2022-06-12
2 Timoteus 2:13 NLV
Hier is iets waaroor jy baie bly moet wees: God se getrouheid aan jou hang nie van jou getrouheid aan Hom af nie. Die Bybel sê: ‘Maar as ons ontrou is – Hy bly getrou…’ Jou foute mag jou dalk buite God se wil neem, maar hulle sal jou nooit buite sy bereik plaas nie.
Catherine Marshall vertel van ‘n groot persoonlike stryd wat sy ondervind het terwyl sy ‘n boek getiteld Gloria geskryf het. Sy het die boek in 1969 begin skryf en die projek twee-en-‘n-half jaar later laat vaar. Die halwe manuskrip het vir haar soos “‘n dood in die familie” gevoel. In ‘n poging om haar teenstrydige gedagtes en gevoelens te versoen, het sy tyd by ‘n toevlugsoord deurgebring. Terwyl sy daar was, het sy weer die Bybelse verhaal in Numeri gelees oor die tyd wat giftige slange die Israeliete se kamp binnegedring het. Die mense het besef dat die slange ‘n straf vir hulle sondes was en het in berou uitgeroep. Die Here het vir Moses gesê: ‘…Maak vir jou ‘n afbeelding van ‘n giftige slang en sit dit bo-op ‘n paal. Elkeen wat gepik is en daarna kyk, sal bly leef…’ (Numeri 21:8 NLV).
Catherine het besef dat net soos die Israeliete dit wat hulle seergemaak het geneem en dit na God opgehef het en genesing ervaar het, so kan ons ons sondes en foute neem en dit in gebed na God ophef, met die vertroue dat Hy ons sal genees. Sy skryf: ‘Wanneer enigeen van ons as gevolg van arrogansie, gebrek aan vertroue, ongeduld of vrees ‘n verkeerde afdraai in ons lewens maak – sal God vir ons ‘n uitweg wys.’ Selfs wanneer jy afdwaal, het God jou so lief dat Hy jou weer na Homself toe sal terugbring. ‘Maar as ons ontrou is – Hy bly getrou…’
Sielskos: Eseg 37:1-14; Matt 27:50-53; 1 Tess 4:13-18; Ef 1:19-20
2022-06-11
Psalm 48:14 NLV
Hier is ‘n vers wat mens ontnugter: ‘…Ná hulle het daar ‘n geslag mense gekom wat nie die Here geken het nie…’ (Rigters 2:10 NLV). Hoe het dit gebeur? Hulle ouers het hulle nie van die Here vertel nie. Lees die volgende drie Skrifgedeeltes noukeurig en met gebed: 1) ‘Kyk na die versterkte mure en bekyk al die vestings, sodat jy dit kan beskryf aan die geslagte ná jou. Want dié God is ons God vir altyd…’ (Psalm 48:14-15 NLV). 2) ‘verswyg ons nie vir ons kinders nie, maar vertel vir die volgende geslag van die roemryke dade van die Here, van sy krag en van sy wonderdade’ (Psalm 78:4 NLV). 3) ‘Geslag na geslag sal u dade prys en van u magtige werke vertel’ (Psalm 145:4 NLV).
Jy sê: ‘Ons het ‘n beter regering en ‘n beter skoolstelsel nodig.’ Miskien, maar regerings en skole maak nie kinders groot nie, ouers doen. Jy is as ouer geroep om jou eie huis te regeer en jou kinders in die weë van die Here op te lei. Begin dus so gou as moontlik om jou kinders diep geestelike wortels te gee. Gaan hulle rebelleer? Moontlik; die Verlore Seun het uit ‘n goeie huis gekom en hy het gerebelleer. Hy het egter teruggekom, omdat hy herinneringe en waardes gehad het om na terug te keer.
Toe hy die einde van sy lewe nader, het Josua die nasie se leiers bymekaar geroep en gesê: ‘Julle het gesien wat die Here julle God alles ter wille van julle… gedoen het…’ (Josua 23:3 NLV). Toe het hy vir hulle opdrag gegee om hulle kinders daarvan te vertel. Hulle het dit egter nie gedoen nie en hulle seuns en dogters het met ander nasies getrou en hulle sondige leefstyle aangeneem. Moenie toelaat dat dit met jou kinders gebeur nie.
Sielskos: Op 15-18; Matt 16:13-28; Ps 132:1-10; Spr 13:4-6
2022-06-10
Daniël 3:29 NLV
Die verhaal van die drie Hebreeuse kinders in die vlammende oond leer ons die volgende vier lesse: 1) Om God se wil te doen, kan jou in die moeilikheid laat beland. Moenie verwag dat die wêreld jou gaan waardeer nie. Kyk na Jesus: ‘In Hom was daar lewe, en dié lewe het gedien as lig vir die mense. Die lig verlig die duisternis en die duisternis kan dit nie uitdoof nie’ (Johannes 1:4-5 NLV).
2) God sal by jou in jou moeilikheid wees. Toe Nebukadneser in die vlamme gekyk het, het hy gesê: ‘…Ek sien dan vier mans in die oond rondloop. Hulle is nie vasgebind nie. Hulle makeer niks. Die vierde een lyk soos ‘n bo-aardse wese’ (Daniël 3:25 NLV). In plaas daarvan om hulle te verbrand, het die vuur die toue wat hulle vasgebind het, verbrand en hulle vry gemaak. Hou moed! Dit mag dalk lyk of omstandighede jou vasgebind het, maar God sal jou as oorwinnaar daaruit bring.
3) Dis jou moeiliheid wat jou getuienis voortbring. Mense hou jou dop. Die dinge waarop hulle vertrou werk nie en hulle wonder of dit waarop jy vertrou, dalk werk. Jou getrouheid aan God en sy ingryping namens jou sal hulle lewens aanraak soos jou teologie nooit kan nie. Almal in die provinsie van Babel het geweet wat die Hebreeuse kinders geglo het. Hulle wou egter ook weet: ‘Werk dit wanneer jy in die vlamme is?’ Dit doen!
4) Hoe groter jou moeilikheid, hoe groter jou seën. ‘Daarna het [die koning] Sadrag, Mesag en Abednego bevorder en nog hoër posisies aan hulle in die provinsie van Babel gegee’ (vers 30 NLV). Hier is ‘n Skriftuurlike beginsel waarop jy kan staat maak: As jy bewys dat jy in moeilike tye getrou is, sal God jou tot hoër vlakke van seën bevorder.
Sielskos: Op 10-14; Matt 16:1-12; Ps 48; Spr 13:2-3
2022-06-09
2 Korintiërs 9:7 NLV
Die rolprent, Schindler’s List, vertel die verhaal van een man se pogings om die beste van ‘n desperate situasie te maak. As die direkteur van ‘n ammunisiefabriek in Pole, het Oskar Schindler besluit om sy posisie te gebruik om Joodse lewens te red. Deur hulle in sy fabriek in diens te neem, het Schindler baie veroordeelde Jode van die gaskamers gered. Dit was egter duur om hulle in diens te hou, dus het hy bietjie vir bietjie sy persoonlike eiendom begin likwideer om sy besigheid aan die gang te hou. Aan die einde van die verhaal word die Nazi’s verslaan en die volle impak van Schindler se pogings word geopenbaar namate die dooies getel word en die lewendes terug na vryheid steier.
In een toneel, knielend by die spoorlyne wat duisende tot hul dood gedra het, het Schindler ‘n verbysterende besef gehad. Hy kon meer mense gered het! Oorweldig met spyt, betreur hy dat hy die paar persoonlike bates wat hy nog besit, behou het. As hy maar net geweet het wanneer die oorlog sou eindig, sou hy meer gedoen het. Nou was dit te laat. Oskar Schindler was ‘n held. Daar word gereken dat hy meer Jode as enige ander enkele persoon tydens die Tweede Wêreldoorlog gered het. Interessant genoeg het hy gewens dat hy meer gedoen het.
‘n Kragtige les uit Schindler se verhaal is die volgende: Selfs blymoedige gewers sal op hulle lewens terugkyk en wens dat hulle meer gedoen het. Daar is ook ander wat minder gegee het as wat hulle kon, of diegene wat nooit gegee het nie. Kan jy jou hul gedagtes indink as hulle voor God staan en rekenskap moet gee oor hoe hulle hul hulpbronne aangewend het om ooreenstemmend beloon te word? ‘God het die blymoedige gewer lief,’ kyk dus vandag uit vir geleenthede om te gee.
Sielskos: Op 5-9; Matt 15:29-39; Ps 16; Spr 13:1
2022-06-08
Hebreërs 4:16 NLV
Vrymoedigheid. Vrymoedigheid is nie arrogansie, aanmatiging of vermetelheid nie. Dis selfvertroue, gebaseer op wie jy in Christus is. Paulus skryf: ‘Kom ons gaan dan met volle vrymoedigheid na die troon van ons genadige God. Hy sal aan ons sy deernis en onverdiende goedheid bewys sodat ons op die regte tyd gehelp sal word’ (vers 16 NLV).
Jy het as verloste kind van God die reg om Hom enige tyd te nader. Wanneer jy dit verstaan, stel dit jou in staat om Satan se pogings om jou onwaardig te laat voel, te weerstaan. Dit verwyder jou natuurlike neiging om te sê: ‘Ek weet dat God dit kan doen, maar dis moeilik om te glo dat Hy dit vir my sal doen.’ Jy dink op hierdie manier wanneer jy onwaardig voel. Die heerlike waarheid is egter dat Jesus jou waardig gemaak het! (sien Kolossense 1:12).
Genade is eenvoudig onverdiende goedheid. God sal dit wat jy nie verdien nie vir jou gee, wanneer jy die vrymoedigheid het om Hom daarvoor te vra. Jy vra dit mos ook in Jesus se naam, nie jou eie nie. Jy bied aan die Vader alles wat Jesus is, nie alles wat jy is nie.
Wanneer jy egter versteekte sonde in jou hart het, kan jy nie met vrymoedigheid bid nie. Onbelyde sonde sluit jou toe en sluit God uit (sien Psalm 66:18). Die goeie nuus is egter dat wanneer jy vir God vra om jou sonde te openbaar, Hy dit sal doen. Jy moet dit dan hanteer indien jy die kommunikasielyne oop wil hou. Wanneer God jou aan ‘n situasie herinner waar jy nie die regte ding gedoen het nie, moenie dit onder die mat probeer invee nie. Erken dit, ontvang sy vergifnis en gaan dan voort om met vrymoedigheid te bid.
Sielskos: Op 1-4; Matt 15:15-28; Ps 129; Spr 12:27-28
2022-06-07
Jakobus 4:3 NLV
Regte motiewe. Die rede hoekom jy bid is baie belangriker as die woorde wat jy sê. Om ‘n rein hart te hê wat vir God en ander mense lief is, is altyd vir die Here aanvaarbaar. Selfsug, weerwraak, manipulasie, beheer, jaloesie, trots en om te bid om die lotery te wen, is aan die ander kant onaanvaarbaar. Enigiets wat op selfsug gebaseer is, is inderwaarheid ‘n onaanvaarbare motief.
Iemand het een keer vir ‘n klein seuntjie gevra of hy elke aand sy gebedjie opsê. Hy het vir ‘n oomblik daaroor gedink en geantwoord: ‘Nee, party aande het ek niks nodig nie.’ Klink dit bekend? Die hoofsaaklike en eerste rede om te bid, is om ‘n intieme verhouding met God te ontwikkel. Dink daaroor: Hoe lank dink jy sal jou huwelik hou as jy slegs huis toe kom om jou eggenoot te sien wanneer jy skoon klere, ‘n goeie maaltyd en ‘n bietjie liefde nodig het? Nie lank nie, né? Dieselfde beginsel is op gebed van toepassing.
Jesus het gesê: ‘As julle aan My verbind bly en my woorde ‘n stewige vastrapplek in julle gekry het, vra dan net wat julle wil hê, en julle sal dit kry’ (Johannes 15:7 NLV). Wanneer jy daarop fokus om aan Christus ‘verbonde’ te bly, sal jy ‘n reaksie op dit wat jy vra, kry. Jakobus skryf: ‘En selfs wanneer julle vra, kry julle dit nie omdat julle motiewe verkeerd is…’
Die waarheid is dat ons natuurlik selfgesentreerd van aard is. Dis hoekom ons ons harte op ‘n gereelde basis moet reining – en dit verg dat ons ons beweegredes moet ondersoek. Dit mag dalk aan die begin pynlik wees, maar jy moet dit egter doen as jy wil hê dat jou gebede beantwoord moet word.
Sielskos: 1 Kon 21-22; Matt 15:1-14; Ps 124; Spr 12:26
