2022-04-03
Romeine 6:14 NLV
As jy rose wil kweek, moet jy oorlog teen onkruid voer; andersins sal hulle jou tuin oorneem. Met ander woorde, jy moet die onkruid uitroei! Daar is ‘n geestelike parallel wat hier getrek kan word: Tensy jy sonde beslissend hanteer, sal dit jou lewe oorneem.
Paulus stel dit so: ‘Ons weet dat ons ou sondige self saam met Christus gekruisig is sodat die sonde se mag oor ons verbreek kan word en ons nie meer slawe van die sonde sal wees nie. Want as iemand sterf, word hy vry van die mag van die sonde. Aangesien ons saam met Christus gesterf het, weet ons dat ons ook deel sal hê aan sy lewe. Ons weet dit omdat Christus uit die dood opgewek is en nooit weer sal sterf nie. Die dood het geen mag meer oor Hom nie. Hy het eens en vir altyd vir die sonde gesterf en nou leef Hy vir God. Julle moet dus ook verseker weet dat julle vir die sonde dood is, en nou vir God lewe deurdat julle één is met Christus. Julle moenie langer toelaat dat sonde julle aardse lewe beheer nie; moenie toegee aan sy verleidelike begeertes nie. Julle is betrokke in ‘n geestelike oorlog. Moenie langer julle liggaamlike vermoëns as wapens van ongeregtigheid vir die sonde beskikbaar stel nie, maar stel julleself voortdurend vir God beskikbaar omdat julle uit die dood weer lewendig geword het. Stel al julle liggaamlike vermoëns as wapens van geregtigheid tot God se beskikking. Die sonde mag hoegenaamd nie oor julle heerskappy voer nie. Julle leef immers nie meer onder die verslawende mag van die wet nie, maar onder die bevrydende mag van die genade’ (verse 6-14 NLV).
Die woord vir jou vandag is dus – sê nee vir sonde!
Sielskos: Josh 2:1-24; Hand 9:20-30
2022-04-02
Galasiërs 5:22 NLV
Paniek en angs is dikwels ons eerste reaksie op konflik en probleme. In daardie aanvanklike oomblikke voel dit onmoontlik om vrede te kies. Jou onderbewussyn fluister: ‘As jy regtig omgee, sal jy bekommerd wees.’ ‘n Ervare berader skryf egter: ‘Moenie paniekerig raak nie! Maak nie saak wat die situasie of omstandighede is nie, ons het gewoonlik ‘n oomblik om diep asem te haal en toe te laat dat vrede deur ons liggaam en gedagtes vloei. Paniek, nie die taak nie, is die vyand.’
Angs bekragtig en vergroot net die probleem. Jou beste hulpbron vir probleemoplossing is altyd vrede. Vrees en angs blokkeer oplossings; antwoorde kom makliker in ‘n vredevolle gemoedstoestand na vore. Paulus skryf: ‘Maar as die Gees ons lewe beheer, is die gevolg… vrede…’ Weier om jou negatiewe emosies toe te laat om oor te neem en jou reaksie te beïnvloed.
Jesus het gesê: ‘Ek laat vir julle my vrede na; my vrede deel Ek met julle. Julle moet regtig nie ontsteld of beangs word nie’ (Johannes 14:27 NLV). Jesus laat sy vrede vir ons na, soos om in ‘n testament iets na te laat. Wanneer iemand sterf, laat hulle hulle kosbaarste besittings vir die mense vir wie hulle lief is, na. Dit beteken dat jy opsies het; jy kan tussen vrede en innerlike konflik kies. Net omdat Jesus egter sy vrede vir ons nagelaat het, beteken dit nie dat dit outomaties binne-in ons werk nie.
Dis ook moeiliker om God se stem te hoor wanneer ons ons vrede verloor. Paulus sê: ‘Verder, laat die vrede wat Christus bewerk het, in julle lewe skeidsregter wees…’ (Kolossense 3:15 NLV). Dus in plaas daarvan om toe te laat dat jy vandag angstig en paniekerig word, kies vrede.
Sielskos: Fil 3-4; Luk 21:12-24; Ps 18:1-29; Spr 9:4-6
2022-04-01
Hebreërs 10:38 NLV
Om uit geloof te leef, is iets wat jy leer om te doen deur dit daagliks te beoefen. Voor jy ‘n Christen geword het, het jy op jou eie vermoë en intellek staatgemaak. Nou vertrou jy op God vir die wysheid, leiding, hulpbronne en vermoë om sy wil vir jou lewe te vervul. Die Bybel sê vir ons: ‘Omdat hy geglo het, het Noag… gehoorsaam die ark gebou. Daardeur is sy huisgesin gered…’ (Hebreërs 11:7 NLV).
Om uit geloof te lewe maak nie altyd sin nie. Dit beteken nie dat jou probleme in die niet gaan verdwyn nie. Soms verander geloof jou omstandighede; ander kere verander dit jou perspektief. Hoe? Deur jou die volharding te gee om vas te byt wanneer die tjek nie in die pos kom nie, of wanneer die dokter sê dat die siekte ongeneeslik is, of jou eggenoot jou vra om te skei, of die kinders die pad byster raak.
Geloof gee jou die krag om te volhard, met vertroue dat God dinge namens jou sal laat uitwerk. Paulus sê vir ons: ‘Wat is geloof dan? Dit is ‘n vaste versekering dat die dinge waarna ons uitsien, inderdaad sal gebeur…’ (Hebreërs 11:1 NLV).
Om uit geloof te lewe, beteken: 1) Om God te gehoorsaam en te glo dat Hy jou nooit in die steek sal laat nie; 2) om in die voetspore van gewone mense, wat buitengewone dinge vir God gedoen het, te loop; en 3) om jou geloof te gebruik omdat jy weet dat dit die enigste geldstelsel is wat in die hemel erken word.
Wanneer die Bybel sê: ‘Dié mense wat my wil doen, sal uit die geloof lewe…,’ beteken dit nie klein, sporadiese opwellings van geloof nie; dit beteken dat jy geloof ‘n leefstyl maak.
Sielskos: Fil 1-2; Luk 21:1-11; Ps 31:14-24; Spr 9:1-3
2022-03-31
Matteus 11:29 NLV
Jesus het met die mense gepraat wat moedeloos oor godsdiens geword het. Mense wat uitgebrand was deur te probeer – en te faal – om ‘n lang lys reëls en regulasies na te kom. Hier is wat Hy vir hulle gesê het: ‘Kom na My toe, julle almal wat moeg is en swaar laste moet dra, en Ek sal julle lewens verkwik. Neem my juk op julle skouers. Kom leer van My, want Ek is sag en nederig van hart, en julle sal nuwe krag kry. Want my juk sal saggies op julle skouers rus en my las is lig om te dra’ (verse 28-29 NLV).
Die ‘juk’ waarvan Jesus gepraat het was ‘n harnas wat om die nekke van twee osse gegaan het, sodat hulle die ploeg in een rigting kon trek. In elke span osse, was een die leier en die ander een het gevolg. Jesus sal die leiding neem, maar jy moet in pas met Hom bly om sy seën op jou lewe te geniet. Hy belowe dat sy juk jou nie sal wurg nie; dit sal jou nie moeg maak of jou nie skaaf nie.
As jy waarlik vry wil wees, moet jy jouself toelaat om aan Jesus se juk vasgemaak te word, deur jou wil aan syne te onderwerp. Dit beteken egter nie dat jy Christus se juk vir ‘n rukkie aanvaar en dan in die ander rigting begin trek wanneer dinge nie gaan soos jy wil nie. Wanneer jy dit doen, raak die las swaarder en begin jy uitgeput voel. Vrede en rus vind plaas wanneer jy in die juk ontspan en Christus toelaat om te lei. Jesus het gesê: ‘…Ek sal julle lewens verkwik…’ Dit beteken dat jou opsies is om Hom teen te staan of om in Hom te rus. Watter een sal dit wees?
Sielskos: Job 40-42; Luk 20:41-47; Ps 31:1-13; Spr 8:34-36
2022-03-30
2 Petrus 1:6 NLV
Het jy al ooit agtergekom dat ons geneig is om ons omstandighede, in plaas van ons tekortkominge, te blameer? Ons skryf ons probleme aan ons swak opvoeding, finansiële moeilikhede of aan ander mense se tekortkominge, toe. Net soos jy nie die spieël kan blameer vir hoe jy lyk nie, net so kan jy ook nie jou karakterfoute op jou omstandighede blameer nie.
Integriteit is altyd ‘n keuse en elke keer wat jy ‘n karakter-gebaseerde besluit maak, neem jy ‘n tree vorentoe in jou geestelike groei. Dink aan die kere wat jy voor versoeking en teenstand te staan gekom het. Skryf hulle neer en dui langs elkeen die keuse wat jy gemaak het aan: om te ontsnap, te verskoon, in te gee, te vermy, uit te hou of te oorkom. Watter probleemareas kan jy identifiseer? Hoe kan jy beter doen? As die dinge wat jy neergeskryf het buite jou beheer was, kies dan om groter beheer van jou lewe te neem.
Hoe? Deur selfbeheersing toe te pas. Karakter word gebaseer op dit wat ons doen wanneer niemand anders kyk nie – hoe ons die lewe se klein ergenisse hanteer en hoe ons mislukking – en sukses – hanteer. Aan die einde van ‘n briljante loopbaan, het Josua vir Israel met hierdie woorde uitgedaag: ‘As julle nie die Here wil aanbid nie, moet julle vandag vir julleself besluit wie julle dan wil aanbid… Ek en my huisgesin sal die Here aanbid’ (Josua 24:15 NLV).
Karakter word op selfbeheersing gebaseer en selfbeheersing gaan daaroor om die regte besluite te neem. Die goeie nuus is dat jy dit nie alleen hoef te doen nie: ‘Dis mos God wat julle gewillig maak om te doen waarvan Hy hou, en Hy gee julle ook die vermoë om dit te kán doen!’ (Filippense 2:13 NLV).
Sielskos: Job 38-39; Luk 20:27-40; Ps 6; Spr 8:32-33
2022-03-29
1 Korintiërs 6:11 NLV
Nadat hy sommige van die ergste sondes moontlik genoem het, het Paulus vir die mense van Korinte gesê: ‘Daar was ‘n tyd toe party van julle presies so was, maar nou is julle sonde afgewas en God het julle aan Homself toegewy. Julle is vrygespreekte mense op grond van wat die Here Jesus Christus en die Heilige Gees van God vir julle gedoen het’ (vers 11 NLV). Voor jy dus ‘n oordeel oor iemand anders vel, onthou waaruit God jou gelig het! Daar is twee maniere hoe ons mekaar kan help.
Een is om ‘n gewas te verwyder. ‘n Gewas kan jou doodmaak en moet verwyder word. Paulus skryf: ‘…wanneer iemand iets doen wat verkeerd is, moet julle wat deur die Gees gelei word, daardie persoon nederig reghelp… Help ander gelowiges wat swaarkry, en gee só uitvoering aan Christus se liefdeswet’ (Galasiërs 6:1-2 NLV). Dit kan ‘n las wees om iemand anders se skaamte en vernedering saam met hulle te dra. Nietemin, ‘Terwyl ons die kans het, moet ons dus goeddoen aan alle mense, maar veral aan medegelowiges’ (Galasiërs 6:10 NLV). As jy vinnig is om iemand anders te veroordeel – iets wat ons almal al van tyd tot tyd gedoen het – vra jouself die volgende vraag af: As mense nie genade tussen die mense wat dit preek kan vind nie, waar kan hulle dit dan kry?
Die tweede manier is om ‘n gebreekte been te spalk. Die Skrif sê vir ons: ‘…Al is ons baie, vorm ons saam een liggaam…’ (Romeine 12:5 NLV). Deur iemand wat geval het op te help, help jy hulle om hulle pyn te genees en stel jy hulle in staat om weer ‘n noodsaaklike, funksionerende deel van Christus se liggaam te word. Die woord vir jou vandag is dus – help mekaar.
Sielskos: Job 35-37; Luk 20:20-26; Ps 69:19-36; Spr 8:30-31
