2018-07-13
Genesis 39:3 NLV
Die tweede bewys wat jy nodig het om mense te kry om na jou te luister, is sukses. Geloofwaardigheid kom nie net van kennis alleenlik nie; dit kom van resultate. Wanneer mense sukses wil behaal, soek hulle raad by diegene wat al iets bereik het. Wanneer jy suksesvol is, sal daar altyd diegene wees wat na jou wil luister. As jy sukses bereik het in ‘n veld waarin hulle ook wil presteer, neem jou geloofwaardigheid baie toe. Wat verg dit dus om ‘n sukses te wees? Baie verskillende dinge. Hier is ‘n paar: 1) Gewoontes. Almal wil suksesvol wees, maar min mense is bereid om die prys daarvoor te betaal. Jy bepaal nie jou toekoms nie; jy bepaal jou gewoontes en jou gewoontes bepaal jou toekoms. Die geheim lê in jou daaglikse roetine. Om sukses te bereik, moet jy ‘n gewoonte daarvan maak om dit te doen wat ander onsuksesvolle mense nie doen nie. 2) Geleenthede. ‘n Suksesvolle persoon maak hooi van die gras wat onder ‘n ander persoon se voete groei! Hulle beperk hulle take nie tot die ure wat die son skyn nie. Hulle verstaan dat sukses aspirasie, inspirasie en perspirasie verg. 3) Volharding. Sukses beteken dat jy elke keer opstaan wanneer jy val. Die wetenskaplike en uitvinder, Louis Pasteur, het gesê, ‘Laat my toe om jou die geheim te vertel wat my gehelp het om my doelwit te behaal. My sterkpunte lê alleenlik in my deursettingsvermoë.’ 4) God. Abraham Lincoln het gesê, ‘I believe the will of God prevails; without Him all human reliance is vain; without the assistance of that divine being I cannot succeed; with that assistance I cannot fail.’ God het vir Josef sukses gegee in alles wat hy gedoen het; en Hy wil dieselfde vir jou doen!
Sielskos: 2 Sam 1:1-3:21; Luk 6:37-49; Ps 109:1-15; Spr 17:27-28
2018-07-12
Markus 12:37 NLV
Die Bybel sê rakende Jesus: ‘…Die groot skare het dit geniet om na Hom te luister.’ Hoekom? Omdat sy woorde deur sy karakter, sy optrede en sy besorgdheid oor ander mense onderstreep is. In kort, Jesus het die reg verdien om te kan praat. Het jy? Mense luister na jou wanneer jy insig het. Wanneer dit wat jy sê iemand waarlik help, vorm julle ‘n konneksie. Benjamin Franklin, een van die mees bewonderenswaardige figure in die Amerikaanse geskiedenis, het ‘n merkwaardige loopbaan gehad. Hy het vir net twee jaar skool bygewoon en tog was hy hoogs gerespekteerd as gevolg van sy kennis en skerp insig. As ‘n vurige leser en ‘n nuuskierige man, het hy ‘n kundige in ‘n opmerklike aantal areas geword: drukwerk en publisering, politiek, burgerlike aktivisme, die wetenskappe en diplomasie. Hy was ‘n innoverende uitvinder wat die ondersteuning van Frankryk tydens die Revolusionêre Oorlog verseker het, die eerste publieke biblioteek in Amerika gestig het, as die eerste president van die Amerikaanse Filiosofiese Gemeenskap gedien het en gehelp het om die Verklaring van Onafhanklikheid op te stel. Die biograaf Walter Isaacson het Franklin die talentvolste Amerikaner van sy tyd en die invloedrykste in die uitvinding van die tipe samelewing wat Amerika sou word, genoem. Mense het ‘n verbinding met Franklin gevoel wanneer hy sy wysheid gedeel het. Hier is hoe dit op jou van toepassing is. Wanneer jy lief is vir mense, hard werk, studeer, groei en jou kundigheid in ‘n gegewe area deel, sal mense leer om jou te respekteer en vir jou te luister. Wanneer dit by luister kom, kry jy nie wat jy vereis nie, jy kry wat jy verdien.
Sielskos: Ef 4:17-6:24; Luk 6:27-36; Ps 79; Spr 17:24-26
2018-07-11
1 Korintiërs 1:10 NLV
Daar is ‘n legende oor ‘n groep kwartels wat in ‘n woud gewoon het. Die voëls was gelukkig daar, behalwe vir hulle vyand, die kwartelvanger. Hy sou hulle roep naboots en wanneer hulle bymekaar kom, sou hy ‘n net oor hulle gooi en wegdra om by die mark te gaan verkoop. Eindelik het ‘n wyse ou kwartel gesê, ‘Broers en susters, ek het ‘n plan. Wanneer die kwartelvanger sy net oor ons gooi, moet ons almal ons koppe in ‘n gaatjie in die net druk en ons vlerke begin klap. Dan kan ons as een opstyg en daarmee wegvlieg.’ Die voëls het almal saamgestem en die volgende dag presies dit gedoen om suksesvol te ontsnap. Toe die kwartelvanger se vrou hom vra waar die kwartels is om na die mark toe te neem, het hy geantwoord, ‘Toe hulle almal saamstaan, was daar geen keer aan hulle nie!’ In ‘n brief aan die gemeente in Korinte het Paulus geskryf, ‘Lede van die huisgesin van Chloë het aan my vertel… dat daar allerlei struwelinge onder julle voorkom’ (vers 11 NLV). Paulus het ook gesê, ‘En nou… pleit ek by julle… om eendragtig saam te staan – één in julle oortuigings. Daar mag nie groepvorming onder julle wees nie. Julle moet van harte saamstem in julle denke en in julle visie.’ Sukses in enige onderneming verg die dood van individuele ego’s en selfbelang. Wanneer ‘n fout dus gemaak word, weier om blaam te verplaas. Wees vergewensgesind en moenie ‘n oortreding toelaat om in bitterheid te ontwikkel nie. Bied lof vir ander spanlede se sterkpunte en hulp in die areas waarin hulle swak is, aan. Wees pligsgetrou en betroubaar en bly op die groter doel gefokus. Wanneer ons leer om saam te werk, is daar geen keer aan ons nie!
Sielskos: Ef 1:1-4:16; Luk 6:17-26; Ps 137; Spr 17:22-23
2018-07-10
2 Korintiërs 5:17 NLV
Niks in die geskiedenis kan vergelyk word met dit wat Christelike sendelinge vermag het nie. Meer as eenhonderd jaar gelede, het ‘n skrywer van ‘n reis rondom die wêreld teruggekeer en ontdek dat sendings en sendelinge deur kritiek in die Londense koerante gebombardeer word. Hy het toe ‘n brief aan die koerante geskryf wat die sendinge verdedig het. Daarin het hy gesê dat die transformasie van die wilde barbare op die eilande in die Suid See iets was om te aanskou en om die sendings af te kraak ‘n gruwelike misdaad was: “‘n Reisiger wat per ongeluk op een van hierdie eilande gestrand word, moet hard bid dat die lesse van ‘n sendeling hom vooraf gegaan het.” Die skrywer van hierdie brief was niemand anders as Charles Darwin nie. Nadat hy van sy wêreldreis teruggekeer het, was hy getransformeer. Dink aan die Papoeane, een van die inboorlingstamme van Nieu-Guinee. Sendelinge van Holland het met hulle begin werk en in 1860 het die werk van die Nuwe Hollandse Sending vrugte afgewerp, toe ‘n man genaamd Nathaniel Pepper, een van die inboorlinge, homself tot Christus bekeer het. ‘n Paar jaar later, toe duisende inboorlinge bekeerlinge geword het, het die Papoeaanse skool eerste prys in ‘n akademiese kompetisies onder die twaalfhonderd koloniale skole in Nuwe Holland, verower. Voorwaar ‘n prestasie! Skeptici mag dalk ‘n paar inrigtings vir melaatses, hospitale en weeshuise gebou het, maar dit is verreweg die volgelinge van Jesus Christus wat die grootste impak op hierdie wêreld gemaak het.
Sielskos: 1 Sam 27-31; Luk 6:1-16; Ps 122; Spr 17:18-21
2018-07-09
Filemon 1:15-16 NLV
Wat het ‘n einde aan slawerny gebring? Die evangelie van Jesus Christus. Lees die brief wat Paulus aan Filemon geskryf het. ‘n Slaaf wat weggeloop het, is saam met Paulus in ‘n Romeinse tronk gegooi en daar het Paulus hom tot Christus bekeer. Toe die slaaf vrygelaat is, het Paulus hom na sy eienaar, Filemon, toe teruggestuur. Dit was die gebruik in daardie tyd om slawe wat ontsnap het, dood te maak wanneer hulle weer gevang word. Teen daardie tyd het Filemon egter ook ‘n bekeerde van die apostel Paulus geword, wat hom opdrag gegee het om die slaaf ‘nie langer as ‘n slaaf nie, nee, méér as ‘n slaaf, as ‘n broer vir wie ons lief is!..’ te ontvang. In hierdie broederskap is slawerny die doodskoot toegedien. Dink nou aan die dae van William Wilberforce, wat homself onder die prediking van John Wesley bekeer het. Wilberforce, ‘n klein, geboë mannetjie, het een van die magtigste lede van die parlement geword. Verteer deur die evangelie en die vryheid wat Christus aanbied, het Wilberforce al sy energie daarin gewerp om die slawehandel van Afrikane omver te werp. Sy sukses om dit dwarsdeur die Britse Ryk af te skaf het tot soortgelyke aksie in Amerika gelei. Dit was inderdaad proklamasies van preekstoele af wat gehelp het om slawerny vir eens en vir altyd te vernietig. Dit is dus deur die kerk wat slawerny afgeskaf is. Jesus het gekom ‘…om aan te kondig dat gevangenes vrygelaat sal word… dat onderdruktes bevry sal word van hulle verdrukkers’ (Lukas 4:18 NLV). Is jy ‘n lid van God se verloste kerk? Indien nie, kan jy vandag deel word daarvan!
Sielskos: 1 Sam 24-26; Luk 5:27-39; Ps 110; Spr 17:15-17
2018-07-08
Matteus 16:18 NLV
Die Christelike kerk is twee keer so groot soos sy naaste mededinger. Dit sal bitter moeilik wees om so ‘n groot kerk se invloed omver te gooi. Veronderstel dat daar vandag ‘n groep sendelinge in jou dorp opdaag en vir jou vertel dat ‘n landbewoner wat tereggestel is, uit die dood uit opgestaan het. Hy is ook niemand anders as die Skepper van die heelal nie. Sal jy dit glo? Die apostels in die heidense Romeinse Ryk het dit geglo. In die aangesig van verskriklike vervolging, het die Christendom aanhou floreer. Selfs die pogings van Julian die Afvallige om die Christendom omver te werp en die heidense Ryk weer te vestig, was nie suksesvol nie. Toe Julian se aanslag teen die Christene op sy ergste was, het een van die keiser se volgelinge ‘n Christen gevra, ‘Wat doen jou timmerman se seun nou?’ Die Christen het geantwoord, ‘Hy is besig om ‘n kis vir jou keiser te bou!’ Nie lank hierna nie is Julian noodlottig tydens ‘n geveg gewond. Hy het grond toe geval, ‘n handvol sand gemeng met sy bloed in die lug gegooi en verklaar, ‘U het oorwin, Galileër.’ Nee, die kerk is nie perfek nie; dis hoekom mense soos ons welkom is daar! Nietemin is daar baie geldige redes hoekom die kerk van Jesus Christus aanhou seëvier. Dis ‘n hospitaal vir die gewondes, dis ‘n familie vir die eensames en dis ‘n skool vir diegene wat in die beginsels van dissipelskap opgelei word. Uiteindelik is dit die enigste ding wat sal staande bly wanneer alles wat tydelik is, in rook opgaan (sien 2 Petrus 3:10-12). Wy dus jou lewe aan Jesus Christus en sluit by sy seëvierende kerk aan!
Sielskos: Matt 5:7; Matt 18:21-35; Ps 103:8-18; Klaag 3:22-24
