2018-07-01
Matteus 5:9 NLV
Wanneer jy ‘n vredeliefhebber is, beteken dit oor die algemeen dat jy na jou eie belange omsien. Wanneer jy egter ‘n vredemaker is, beteken dit dat jy jouself blootstel om ander mense te help. Om vrede te maak is nie maklik nie. Wanneer jy besluit om die middeweg te soek, sal jy vind dat ‘hy wat in die middel van die pad staan, van beide kante getref word!’ Kom ons wees eerlik; soms is dit makliker wanneer jy na versoening werk om met die vrees en vyandigheid saam te lewe, as met die dreigement van verandering. ‘Sover dit vir julle moontlik is, moet julle goeie verhoudings handhaaf met alle mense’ (Romeine 12:18 NLV). Dit beteken dat jy met mense wat anders as jy dink moet leer praat en omgaan. Dit beteken nie dat jy jou siening of boodskap moet verander nie, maar dit beteken dat jy soms jou benadering moet verander. Wanneer jy die rol van vredemaker aanneem, beteken dit dat jy gewillig moet wees om by ‘n opregte dialoog tussen twee mense betrokke te raak. Die risiko van verwerping is nie maklik vir enigeen nie. Dis hoekom die teenwoordigheid van vredemakers so noodsaaklik vir konflikoplossing is. Ware vredemaking begin in die hart, nie die kop nie. Die Bybel sê, ‘Die liefde sal nooit vergaan nie…’ (1 Korintiërs 13:8 NLV). Wanneer ander mense geliefd voel en as jy moeite doen om hulle te verstaan, sal hulle begin om hulle skanse te laat sak en met ander mense te konnekteer. Wanneer dit gebeur, kan dit nie net die kwessie oplos nie, maar ook harte en gedagtes gesond maak. Dit is hoekom Jesus gesê het, “Gelukkig is die vredemakers, want God sal vir hulle sê: ‘Julle is mý kinders.'”
Sielskos: Matt 5:6; Jes 55:1-7; Ps 63:1-5; Joh 4:1-34
2018-06-30
Johannes 18:37 NLV
Wanneer jy weet wat jou God-gegewe taak in die lewe is en dat God aan jou kant is, word jy feitlik onstuitbaar. Sal jy foute maak? Ja, maar God het jou lief genoeg om jou te korrigeer en jou terug op jou pad te lei. ‘Hoe ontdek ek my taak?’ vra jy. Hier is veertien insiggewende vrae om jouself af te vra: 1) Watter begeertes lewe al die meeste van my lewe binne-in my? 2) Wat motiveer my om hard te werk en produktief te wees? 3) Wat laat my voortgaan wanneer ek moeg is? 4) Wat laat my weier om tou op te gooi selfs wanneer ek weerstand kry? 5) Wat doen ek wat nie soos werk voel nie? 6) Wat doen ek wat ‘n positiewe reaksie en ondersteuning by mense ontlok? 7) Wat doen ek of wat gebeur in my lewe wanneer dit voorkom of deure outomaties en moeiteloos vir my oopgaan? 8) Wat dink wyse leiers en goddelike raadgewers oor my werk? 9) Wat laat my goed voel oor wie ek is? 10) Wat laat my kreatiwiteit vloei? 11) Wat is ek bereid om op te offer om dit te bereik? 12) Wat doen ek wat ek trots sal wees om voor God vir sy goedkeuring te bring? 13) Wat sal ek sonder betaling doen as ek dit kon bekostig? 14) Waarvoor sal ek gewillig wees om Satan teen te staan om dit te bereik? Oorweeg met gebed hierdie veertien vrae, en hulle sal lig op jou God-gegewe lewenstaak werp.
Sielskos: 1 Sam 4-7; Luk 3:11-20; Ps 59:9-17; Spr 16:23-26
2018-06-29
Spreuke 14:34 NLV
Die bekende ateïs Madalyn Murray O’Hair het eenmaal gesê, ‘Niks goeds het al ooit uit Christenskap gekom nie. As die Christendom dan niks goed gedoen het of iets goeds geproduseer het nie, moet ons dit verwerp.’ Selfs Christus het gesê, ‘Julle sal hulle aan hulle optrede uitken, net soos ‘n mens ‘n boom aan sy vrugte uitken…’ (Matteus 7:16 NLV). Met elke woord wat Christus egter gepreek het, is lewens verander en is daar wonderbaarlike dinge vir die samelewing gedoen. Neem die wetenskap as voorbeeld. Soos een kundige uitgewys het, kon die wetenskap in geen ander kultuur sy oorsprong gehad het nie. Dit kon nie uit die Moslemse kultuur ontstaan het nie as gevolg van hulle fatalistiese geloof, wat enige konsep van wetenskaplike vooruitgang verhoed. Dit kon ook nie vanuit die Boeddhiste of die Hindoes ontstaan het nie, omdat hulle glo dat die fisiese wêreld nie bestaan nie, dat niks behalwe God bestaan nie en dat hierdie alles net verbeelding is. Net deur Christenskap kon die wetenskap tot stand gekom het! Dink ook aan organisasies en mense wat die krotbuurte binnegaan om die verlatenes te red. Christene gee hulself aan hierdie mense. Vandag, met die verwydering van die Skrif uit groot dele van ons kultuur, sien ons hoe verval en korrupsie aan die orde van die dag is. Wat is dus die antwoord? Jesus het gesê, ‘Julle is die sout wat die aarde ‘n beter plek moet maak…’ (Matteus 5:13 NLV). Kry dus jou soutpot uit en begin om die lewensveranderende waarheid van God se Woord te versprei! Jesus het ook gesê, ‘Julle is die lig wat die wêreld moet verlig…’ (vers 14 NLV). Daar is nie genoeg duisternis in die wêreld om die lig van een klein kersie uit te doof nie. Laat jou lig dus skyn.
Sielskos: 1 Sam 1-3; Luk 3:1-10; Ps 59:1-8; Spr 16:20-22
2018-06-28
Rigters 3:31 NLV
Omdat die Israeliete ongehoorsaam aan God was, was hulle slawe vir die Filistyne wat met vrees en intimidasie oor hulle geregeer het. Samgar het egter geweier om geïntimideer te wees. Hy het besluit om die status quo omver te gooi en hy het dit met ‘n drywerstok gedoen – ‘n lang stok wat boere gebruik om diere mee aan te por. Hy het geweier dat dit wat hy nie kon doen nie, hom daarvan weerhou om te doen wat hy kon doen. God plus een is immers altyd die meerderheid. As God vir jou is, wie kan teen jou wees (sien Romeine 8:31). Samgar het dus sy drywerstok gegryp en op seshonderd Filistyne afgestorm. Die vyand het seker oor sy vreemde wapenkeuse gelag, totdat hy dit begin rondswaai het. Toe het die kyk in sy oë vrees in hulle harte ingeboesem. Moed beteken nie dat jy wag tot die situasie in jou guns draai nie, of tot die plan perfek is of tot mense se opinies verander nie. Moed wag vir net een ding: ‘n groen lig van God af. Dit gaan daaroor om die probleem aan te val met watter drywerstok God ook al vir jou gegee het. Dis ‘n aanval op die donker magte, deur te besluit om ‘sout en lig’ te wees waar God jou geplaas het. Dis meer as om net die probleme uit te wys, dis om jouself aan die oplossing te verbind. Dis meer as om ‘n hart vir Christus te hê, dis die besluit om aksie te neem en sy hande en voete te word. In plaas daarvan om op die kantlyn te sit omdat jy glo dat ander mense meer gekwalifiseerd is, gebruik dit wat God jou gegee het en vra Hom om dit te seën.
Sielskos: Hoog 5-8; Luk 2:41-52; Ps 21; Spr 16:16-19
2018-06-27
Kolossense 3:17 NLV
Wanneer jy God en ander mense dien, moet jy jou hart daarop sit om getrou te wees, eerder as om vernaam te wees. Die Bybel sê, ‘Dit is God wat oordeel. Hy wys vir party mense dat hulle nie belangrik is nie en Hy maak ander mense belangrik’ (Psalm 75:8 DB). Min dinge in die lewe is erger as om ‘n rol te vervul waarvoor jy nie toegerus is of voor geroepe is nie. Josh McDowell, wat al miljoene universiteitstudente wêreldwyd toegespreek het en verskeie boeke geskryf het, het sy lewensbediening aan Christus op ‘n nederiger manier begin. Sy eerste taak by die hoofkantoor van Campus Crusade for Christ was om die hoofingang se vloer skoon te maak. Josh se bekendstelling aan die bediening was soortgelyk aan die ou in die Ou Testament wat die tentpenne moes dra wanneer hulle die tabernakel van een plek na die volgende verskuif het. Nie eintlik ‘n hoë-profiel posisie nie! Sonder ‘n ordentlike perspektief oor ons motivering om te dien, is dit maklik om geaffronteerd te voel wanneer ons ‘n taak gegee word wat ons voel benede ons is. Hoe bly ons dus gemotiveerd om God te dien? Deur die belofte te onthou dat ons sal oes wat ons saai (sien Galasiërs 6:7). God het beloof dat Hy ons op die oordeelsdag vir ons getroue diens sal beloon. As Hy jou dus geroep het om Hom te dien deur ander mense te dien, hou jou hart op getrouheid gefokus – nie op trots of posisie nie. Lewe volgens hierdie Skrifgedeelte: ‘Verder, doen alles – of dit nou woorde of dade is – asof julle dit namens die Here Jesus doen. Só is julle besig om deur Hom dank aan God die Vader te bring’ (Kolossense 3:17 NLV).
Sielskos: Hoog 1-4; Luk 2:34-40; Ps 17; Spr 16:12-15
2018-06-26
Psalm 68:7 DB
‘n Vrou, pas geskei, het na ‘n dorp toe getrek waar sy niemand geken het nie. Toe sy eindelik haar moed bymekaar skraap om ‘n kerkdiens by te woon, het sy gebid, ‘Here, laat my inpas. Omring my met vriende.’ Sy het twee dames gevra of sy by hulle kon sit, en hulle het op die ou einde saam middagete gaan eet. Dit blyk toe dat al drie vrouens alleen woon en geïsoleerd voel. Hulle het toe ‘n Bybelstudie groep begin wat hulle G.A.L.S genoem het: God’s Amazing Love Sustains. Jare later gaan hierdie klein ‘familie’ nog sterk voort, deel hulle lief en leed, bid vir mekaar en kyk uit vir mekaar. Thomas Blackaby het opgemerk: ‘Een van die goeie dinge wat God voorsien is goddelike vriende. Dis een van sy maniere om vir ons aanmoediging, ondersteuning, raad en kameraadskap te gee. Paulus sou baie van sy beproewinge en vervolgings nie oorleef het nie, as dit nie vir vriende en kamerade was nie (sien 2 Korintiërs 7:6-7). Dis hartseer wanneer God se mense nie daaraan tyd spandeer om vriendskappe te ontwikkel nie en eerder op hulle eie in bediening voortgaan. Dis geen wonder dat hulle dikwels uitbrand of ontnugter of bitter terugkom, omdat hulle nie die aanmoediging en ondersteuning wat hulle bediening verëis het, ontvang het nie. Dank God vir diegene wat Hy gekies het om jou ondersteuners en aanmoedigers te wees. Vir wie is jy tans ‘n vriend? Wie het God jou op die hart gedruk om te versterk en die pad saam mee te loop? Vra Hom om jou te help om ‘n getroue vriend te wees, sodat julle julself kan verbly in wat Hy deur julle gekombineerde pogings vermag.’
Sielskos: 2 Kor 11:16-13:14; Luk 2:21-33; Ps 8; Spr 16:8-11
