2019-05-17
Galasiërs 6:2 DB
Jou doel moet wees om mense te help om hulle krisis te hanteer en daardeur te groei. Dit beteken dat jy hulle vlak van vrees moet verlaag en hulle moet help om weer normaal te funksioneer deur: 1) Kontak met hulle te maak. Mense in ‘n krisis neig om te onttrek eerder as om vir hulp te vra. Jy sal dus dalk die eerste skuif moet maak en begrip en opregte belangstelling moet toon. Twee eenvoudige stappe kan ‘n groot verskil maak. Luister aandagtig na hulle bekommernisse en waarnemings en behou oogkontak. Hierdie twee dinge sal hulle laat voel dat hulle waardig is en dat jy verstaan. 2) Hulle te help om hulle angs te verminder. ‘n Kalmerende teenwoordigheid kan hulle stres verlaag. Moedig hulle aan om oor hulle bekommernisse te praat en bied hoop aan. Sê byvoorbeeld: ‘Daar is maniere om hierdie situasie te hanteer.’ Die kans is goed dat die persoon se uitkyk verwronge of oorpessimisties is, stel dus ander perspektiewe voor. Byvoorbeeld: ‘Mag ek ‘n ander manier om hierna te kyk voorstel?’ Gee ook hoop vir die toekoms: ‘Ek besef dat dit moeilik is, maar met God se hulp glo ek dat jy dit sal kan hanteer.’ Gee hulle dan ‘n Bybelse belofte om dit te staaf (sien Jeremia 33:3). 3) Deur op die ware kwessie te fokus. In ‘n krisis voel mense dikwels deur die verwarrende feite, potensiële probleme en noodsaaklike besluite oorweldig. Deur aan hulle bystand te bied oor watter kwessies eerste aangepak moet word en watter probleme eerste opgelos moet word, help jy om hulle nood te verlig. Om op die hede te konsentreer, eerder as om die verlede te bespreek of oor die toekoms te bekommer, kan hulle angs verminder en hulle bemagtig om die situasie beter te hanteer.
Sielskos: 1 Kon 3-5; Mark 7:24-37; Ps 93; Spr 11:30-31
2019-05-16
Romeine 12:8 DB
Jy sê: ‘Dis nie my verantwoordelikheid nie. Ek gaan nie betrokke raak nie!’ Sielkundiges noem dit ‘medelydende onttrekking,’ die geneigdheid om te vermy om iemand in moeilike omstandighede te help. Of jou motief nou ongerief, selfbeskerming of onverskilligheid is, dis verkeerd. Om ‘daar te wees’ is hoe jy jou liefde vir God en jou naaste demonstreer. Om te help beteken dat jy drie soorte krisisse kan herken: 1) Toevallige of omstandigheidskrisisse. Dit is dinge wat ons welstand skielik bedreig, ontwrigtende gebeurtenisse, onverwagte verliese, die ontdekking van ‘n ernstige siekte, die dood van ‘n geliefde, ‘n familie ineenstorting, die verlies van lewensbestaan en sekuriteit. Job het alles hiervan ervaar en gewonder hoekom God toelaat dat so baie slegte dinge met hom gebeur. 2) Ontwikkelingskrisisse. Hierdie gebeur deur die loop van ons alledaagse lewe. Dit is dinge soos om te trek, universiteit toe te gaan, by die getroude lewe aan te pas, ouerskap, aftrede, veroudering, afname in gesondheid en die verlies van vriende. Abraham en Sara het verskeie kere getrek. Hulle het ook jare van kinderloosheid en familiestres verduur, insluitend die uitdaging om Isak te moet offer. 3) Eksistensiële krisisse. Dit is wanneer ons ontstellende waarhede oor onsself in die gesig moet staar. Ons mag onsself dalk as ‘n mislukking sien, daarmee stoei dat ons geskei is, leer dat ons siekte ongeneeslik is, verwerping as gevolg van ons ras, klas, ouderdom, of geslag ervaar, of besef dat ons te oud word om ons lewensdoelwitte te bereik. Ware ‘helpers’ verstaan, raak betrokke en bemoedig. Hulle hou hulle oë oop en is vinnig om ‘mense te help wat in nood verkeer.’
Sielskos: 1 Kon 1-2; Mark 7:14-23; Ps 88:9b-18; Spr 11:27-29
2019-05-15
Psalm 149:6 NLV
Die Christelike lewe is ‘n slagveld met ‘n vyand wat daarop uit is om ons elke dag te verslaan. God het ons egter strategieë gegee om te wen, waarvan lofprysing een is. Wanneer Israel se weermag oorlog gemaak het, het die stam Juda die leiding geneem. Die naam ‘Juda’ beteken ‘loof die Heer.’ Wanneer jy dus die geveg binnegaan, loof God met jou lippe en Hy sal voor jou uitgaan. Dis die ‘lofprysing strategie’ wat die mure van Jerigo vir Josua laat ineentuimel het en veroorsaak het dat Josafat se vyande mekaar vernietig het nog voor die geveg begin het (sien 2 Kronieke 20). Dis ‘n besluit om God te loof wanneer jy voor ‘n situasie te staan kom wat jy nie kan hanteer nie; om op Hom eerder as jou probleem te fokus. Jy mag dalk nie waardig voel nie – maar Hy is! Jy mag dalk nie in staat voel nie – maar Hy is! Herinner God aan sy beloftes. Niks roer Hom meer as die aangesig van sy kinders wat sy Naam loof en sy beloftes opeis nie. Jesus het gesê: ‘Ek vertrou die sleutels van God se koninkryk aan jou toe. Wat jy ook al op aarde toesluit, sal ook by God toegesluit bly, en wat jy ook al oopsluit, sal ook by God oopgesluit bly’ (Matteus 16:19 NLV). Lofprysing nooi God uit om in te tree, gebruik dit dus. Kry ook iemand om by jou in lofprysing aan te sluit (sien Matteus 18:19). Vermenigvuldig jou impak voor die troon van God. Die Bybel sê: ‘Teen middernag was Paulus en Silas besig om te bid en tot lof van God te sing… Al die tronkdeure het [skielik] oopgevlieg…’ (Handelinge 16:25-26 NLV). Die woord vir jou vandag is dus: Gebruik die ‘lofprysing strategie!’
Sielskos: Heb 11:17-13:25; Mark 7:1-13; Ps 88:1-9a; Spr 11:24-26
2019-05-14
Lukas 14:18 NLV
Jesus het die verhaal van ‘n man wat ‘n feesmaal beplan het en verskeie gaste uitgenooi het, vertel. Luister na sommige van hulle verskonings hoekom hulle nie die feesmaal kan bywoon nie: ‘Ek het ‘n stuk grond gekoop.’ ‘Ek het ‘n paar osse gekoop.’ ‘Ek is pas getroud.’ Dus het die gasheer gesê: ‘…niemand van hulle wat genooi is, sal selfs die kleinste proeseltjie smaak van wat ek vir hulle voorberei het nie’ (vers 24 NLV). Miskien dink jy dat jy anders is, dat jy ‘n goeie rede het om vir God nee te sê. Is dit egter die moeite werd om daarvoor jou roeping mis te loop? Wanneer God met jou praat, is dit die oomblik van waarheid! Op daardie punt maak jy óf ‘n verbintenis, óf ‘n verskoning. Daar en dan besluit jy jou bestemming! Wat vra God vir jou om te doen? Wat laat jou huiwer? Vrees vir mislukking? Vrees vir kritiek? Vrees word dikwels as ‘n verskoning geklee. Elke keer wat jy weifel of terugtrek, lê jy nog ‘n baksteen in die muur wat jou uiteindelik daarvan gaan weerhou om jou Godgegewe lot te bereik. Die skrywer John Mason sê: ‘Geleentheid gaan dikwels in beraadslaging verlore.’ As God dus vir jou sê om iets te doen, neem sy hand en beweeg in geloof vorentoe. Jy kan nie die rigting van die wind beheer nie, maar met God se genade kan jy jou seile aanpas om jou te neem waarheen jy moet gaan. George Washington Carver het gesê: ‘Nege-en-negentig persent van mislukkings kom van mense wat ‘n gewoonte het om verskonings te maak.’ Onthou, geleentheid is ‘n besoeker: Moenie aanneem dat dit môre gaan terugkom nie. Nou is die tyd om te beweeg – beweeg dus terwyl die deur oop is!
Sielskos: Heb 9:1-11:16; Mark 6:45-56; Ps 75; Spr 11:23
2019-05-13
Lukas 19:3 NLV
Die Bybel sê: ‘…Saggeus… was ‘n hooftollenaar en ‘n ryk man. Hy het sy bes probeer om te sien wie Jesus is… Hy het vooruit gehardloop… en in ‘n vyeboom geklim om Jesus te sien omdat Hy daar sou verbygaan’ (verse 2-4 NLV). Die verhaal van Saggeus leer ons dat ryk mense net so beskadig soos arm mense kan wees. Hoe sommige van hulle beskadig is, is in die verhaal van hoe hulle ryk geword het. Wanneer jy jou gewete skend, is dit moeilik om in jou eie vel te lewe. Wanneer jy jou kernwaardes vir geld verruil, kan jou sukses hol en jou skuld swaar wees. Saggeus het hiermee gesukkel: ‘…Here… as ek iets van iemand met ‘n slenter bekom het, gee ek dit vierdubbel terug’ (vers 8 NLV). As dit is hoe jy vandag voel, sê Jesus vir jou die drie dinge wat Hy vir Saggeus gesê het: 1) ‘Maak gou!’ Moenie jou redding ‘n dag langer uitstel nie. Op enige gegewe oomblik is jy so naby aan die ewigheid soos ‘n foutiewe hartklop of ‘n kwaadaardige sel. Moenie met jou siel dobbel nie; maak reg met God terwyl jy nog kan. 2) ‘Klim dadelik af.’ Word nederig. Kniel by die voete van die Een wat jou liefhet en wat sy lewe gegee het om jou te verlos. Dit maak nie saak hoe erg jy misluk het nie: ‘As ons egter ons sondes bely, is Hy betroubaar en regverdig om ons sondes te vergewe en ons skoon te maak van elke verkeerde optrede’ (1 Johannes 1:9 NLV). 3) ‘Want Ek moet vandag by jou kom oorbly’ (Lukas 19:5 DB). Weier om nog een dag sonder die versekering dat Christus in jou hart woon, jou treë rig en oor alles van jou waak, te leef.
Sielskos: Heb 5-8; Mark 6:30-44; Ps 18:30-50; Spr 11:22
2019-05-12
Johannes 4:4 NLV
Hoekom sê die Bybel dat Jesus deur Samaria moes reis? Omdat Hy ‘n beskadigde vrou moes verlos en die evangelie vir die eerste keer aan Samaria moes bekendstel. Dink aan die situasie waarin Jesus Hom bevind het: dit was baie warm, die reis was lank en Hy was te voet op reis. Hy het geweet dat Hy as gevolg van ‘n langdurige vyandskap tussen die Jode en die Samaritane nie welkom daar sou wees nie. In daardie dae het vrouens ‘n sluier oor hulle gesigte gedra en was hulle verbied om met mans buite hulle eie familie te praat. Hierdie vrou was reeds die onderwerp van skinderstories, omdat sy al vyf keer geskei was. Hoekom het Jesus dus gevoel dat Hy deur Samaria moet reis? Omdat Hy verby haar probleem gekyk het en haar potensiaal vir sy koninkryk gesien het. Die Bybel sê: ‘Uit daardie dorp het baie van die Samaritane in Jesus begin glo op grond van die woorde van die vrou wat met oortuiging kom vertel het…’ (vers 39 NLV). Daar is ‘n belangrike les hieruit te leer. Die skedule beheer Jesus nie; die wil van God en die behoeftes van mense wat seer het doen. Hy was gewillig om uit sy pad te gaan, tradisie op sy kop te keer en nuwe voorbeelde daar te stel om dit te doen. Let op wat Jesus na die tyd vir sy dissipels gesê het: ‘Sê julle dan nie: ‘Daar is nog vier maande voor die oes’ nie? Ek sê nou vir julle, kyk na die landerye; hulle vertoon reeds wit van die oes. Dié wat die oes insamel, ontvang vergoeding: Die vrug wat hulle insamel, is mense wat die ewige lewe beërf. Op só ‘n manier is hulle wat saai en hulle wat die oes insamel, saam bly’ (vers 35-36 NLV).
Sielskos: Eks 20:13; Gen 4:1-15; Matt 5:21-22
