Wat om te doen wanneer jy mismoedig voel (2)

Toe Elia op sy laagste punt was, het God vir hom hierdie drie belangrike dinge gesê: 1) Bring meer tyd met God deur. ‘Kom buitekant toe en gaan staan voor My op die berg…’ (1 Konings 19:11 NLV). Ons moet nie net altyd vir God werk nie, ons moet ook tyd saam met Hom deurbring. As jy dit nie doen nie, sal jou tenk leegraak en sal jy nêrens kom nie. Toe Dawid mismoedig gevoel het, het hy geskryf: ‘So baie sê: ‘God sal hom nooit red nie!’ Maar U, Here, is ‘n skild rondom my. U herstel my eer, U lig my kop weer op. Ek het tot die Here geroep. Vanaf sy heilige berg het Hy geantwoord’ (Psalm 3:3-5 NLV).

2) Hou op om dit alles self te probeer doen. Dis die vinnigste roete tot depressie. Leierskap gaan nie net daaroor om die werk gedoen te kry nie; dit gaan daaroor om ander mense te ontwikkel en dit deur hulle gedoen te kry. Elia was nie alleen nie. God het vir hom gesê: ‘Nogtans sal Ek 7 000 in Israel laat oorbly, hulle wat nie voor Baäl gebuig en hom vereer het nie’ (1 Konings 19:18 NLV).

) Besef dat jou opdrag nie verby is nie. God het vir Elia gewys dat daar nog konings was om te salf, oorloë om te wen, en ‘n opvolger om op te lei (sien vers 16).

Wanneer jy mismoedig is, raak God nie kwaad vir jou nie. Inteendeel, sy Woord sê: ‘Hy sal ‘n geknakte riet nie verder afbreek nie. Mense wat dof brand soos ‘n lamppit sal hy nie uitdoof nie. Hy sal in opregtheid reg laat geskied’ (Jesaja 42:3 NLV). Dit is die liefdevolle goedhartigheid van God!

Sielskos: Eks 16-18; Luk 12:49-59; Ps 70; Spr 6:26-28