2018-07-19
Klaagliedere 2:19 NLV
Die verhaal van Jaïrus is die storie van ‘n pleitende ouer en ‘n alomteenwoordige Redder. Dus, ‘Staan op… om jou hart soos water voor die Here uit te stort. Steek jou hande uit na Hom om te pleit vir jou kinders…’ Ouer, jy kan dit doen. Jy kan ‘n lojale voorstaander en ‘n getroue bemiddelaar wees. Jy kan jou vrese oor ouerskap na Jesus toe bring. As jy dit nie doen nie, mag jy dalk selfs jou vrese op jou kinders uithaal. Vrees verander sommige ouers in tronkbewaarders wat elke minuut monitor en die agtergrond van elke vriend ondersoek. Hulle onderdruk groei en kommunikeer wantroue. ‘n Familie met geen spasie vir asemskep nie, versmoor ‘n kind. Aan die ander kant, kan vrees ook permissiewe ouers kweek. Uit vrees dat hulle kind te ingehok sal voel, verlaag hulle hulle grense. Hoog op drukkies en laag op dissipline, besef hulle nie dat toepaslike dissipline ‘n uitdrukking van liefde is nie. Permissiewe ouers of paranoïese ouers – hoe kan jy hierdie uiterstes vermy? Deur te bid! Jesus het min oor ouerskap gesê, maar sy aksies spreek volumes oor gebed. Elke keer wat ‘n ouer bid, reageer Christus. Die groot boodskap van hierdie dagstukkie is: Wanneer jou kind ‘n krisis beleef, draai na Jesus toe. Moet egter nie vir die krisis wag nie. Stuur hulle elke dag met ‘n seëngebed skool toe. Wanneer jy vir hulle goeienag sê, bedek hulle met gebed. Wanneer hulle met huiswerk sukkel, bid saam met hulle daaroor. Bid dat jou kinders ‘n diepgaande sin van hulle plek in hierdie wêreld sal hê, en ‘n hemelse plek in die volgende een.
Sielskos: 2 Sam 17:14-19:43; Luk 8:1-15; Ps 123; Spr 18:13-16
2018-07-18
Lukas 8:41 NLV
Jaïrus het die sosiale status van ‘n burgemeester of biskop geniet. Wanneer jou kind egter in ‘n krisis is, sal al die status in die wêreld jou nie help nie. Jaïrus was ook nie die enigste ouer wat na Jesus toe gehardloop het toe moeilikheid aan sy deur kom klop het nie. ‘n Vrou het na Jesus gestorm en uitgeroep, ‘Here, Seun van Dawid, kry my tog jammer! My dogter is in die mag van ‘n duiwel en hy teister haar verskriklik’ (Matteus 15:22 NLV). Die vader van ‘n seun wat stuiptrekkings gekry het, het ook by die dissipels om hulp gesoek. Toe hulle hom nie kon help nie, het hy na Jesus toe gedraai en in trane gesê, ‘Ek glo!.. Help my tog om nie meer te twyfel nie!’ (Markus 9:24 NLV). In elke geval het Jesus gereageer. Hy het niemand weggewys nie. Hy sal jou ook nie wegwys nie! Jou kinders was immers eers sy kinders. Die Psalmdigter het gesê, ‘Kinders is ‘n gawe van die Here; ‘n vrug van die moederskoot’ (Psalm 127:3 NLV). Naas die gawe van verlossing, is kinders God se beste gawe aan jou. Selfs al is hulle joune, is hulle steeds syne. Dit wat syne is, beskerm en versorg Hy. Soos die Verlore Seun, mag hulle dalk elkeen van God se wette en jou hart gebreek het. Jou gebede is egter dit wat God ‘n uitnodiging en ingangspunt terug in hulle lewens gee. Die liefde van ‘n pa wat die Verlore Seun huis toe gedryf het, sal ook jou kind terugbring. Wat Jesus vir Jaïrus gesê het, sê Hy ook vandag vir jou: ‘…Moenie jou ontstel nie. Vertrou My net en dit sal goed gaan met haar’ (Lukas 8:50 NLV).
Sielskos: 2 Sam 14:21-17:13; Luk 7:36-50; Ps 118:19-29; Spr 18:10-12
2018-07-17
Psalm 139:16 NLV
Die Psalmdigter het geskryf: ‘U het my gesien voor ek gebore is. In u boek is alles opgeteken; elke dag is bepaal voordat een van hulle daar was. Kosbaar is u gedagtes vir my, o God!..’ (verse 16-17 NLV). As jy wil weet wat God se wil vir jou lewe is, bid die volgende gebed: ‘Here, U het my geken voor ek gebore is, U het my gevorm en vir ‘n spesifieke doel geskep. Gee my asseblief ‘n duidelike visie van alles wat U in en deur my lewe wil doen. Ek het ‘n desperate behoefte daaraan om te verstaan wat die roeping waarvoor ek geskep is, is (sien Efesiërs 4:4), en ‘…hoe enorm groot die krag is wat God gebruik in ons wat glo…’ (Efesiërs 1:19) om my in staat te stel om u doel te vervul. Wys my die gawes wat U in my geplaas het en hoe ek hulle tot eer van U kan ontwikkel en gebruik (sien Romeine 12:6). Help my om met vrymoedigheid te bid (sien Efesiërs 3:20). Ek wil ontvanklik wees vir dit wat U vir my het en nie u seëninge verbeur nie. Help my om nie aan dinge en verhoudings vas te hou wat nie van U af kom nie. Ek wil u wil met my hele hart dien (sien Psalm 40:9). Help my om u stem te hoor en gee my die genade en moed om u leiding te volg wanneer ek bang is (sien Johannes 10:4). Mag die begeertes van u hart die begeertes van my hart word. Vergroot my kapasiteit om te glo dat U dit kan neem wat ek het en dit kan vermeerder bo enigiets wat ek aan kan dink. In Jesus se Naam bid ek dit, amen.’
Sielskos: 2 Sam 12:1-14:20; Luk 7:24-35; Ps 118:10-18; Spr 18:7-9
2018-07-16
Psalm 32:7 NLV
Het jy al ooit daaroor gefantaseer om weg te hardloop van al die stres van vandag se gejaagde lewe? Daar moet tog ‘n plek op aarde wees waar die pas stadiger en die lewe maklik is. Hierdie droom het ‘n familie in 1940 gemotiveer om na ‘n eiland genaamd Gaudalcanal in die Koraalsee te verhuis. Twee jaar later het oorlog egter in die Stille Oseaan uitgebreek en was daar ‘n stryd op hulle voorstoep. Uit die aard van die saak het hulle die verkeerde plek gekies. Waar kan jy gaan om die geraas en gejaagdheid van die stadslewe te ontsnap? Wat van ‘n klein eiland in die Karibiese See genaamd Grand Cayman? Vakansiegangers by hierdie oord sê dat dit die naaste ding aan ‘n paradys op aarde is. Die inwoners betaal geen belasting nie. Die water rondom hulle is kalm en warm en daar is orgideë wat orals groei. Klink idillies, nie waar nie? Daar is egter ‘n vangplek. Mediese studies het bewys dat die twee hoofsiektes waaraan inwoners van Grand Cayman ly, hipertensie en angsneurose is. Lewe op ‘n tropiese eiland is nie altyd wat dit voorkom om te wees nie. Kan dit wees dat die stres en druk waarteen ons stry, eintlik van binne onsself kom? Ja. Hierdie stres en druk gaan ons pla, maak nie saak waar ons lewe nie, totdat ons leer om ons omstandighede soos dit is, te hanteer. Hier is hoe die Psalmdigter dit gedoen het: ‘U is vir my ‘n skuilplek. U beskerm my van teëspoed. U omring my met liedere van redding. Die Here sê: “Ek sal jou onderrig en die pad wys waarop jy moet gaan. Ek sal vir jou raad gee, my oog sal op jou wees'” (verse 7-8 NLV).
Sielskos: 2 Sam 7:18-11:27; Luk 7:11-23; Ps 118:1-9; Spr 18:4-6
2018-07-15
Genesis 26:8 NLV
In die dae wat houtskepe van die wind afhanklik was om hulle voort te dryf, het matrose baie gehad om oor besorgd te wees: seerowers, storms en siektes. Hulle grootste vrees was egter dikwels die ‘windstilstreke’ – ‘n area naby aan die ewenaar wat deur kalm en min winde gekenmerk word. Dit kon die dood van die hele bemanning beteken het. Hulle kon vir dae of selfs weke rondgedobber het terwyl hulle vir ‘n wind gewag het om hulle weer op koers te kry. Ons praat van dinge wat ‘die wind uit ons seile neem,’ wanneer ons ons momentum verloor en van koers af gaan. Jou huwelik verloor nie sy momentum oornag nie, maar oor maande en jare van onsensitiwiteit en verwaarlosing. Dit hoef egter nie vir jou so te wees nie. Doug Fields skryf in sy boek, Creative Romance, die volgende: ‘Om jou eggenoot te romantiseer kan baie pret wees. Daar is natuurlik geen kitsoplossings vir ‘n huwelik wat stagnant is nie, maar jy kan die verskonings eenkant toe skuif en begin om jou geliefde weer die hof te maak.’ God het die kerk in Efese hiervan beskuldig: ‘Maar Ek het hierdie klag teen jou: dat jy jou eerste liefde versaak het’ (Openbaring 2:4 NLV). Toe het Hy vir hulle gesê hoe om dit reg te stel: ‘…kom tot inkeer, en doen weer wat jy aan die heel begin gedoen het…’ (vers 5 NLV). Isak was bang dat koning Abimelek hom sou doodmaak en sy vrou Rebekka vir homself sou vat, en het toe gejok en gesê dat sy sy suster is. Wat het hom weggegee? ‘Na ‘n tyd kyk Abimelek… eendag deur ‘n venster en sien hoe Isak vir Rebekka liefkoos.’ Romanse het sy lewe en sy huwelik gered. Dit kan dieselfde vir jou doen.
Sielskos: Matt 5:8; Ps 24:3-6; Ps 18:17-26; 1 Joh 3:1-3
2018-07-14
1 Korintiërs 15:57 NLV
Wat soos ‘n terugslag lyk, is dikwels die grondslag vir ‘n terugkeer! Daar is geen groter illustrasie hiervan as Goeie Vrydag nie. Op die Saterdag tussen Goeie Vrydag en Opstanding Sondag, het dit gelyk of alles verlore was. Dis egter nie verby totdat God sê dis verby nie! Die grootste geestelike oorwinning is behaal op die hakke van wat na die grootste nederlaag gelyk het. Alles was verlore, maar nie vir lank nie. Drie dae na sy kruisiging, het Jesus uit sy grafkelder uitgeloop. As ‘n verloste kind van God, lê dieselfde krag vandag in jou. ‘Omdat die Gees van die God wat Jesus uit die dood opgewek het in julle woon, sal Hy wat die dooie Jesus opgewek het, ook julle dooie liggame weer lewendig maak deur dieselfde Gees wat in julle woon’ (Romeine 8:11 NLV). In God se koninkryk is mislukking nooit finaal nie. Nie as jy in die opstanding glo nie! Jy sal nie elke geestelike geveg wen nie, maar die oorlog is beslis gewen. Die oorwinning is tweeduisend jaar terug reeds behaal toe Jesus sy grafkelder se seël gebreek het. Dit was die doodslag vir die dood self. Paulus skryf, ‘Tog is ons ten spyte van al hierdie dinge besig om ‘n superoorwinning te behaal – oorwinnaars deur Christus wat sy liefde so duidelik aan ons bewys het’ (vers 37 NLV). Vandag is jy meer as ‘n oorwinnaar (in al hierdie dinge) as gevolg van dit wat Christus vir jou bereik het. Ja, jy sal terugslae beleef. Onthou egter die volgende: sonder die kruisiging kan daar nie ‘n opstanding wees nie. Wanneer jy dus ‘n terugslag beleef, moenie ‘n tree terug neem nie, want God berei jou vir jou terugkeer voor.
Sielskos: 2 Sam 3:22-7:17; Luk 7:1-10; Ps 109:16-31; Spr 18:1-3
