2018-07-31
Psalm 37:23-24 ABA
Om sukses in die lewe te behaal, het jy hierdie vier dinge nodig: 1) Morele waardes. Wat is jy bereid om te doen om te kom waar jy wil wees? Jy kan nie net op enige manier daar kom nie; jy moet grense hê. Ja, ons het almal al op ‘n stadium reëls gebreek, maar dank God dat ons reëls gehad het om te breek. Ons kon onsself weer met ons morele kompas op die regte pad bring. Baie mense vandag gee nie om om op die regte pad te bly nie. 2) Metodes. ‘n Doelwit sonder ‘n plan is soos ‘n pad wat nêrens heen gaan nie. Jy moet eers die doelwit, dan die plan en dan die proses kry. As jy hierdie drie-stap formule volg, sal jy verstaan dat daar metodes is wat jy moet gebruik en by moet bly! 3) Middele. Wanneer God aan jou die visie gee, rus Hy jou ook toe. Wanneer dit nie gebeur nie, is die tyd dalk nie reg nie of het Hy iets anders vir jou in gedagte. God se voorsiening kan kom as ‘n idee wat jou skielik tref, of ‘n idee wat wortelskiet en oor ‘n tydperk groei. Sy voorsiening sluit hulp van ander mense af in, so wandel in liefde waar jy ook al gaan. 4) Bestuurskap. Jesus het gesê, ‘…Baie word verwag van hulle aan wie baie gegee is…’ (Lukas 12:48 NLV). Sommige mense maak of die proses verby is wanneer God hulle gee wat hulle wil hê. Nee, dis net die begin. Raai wie sal jou grootste uitdaging in jou bestuurskap van jou sukses wees? Jyself! Dis hoekom die Psalmdigter geskryf het, ‘Wanneer die Here tevrede is oor hoe ‘n mens lewe… dan val hy nie hard nie, want die Here hou sy hand vas.’
Sielskos: Esra 3-5; Luk 10:1-12; Ps 78:1-8; Spr 19:21-23
2018-07-30
1 Tessalonisense 5:17 NLV
Het jy moedeloos geword en ophou bid oor die probleem? Hou aan bid. God mag dalk nie antwoord op die manier wat jy dink Hy moet nie, of binne die tydraam wat jy verwag nie, maar wanneer jy volgens sy Woord bid, het Hy beloof om te antwoord: ‘…Hy sal die goeie nie weerhou van hulle wat doen wat reg is nie’ (Psalm 84:12 NLV). Toe die kinders van Israel die baie sterker Amalekiete die stryd aangesê het, het Moses op die koppie gebid en het die Israeliete die stryd gewen (sien Eksodus 17:8-13). Toe Abraham van die dreigende verwoesting van Sodom en Gomorra bewus geword het, het hy hom tot die Here gewend (sien Genesis 18:16-33), eerder as om na die stede toe te hardloop en die inwoners te waarsku. Toe raadgewers vir Nehemia sê dat Jerusalem ‘n ruïne is, het hy eers tot die Here gebid en sodoende ‘n fondasie van gebed gebou voor hy een steen van die projek om Jerusalem te herbou, neergelê het (sien Nehemia 1). Paulus se briewe het meer versoeke vir gebede as versoeke vir geld of troos bevat. Wat van Jesus? Hy het vroeg opgestaan om te bid (sien Markus 1:35). Hy het mense weggestuur om te gaan bid (sien Matteus 14:22-23). Hy het ‘n berg uitgeklim om te gaan bid (sien Lukas 9:28). Voordat Hy na die kruis gegaan het, het Hy heelnag gebid (sien Lukas 22:39-46). Elke woord wat Hy geuiter het en elke werk wat Hy gedoen het, was met gebed deurdrenk. As Hy nodig gehad het om so te bid, moet jy ook! Jy kan groot dinge bereik nadat jy gebid het, maar niks groots totdat jy gebid het nie. Die woord vir jou vandag is dus: Hou aan bid.
Sielskos: Esra 1-2; Luk 9:57-62; Ps 46; Spr 19:18-20
2018-07-29
1 Korintiërs 1:23 NLV
‘n Middeleeuse priester in ‘n Europese dorpie het vir sy gemeente gesê, ‘Kom vanaand terug vir ‘n spesiale diens oor Jesus.’ Die gemeente het dit gedoen, maar tot hulle verbasing het geen kerse die kerk verlig nie. Hulle het voel-voel na die kerkbanke geskuifel en gaan sit. Die priester was nêrens te sien nie. Toe hoor hulle hom deur die kerk na vore loop. Toe hy by die kruis wat op die muur hang kom, het hy ‘n kers aangesteek. Sonder om ‘n woord te sê het hy die vasgespykerde voete van Christus verlig, toe sy sy, toe een hand en toe die ander hand. Hy het die kers opgelig en die bebloede gesig en doringkroon verlig. Hy het die kers met een asem uitgeblaas en toe die gemeente verdaag. Dit was nodig om niks meer te sê nie. Christus is vir jou gekruisig. God het sy sondelose Seun op daardie kruis vir jou laat hang. As jy die enigste persoon was wat nog ooit geleef het, sou Christus steeds vir jou gesterf het. Met sy arms wyd gestrek, het Hy gesê, ‘Dit is hoe lief ek jou het.’ Wanneer jy versoek word om te sondig, wanneer jy deur skuld as gevolg van jou sonde oorval word, wanneer Satan fluister, ‘Daar is geen hoop vir jou nie,’ wanneer trots jou op jou eie deugde en moraliteit laat fokus, gaan terug na die kruis toe. Jy kan nie te gereeld soontoe gaan nie. Die lofsanger Isaac Watts het dit met hierdie woorde opgesom: ‘Were the whole realm of nature mine, that were an offering far too small; love so amazing, so divine, demands my soul, my life, my all.’
Sielskos: Matt 5:10; 1 Tess 2:13-3:5; 1 Kor 4:11-13; Op 6:9-11
2018-07-28
Psalm 25:21 NLV
Bobby Jones word as een van die wêreld se beste golfers geag. Hy is egter meer bekend vir dit wat by 1925 se Amerikaanse Ope gebeur het, as al sy ander oorwinnings op die golfbaan. Hy het per ongeluk sy bal aangeraak en vir homself ‘n een-hou boete toegeken, selfs al het niemand anders gesien dat hy die bal aangeraak het nie. Daardie boete het veroorsaak dat hy die Ope met een hou verloor het. Toe toernooi beamptes hom oor sy integriteit probeer komplimenteer, het Jones eenvoudig gesê, ‘Jy mag my net sowel prys omdat ek nie banke beroof nie. Daar is net een manier om hierdie spel te speel.’ Bobby Jones het by die reëls gehou. Punt. Daarmee het hy die integriteit van die spel geëer. Een sportjoernalis het geskryf, ‘In die opinie van baie mense, van al die groot atlete, het Bobby Jones die naaste gekom aan wat ons ‘n groot man kon noem.’ Jones kon die toernooi gewen het, maar hy sou sy integriteit verloor het. Om die Amerikaanse Ope te wen was nie genoeg om ‘n een-hou boete op sy integriteit te plaas nie. Dis epiese integriteit! Dis iets om te vier. Ons lewe in ‘n samelewing wat talent meer as integriteit waardeer, maar dis verkeerd. Talent verloor waarde soos die tyd verloop. So ook intellek en voorkoms. Jy sal op die ou einde jou krag en jou mooi voorkoms verloor. Jy hoef egter nie jou integriteit te verloor nie. Integriteit is die een ding wat se waarde nie met verloop van tyd verminder nie. Niks neem langer om te bou as ‘n goddelike reputasie nie. Niks word egter ook vinniger met een hou van sonde vernietig nie. Dis hoekom jou integriteit bo alles anders gevier en beskerm moet word.
Sielskos: Sef 1-3; Luk 9:46-56; Ps 42:6-11; Spr 19:15-17
2018-07-27
Jesaja 43:18 DB
Alhoewel dit waar is dat ons almal van tyd tot tyd misluk, is dit goed om te onthou: Jy kan suksesvol misluk. Hoe? Deur uit jou foute te leer en wyser en sterker as gevolg daarvan te word. As jy oefen om ‘suksesvol’ te misluk kan jy sukses in die toekoms ervaar. Erken dus jou mislukkings, sien jouself as gereinig deur die bloed van Jesus, laat jou teleurstellings gaan en staan op en probeer weer. Op ‘n punt in Elia se lewe het hy so depressief geword dat hy gebid het om dood te gaan: “…’Ek het nou genoeg gehad, Here,’ het hy gesê. ‘Neem nou maar my lewe, want ek is niks beter as my voorouers nie'” (1 Konings 19:4 NLV). Later is hy deur God se genade versterk en het hy uit sy depressie ontwaak as ‘n nuwe man met ‘n nuwe doel in die lewe (sien verse 15-16 NLV). Nadat hy Christus openlik verloën het, is Petrus vergewe. Ten spyte van sy swakheid is hy herstel en het hy die apostel geword wat sy mede-apostels versterk het en die Nuwe Testamentiese kerk gebou het (sien Lukas 22:31-32). Dis nie ‘n kwessie van hoe erg of hoe gereeld jy misluk het nie – dis ‘n kwessie van wat God met jou kan doen wanneer jy sy genade aanvaar, weer opstaan en Hom toelaat om jou te bemagtig om beter te doen. Petrus is ‘n bewys dat God ons kan gebruik wanneer ons swak is en deur ons tot eer van Hom kan praat en optree (sien 1 Korintiërs 1:28). Sal God jou soms korrigeer? Ja, Hy is ‘n goeie ouer, maar Hy sal jou nooit weggooi nie. Die woord vir jou vandag is dus: Jy kan oor begin.
Sielskos: 1 Tim 4-6; Luk 9:37-45; Ps 42:1-5; Spr 19:12-14
2018-07-26
Spreuke 11:3 NLV
Die tweede kwaliteit wat jy moet hê wanneer jy met mense omgaan is: Geloofwaardigheid. Wanneer mense jou vertrou, luister hulle na jou. In die vroeë stadiums van die verhouding gee hulle jou die voordeel van die twyfel, mits jou getuigskrifte goed is. Om hulle vertroue egter te behou, moet jy geloofwaardigheid demonstreer (betroubaarheid, integriteit en opregtheid). Daar word gesê dat ‘n middelmatige onderwyser vertel, ‘n goeie onderwyser verduidelik, maar dat ‘n uitstekende onderwyser demonstreer. Op die ou einde moet ons almal daarna strewe om die boodskap te wees. In die eerste ses maande van ‘n verhouding, fokus ons op die persoon se kommunikasievermoë om indrukke oor hom of haar te kry. Ons sal byvoorbeeld by ‘n nuwe baas se idees inkoop as hy goed kan praat en ‘n uitstekende visie voorhou. Wanneer ons by ‘n buurman of kollega aanklank vind, voel ons dat ons dalk ‘n nuwe vriend kan hê. Wanneer ons die persoon ontmoet waarmee ons op die ou einde trou, dink ons dat alles altyd sal wonderlik wees. Vir die meeste mense is die wittebrood wonderlik. Maar na die wittebrood kom die huwelik! Soms is dit ook wonderlik en soms is dit nie. Wat maak die verskil? Geloofwaardigheid! Na ses maande raak geloofwaardigheid belangriker as kommunikasie. Wanneer ‘n persoon geloofwaardig is, word dit beter soos die tyd aanstap. Wanneer ‘n persoon egter geloofwaardigheid kort, word dit slegter hoe langer jy tyd saam met hom spandeer. Geloofwaardigheid is soos geld: Daarmee is jy solvent, daarsonder is jy bankrot. Die waarheid is: Met die verloop van tyd weeg die manier wat jy leef veel meer as die woorde wat jy gebruik.
Sielskos: 1 Tim 1-3; Luk 9:28-36; Ps 1; Spr 19:9-11
