of om hulle veilig te hou. Jesus het egter meer kere met deernis gepraat as wat Hy gekonfronteer of veroordeel het. Karen Casey Arneson vertel van haar vroeë ervarings as ‘n gelowige: ‘Ek het die koninkryk vol littekens en bloeiend binne gegaan, met die hoop om genesing vir my wonde te vind. Ek het iemand gevind wat my bytmerke skoongemaak het en my ou wonde versorg het. Ek het ook uitgevind dat daar kannibale in die Christendom is. Dis die susters met die soet glimlagte wat jou rug byt wanneer jy wegdraai. Die nuuskierige Nellies wat om jou kom snuffel vir ‘n lekker skinderstorie. God waarsku ons: ‘Maar julle byt en verskeur mekaar. Pas op dat julle mekaar nie heeltemal verslind nie!’ (Galasiërs 5:15 NLV). Om krag te kry om ons natuurlike aptyt teë te werk, beteken dat ons ons honger by ‘n ander bron moet versadig. Die Psalmdigter sê: ‘Smaak en sien dat die Here goed is…’ (Psalm 34:9 AFR53) Sonder waaksaamheid kan ons maklik weer in ou gewoontes terugval. ‘n Bietjie peusel aan hierdie een, ‘n bietjie proe aan daardie een… en voor ons besef het ons weer die kannibaal binne-in ons losgelaat. Terwyl ons geroepe is om ons broers en susters te help wat in sonde vasgevang is, word ons ook gewaarsku om versigtig te wees om nie self versoek te word nie (sien Galasiërs 6:1 NLV).
Sielskos: Rom 12-14; Luk 6:1-16; Ps 104:1-23; Spr 3:9-10
2019-01-24
Spreuke 29:17 NLV
As ‘n gedissiplineerde kind vir jou rus gee, sal ‘n ongedissiplineerde kind jou geen rus toelaat nie. Jy kan hulle nêrens heen vat nie of hulle nêrens los nie. Salomo sê: ‘Hy wat sy seun nie dissipline leer nie, het hom nie regtig lief nie. As hy hom liefhet, sal hy hom dissiplineer’ (Spreuke 13:24 NLV). Kindermishandeling is laakbaar – maar so ook kinderverwaarlosing. Sonder dissipline, kondisioneer jy jou kind vir ‘n lewe van seerkry. Wanneer hulle deur die polisie afgetrek word of deur die bank gekontak word omdat hulle nie hulle lening terugbetaal het nie, gaan ‘n woedeaanval hulle niks help nie. Dink asseblief aan hulle toekoms! God dissiplineer sy kinders; is jy slimmer as wat Hy is? Die Bybel sê, ‘…Dit is nie lekker om gestraf te word nie, want dit maak seer, maar later pluk ons die vrugte. Iemand wat sy les uit die straf geleer het, sal ‘n mens word wat doen wat God wil hê en daarom in vrede leef’ (Hebreërs 12:11 DB). ‘n Tweejarige wat ‘Nee!’ skree mag dalk vandag oulik wees, maar wag tot hy sewentien is en jou soos ‘n dronk matroos vloek. Die Bybel sê, ‘Astrantheid is eie aan ‘n seun; ‘n pak slae haal dit uit hom uit’ (Spreuke 22:15 NLV). Rebellie is deel van hulle DNA en dis jou werk om daarvan ontslae te raak. Ja, dis moeilik om hulle te dissiplineer wanneer jou tyd met hulle so beperk is, maar hulle toekoms is in jou hande. ‘n Kind sonder grense is soos ‘n huis sonder mure; daar is geen beskerming teen eksterne invloede nie. Niemand voel veilig nie. Praat dus vandag met God. Hy is ‘n vader – Hy het kinders van sy eie en Hy sal jou help om joune reg groot te maak.
Sielskos: Rom 9:17-11:36; Luk 5:27-39; Ps 100; Spr 3:7-8
2019-01-23
2 Petrus 1:13 NLV
God sal jou geloof tot naby jou breekpunt strek. Die pastoor en skrywer, Jon Walker, sê: ‘Op ‘n punt het ek agtergekom dat God my geloof strek. Hy het spesifiek vir my gesê om op te hou om ‘n gereelde salaris te trek en deur geloof te begin leef. Met stralende sekerheid dat God sou voorsien omdat Hy vir my gesê het dat Hy sal, het ek gedoen wat Hy gesê het en vir sy voorsiening begin uitkyk. Ek het al die maniere wat God vir my voorsien het opgeteken, en die lys het indrukwekkend lank geword. God het my van ‘n ‘Ek hoop dit sal gebeur,’ na ‘n seker ‘Ek weet dit sal gebeur,’ beweeg. Tog het ek binne maande letterlik onder twyfel gesteier. Ek het my fokus verloor en begin spartel vir maniere om ‘n inkomste te genereer. Ek het geglo dat dit my verantwoordelikheid was om dinge te laat gebeur omdat God dalk nie betyds vir my sou deurkom nie.’ Verstaan mooi: ‘n Geloof wat nie geskud kan word nie, word net uit ‘n geloof wat so erg geskud is dat dit nou seker en standvastig is, gebore. Ons grootste bekommernis is om aan ons behoeftes te voldoen, maar God se grootste besorgdheid is om ons geloof te ontwikkel. ‘As jy nie glo nie, is dit onmoontlik om God tevrede te stel…’ (Hebreërs 11:6 NLV). Dis hoekom Petrus geskryf het: ‘Dis hoekom ek julle altyd aan hierdie dinge sal herinner, al weet julle dit en al leef julle reeds noukeurig volgens die waarheid wat by julle is. Ek beskou dit inderdaad as my plig om julle hieraan te herinner…’ (2 Petrus 1:12-13 NLV). Hou dus aan om jouself te herinner dat God getrou is.
Sielskos: Rom 7:1-9:16; Luk 5:12-26; Ps 96; Spr 3:5-6
2019-01-22
Markus 5:17 DB
Die Bybel sê: ‘Die mense wat dit alles gesien het, het natuurlik vir almal in besonderhede vertel wat met die woeste man met die demoon en die varke gebeur het. Die mense uit daardie gebied was egter baie ontevrede en het Jesus gevra om pad te gee’ (verse 16-17 DB). Hulle het nou net ‘n wonderwerk gesien en tog het hulle vir Jesus gevra om hulle uit te los. Miskien was hulle bang dat Hy met hulle lewensbestaan sou inmeng, soos Hy met die eienaar van die varke gedoen het. Of miskien het hulle gedink dat Hy so magtig en onvoorspelbaar was dat hulle Hom nie by hulle lewens wou betrek nie. ‘Los my uit, Here!’ Miskien het jy nog nie hierdie presiese woorde gebruik nie, maar is daar nie areas in jou lewe waarby jy eerder nie vir God wil betrek nie? Pastoor Mark Roberts sê: ‘As ons ons geheime gedagtes in woorde omskep, mag hulle dalk soos volg klink: ‘U kan my hê as dit by my familielewe kom, maar los my by die werk uit.’ Of, ‘Ek is gewillig om U ‘n tiende van my inkomste te gee, maar los die res van my geld uit.’ Of, ‘Ek is bly om U in my lewe te hê, Jesus, maar moenie van my vra om my ouers te vergewe nie.’ Of, ‘Ek wil hê dat U my Here moet wees, maar ek wil steeds aan sekere gedragsareas vashou; ek wil aanhou om op sekere maniere te sondig en U te weerstaan wanneer dit by sekere verhoudings kom.” God wil alles hê, nie net sekere dele van jou nie. Hy wil die heerser van alle aspekte van jou lewe wees – insluitend die areas waar jy eerder aan jou eie genade oorgelaat wil word.
Sielskos: Rom 3:21-6:23; Luk 5:1-11; Ps 91; Spr 3:3-4
2019-01-21
Psalm 90:1 NLV
Dawid het geskryf: ‘Sommige mense het in ‘n dorre land rondgedwaal… maar die pad na ‘n bewoonde stad kon hulle nie kry nie. Hulle was honger en dors, hulle was heeltemal uitgeput. ‘Here, help ons!’ het hulle geroep, en Hy het hulle uit hulle nood gered. Hy het hulle op die regte pad gelei, na ‘n stad waar hulle kon woon’ (Psalm 107:4-7 NLV). Ons siele het ‘n plek nodig waar ons rustig kan wees; ‘n plek waar ons al ons bekommernisse, moegheid en frustrasies kan neerlê. ‘Here, ek verlang, ek hunker na u woning. Met my hele wese, liggaam en gees, wil ek jubel oor die lewende God’ (Psalm 84:3 NLV). Jesus het geweet dat ons siele ‘n plek nodig gehad het wat ons huis kon noem en het gesê, ‘Niks moet ons van mekaar skei nie! Julle moet baie naby aan My bly…’ (Johannes 15:4 DB). Jesus nooi jou nie uit om by Hom te bly as ‘n gewone gas nie, maar as ‘n familielid wat al die voordele wat daarmee gepaard gaan, kan geniet. As iemand jou ‘n pragtige huis gee, hoe sal jy daarvan besit neem? Jy sal eers seker maak dat die gewer ernstig is, die nodige papierwerk inspekteer en dan intrek en dit geniet. Is die Here ernstig wanneer Hy sê: ‘Bly by My?’ Ja. Is jou naam op die nodige Bybelse ‘papierwerk’? Ja. Dan kan jy deur ‘n daad van geloof vandag jou goed oppak en intrek. Die digter S.T. Coleridge het geskryf, ‘Geloof is ‘n bevestiging en ‘n daad wat ewige waarhede huidige feite maak.’ Verander jou geloof in ‘n ‘huidige feit’ en verklaar: ‘Die Here is nou my permanente, veilige huis.’ Herhaal dit soveel keer as nodig. Eis die belofte: ‘Here, U was ons toevlug van geslag tot geslag’ op.
Sielskos: Rom 1:1-3:20; Luk 4:31-44; Ps 89:38-52; Spr 3:1-2
