2021-10-09
Filippense 3:10 DB
Dis een ding om van God te weet, maar dis iets heeltemal anders om Hom intiem te ken. Neem ‘n oomblik en ondersoek vandag jou lewe. Het jou wandel met God tot stilstand gekom? Is jou tenk leeg? ‘n Vol tenk is net moontlik as jy gereelde besoeke aan die vulstasie bring; wat beteken dat jy die petrolnaald moet dophou. ‘n Vol tenk gebeur ook nie net vanself nie; dit verg waaksaamheid, toewyding en optrede. Jou vlees sal elke dag teen jou werk en ongunstige omstandighede sal jou ontmoedig. As dit maklik was, sou enigiemand dit kon doen.
Die prys gaan aan diegene wat soos Paulus kan sê: ‘Een ding wil ek nou regtig graag hê, en dit is om Jesus te ken. Daardie krag wat Jesus lewend uit die graf laat uitstap het, wil ek ook hê. Ek wil nie weghardloop vir lyding soos Jesus s’n nie, al beteken dit ook dat ek soos Hy moet sterf. Ek weet tog dat ek soos Hy eendag lewendig uit die kloue van die dood sal stap’ (Filippense 3:10-11 DB).
Die Bybel vertel vir ons: ‘Alhoewel die mens en sy vrou sonder klere was, was hulle nie skaam vir mekaar nie’ (Genesis 2:25 NLV). Dís fisiese intimiteit! Die beste intimiteit is egter nie tussen ‘n man en ‘n vrou nie, maar met God! Paulus het nie net daarvoor gebid nie; hy het dit met sy hele hart nagestreef. Niks was vir hom belangriker nie.
Het jy so krities teenoor die mense rondom jou geword, dat jy soos ‘n ongelowige klink? Het jy toegelaat dat jou sondige gewoontes jou selfvertroue voor God steel? (Sien 1 Johannes 3:21-22). As dit die geval is, moet jy iets daaraan doen! Begin vandag om daarna te strewe om God intiem te leer ken.
Sielskos: 2 Sam 3:22-7:17; Joh 1:43-51; Ps 23; Spr 23:4-5
2021-10-08
Spreuke 22:7 NLV
Hoe om van finansiële skuld ontslae te raak: 1) Skryf jou finansiële doelwitte neer. Besluit wat waarlik belangrik is – hoeveel jy gaan spaar, hoeveel jy gaan spandeer en hoeveel skuld jy kan hanteer sonder om jou toekoms in gedrang te bring. Jy moet weet waarheen jy op pad is en hoe jy daar gaan kom.
2) Begin klein. Pak een rekening op ‘n slag aan. Dis wonderbaarlik wat jy kan bereik wanneer jy ernstig raak en daarmee volhou. Die Bybel sê: ‘…as ons nie tou opgooi nie, sal ons op die regte tyd oes’ (Galasiës 6:9 NLV).
3) Hou op om jou kredietkaart te gebruik vir dit wat jy nie kan bekostig nie. Jy betaal baie rente daarop en dit dra tot jou las by. Gebruik kredietkaarte slegs as jy gedissiplineerd genoeg is om nie oorboord te gaan nie. Jou bedoeling mag dalk goed wees, maar onvoorsiene omstandighede kan jou dwing om ‘n balans van maand tot maand oor te dra. As jou besteding heeltemal buite beheer is, moet jy plastiese chirurgie doen – deur jou kredietkaarte op te sny!
4) Gee meer. Dit mag dalk dwaas en vreemd klink wanneer jy uit skuld uit probeer kom. Jesus het egter gesê: ‘…Julle gawe sal na julle terugkom in volle maat, ingestamp, geskud om plek vir meer te maak, tot oorlopens toe vol… (Lukas 6:38 NLV).
5) Verwag afkeur. Wanneer jy begin om finansiële dissipline toe te pas, mag sommige mense dalk nie daaroor gelukkig wees nie – veral wanneer dit hulle persoonlik affekteer. As jy egter net die dinge in die lewe doen wat almal goedkeur, sal jy nie veel bereik nie. God wil hê dat jy vry van finansiële skuld moet wees – en vry moet bly (sien Johannes 8:36).
Sielskos: 2 Sam 1:1-3:21; Joh 1:29-42; Ps 131; Spr 23:1-3
2021-10-07
Filippense 4:13 ABA
Hardnekkige gewoontes neem ‘n lewe van hul eie aan; dis hoekom hulle aanhou groei. Hulle het ‘n brein wat vir jou dink, ‘n stem wat met jou praat en ‘n krag wat jou aanhou oorwin. Wat staan jou dus te doen? Bid en spreek God se Woord oor jou gewoonte uit!
Bid die volgende: ‘Here, u Woord sê dat as ek tot U roep, sal U my antwoord. Dat U saam met my in nood sal wees en my sal red en in eer herstel (sien Psalm 91:15). U het belowe dat deur die krag van u inwonende Gees, ek vry van hierdie kwaadwillige siklus van versoeking, sonde en mislukking kan wees (sien Romeine 8:2). U het gesê as ek my lewe ten volle aan U toewy, sal ek die krag hê om die Duiwel te weerstaan en dat hy van my af sal wegvlug (sien Jakobus 4:7). U Woord sê dat U my die mag gegee het om my ou geestelike vestings af te breek en beheer van elke eiewyse gedagte en impuls, te neem (sien 2 Korintiërs 10:5 NLV). U het belowe dat wanneer ek elke dag u Woord lees en daaroor mediteer, sal ek deel aan u Goddelike natuur kry en die neigings van my vlees oorkom (sien 2 Petrus 1:4). U het belowe om my in my gedagtes, emosies en wil te versterk; dat my selfwaarde alleenlik op u liefde vir my gebaseer sal word; dat U meer sal doen as wat ek vra of ooit kan dink om te vra – omdat U in my aan die werk is (sien Efesiërs 3:14-21). Vandag spreek ek oorwinning oor hierdie gewoonte uit, in Jesus se naam, Amen.’
Die woord vir jou vandag is: ‘Christus gee vir my die krag om enige iets te doen’.
Sielskos: Ef 4:17-6:24; Joh 1:14-28; Ps 29; Spr 22:26-29
2021-10-06
Eksodus 24:2 NLV
Dis noodsaaklik om alleen by God te wees om Hom duidelik te kan hoor. Vir ‘n generasie wat aan selfone en 24 uur media verslaaf is, kan dit ‘n moeilike konsep wees om te snap. Is jy ernstig daaroor om Jesus te volg? Hy het ‘…Hom gereeld in ‘n verlate plek afgesonder om te bid’ (Lukas 5:16 NLV). Hy het ‘…teen die berg uitgeklim om eenkant te gaan bid…’ (Matteus 14:23 NLV).
Die Bybel sê: ‘Hy het alleen agtergebly. Dáár kom hy ‘n man teë (die engel van die Here) wat tot die dagbreek met hom worstel’ (Genesis 32:24 NLV). Die grootste geestelike oorwinnings kom deur gevegte waar God jou roep om te veg wanneer jy alleen met Hom is. Hy verduidelik sy planne vir jou lewe wanneer daar niemand anders in die omtrek is nie. Dis omdat Hy wil hê dat jy deur Hom, en nie deur ander mense nie, beïnvloed moet word.
Wanneer God jou gereed maak vir ‘n spesiale opdrag, sal daar van jou verwag word om tyd buite die geselskap van ander mense deur te bring. In Eksodus het God gesê: ‘Moses, net jy mag naby aan die Here kom. Die ander mag nie naderkom nie…’ Nadat Elia ‘n nag alleen in ‘n grot deurgebring het, het God vir hom gesê: ‘Kom buitentoe en gaan staan voor My op die berg’… Terwyl Elia daar staan, het die Here by Hom verbygegaan…’ (1 Konings 19:11 NLV). Daniël ‘…het alleen agtergebly en na hierdie visioen staan en kyk…’ (Daniël 10:8 NLV). Jeremia het geskryf: ‘…Ek moes alleen sit omdat u hand op my was…’ (Jeremia 15:17 NLV).
Leer die verskil tussen eensaamheid en afsondering. Wanneer God jou op die kantlyn plaas, leer alles wat jy kan uit die ervaring uit en beweeg dan na die volgende vlak toe.
Sielskos: Ef 1:1-4:16; Joh 1:1-13; Ps 92; Spr 22:24-25
2021-10-05
Johannes 14:27 NLV
God stuur ons selde in situasies, waar ons gemaklik voel, in. In plaas daarvan belowe Hy ons om by ons, ten spyte van ons vrees, te wees. Dis God se teenwoordigheid, nie gemaklike omstandighede nie, wat ons geloof versterk en die beste in ons na vore bring.
God het vir Abraham gesê om ‘n ryk, bekende familie te verlaat en na ‘n land te gaan wat hy nie ken nie. Hy het verduidelik dat Abraham aan ‘n nuwe nasie wat die wêreld sou seën, geboorte sou gee. Abraham het gegaan en ‘n nasie is gebore. God het vir Moses gesê om die farao, die magtigste man op aarde, te konfronteer en dat God Moses sou gebruik om sy mense te verlos. Moses het gekonfronteer en God het verlos. God het vir Josua gesê dat as hy sterk en moedig sou staan wanneer almal anders na slawerny wou terugkeer, sal God saam met hulle gaan en vir hulle die land gee. Josua was sterk en moedig en God het saam met hulle gegaan en vir hulle die land gegee. Oor en oor sien ons hierdie patroon in die Skrif. Dawid het voor Goliat te staan gekom, Elia het voor die profete van Baäl te staan gekom, Daniël het voor ‘n trop leeus te staan gekom – en altyd was God, te midde van hulle vrese, daar.
Indien jy dalk dink dat hierdie verhale van dapperheid almal tot die verlede hoort, het die geskiedkundige, Everett Ferguson, bereken dat daar die afgelope vyftig jaar meer mense vir hulle geloof doodgemaak is, as in die eerste driehonderd jaar van die kerk se bestaan. Hier is dus Jesus se Woord aan jou wanneer iemand nie van jou hou nie, wanneer jy siek is of die ekonomie ineenstort en jou pensioen krimp: ‘Ek laat vir julle vrede na; my vrede deel Ek met julle…’
Sielskos: 1 Sam 27-31; Luk 24:45-53; Ps 63; Spr 22:17-23
2021-10-04
Lukas 15:20 NLV
Goeie ouers probeer om hulle kinders ewe lief te hê. Dis egter die kind wat ons die nodigste het, wat die spesiale fokus van ons liefde word.
Die skrywer Erma Bombeck het gesê: ‘Elke moeder het ‘n gunstelingkind. Sy kan dit nie help nie. Sy is maar net menslik. Ek het een – die kind met wie ek ‘n spesiale band deel, met wie ek ‘n liefde wat niemand anders ooit sal kan verstaan nie, deel. My gunstelingkind was die een wat te siek was om roomys by sy verjaarsdagpartytjie te eet, wat masels op Kersfees gehad het, wat in die middel van die nag ‘n asma aanval gehad het, die kind in my arms by ongevalle. My gunstelingkind is die een wat sy woorde by die kunswedstryd vergeet het, die verkeerde rigting in ‘n rugbywedstryd gehardloop het en wie se fiets gesteel is omdat hy agtelosig was. My gunstelingkind was selfsugtig, onvolwasse, het ‘n slegte humeur gehad en was selfgesentreerd. Hy was weerloos, eensaam, onseker van homself – en heeltemal wonderlik. Almal het hul eie gunstelingkind. Dis altyd dieselfde een: die een wat jou op daardie oomblik nodig het. Wat jou om watter rede ook al nodig het – om aan vas te hou, om op jou te skree of seer te maak, om jou te druk, te vlei, om op af te pak – maar meestal net om daar te wees.’
Of soos Jesus oor die Verlore Seun gesê het: ‘…En toe hy nog ver weg was, het sy pa hom gesien aankom. Oorweldig met liefde en deernis het hy na sy seun toe gehardloop…’
Sielskos: 1 Sam 24-26; Luk 24:36-44; Ps 51; Spr 22:12-16
