2018-07-07
Genesis 50:20 NLV
Op sewentienjarige ouderdom het Josef se broers hom as slaaf verkoop. Op dertigjarige ouderdom, het farao hom as heerser oor Egipte aangestel. Gedurende daardie dertien jaar het Josef verskriklik gely. Nou het hy die mag van lewe en dood oor sy broers in sy hand gehou. Tog het hy nie net gekies om hulle te vergewe nie, maar ook om hulle in ‘n tyd van hongersnood van kos te voorsien. Soos hulle bewend voor hom gestaan het, het Josef gesê: “‘Wat my betref, het God die kwaad wat julle gedoen het, omgekeer in iets wat goed is. Hy het my gebring tot in hierdie hoë pos wat ek beklee sodat ek die lewens van baie mense kon red. Moenie bang wees nie. Wees verseker: Ek sal self vir julle en julle gesinne sorg.” So het hy vriendelik met hulle gepraat en hulle gerusgestel’ (verse 20-21 NLV). Let hierdie vier dinge op: 1) Net God verstaan mense se harte, dus is slegs Hy gekwalifiseerd om hulle te oordeel. 2) Soos jy meer volwasse word, sal jy in staat wees om die hand van God in sekere van die situasies wat jy deurgemaak het te sien; jy sal die ‘goeie’ eerder as die slegte in hulle sien. 3) Omdat jy geestelik gegroei het, sal jy erken dat ander ook in staat is om te groei en te verander. 4) As gevolg van die guns en seën wat God aan jou bewys het, sal jy nie net vriendelik met jou oortreder praat nie, maar ook vrygewig teenoor hulle wees. Jesus het gesê, ‘…julle moet julle vyande liefhê en bid vir dié wat julle vervolg’ (Matteus 5:44 NLV). Is jy gewillig om dit te doen? Is jy ten minste gewillig om te bid, ‘Here, maak my gewillig?’
Sielskos: 1 Sam 20:30-23:29; Luk 5:12-26; Ps 102:18-28; Spr 17:11-14
2018-07-06
Genesis 33:8 NLV
Hier is iets wat jy moet weet om vorentoe te kan beweeg. Die persoon wat jou seergemaak het, mag dalk nooit ‘n verskoning op die manier wat jy dit wil hê, aanbied nie. Na Jakob sy broer Esau uit sy geboortereg gekul het, het dinge tussen hulle so sleg geword dat Jakob by sy oom Laban in Haran gaan woon het. Later, toe albei broers ryk en suksesvol in hulle eie reg was, het Jakob probeer om met sy broer te versoen. Eers het Esau geweier om sy broer se geskenke te aanvaar, maar toe Jakob aangehou het, het ‘…Esau dit uiteindelik aanvaar…’ (vers 11 NLV). Let op, Jakob het nooit gesê, ‘Ek is jammer dat ek jou geboortereg gesteel het nie; vergewe my asseblief’ nie. Basies het hy gesê, ‘Ek sal graag wil vergoed vir my dade.’ Op hierdie punt het Esau ware volwassenheid bewys deur sy verhouding met sy broer hoër te ag as sy reg om weerwraak te neem. Daar is ‘n les hieruit te leer. God wil hê dat jy moet groot word en geestelike volwassenheid moet uitoefen. Jy kan nie beheer wat ander mense doen nie; jy kan net jou reaksie daarop beheer. As jy verder daarop aandring dat iemand jou op ‘n sekere manier verskoning moet vra, sal die verhouding dalk nooit herstel nie. Om aan ‘n wrok vas te hou is soos om aan ‘n brandende kool vas te hou; dit sal jou aanhou brand totdat jy dit laat gaan. Jy wil byvoorbeeld hê dat jou man vir sy gedrag moet om verskoning vra. As hy egter eerder vir jou ‘n geskenk koop of iets moois vir jou doen, reageer met grasie, eerder as om sy metodes en motiewe te oordeel. Sluit met ander woorde die rekening en beweeg vorentoe.
Sielskos: 1 Sam 18:1-20:29; Luk 5:1-11; Ps 102:12-17; Spr 17:7-10
2018-07-05
Johannes 17:4 NLV
Die mier sterf letterlik terwyl hy besig is om te werk. Verstaan egter mooi, die Bybel moedig nie ‘n leefstyl waar jy aan werk verslaaf is, jou gesondheid in gevaar stel en jou familie verwaarloos, aan nie. Te veel huwelike val uitmekaar wanneer paartjies hierdie filosofie aanhang, en te veel kinders neem hulle ouers kwalik omdat hulle nooit vir hulle tyd gehad het nie. Met dit in gedagte, het die moderne konsep van aftrede nie in die Bybel bestaan nie. Ja, jy mag dalk van ‘n beroep aftree, maar jy tree nooit van werk af nie. Solank as wat jy lewe, sal daar altyd werk wees wat God wil hê jy moet doen. Harvard Universiteit het ‘n studie oor sommige van sy alumni gedoen. Een groep van eenhonderd deelnemers het op die ouderdom van vyf-en-sestig afgetree, terwyl die ander groep tot die ouderdom van vyf-en-sewentig aanhou werk het. In die eerste groep is sewe uit agt deelnemers teen die ouderdom van vyf-en-sewentig dood – terwyl net een uit agt van die tweede groep wat aanhou werk het, oorlede is. Navorsers het dus tot die gevolgtrekking gekom dat vroeë aftrede langslewendheid kan beïnvloed. Dink bietjie aan Jesus se bediening wat drie-en-‘n-half jaar geduur het. Aan die einde daarvan, het Hy gesê, ‘Ek het… die werk… voltooi wat U vir My gegee het om te doen.’ Besef jy dat verlossing beskikbaar is omdat Jesus ‘n getroue werker was wat aangehou het totdat sy werk voltooi was? Weereens, rus, ontspanning en aftrede is waardige belonings na ‘n lewe van harde werk. Die waarheid is egter, so lank as wat jy lewe sal God vir jou iets hê om te doen! Jy sal nie net vreugde en vervulling in jou taak vind nie, maar ook die mense rondom jou daarmee seën.
Sielskos: 1 Sam 16-17; Luk 4:31-44; Ps 102:1-11; Spr 17:4-6
2018-07-04
Spreuke 10:4 NLV
‘n Mier kan tot vyftig keer sy eie gewig ‘n honderd meter ver dra. Dis die ekwivalent van ‘n man van 90 kilogram wat vyf ton vir 27 kilometer op sy rug dra! In ‘n enkele somer, kan ‘n kolonie miere dertien tot agtien kilogram grond uitgrawe om ‘n nes te maak en 2200 kilogram kos na hulle nes toe dra. Hulle kan tot vier reise per dag na ‘n bron van kos onderneem wat meer as 100 meter van die nes af weg is. Dis rofweg die ekwivalent van ‘n mens wat honderd kilometer, teen rofweg 32 kilometer per uur, afgewissel met ‘n spoed van 104 kilometer per uur, loop. Een ding van ‘n mier waarop jy kan staatmaak is dat hy altyd sy beste sal lewer en sy deel van die werk sal doen. Leer jou kinders dat hulle reputasie nooit bo hulle werksetiek en hoe ander mense hulle as werkers sien, sal uitstyg nie. Die sukses van die Walt Disney ryk is op die filosofie van die stigter daarvan gebaseer: ‘Wat jy ookal doen, doen dit so goed dat wanneer mense jou dit sien doen, hulle sal terugkom om jou dit te sien doen en ander mense sal saambring om hulle te wys hoe goed jy dit doen wat jy doen.’ Leer jou kinders om hard te werk, altyd die werk klaar te maak en altyd hulle beste te lewer. As hulle hierdie les goed leer, sal jy hulle nie baie oor sukses hoef te leer nie – dit sal hulle konstante metgesel wees.
Sielskos: 1 Sam 14-15; Luk 4:14-30; Ps 98; Spr 17:1-3
2018-07-03
Spreuke 14:23 NLV
Die mier sien werk nooit as vuil of benede sy waardigheid nie. Of hy nou grond moet skuif of broodkrummels moet ronddra, hy doen dit sonder om te kla. Hoe anders is dit nie as baie mense vandag nie! Iemand het een keer gespot, ‘As jy jou tieners uit warm water wil hou, sit net ‘n paar vuil borde daarin!’ Alle werk kan en behoort tot die eer van God gedoen te word (sien 1 Korintiërs 10:31). Die som van al hierdie dele word in hierdie eenvoudige Bybelse stelling gevind: ‘Inspanning bring voorspoed…’ Leer jou kinders die outydse manier om geld te bekom – deur daarvoor te werk! Elke werk of roeping, maak nie saak wat dit is nie, is ‘n roeping van God. Dr Martin Luther King het tereg verklaar, ‘Nie alle mans word geroep om gespesialiseerde of professionele werke te doen nie; selfs minder word na die hoogtes van meesters in die kuns of wetenskap geroep. Baie word geroep om in fabrieke, velde en strate te werk. Geen werk is egter onbelangrik nie.’ Jy as ouer berei jou kinders vir hulle beroepslewe voor, berei hulle dus goed voor. As jy dit nie doen nie, sal hulle ‘n lewe van smart hê en ‘n lewe van smart vir ander mense skep. Hulle sal dalk ook weer op jou drumpel opeindig! Base betaal nie werkers wat nie werk nie. Voor jy dus vir jou kinders sakgeld gee, gee hulle take om te doen, soos om hulle bed op te maak, hulle kamers skoon te maak, die asblik uit te neem, goeie punte op skool te behaal en hulle huiswerk betyds te doen. Beloning sonder verantwoordelikheid is verwenning. As jy jou kind liefhet, sal jy hom of haar nie verwen nie!
Sielskos: 1 Sam 11-13; Luk 4:1-13; Ps 95; Spr 16:31-33
2018-07-02
Spreuke 6:6 NLV
Die Bybel sê: ‘Jou luiaard, gaan leer by die mier wat wysheid is. Kyk wat hy doen. Leer iets by hom. Hy het nie ‘n leier, of ‘n opsigter, of iemand wat agter hom staan nie. Hy kry reeds in die somer sy kosvoorraad reg. In die oestyd werk hy klaar voor die winter kom’ (verse 6-8 NLV). Terwyl die koningin die middelpunt van aandag in die kolonie is, is sy nie die hoof-regeerder nie. Die werk en oorlewing van die kolonie word deur die ‘soldaatmiere’ verseker. Hierdie dienskneg-leiers is ouer miere wat elke nuwe aktiwiteit in die kolonie begin deur die werk self te doen. Die jonger miere boots dan hierdie dienskneg-leiers na en val by die werk in. Daar is geen opsigters, hoofde of offisiere onder die miere nie. Wanneer Salomo dus sê dat die miere ‘nie ‘n leier, of ‘n opsigter, of iemand wat agter hom staan nie’ het nie, is dit ‘n prentjie van die ywerige persoon wat hy in Spreuke 10:4 beskryf: ‘Mense wat lui is, word gou arm. Hulle wat fluks is, word ryk’ (NLV). Wanneer jy ‘n mier sien wat ‘n stuk brood verskeie kere groter as hy by ‘n steil opdraande uitdra, is dit ‘n studie in ywerigheid! Maak nie saak hoeveel keer hy die brood laat val nie, hy gaan terug om dit op te tel en begin weer klim totdat hy dit gebring het waar dit hoort. Wat dryf hom om dit te doen? Honger – God se motiverende krag vir werk. “‘n Werker se honger motiveer hom om te werk, sy behoefte aan kos dryf hom” (Spreuke 16:26 NLV). Die maag van ‘n honger man of vrou wat grom, is dikwels God se manier om ons die waarde van gewilligheid om te werk te leer.
Sielskos: 1 Sam 8-10; Luk 3:21-38; Ps 64; Spr 16:26-30
