2022-05-02
Filippense 4:19 NLV
Hoe weet jy wanneer jy meer van mense as van God afhanklik is? Wanneer jy vir jou baas kwaad is omdat jy nie die verhoging gekry het wat jy dink jy verdien nie. Wanneer jy kwaad word vir ‘n geliefde omdat sy of hy nie vir jou geld wil leen nie. Wanneer jy sulke dinge doen, sit jy voor die verkeerde deur en wag op jou seëning!
Ja, dit maak seer wanneer jou werk nie erken word nie. Jy moet egter die volgende verstaan: God sal mense as instrumente gebruik om jou te seën, maar slegs Hy moet altyd die bron van al jou seëninge wees!
Dink oor die volgende Skrifgedeeltes na: ‘Hy het dit gedoen sodat jy nie moet dink dit is deur jou eie krag en energie waardeur jy ryk geword het nie. Onthou altyd dat dit die Here jou God is wat vir jou die krag gee om ryk te word…’ (Deuteronomium 8:17-18 NLV). ‘En as God aan mense rykdom en besittings gee, en die vermoë om dit te geniet, is dit ook ‘n geskenk uit sy hand’ (Prediker 5:18 NLV). ‘Sy besef nie dat dit Ek is wat haar alles gegee het nie…’ (Hosea 2:7 NLV). Wat was haar probleem? Sy het God geïgnoreer en vergeet dat Hy haar ware bron is.
Wanneer jy God as die bron van al jou seëninge erken, verbind jy jouself daartoe om jou verhouding met Hom te koester. Dis hoekom Jesus gesê het: ‘Nee, maak die koningsheerskappy van God en dit wat voor Hom reg is, julle heel eerste prioriteit; dan sal God vir julle al hierdie ander dinge as ‘n bonus byvoeg’ (Matteus 6:33 NLV). Wanneer jy God volg, vrygewig in sy koninkryk saai en van Hom verwag om aan jou behoeftes te voldoen – sal jou werke geseën word.
Sielskos: Jak 3-5; Matt 5:1-12; Ps 94:12-23; Spr 10:27
2022-05-01
Psalm 37:21 NLV
Jou begeerte na finansiële sekuriteit kan jou daarvan weerhou om te gee. Hoekom? Omdat jy voel dat elke rand wat jy weggee, nie meer onder jou beskerming is nie. Die teenoorgestelde is egter waar. Ons sin van vryheid en sekuriteit vergroot inderwaarheid wanneer ons gee, omdat om te gee ‘n verklaring is dat ons ons sekuriteit in iets anders as die bank of ons eie verdienste plaas. Om te gee is ‘n daad van vertroue in God en dit is die enigste manier om finansiële onsekerheid te oorkom. Dink aan al die dinge in die lewe waaroor ons min of geen beheer het nie. Siekte. Ongelukke. Werksverlies. Ekonomiese toestande. G’n wonder ons voel onseker nie!
Die Bybel sê: ‘Mense wat graag uitdeel, ontvang altyd meer. Daar is ander wat suinig is en hulle word arm. Mense wat ‘n ander iets gun, het self altyd oorvloed. Hulle wat ander se dors les, is self altyd verkwik’ (Spreuke 11:24-25 NLV). Vir die rasionele verstand klink dit nie reg nie, maar vir die verstand wat op die koninkryk gerig is, maak dit heeltemal sin.
Paulus skryf: ‘Dus staan die saak só: Wie suinig saai, sal karig oes; wie ruimhartig saai, sal volop oes. Elkeen moet gee soos hy in sy hart besluit het, nie uit spyt of dwang nie, want God het die blymoedige gewer lief. En God is in staat om aan julle elke gawe in oorvloed te gee sodat julle in elke opsig altyd van alles genoeg kan hê én ook nog oorvloedig kan wees in elke goeie werk’ (2 Korintiërs 9:6-8 NLV). ‘n Rand sal nooit meer as ‘n rand in jou hand wees nie. Wanneer jy dit egter in God se koninkryk saai, begin dit met ‘n oes waaruit jy kan pluk wanneer jy ‘n behoefte het. Om te gee is waarlik die sleutel tot finansiële sekuriteit.
Sielskos: 2 Kon 4:42-44; Mark 6:30-44
2022-04-30
Deuteronomium 4:40 NLV
As ouer dra jy konstant jou waardes aan jou kinders oor, doen dus die volgende: 1) Laat hulle jou sien bid. Help hulle om te verstaan dat gebed die manier is waarmee ons ‘n lewenslange vriendskap met God bou. God het gesê: ‘Hy sal roep, en Ek sal antwoord; in nood sal Ek by hom wees. Ek sal hom red en in eer herstel’ (Psalm 91:15 NLV).
2) Wys hulle hoe God is. Jou kind se konsep van God word deur jou gevorm. Of jy nou liefdevol en beskermend of afwesig en koud is, hulle sal God begin verstaan deur die interaksies wat hulle met jou het. ‘n Paar voorbeelde is dat God nooit te besig is om te luister nie, dat Hy konstant vir ons sê dat Hy lief is vir ons en dat Hy ons nooit mishandel nie.
3) Help hulle om God in ander te sien. Wanneer kinders aangemoedig word om God se werk in hulle eie lewens te sien, sal hulle begin om sy werk ook in ander mense se lewens raak te sien. Wanneer dit gebeur, sal hulle ander mense waardeer en respekteer en deur ander mense gewaardeer en gerespekteer word.
4) Moenie hulle kerk toe stuur nie, neem hulle saam. Kinders het die behoefte om te glo – en te behoort. Leer hulle dat net soos ‘n ledemaat wat nie aan die liggaam gekonnekteer is nie sterf, ons geestelik sterf tensy ons aan ‘n plaaslike kerk gekonnekteer is. Hulle sal dan altyd ‘n plek hê om heen te gaan.
Die Bybel sê: ‘As julle al die gebooie en voorskrifte gehoorsaam… sal dit goed gaan met julle en met julle kinders…’ (Deuteronomium 4:40 NLV). Die grootste geskenk wat jy vir jou kinders kan gee, is om hulle te help om die regte pad te vind.
Sielskos: Jak 1-2; Matt 4:12-25; Ps 94:1-11; Spr 10:24-26
2022-04-29
Filippense 2:4 NLV
Onselfsugtigheid doen drie dinge vir jou: 1) Dit verhoog die kwaliteit van jou lewe. Dit gee jou ‘n waardering vir die lewe en ‘n beter begrip van die lewe se hoër waardes. Om mense in nood raak te sien en dan aan hulle behoeftes te voldoen, plaas baie dinge in perspektief. Een leier skryf: ‘Daar is geen lewe so leeg soos ‘n selfgesentreerde een nie. Daar is geen lewe so gesentreerd soos die self-leë ene nie.’ As jy jou wêreld wil verbeter, moet jy jou aandag daarop fokus om ander te help.
2) Dit maak jou deel van iets groters as jyself. In die middel tagtigs, het Merck & Company, die globale farmaseutiese korporasie, medikasie ontwikkel wat rivierblindheid genees – ‘n siekte wat hoofsaaklik mense in ontwikkelende lande infekteer en blind laat. Dit was ‘n goeie produk, maar die meeste potensiële kliënte kon dit nie bekostig nie. Wat het Merck dus gedoen? Hulle het die medikasie in elk geval geproduseer en aangekondig dat dit verniet vir enigeen wat dit nodig gehad het, beskikbaar sou wees. Gevolglik het hulle meer as 250 miljoen dosisse weggegee. George W. Merck sê: ‘Ons probeer nooit vergeet dat medisyne vir die mense is nie. Dis nie vir die wins nie. Die wins volg daarop en wanneer ons onthou dat dit vir die mense is, het die winste nog nooit nie opgedaag nie.’ Die les hieruit te leer? Eenvoudig. In plaas daarvan om groot te wees, word deel van iets groters as jyself.
3) Dit skep ‘n nalatenskap. Jack Balousek, die voormalige president van True North Communications, het gesê: ‘Leer, verdien, gee terug – hierdie is die drie fases van die lewe.’ Wanneer jy onselfsugtig is en in ander mense belê, ontvang jy die geleentheid om ‘n nalatenskap te skep. Dit behoort jou doelwit te wees.
Sielskos: Dan 11-12; Matt 4:1-11; Ps 144:9-15; Spr 10:22-23
2022-04-28
1 Johannes 5:14 NLV
‘n Leier het hierdie woorde geskryf: ‘My pa was ‘n besige man. Om hom by die werk op te spoor moes jy deur die skakelbord gaan, tensy jy sy private nommer geken het. Hy het dit net vir ‘n paar besigheidsvennote gegee, maar al sy kinders het die nommer geken. Maak nie saak hoe besig hy was nie, ons kon hom enige tyd op sy direkte lyn bel. My kinders ken ook my nommer en hulle weet dat hulle my enige tyd oor enigiets kan bel. Daar is geen stem wat soeter as my kinders se stemme klink nie. Wanneer een van hulle sê: ‘Hallo, Pappa,’ maak dit nie saak waarmee ek besig is nie. Hulle is my absolute prioriteit. Maal dit nou eksponensieel. Niks klink soeter vir God as jou stem wat sê: ‘Hallo, Vader,’ nie. Daar is niks wat tans in die kosmos aan die gang is wat Hom daarvan sal weerhou om sy volle aandag aan jou gesprek of versoek te gee nie.’
Dit beteken dat wanneer God jou Vader is, kan jy Hom enige tyd bel. Hy is net ‘n gebed weg! Jesus het gesê: ‘Hou aan met vra, en God sal vir julle gee… Julle as ouers sal tog nie vir julle kinders as hulle brood vra, klippe gee nie… As sondige mense soos julle dan goed weet om goeie dinge aan julle kinders te gee, hoeveel te meer sal julle hemelse Vader goeie dinge gee aan hulle wat dit van Hom vra!’ (Matteus 7:7, 9-11 NLV).
‘Dit is die vrymoedigheid wat ons voor God het, dat wat ons ook al volgens sy wil vra, Hy na ons luister. As ons dan met die wete leef dat Hy na ons luister… weet ons ook dat Hy die versoek wat ons gevra het, sal toestaan’ (1 Johannes 5:14-15 NLV). Glo vandag in jou gebede.
Sielskos: Dan 8-10; Matt 3:1-17; Ps 144:1-8; Spr 10:19-21
2022-04-27
Spreuke 11:3 NLV
Jesus het gesê: ‘…jy moet jou naaste liefhê soos jouself’ (Matteus 19:19 NLV). Om jouself te kan liefhê, moet jy egter eers jouself kan respekteer. Selfrespek word op persoonlike integriteit gebaseer.
Die skrywer Ted Engstrom vertel die volgende verhaal in sy boek getiteld Integrity: ‘Vir afrigter Cleveland Stroud en die Bulldogs van die Rockdale County Hoërskool (Conyers, Georgia), was dit hul beste kampioenskapseisoen: een-en-twintig oorwinnings en vyf verliese op pad na die Georgia Boys-basketbaltoernooi verlede Maart. Nou staan die nuwe trofeekas buite die hoërskool se gimnasium egter leeg. Vroeër hierdie maand het die Georgia Hoërskool Assosiasie die kampioenskap van Rockdale County ontneem nadat skoolamptenare gesê het dat ‘n speler wat akademies nie in aanmerking gekom het om deel van die span te wees nie, vyf en veertig sekondes in die eerste van die skool se vyf na-seisoen wedstryde, gespeel het. ‘Ons het nie geweet dat hy nie in aanmerking kom nie; ons het dit eers ‘n paar weke gelede uitgevind,’ het afrigter Stroud gesê. ‘Sommige mense het gesê ons moes net daaroor geswyg het, dat dit net vyf-en-veertig sekondes was en dat die speler nie ‘n impakspeler was nie. Maar mens moet doen wat eerlik en reg is en wat die reëls sê. Ek het vir my span gesê dat mense die tellings van basketbalwedstryde vergeet; hulle vergeet egter nooit waarvan jy gemaak is nie.’
Elke eerlike of oneerlike woord en daad voeg of by jou karakter by, of neem daarvan weg. Dis wat die Bybel bedoel met die volgende: ‘Die opregtheid van eerlike mense wys vir hulle die koers. Die valsheid van onbetroubare mense bring hulle ondergang.’ Strewe vandag na integriteit in al jou aksies.
Sielskos: Dan 5-7; Matt 2:13-23; Ps 7:10-17; Spr 10:17-18
