2019-01-20
1 Johannes 1:7 NLV
Bloed is die enigste element wat elke deel van die liggaam bereik. Bloed se kosbare vrag suurstof en voedingstowwe dra lewe, energie, voeding en genesing na alle dele van die liggaam toe. Die witbloedselle funksioneer as paramedici wat wonde skoonmaak en siektes genees. Hulle is ‘n weermag wat potensiële aanvallers afweer. Daar is ‘n geestelike les hier uit te leer! Ons het almal die lewenskragtige bloed van Jesus nodig om ons te reinig, te beskerm en ons in stand te hou. Ons het dit elke dag nodig. Die Bybel sê: ‘As ons optrede van die lig getuig, leef ons soos Hy wat in die lig is… en die bloed van Jesus, sy Seun, maak ons skoon van alle sonde.’ Dit beteken as jy voortgaan om met Jesus te wandel, sal sy bloed voortgaan om jou van alle sonde skoon te maak. Vra enige dokter: Bloed bepaal wie die kind se regte vader is. Die bloed van Jesus bewys dat jy God se verloste kind is. Elkeen van ons hemelse Vader se seëninge vloei deur sy bloed na sy kinders toe. Dis wat ons in staat stel om geregtig en gekwalifiseerd voor Hom te staan om sy seëninge te ontvang. As ons egter nie verstaan dat God ons aanvaar en ons deur hierdie bloed sien nie, sal ons bemagtig maar onseker wees en ons geestelike gawes gebruik, maar onder onnodige veroordeling lewe. Berader, sê vir jou kliënte wat seer het dat hulle deur die krag van Jesus se bloed elke vesting in hulle familie en elke ketting wat hulle aan hulle verlede bind, kan afbreek. Neem vandag ‘n oomblik om God vir die seëning van Jesus se bloed te dank.
Sielskos: Rig 16:23-31; 2 Kor 12:3-10
2019-01-19
Filippense 3:13 DB
Om met vertroue vorentoe op jou lewensreis te beweeg, het jy ‘n betroubare padkaart nodig. In die Bybel word dit ‘n droom of visie genoem. Vir Moses was dit om God se mense uit slawerny na die Beloofde Land toe te lei. Vir Florence Nightingale het dit beteken om genesing en hoop aan die gewonde en sterwende soldate in die Krim-oorlog te bring. Vir Thomas Edison was dit om die wêreld met gloeilampe te verlig. Die feit bly staan, enigiemand wat al ooit ‘n verskil in die lewe gemaak het, het met ‘n droom begin wat uiteindelik hulle lewenspassie geword het. Vir die uitgewers van hierdie dagstukkies, is dit om God se Woord in die hande van soveel mense as moontlik in elke nasie op aarde te plaas! Hoe weet jy of jou visie van God af kom? Dit sal jou seën en vir ander tot voordeel wees. As jou droom egter is om in ‘n herehuis te bly en ‘n fortuin vir jouself bymekaar te maak, moenie daarop staatmaak dat God dit sal onderskryf nie. Inspirasie sonder perspirasie is net ‘n dagdroom. Veertig persent van die mense wat jy ontmoet, het wonderlike idees, maar al wat hulle daaraan doen, is om daaroor te praat. Die ander veertig persent van mense werk hard en sal gewillig wees om hulle alles vir ‘n droom te gee – maar hulle het nie een nie. Net die laaste twintig persent van mense het ‘n droom en die geloof om dit te bewaarheid. Selfs as jy deel van hierdie laaste groep is, is daar geen waarborge dat jy suksesvol sal wees nie. Jy het egter ‘n goeie kans – beter as tagtig persent van die mense om jou. Gaan dus voort – waag dit om te droom.
Sielskos: Jes 63-66; Luk 4:14-30; Ps 89:15-37; Spr 2:21-22
2019-01-18
1 Tessalonisense 1:8-9 NLV
Jack Eckerd, die stigter van die Eckerd apteekgroep, wat op daardie stadium die tweede grootste apteekgroep in Amerika was, het vriende geraak met Chuck Colson, wat die stigter van die Prison Fellowship was. Hy het Colson aan verskeie invloedryke groepe in Florida voorgestel in ‘n poging om verandering in Florida se tronksisteem mee te bring. Gedurende hulle reise het Chuck die geleentheid gehad om sy nuutgevonde geloof in Jesus Christus met Jack te deel. Hy het ‘n paar boeke vir Jack gegee en uiteindelik saam met hom gebid om ‘n Christen te word. Kort daarna het Jack verby die tydskrifrak in een van sy winkels geloop, toe hy twee pornografiese tydskrifte op die rak opmerk. Die teenwoordigheid van hierdie tydskrifte het hom in die verlede nooit gepla nie, maar dit het nou! Jack het die president van sy maatskappy gebel en vir hom gesê: ‘Kry daardie tydskrifte uit my winkels uit.’ Die president het gestry: ‘Maar ons maak ‘n wins van drie miljoen dollar ‘n jaar uit daardie tydskrifte uit.’ Jack het egter aangedring: ‘Verwyder hulle.’ So is al sulke tydskrifte op een dag uit sy sewentien honderd winkels verwyder. Toe Chuck Colson Jack oor sy besluit uitvra, het hy geantwoord: ‘Hoekom anders sal ek drie miljoen dollar weggee? Die Here sal my nie daarmee laat wegkom nie.’ Wanneer jy daaraan verbind is om Christus te volg en volgens die beginsels van die Skrif te leef, sal God jou ook nie daarmee laat wegkom nie. Laat dieselfde van jou gesê word wat Paulus van die gelowiges in Tessalonika gesê het: ‘…óral het julle geloof in God bekend geword… hoe julle van die afgode af weggedraai het na God toe…’
Sielskos: Jes 58-62; Luk 4:1-13; Ps 89:1-14; Spr 2:20
2019-01-17
2 Timoteus 2:3 NLV
Daar is twee tipes kritiek: konstruktiewe kritiek en destruktiewe kritiek. Die een bou jou op en die ander een breek jou af. Wees slim oor hoe jy op ongegronde kritiek en skinderstories reageer. Wanneer jou kritici anoniem wil bly, is hulle nie jou reaksie waardig nie. Daar is ‘n verhaal van ‘n pastoor wat ‘n brief ontvang het met net een woord daarop – DWAAS! Die volgende Sondag het hy dit opgehou en vir sy gemeente gesê, ‘Ek het die vreemdste brief hierdie week ontvang. Die persoon wat dit geskryf het, het egter vergeet om die brief te onderteken!’ Jy sê: ‘Maar hulle probeer om my reputasie te beskadig.’ D.L. Moody het gesê: ‘As ek vir my karakter sorg, sal God vir my reputasie sorg’ (sien Jesaja 54:17). Enige tyd wanneer jy by ‘n waardige saak betrokke is, sal mense nie net probeer om jou af te breek nie, maar ook om jou op die grond te hou. Toe Paulus Timoteus vir die bediening opgelei het, het hy vir hom gesê: ‘Verduur saam met my lyding soos ‘n goeie soldaat van Christus Jesus.’ Moeilike mense word in ons pad geplaas, nie om ons te verslaan nie, maar om ons te ontwikkel. Leiers weet dit, dus bly hulle en maak die werk, ongeag die koste, klaar. Net soos die kaptein saam met die skip ondergaan, bly ‘n ware leier totdat die werk afgehandel is. Hoe moet jy dan reageer? Deur vir hulle te bid! Jesus het gesê, ‘Seën dié wat julle vervloek. Bid vir hulle wat julle seermaak…[Dan] sal julle werklik optree as kinders van die Allerhoogste…’ (Lukas 6:28, 35 NLV).
Sielskos: Jes 53-57; Luk 3:21-38; Ps 84; Spr 2:16-19
2019-01-16
Efesiërs 4:32 NLV
Sommige van ons blink uit in ons loopbane, maar tree soos ‘n bul in ‘n glashuis op wanneer dit by ons verhoudings kom. Dan rasionaliseer ons dit deur te sê: ‘Ek het nie bedoel om iemand seer te maak nie,’ of ‘Dis maar net hoe ek is.’ Jammer. God laat ons nie so maklik daarvan afkom nie. Wanneer iemand jou irriteer, verwag God van jou om twee dinge te doen: 1) Wees die eerste een om uit te reik. Jy mag dalk reg wees, maar as jy wrokkig voel, watse nut het dit dan? Dink daaroor: As jy net ‘n jaar oorgehad het om te lewe, sou jy nog een sekonde van jou tyd aan sulke dinge spandeer het? Nee! Die Bybel sê: ‘Vergewe mekaar soos God julle vergewe het…’ (Efesiërs 4:32 NLV). God het die eerste tree geneem om ons te vergewe, sodat ons weet hoe om dit vir ander mense te doen. 2) Jy moet begrip hê. Wanneer sommige van ons ons punt probeer bewys, stoomroller ons oor almal en alles in ons pad. Doelgerigte, tydsbewuste mense kan hieraan skuldig wees. Die Bybel sê: ‘Wees eerder vriendelik met mekaar. Gee vir mekaar om. Vergewe mekaar soos God julle vergewe het.’ Die kans is goed dat die mense wat onder jou vel kom nie probeer om jou lewe moeilik te maak nie; hulle sukkel om hulle eie lewens te hanteer. Sodra jy begryp dat hulle nie kwaadwillig is nie, sal jy deernis vir hulle begin kry. Dis hoe dit met God is. ‘Hy sal ‘n geknakte riet nie verder afbreek nie. Mense wat dof brand soos ‘n lamppit sal hy nie uitdoof nie…’ (Jesaja 42:3 NLV). Vra Hom vandag om jou te wys hoe om sy liefde aan diegene wat jou irriteer, te bewys.
Sielskos: Jes 49-52; Luk 3:11-20; Ps 81; Spr 2:11-15
2019-01-15
Psalm 55:23 NLV
Soms is die beste ding om te doen, om die situasie aan God oor te gee. Kyk na Jesus; Hy het sy bediening eers op dertig begin. Wat van al daardie ‘vermorste’ jare? Hy het dit aan God oorgelaat. Hoe het Hy ook gereageer teenoor diegene wat sy boodskap gehoor het, hulle skouers opgetrek het en weggeloop het? Hy het dit aan God oorgelaat. Wat van daardie klomp Fariseërs wat Hom soveel moeilikheid gegee het? Hy het hulle ook aan God oorgelaat. In The Finishing Touch, beskryf Charles Swindoll ‘n tyd in sy bediening toe hy deur eindelose eise gedrewe en gedreineer gevoel het. Hy skryf: ‘As mense nie verander het nie, het ek verantwoordelik gevoel. As iemand die pad byster geraak het, was dit op een of ander manier my fout. As daar nie aanhoudende groei was nie, het ek opgetree asof ek dit moes maak gebeur. As ‘n preek nie mooi duidelik of kragtig was nie, het ek die hele Maandag en die helfte van Dinsdag daarmee geworstel. Praat van vermorste energie! Ek het met tyd en ouderdom verbeter. Amper al die dinge wat eens op ‘n tyd my vreugde gesteel en my motivering aangeval het – gee ek eenvoudig aan God oor. Beteken dit ek gee nie om nie? Natuurlik gee ek om. Daardie bekommernisse is egter nou in die Een wat hulle kan hanteer se hande geplaas. Ek het geleer om die dinge wat my eens op ‘n tyd gepla het, aan die Een oor te gee wat nie omgee om gepla te word nie. Waar kritiek my voorheen vir dae ontstel het, het ek nou geleer om te sif, te skuif en te seil. Ek doen wat ek kan – en gee die res aan God oor.’
Sielskos: Jes 45-48; Luk 3:1-10; Ps 79; Spr 2:9-10
