2018-07-25
Rigters 7:17 NLV
Op die vooraand van sy skouspelagtige oorwinning oor die Midianiete, het Gideon vir sy driehonderd manskappe gesê, ‘…Kyk mooi wat ek doen. Wanneer ek by die kamp kom, moet julle presies maak soos ek.’ Wat sou gebeur as jy dit vir die mense wat jou ken sou sê? Sou jy moes byvoeg, ‘Volg my in besigheid, maar nie in my familielewe nie’? Of, ‘Volg my professionele raad, maar nie my persoonlike leefstyl nie’? Om respek te verdien en waardig te wees om gevolg te word, het jy twee kwaliteite nodig wat saak maak. Die eerste is oortuiging. Oortuiging is ‘n vaste beginsel waarvolgens jy leef en weier om van af te sien. ‘n Man of vrou van oortuiging pas nie sy of haar beginsels en aksies by eksterne invloede aan nie. Een vroeë oggend, is die Skotse filosoof en godsdienstelike skeptikus, David Hume, gesien waar hy jaag om die evangelis George Whitefield se diens by te woon. Toe hy gevra word of hy waarlik glo wat die groot evangelis gepreek het, het Hume geantwoord, ‘Definitief nie! Maar hy glo dit en ek wil ‘n man hoor praat wat waarlik glo in dit wat hy sê!’ Die skrywer Larry Phillips het gesê, ‘Daar is ‘n opmerkbare verskil tussen staal en tin – veral wanneer dit getref word. Opregte, hartstogtelike oortuigings kom eenvoudig oor as ‘woorde van staal.’ Daar is ‘n gedetermineerde voorneme daaraan. Ons moet besef dat ons nie oortuigings kan vervals nie! Mense sal altyd die verskil tussen woorde van staal en die geluid van tin kan onderskei – maak nie saak hoe hard die tin getref word nie!’ Mense ken die verskil tussen jou kernwaardes en jou intellektuele konsepte. As jy nie ‘n diepe oortuiging het van dit wat jy sê nie, hoekom moet hulle dit hê?
Sielskos: Hab 1-3; Luk 9:18-27; Ps 65; Spr 19:5-8
2018-07-24
Amos 5:5-6 NLV
Bet-El is waar Jakob sy lewensveranderende droom gehad het en ‘n eed aan God afgelê het. Gilgal is waar die Israeliete gekamp het nadat God die Jordaanrivier wonderbaarlik geskei het en waar hulle vir die eerste keer die Beloofde Land betree het. Berseba is waar Isak ‘n put gegrawe het en ‘n altaar opgerig het. Al drie plekke het spesiale betekenisse gehad: Hulle was heilige bakens van Israel se geestelike reis. Hoekom het God dan gesê dat hulle Hom nie daar moet soek nie? Die antwoord is eenvoudig: Jy sal God nie in die verlede vind nie. Die Psalmdigter het gesê, ‘God beskerm ons en Hy maak ons sterk, Hy is altyd gereed om ons te help’ (Psalm 46:2 ABA). Wanneer ons te styf vashou aan dit wat God laas gedoen het, mis ons dikwels wat God wil hê ons volgende moet doen. Hy is aan die werk, op hierdie oomblik en op hierdie plek. Hy doen altyd iets nuuts. Gaan dus voort en bou altare en bakens vir heilige oomblikke in die verlede, maar onthou egter dat die doel van altare is om ons aan God se getrouheid in die verlede te herinner sodat ons geloof kan hê om Hom vir die toekoms te vertrou. Wanneer ons in die verlede begin leef, begin ons sterf. Om lewendig te wees beteken dat ons ten volle in die huidige leef. Dit beteken dat jy die verlede in die verlede moet los. Dis hoekom Paulus geskryf het, ‘…ek vergeet dit wat agter my lê, en strek my uit na dit wat voorlê. Ek jaag wenpaal toe, na die hemelse prys wat God aan my wil gee omdat Christus Jesus dit vir my verdien het’ (Filippense 3:13-14 NLV). Strek jou dus uit na wat voor is!
Sielskos: Nah 1-3; Luk 9:1-17; Ps 14; Spr 19:1-4
2018-07-23
1 Konings 19:21 NLV
Elisa se bediening begin met die volgende Skrifgedeelte: ‘Elisa het toe teruggegaan en twee osse geslag. Hy het die jukke opgekap vir brandhout en die vleis gebraai. Hy het die vleis gegee aan die ander wat geploeg het… Daarna het hy saam met Elia gegaan en sy volgeling geword.’ Hy kon nie na sy ou manier van lewe terugkeer nie, omdat hy die gereedskap daarvoor verbrand het. Dit was die einde van Elisa die boer en die begin van Elisa die profeet. Dit maak nie saak of jy probeer gewig verloor, verder wil leer, ‘n boek wil skryf, ‘n besigheid of bediening wil begin of uit die skuld wil kom nie, die eerste stap is altyd die langste en die moeilikste. Jy kan nie net ‘n tree in jou toekoms inneem nie; jy moet ook die moontlikheid om terug in die verlede in te beweeg, elimineer. Dis hoe jy jou doelwitte bereik. Dis hoe jy verslawings oorkom. Dis hoe jy verhoudings versoen. Dit was nie nodig vir Elisa om sy ploeggereedskap te verbrand om Elia te volg nie, maar dit het ‘n stelling gemaak. Meer spesifiek was dit ‘n stelling van geloof. Daar was nie omdraaikans nie. Nege uit die tien keer misluk mense wanneer hulle na Plan B oorgaan omdat Plan A te riskant, te duur of te moeilik is. Dis hoekom die meeste mense hulle Plan B uitlewe. Hulle het nie hulle brûe na die verlede afgebrand nie. Plan A mense het nie ‘n Plan B nie. Dis Plan A of niks. Hulle sal eerder verongeluk terwyl hulle hulle Goddelike drome nastreef, as om sukses met iets anders te behaal. Die woord vir jou vandag is: Brand die brûe na jou verlede af en beweeg vorentoe.
Sielskos: 2 Pet 1-3; Luk 8:40-56; Ps 146; Spr 18:23-24
2018-07-22
Efesiërs 5:33 NLV
‘n Vrou het een Maandagoggend skielik opgespring en ‘n werksvergadering verlaat. Bekommerd, het haar vriendin haar buitentoe gevolg om te hoor hoekom sy so skielik opgespring het. Sy het die vrou op haar selfoon buite die raadsaal aangetref. ‘Is alles reg?’ het sy dringend gevra toe die vrou die telefoon neersit. ‘O, ja,’ het die vrou skaam geantwoord. ‘Ek wou julle nie laat skrik nie, maar ek het skielik onthou dat die asblik op Maandae vir die vullisverwyderaars uitgesit moet word.’ ‘Maar is jou man dan nie by die huis om daarvoor te sorg nie?’ het die vriendin fronsend gevra. ‘Ja,’ het die vrou geantwoord, ‘maar dit verg twee van ons om die vullis uit te vat. Ek kan dit nie optel nie, en hy kan dit nie onthou nie!’ Die geheim van ‘n suksesvolle huwelik lê daarin om te leer hoe om saam te lewe en te werk. Hier is tien voorstelle om jou te help om hierdie doel te bereik: 1) Besluit om daagliks saam te bid. 2) Sê elke dag vir mekaar iets moois. 3) Moenie vergeet om lepel te lê nie. 4) Dink aan julle as ‘n span – nie net as ‘n paartjie nie. 5) Respekteer julle verskille. 6) Eet ten minste een maaltyd ‘n dag saam. 7) Gee julle argumente aan God oor. 8) Ontwikkel ‘n sterk sin vir humor. 9). Identifiseer julle ‘spesiale plek’ en ‘spesiale liedjie.’ 10) Wees nostalgies saam. Ironies genoeg, is die nommer een rede vir skeisake vandag ‘uiteenlopenheid van karakter.’ Wel, raai wat? Julle is veronderstel om verskillend te wees! Wanneer twee mense met verskillende gawes besluit om vir mekaar lief te wees en na mekaar te luister, word hulle verskille ‘n bron van krag, eerder as ‘n bron van swakheid. Die huwelik verg twee!
Sielskos: Matt 5:9; Rom 12:17-21; Jak 3:17-18; Matt 26:51-52
2018-07-21
2 Timoteus 1:10 NLV
Dis geen verrassing dat God ‘n hart het vir ouers wat seer het nie. God is immers self ‘n Vader. Mishandel iemand jou kind? Hulle het sy kind gespot en geboelie. Maak iemand misbruik van jou kind? Jesus is deur vals getuienis veroordeel en deur ‘n gierige volgeling verraai. Word jy geforseer om toe te kyk hoe jou kind ly? God het sy Seun op die kruis gesien. Vind jy dat jy jou kind van al die seer in die wêreld wil spaar? God het ook so gevoel, maar, ‘As God werklikwaar nie sy eie Seun gespaar het nie, maar Hom ter wille van ons aan die dood oorgegee het, is daar tog geen manier waarop Hy nie ook alle ander goeie dinge aan ons sal skenk nie’ (Romeine 8:32 NLV). Daar is niks wat God nie in antwoord op gebed kan doen nie! Miskien het jy gebid, maar jou kind het gesterf. Daar is geen pyn wat met die verlies van ‘n kind vergelyk kan word nie. Miskien het jy gesê, ‘Jesus het Jaïrus se kind uit die dood gered, hoekom het Hy myne nie gered nie? God verstaan jou vraag. Hy het ook sy kind begrawe. Hy haat ook die dood. Dis hoekom Hy ‘…die mag van die dood verbreek het en aan ons… die weg gewys het na die onverganklike lewe.’ Vir diegene wat op Christus vertrou, is die dood niks meer as ‘n oorgang na die hemel toe nie. Jou kind mag dalk nie vandag in jou arms wees nie, maar is veilig in God se arms. Nadat hy sy seun by geboorte verloor het, het Dawid met hoop vorentoe gekyk en gesê, ‘…Eendag sal ek na hom toe gaan…’ (2 Samuel 12:23 NLV). Jy sal ook.
Sielskos: 2 Sam 22:31-24:25; Luk 8:26-39; Ps 140; Spr 18:21-22
2018-07-20
Lukas 8:55-56 NLV
Jy kan jou heel beste vir jou kinders doen en steeds staan waar Jaïrus gestaan het. Jy kan vir hulle lief wees, hulle beskerm en vir hulle bid, en steeds jouself om middernag in ongevalle of by die rehabiliteitskliniek tydens besoekure bevind, waar jy tussen twee stemme kies: wanhoop en geloof. Wie sou Jaïrus kwalik geneem het as hy opgegee het? Toe hy die eerste keer na Jesus toe gegaan het, was sy dogter kritiek, maar steeds lewendig. Terwyl hy egter met Jesus gepraat het, het die boodskap gekom: ‘…Jou dogter is dood…’ (vers 49 NLV). In daardie oomblik het Jesus na Jaïrus gekyk en gesê, ‘Moenie jou ontstel nie. Vertrou My net en dit sal goed gaan met haar’ (vers 50 NLV). Of dit nou is om die kind se siekte in sy spore te stuit of haar uit die dood uit op te wek, Jesus was die antwoord op Jaïrus se probleem. Hy is ook die antwoord op jou familie se probleem. Let twee dinge op wat Jesus gedoen het: 1) Hy het die mense weggestuur wat getreur het, maar geen geloof gehad het nie (sien Lukas 8:52). Wees versigtig wie jy naby aan jou toelaat, veral in tye van krisis. 2) Hy het die ouers in geloof verenig. ‘Toe hulle by die huis aankom, wou Jesus niemand saam met Hom laat ingaan nie, behalwe Petrus, Jakobus en Johannes, en die dogtertjie se pa en ma (vers 51 NLV). ‘Jesus vat haar toe aan die hand en sê hardop: ‘Staan op, my kind!’ En op daardie oomblik het die lewe in haar teruggekom, en sy het onmiddellik opgestaan!.. Haar ouers was oorstelp…’ (verse 54-56 NLV). Wanneer jy bid en jou geloof in Christus plaas, kan Hy dinge in jou familie doen wat jou sal verstom!
Sielskos: 2 Sam 20:1-22:30; Luk 8:16-25; Ps 133; Spr 18:17-20
