2019-01-14
Markus 11:23 NLV
Jy moet drie dinge doen om dit wat God in sy Woord belowe het, te ontvang. Eerstens, neem ‘n besluit. Vat sy belofte vas en moenie laat gaan nie. God reageer op ‘n geloof wat uithou en ‘n besluit wat geneem is: ‘…by God is alles moontlik!’ (Matteus 19:26 NLV). Die voormalige bofbalster, Sam Ewing, het gesê: ‘Niks is so vernederend soos om toe te kyk hoe iemand iets doen wat jy gesê het nie gedoen kan word nie.’ Tweedens, visualiseer jou oorwinning. Voor konstruksie begin, het die argitek reeds die eindresultaat in sy of haar gedagtes gesien. Deur geloof het Abraham sy kinders ‘gesien’; hy het hulle elke keer getel wanneer hy na die sterre opgekyk het (sien Genesis 15:5). Gebruik jou geheue om weer oorwinnings in die verlede te sien en gebruik jou verbeelding om toekomstige oorwinnings te sien. Dis wat Dawid gedoen het toe hy Goliat verslaan het. Jy moet jou reus in die gesig kyk en verklaar: ‘In die Naam van die Here gaan jy val.’ Derdens, spreek tot jou situasie. Jesus het gesê: ‘… Julle moet geloof in God hê. Dit verseker ek julle, julle kan vir hierdie berg sê: ‘Mag God jou oplig en in die see gooi,’ en dit sal so gebeur. Al wat nodig is, is dat julle regtig sal glo en nie in julle harte twyfel nie’ (Markus 11:22-23 NLV). Moenie net oor jou berg praat nie, praat met hom! Maak seker dat dit wat jy sê, in lyn met God se Woord is. Maak sy Woorde jou woorde en die berg sal jou slaaf word. Hy moet – want Jesus het so gesê!
Sielskos: Jes 42-44; Luk 2:41-52; Ps 74:12-23; Spr 2:7-8
2019-01-13
Jakobus 1:4 NLV
Jy is nader daaraan as wat jy dink om die mens te word wat God wil hê jy moet wees. Deur sy genade, sal jy deur hierdie toets kom en sterker en wyser aan die ander kant uitkom. Paulus sê: ‘…As God aan ons kant is, wie kan ooit téén ons wees?’ (Romeine 8:31 NLV). God is aan jou kant! Die tronktralies waarteen jy slaan is net in jou gedagtes. Omdat jy hulle daar gebou het, kan jy hulle met God se hulp afbreek. God wil jou vrymaak van die bang houding wat jou vir so lank teruggehou het; om jou vry te maak om jou volle potensiaal te bereik. Die regte houding kan amper enige struikelblok oorkom. Die Bybel sê byvoorbeeld: ‘Die liefde sal nooit vergaan nie…’ (1 Korintiërs 13:8 NLV). Hoekom? Omdat liefde nie van jou emosies of omstandighede afhang nie, dis ‘n slaaf van jou wil. Liefde is ‘n besluit! Jesus het gesê: ‘Dit is my opdrag: Julle moet mekaar liefhê soos Ek julle liefgehad het’ (Johannes 15:12 NLV). As dit Jesus se opdrag is, sal Hy jou in staat stel om dit te vermag! Om te begin is gewoonlik die moeilikste deel. Die reis van ‘n duisend myl begin met een tree; daarna raak dit makliker. Wees egter bedag op ou houdings wat sal probeer om sterker as ooit na die oppervlak terug te keer. Moet hulle nie toelaat om dit te doen nie. Die radiokommentator, Paul Harvey, het gesê: ‘Mens kan altyd agterkom wanneer jy op die pad na sukses is; dis al die pad opdraande.’ Wees dus geduldig; dit sal tyd neem om daar te kom. Enigiets waardevol is egter die moeite werd om voor te werk!
Sielskos: 1 Sam 3:1-11; Hand 9:1-9
2019-01-12
2 Tessalonisense 3:11 NLV
Eendag het Petrus vir Johannes gekyk en vir Jesus gevra: ‘…Wat van hom, Here?’ Jesus reageer daarop: ‘…wat het dit met jou te doen? Volg jy net vir My!’ (Johannes 21:21-22 NLV). As die apostel Petrus in die moeilikheid kon kom omdat hy ingemeng het, kan enigeen van ons in die moeilikheid daaroor kom. Die kwessie gaan nie daaroor om ander mense te help nie; dit gaan daaroor om te weet wanneer om jou by jou eie besigheid te bepaal. Soms spring ons in en probeer probleme oplos sonder dat ons gevra word. Nie net is ons pogings vrugteloos nie, ons word ook daarvoor verkwalik. Soos jy geestelik meer volwasse word en oor jou behoefte kom om almal ‘reg te sien’, word die lewe eenvoudiger. Noudat jy nie meer inmeng waar jy nie uitgenooi is nie, is jy meer beskikbaar om te help waar jy regtig benodig word. Weet jy hoekom ons so baie op ander mense se tekortkominge fokus? Ja, om te keer dat ons nie te veel selfondersoek instel nie. Die enigste ding wat jy aan ander mense kan verander – is jou houding teenoor hulle. Paulus skryf: ‘Ons sê dit omdat ons hoor dat sommige mense… hulle met ander persone se sake bemoei. In die Naam van die Here Jesus Christus beveel ons sulke mense… dat hulle rustig hulle werk moet verrig en so hulle eie brood moet verdien’ (2 Tessalonisense 3:11-12 NLV). ‘n Berader sê: ‘Om ‘n vredemaker te wees beteken nie dat ons in die middel gaan staan nie. Ons is draers van vrede deurdat ons self vredig bly en nie ekstra chaos veroorsaak wanneer ons in die middel van ander mense se sake en verhoudings kom nie.’
Sielskos: Jes 38-41; Luk 2:34-40; Ps 74:1-11; Spr 2:6
2019-01-11
Hebreërs 11:26 NLV
Moses het besef dat wanneer jy nie besig is om jou God-gegewe droom te vervul nie, sal ‘n koning se paleis jou nie eens gelukkig maak nie. ‘Omdat Moses geglo het, het hy as volwasse man geweier om as die seun van Farao se dogter bekend te staan. Hy het die swaarkry saam met God se volk verkies bo die kortstondige genieting van die sonde. Vir hom was die lyding wat hy ter wille van Christus, die Messias, moes deurmaak, ‘n groter rykdom as die skatte van Egipte… Hy het volgehou soos iemand wat sy oog op die onsienlike gevestig hou’ (verse 24-27 NLV). Wanneer God jou ‘n droom gee, sal jy dinge sien wat ‘onsienlik’ vir ander mense is. Dit bring ons my die volgende droomdoder: Gebrek aan verbeelding. Robert Orben het gesê, ‘Onthou altyd dat daar net twee tipes mense in hierdie wêreld is – die realiste en die dromers. Die realiste weet waarheen hulle gaan. Die dromers was alreeds daar.’ Moses het die Beloofde Land ‘gesien,’ lank voor hy daar aangekom het. Dis wat hom veertig jaar in die woestyn gedra het. God het nie ‘n fout gemaak toe hy vir jou verbeelding gegee het nie. As gevolg daarvan kan jy in die middel van ‘n droom staan en sien hoe dit bewaarheid word, selfs wanneer ander mense daaraan twyfel. As jy dus ‘n dromer is wat reeds daar is in jou verbeelding, vertrou op God en begin aan jou droom werk. As jy uit ‘n ontmoedigende agtergrond kom, of dink dat jy nie ‘n groot verbeelding het nie, moenie hoop verloor nie. Jy kan steeds ‘n droom ontdek en ontwikkel. God het daardie vermoë in jou geplaas!
Sielskos: Jes 34-37; Luk 2:21-33; Ps 71:17-24; Spr 2:3-5
2019-01-10
Numeri 14:24 NLV
Kaleb was werklik merkwaardig. Hy het nie ‘n plan vir aftrede of ‘n rystoel gehad nie! Op vyf-en-tagtig het hy daarvan gedroom om sy eie berg in die Beloofde Land te besit. Selfs toe hy sien dat daar reuse op die berg bly, het dit hom nie afgeskrik nie. Toe die mense rondom hom die reuse sien en die aftog wou blaas, het Kaleb gesê, ‘…Moenie bang wees vir die mense van die land nie. Hulle is ons slagoffers. Hulle het geen beskerming nie. Die Here is met ons. Moenie bang wees nie!’ (vers 9 NLV). Soos jy in geloof groei, sal jy die aanslae van die Vyand kan teenstaan en sodoende sterker word. Jy kies óf om in die agtergrond weg te smelt, óf om uit te staan! God het gesê: ‘My dienaar Kaleb het egter ‘n ander gesindheid teenoor My gewys. Hy het by My bly staan. Ek sal hom in die land laat kom wat hy gaan verken het. Sy nageslag sal die land besit.’ Let op, Kaleb het ‘n ‘ander gesindheid’ gehad, wat ons by nog ‘n droomdoder bring wat jy moet oorkom: Gebrek aan selfvertroue. Drome is broos. Hulle verkeer die meeste in gevaar wanneer hulle vir jou nuut is, wanneer die mense vir wie jy lief is en respekteer dit nie goedkeur nie en wanneer jy nie ‘n rekord van sukses het waarop jy kan terugval en wat vir jou selfvertroue gee nie. Dis op hierdie punt wat jy God moet ken en ‘n verhouding met Hom moet hê. ‘…Dié wat in hulle God glo, sal egter sterk staan en doen wat reg is’ (Daniël 11:32 NLV). God kan jou wys hoe om geleenthede te vind, te gebruik en wins uit hulle te slaan, selfs in die slegste van omstandighede.
Sielskos: Jes 30-33; Luk 2:8-20; Ps 71:1-16; Spr 2:1-2
2019-01-09
Romeine 4:17 NLV
Wanneer jy dit waag om te droom, werk die God wat ‘dinge wat nog nie bestaan, aanspreek asof hulle reeds werklikheid is,’ binne-in jou. Daar is egter ‘n derde droomdoder wat jy te bowe moet kom: Tevredenheid met middelmatigheid. ‘n God-gegewe droom sal jou strek; jy kan nie daarna uitreik en terselfdertyd veilig in middelmatigheid bly nie. Die twee is onversoenbaar. Wanneer jy tevrede met middelmatigheid word, is dit aanloklik om dit op ander mense, of jou persoonlike omstandighede, of die sisteem te blameer. Die waarheid is egter dat middelmatigheid altyd ‘n persoonlike keuse is. Wanneer jy nie ‘n dwingende droom het nie, loop jy die gevaar dat jou lewe eenvoudig weg sal gly. Die skrywer, Kenneth Hildebrand, stel dit so: ‘Die armste van alle mense is nie die man sonder ‘n sent op sy naam nie. Dis die man sonder ‘n droom. Hy is soos ‘n groot skip wat vir die magtige oseaan gebou is, maar wat op ‘n meuldam probeer navigeer. Hy het nie ‘n hawe om te bereik nie, geen horison om te sien nie, geen kosbare vrag om te dra nie. Sy ure word deur roetine en kleinlike take geabsorbeer. Dis g’n wonder hy raak onvergenoegd, bakleierig en keelvol nie. Een van die lewe se grootste tragedies is ‘n persoon met ‘n tien-by-twaalf kapasiteit en ‘n twee-by-vier siel.’ As jy voel dat jou lewe nader aan middelmatigheid is as wat jy wil hê, moet jy meer doen as om net te droom. Niks sal jou help om uit jou groef te breek soos ‘n God-gegewe droom nie. As jy nie reeds een het nie, vra God om jou een te gee. Hy kan dit dalk vir jou oombliklik gee, of oor ‘n tydperk, maar Hy sal dit vir jou gee.
Sielskos: Jes 26-29; Luk 2:1-7; Ps 46; Spr 1:32-33
