2022-01-07
Jakobus 3:2 NLV
Wanneer dit by jou tong kom, is daar drie reëls: 1) Moenie te gou praat nie. ‘Ons maak almal baie foute. Maar ‘n mens wat sy tong in toom kan hou, kan dit ook met sy hele liggaam regkry’ (vers 2 NLV). Omdat jy nooit heeltemal bewus kan wees van alles waaroor ‘n persoon sensitief is nie, moet jy op die Heilige Gees staatmaak om jou woorde op so ‘n manier te rig dat dit nie pyn veroorsaak of hulle aan negatiewe ervarings herinner nie. Die teenoorgestelde is ook waar. Oefen om nie maklik aanstoot te neem nie en gee aan ander die voordeel bo die twyfel wanneer hulle iets sê wat verkeerdelik kan aanstoot gee.
2) Moenie te vinnig reageer nie. ‘Iemand wat ‘n antwoord gee voor hy die vraag gehoor het, is dwaas…’ (Spreuke 18:13 NLV). Voor jy praat, luister eers versigtig en maak seker dat jy verstaan wat gesê word. As jy nie verstaan nie – sê so. Jou behoefte om ‘goed te lyk’ kan veroorsaak dat jy die respek van die persoon wat jy probeer beïndruk, verloor.
3) Moenie jouself te vinnig verbind nie. Salomo skryf: ‘Moenie te gou praat nie. Moenie oorhaastig iets aan God belowe nie…’ (Prediker 5:1 NLV). Hy gaan voort deur te verduidelik dat ons nie moet probeer om ‘n belofte te verbreek deur te sê dat ons ‘n fout gemaak het nie. Jou woord is jou eer en wanneer jy ‘n belofte verbreek, maak jy mense seer en gee jy hulle vertroue prys.
Neem dus ‘n oomblik voor jy praat en indien nodig, neem tyd om daaroor te bid. Jou tyd en jou woorde is twee dinge wat nooit teruggeneem kan word nie, weeg dus jou woorde versigtig op.
Sielskos: Gen 13-16; Luk 1:57-66; Ps 42:1-5; Spr 1:20-27
2022-01-06
Johannes 15:2 DB
Jy moet jou aan die snoeiproses onderwerp. ‘…Hy snoei hulle en maak hulle skoon sodat daar baie plek vir die druiwetrossies is.’ Die snoeiproses beteken dat jy dooie takke afsny en lewende takke wegsny. Beide is noodsaaklik om die boom te vorm en groei te stimuleer. God sny egter nie net dit wat sondig en oppervlakkig is af nie, Hy sny ook dit wat lewendig en suksesvol is, weg; ‘n besigheid wat goed doen, ‘n bevredigende verhouding of ‘n plan wat lyk of dit goed werk. God sny nie net die ‘slegte’ af nie, maar ook die ‘goeie’ om jou sodoende die ‘beste’ te gee. Dis nie lekker nie, maar dit is absoluut noodsaaklik vir geestelike groei.
Wat wil God in jou lewe hê? Baie vrugte (sien Johannes 15:8). Dus gaan jy gesnoei word! Jy mag dalk tans ‘n besnoeiing ondergaan en dit mag dalk nie alles dooie hout wees nie. God sny dinge wat ons as produktief sien af, sodat meer vrugte in ons lewens geproduseer kan word. Ons glo dat ons getrou is, dus verwar en frustreer dit ons wanneer Hy aan ons snoei.
‘Hoekom doen U dit, Here? Ek het my besigheid aan U oorgegee, maar nou is dit nie winsgewend nie. Ek het my gesondheid aan U toevertrou, maar nou is ek in die hospitaal. Ek het getrou my tiende gegee, maar tog is ek bankrot.’ Wat gebeur? ‘Elke vorm van tug lyk vir ons op die oomblik meer na ‘n rede vir trane as vir blydskap, maar later sal dit vir hulle wat daardeur gebrei is, die blye oes oplewer van ‘n lewe volgens die wil van God’ (Hebreërs 12:11 NLV). Jy word vir groter vrugbaarheid gesnoei.
Sielskos: Gen 10-12; Luk 1:39-56; Ps 10:12-18; Spr 1:17-19
2022-01-04
Kolossense 2:7 ABA
Paulus skryf: ‘Julle het gehoor dat Christus Jesus die Here is, en julle glo in Hom. Nou moet julle lewe soos mense wat aan Hom behoort. Christus maak julle geloof sterk, soos ‘n wortel ‘n boom sterk maak… En julle moet aanhou om die dinge te glo wat julle geleer het, en julle moet altyd vir God dankie sê vir alles. Julle moenie luister na die mense wat dink hulle sê slim dinge en wat vir julle dinge laat glo wat nie waar is nie. Hulle het daardie dinge by ander mense geleer, nie by Christus nie… Julle behoort aan Christus. Christus het julle gered, en julle is heeltemal soos Hy wil hê julle moet wees. Christus is sterker as almal en alles wat oor die wêreld wil regeer’ (Kolossense 2:6-8, 10 ABA).
As jy ooit die Arizona woestyn besoek, sal jy die saguaro kaktus vind wat selfs in 50 grade celsius vrugte dra. Hoekom? Omdat sy wortels 15-20 meter in alle rigtings uitsprei. Jy moet diep geestelike wortels hê as jy dit deur die droogte van die lewe wil maak. Enigeen kan ‘n dag of twee van droogte oorleef, maar wat van uitgebreide seisoene van stres, rou, gebrek, siekte en teëspoed? Dit waaraan jou lewe vasgewortel is, is waaruit jy krag sal put.
Die Psalmdigter het geskryf: ‘Gelukkig is die mense wat… vreugde vind in die gebooie van die Here en sy voorskrifte dag en nag oordink. Hulle is soos bome geplant langs ‘n rivier, wat vrugte dra op die regte tyd. Hulle blare verwelk nie; in alles wat hulle doen is hulle voorspoedig. Maar dit geld nie die goddeloses nie. Hulle is soos kaf wat die wind verstrooi’ (Psalm 1:1-4 NLV). Bid: ‘Here, wortel my diep binne-in U.’
Sielskos: Gen 4-6; Luk 1:11-25; Ps 90:7-17; Spr 1:5-9
2022-01-03
Spreuke 12:3 AFR53
Jy moet diep geestelike wortels ontwikkel. ‘Maar gelukkig is dié mense wat op die Here vertrou… Hulle is soos bome wat langs ‘n rivier staan, hulle wortels reik diep tot by die water. Hitte bedreig hulle nie, hulle blare bly groen. Lang maande van droogte pla hulle ook nie, hulle hou nie op om vrugte te dra nie’ (Jeremia 17:7-8 NLV). Hierdie Skrifgedeelte gee jou een rede hoekom jy diep geestelike wortels moet hê: sodat jy dit deur moeilike tye – tye van hitte en droogte – kan maak. Salomo het gesê: ‘Iemand wat verkeerd lewe, het nie vastigheid nie. Iemand wat regverdig lewe, is stewig geanker’ (Spreuke 12:3 NLV).
Dis wanneer seisoene van teëspoed jou tref wat jy ontdek waaraan jy geanker is: God se krag of bloot jou eie. Wanneer die Bybel van ‘hitte’ praat, praat dit van druk in die lewe. Wanneer dit van ‘droogte’ praat, praat dit van seisoene van krisis en gebrek. Wat is dus die antwoord? Wortels wat diep tot by die water reik. Wat is die resultaat? Hulle hou nie op om vrugte te dra nie. As jy die wortels van ‘n groot eikeboom sou meet, sou dit oor verskeie honderde kilometers strek. Dis hoekom hulle stabiel in die storms van die lewe is.
Paulus skryf die volgende: ‘Mag Hy deur sy Gees uit die rykdom van sy Goddelike grootheid aan julle die krag gee om innerlik sterk te word. Dan sal Christus deur die geloof in julle harte woon, en sal julle in God se liefde gewortel en gegrondves wees… Dan sal julle Christus se liefde, wat alle verstand te bowe gaan, beleef. Mag julle heeltemal met die volheid van God vervul word’ (Efesiërs 3:16-17, 19 NLV).
Sielskos: Gen 1-3; Luk 1:1-10; Ps 90:1-6; Spr 1:1-4
2022-01-02
Johannes 15:16 NLV
Toe Jesus gesê het: ‘…Ek [het] julle uitgekies… om te gaan vrugte dra, vrugte wat sal hou…,’ het Hy inderwaarheid gesê: ‘Leef jou lewe in die strewe na dit wat blywende betekenis en ewigheidswaarde het!’
Wat bedoel Hy met ‘vrugte’? Die vrugte van die Gees is: ‘…liefde, vreugde, vrede, geduld, vriendelikheid, goedheid, getrouheid, sagmoedigheid en selfbeheersing…’ (Galasiërs 5:22-23 NLV). Hierdie nege eienskappe beskryf die enigste lewe wat waarlik die moeite werd is om te lewe.
Gelukkig hoef jy nie hierdie vrugte deur jou eie inspanning te probeer produseer nie. Nee, Jesus het gesê: ‘Ek is die egte druiwestok en my Vader is die tuinier. Elke loot aan My wat nie vrugte dra nie, sny Hy af. Elkeen wat egter vrugte oplewer, snoei Hy sodat dit nog meer vrugte kan dra… Julle moet aan my verbonde bly soos Ek aan julle. ‘n Loot kan nie uit sy eie vrugte dra as dit nie aan die druiwestok verbind bly nie, en só julle ook nie as julle nie voluit aan My verbonde bly nie. Ek is die druiwestok, julle is die lote. Wie aan My verbonde bly en Ek aan hulle, dra baie vrugte, want sonder My kan julle niks doen nie’ (Johannes 15:1-2, 4-5 NLV).
Met wie praat Jesus? Gelowiges. ‘Elke loot aan My’ (vers 2 NLV). Wie is die tuinier? ‘My Vader is die tuinier’ (vers 1 NLV). Wat is sy doelwit? Vir jou om ‘nog meer vrugte [te] kan dra’ (vers 2 NLV). Wat is die geheim tot baie vrugte? Konstante kontak en intimiteit met Jesus. ‘Wie aan My verbonde bly en Ek aan hulle, dra baie vrugte’ (vers 5 NLV). As jy dus meer vrugte wil dra, moet jy nader aan God beweeg.
Sielskos: 2 Kron 7:12-16; Matt 6:5-15; Luk 18:1-8
2022-01-01
1 Korintiërs 10:31 NLV
In 1643 het die parlement in Engeland die Anglikaanse regeringstelsel in die Kerk van Engeland afgeskaf. ‘n Vergadering van honderd-en-twintig dominees en dertig leke is na die Westminster Abdy opgeroep om die Engelse kerk te herbou. Die dokumente wat uit daardie ses jaar lange vergadering voortgekom het, is van die bekendstes in die geskiedenis van die kerk. Die eerste vraag in die Korter Westminster Kategismus lees as volg: ‘Wat is die mens se hoofdoel?’ Antwoord: ‘Om God te verheerlik en Hom vir altyd te geniet.’
Die implikasies van daardie vraag en die antwoord daarop is diepgaande in hulle eenvoud. As jy wys is, sal jy dit ‘n bloudruk vir jou lewe hierdie komende jaar maak. Verheerlik God. Gehoorsaam God. Geniet God. Wanneer jy weet dat jou lewe God verheerlik, geniet jy sy teenwoordigheid, maar wanneer jy weet dat jou lewe God nie verheerlik nie, is jy geneig om Hom te vermy. Dis sleg, want wat is jou kans op ware sukses sonder God se teenwoordigheid in jou lewe? Nie goed nie!
Soos jy terugkyk op verlede jaar, is daar dinge waaroor jy spyt is omdat jy weet dat God nie daardeur verheerlik is nie? Wel, God gee jou ‘n nuwe jaar om dinge anders te doen. Indien jy nuwejaarsvoornemens maak, moet jy hulle op die fondasie van hierdie Skrifgedeelte baseer: ‘Wat julle ook al eet of drink of wat julle ook al doen, doen alles tot eer van God.’ As jy hierdie reël volg, sal jy op die regte pad bly en sal jy vrede en vreugde hê in die wete dat jou lewe die Here behaag. Maak nie saak watter omstandighede mag voorkom nie, jy sal hulle met vrede en selfvertroue in die gesig kan staar, omdat jy weet dat God by jou is.
Sielskos: Rom 13:12-14:19; Joh 1:1-14
