2018-08-06
Klaagliedere 3:23 NLV
Kardinaal J.H. Newman, ‘n Katolieke filosoof, het gesê: ‘Moenie bang wees dat jou lewe tot ‘n einde sal kom nie, maar eerder dat dit nooit ‘n begin sal hê nie.’ Dit is wat kan gebeur as jy toelaat dat vrees ‘n houvas op jou lewe kry. Die meeste van ons vrese is werklik ongegrond. Navorsing het selfs al getoon dat vyf-en-negentig persent van dit wat ons vrees, ongegrond is. Ons moet eenvoudig leer om met die res saam te lewe. Miskien het Gertrude Stein die beste benadering gehad. Sy het gesê: ‘As jy dink hoe gevaarlik alles is, is niks eintlik vreesaanjaend nie.’ Die lewe het geen waarborge nie. Mense probeer hulself met baie dinge beskerm: alarms, reisigertjeks, aspirien, sambrele, ‘n GPS-stelsel, lugsakke. Die waarheid is egter dat die lewe gevaarlik is, dat dit jou gesondheid benadeel en jou uiteindelik sal doodmaak. Jy kan dus net sowel met oorgawe lewe. Shakespeare het gesê, ‘He is not worthy of the honeycomb who shuns the hive because the bees have stings.’ Moenie dat vrees jou daarvan weerhou om klein treë in jou ontwikkeling te gee nie. Jy weet nooit waarheen hulle mag lei nie. Daar is twee dinge wat altyd saam met ons in die lewe teenwoordig is: vrees en geloof. Elke dag wat jy leef, kies jy die een of die ander. Jeremia het geloof gekies. Hy het geskryf: ‘Deur die Here se troue liefde is ons nie doodgemaak nie. Hy hou nooit op om vir ons om te gee nie. Sy liefde het geen einde nie. Op u ontferming kan ‘n mens altyd vertrou. Dit is elke oggend nuut… My lewe behoort aan die Here, Ek kan op Hom vertrou. Die Here is goed vir hulle wat hoop op Hom en vra wat Hy wil hê’ (verse 22-25 NLV).
Sielskos: 1 Kro 1-2; Luk 11:14-28; Ps 78:56-64; Spr 20:7-10
2018-08-05
Psalm 139:14 NLV
Daar word die verhaal vertel van ‘n man met ‘n buitengewone vrees vir donderweer wat ‘n psigiater daaroor besoek het. ‘Jy ly aan brontofobie,’ sê die psigiater. ‘Dit is werklik laf om op jou ouderdom nog vir donderweer bang te wees. Dink daaraan as die tromme in die simfonie van die lewe.’ ‘Maar sê nou dit help nie?’ vra die man. ‘Dan moet jy maar maak soos ek maak. As jy donderweer hoor, stop watte in jou ore, kruip onder jou bed en sing jou gunstelingliedjie so hard as wat jy kan totdat die donderweer ophou.’ Die meeste mense se vrese is nie op feite gegrond nie, maar op gevoelens. Vrees is onrealistiese verwagtings wat realisties lyk. Jy moet verder kyk as jou irrasionele gevoelens en die verwagtings daaragter ontdek. As jy byvoorbeeld in armoede grootgeword het, mag jy dalk bang wees om vrygewig te wees. As jy deur iemand verlaat is, mag jy bang wees om mense te vertrou, of jy mag aan mense vasklou en hulle probeer beheer. As jy mishandel is, mag jy dalk emosionele en fisiese intimiteit vrees. As jy nie mooi of intelligent voel nie, of nie uit ‘n hoë-klas familie uit kom nie, mag jy dalk bang wees om met mense te meng of met hulle te praat, uit vrees dat hulle dalk op jou sal neerkyk. James Thurber, die Amerikaanse humoris, het geskryf: ‘Almal moet probeer om voor hul dood uit te vind waarvan hulle weghardloop en waarheen en waarom.’ Dawid het nie net die bron van sy vrese vasgestel nie, maar ook die bron van sy selfwaarde en sekuriteit: ‘Ek loof U omdat U my so besonder wonderbaarlik gemaak het. U werke is wonderbaar…’ Wanneer jy weet dat jy God se goedkeuring het, begin jou vrese doodgaan.
Sielskos: Joh 1:1-14; Matt 4:12-16; Matt 5:14-16; Hand 9:1-19
2018-08-04
Handelinge 3:4 NLV
Die Bybel sê: ‘Net tóé word daar ‘n man aangedra wat van sy geboorte af lam was. Mense het hom daagliks laat sit by die tempelpoort wat as Mooipoort bekend staan, om by die tempelgangers te bedel. Petrus en Johannes wou net in die tempel ingaan, toe hy hulle sien en ‘n bydrae by hulle vra. Petrus kyk hom toe saam met Johannes stip aan, en sê: ‘Kyk na ons!’ Die verlamde man kyk toe na hulle in die verwagting dat hy ‘n bydrae gaan kry. Maar Petrus sê: ‘Geld het ek nie. Maar wat ek het, dít gee ek vir jou: Op gesag van Jesus Christus van Nasaret, staan op en loop! Petrus vat die man toe aan sy regterhand en help hom op. En onmiddellik het sy voete en enkels gesond en sterk geword. Hy het opgespring, op sy voete gestaan, en begin rondstap. Daarna, terwyl hy rondstap, huppel en God prys, is hy saam met hulle die tempel in’ (verse 2-8 NLV). Hierdie wonderwerk het met die volgende woorde begin: “Petrus kyk hom toe saam met Johannes stip aan, en sê: ‘Kyk na ons!'” Dit gaan met die volgende woorde verder: ‘Petrus vat die man toe aan sy regterhand en help hom op.’ In sekere Zoeloe tradisies, groet die mense mekaar met ‘n frase wat ‘Ek sien jou’ beteken. Kan dit God se strategie vir die mensdom se seer wees? Eers ontmoet vriendelike oë desperate oë. Vervolgens help sterk hande swakkes. Dan, die wonderwerk van God. Ons doen ons klein deeltjie, Hy doen sy groot deel en die lewe by die Mooipoort word presies dit – mooi. Om ander mense te dien, moet jy hulle eers sien. Om hulle op te hef moet jy hulle eers liefhê, omdat jy weet dat Jesus hulle liefhet.
Sielskos: 1 Joh 3:11-5:21; Luk 11:1-13; Ps 78:40-55; Spr 20:4-6
2018-08-03
Handelinge 17:26-27 NLV
Kom ons kyk na drie frases in hierdie Skrifgedeelte: 1) ‘Hy het die tye van hulle bestaan bepaal…’ Jou ouers mag jou dalk nie wou gehad het nie, maar God wou jou gehad het. Hy het die oomblik van jou geboorte geskeduleer, Hy het ‘n doel vir jou lewe en jy is konstant in sy gedagtes. As dit te goed klink om waar te wees, lees verder: ‘U het my gesien voor ek gebore is. In u boek is alles opgeteken; elke dag is bepaal voordat een van hulle daar was. Kosbaar is u gedagtes vir my, o God!..’ (Psalm 139:16-17 NLV). Dis nou ‘n fondasie om jou selfwaarde op te bou! 2) ‘…en die grense van hulle blyplek.’ God se wil verg van jou om op die regte plek te wees, dis hoekom Hy ‘grense’ daarstel. Soms sal Hy sê, ‘Moenie soontoe gaan nie, Ek wil jou hier hê,’ of ‘Moenie daar bly nie, Ek soek jou daar.’ Omdat iemand anders êrens heen gegaan het en sukses behaal het, beteken nie dat dieselfde met jou sal gebeur nie. ‘Die Here bepaal die rigting van ‘n mens, en met sý lewe is Hy tevrede’ (Psalm 37:23 NLV). Sluit God by elke detail van jou lewe in, want waar Hy lei, sal Hy ook voorsien. 3) ‘God se doel met die nasies was om Hom te soek…’ Elke aksie van God in jou lewe is so ontwerp om jou afhanklikheid aan Hom te vermeerder. Elke taak wat Hy jou gee, het sy deelname nodig om suksesvol te wees. Selfs met al sy groot talente, het Paulus erken, ‘Nie dat ons op eie houtjie iets kan bedink asof dit ons eie breinkind is nie. Ons bekwaamheid kom van God…’ (2 Korintiërs 3:5 NLV).
Sielskos: 1 Joh 1:1-3:10; Luk 10:38-42; Ps 78:32-39; Spr 20:1-3
2018-08-02
Lukas 9:23 NLV
In 44 n.C., het koning Herodus beveel dat ‘n apostel, Jakobus, met ‘n swaard deurboor moet word. Hy was een van die eerste apostels wat ‘n martelaar geword het. Lukas is aan ‘n olyfboom in Griekeland opgehang. Ongelowige Tomas is in Indië lewend aan die brand gesteek. Filippus is gekruisig en het steeds met sy laaste asem van die kruis af gepreek. Matteus is in Ethopië in die rug gesteek. Bartolomeus is in Armenië doodgeslaan. Jakobus die Regverdige is van die dak van die tempel in Jerusalem afgegooi en toe deur die skare doodgeslaan. Simon die Yweraar is in 74 n.C. deur die goewerneur van Sirië gekruisig. Judas Thaddeus is met stokke in Mesopotamië doodgeslaan. Mattias, wat in die plek van Judas Iskariot aangestel is, is gestenig en onthoof. Petrus is op sy eie versoek onderstebo gekruisig. Toe Johannes die Geliefde dit oorleef het nadat hy in ‘n houer kokende water geplaas is, het die keiser Diocletianus hom na die eiland Patmos toe verban. Jy sal heel waarskynlik nie geroep word om fisies vir Christus te sterf nie, maar om sy dissipel te wees, moet jy aan jouself sterf. Jesus het gesê, ‘…As enigeen van julle my dissipel wil word, moet jy jou selfsugtige ambisie aflê, elke dag jou kruis opneem en My volg. As jy jou lewe vir jouself wil hou, sal jy dit verloor. Maar as jy jou lewe vir My opgee, sal jy ware lewe vind’ (verse 23-24 NLV). As jy jouself wil vind, moet jy gewillig wees om jouself vir Christus te verloor. As jy in die volste sin lewendig wil word, moet jy bereid wees om in alle vorme van self-gesentreerdheid te sterf en vir Christus te lewe.
Sielskos: Esra 9-10; Luk 10:25-37; Ps 78:17-31; Spr 19:27-29
2018-08-01
Matteus 6:33 NLV
Tot en met die sestiende eeu, het wetenskaplikes geglo dat die aarde die middelpunt van die heelal was en dat die son rondom die aarde gedraai het. Toe het ‘n sterrekundige genaamd Copernicus gekom en gestry dat die son nie om die aarde draai nie, maar dat die aarde om die son draai. Hy het die wetenskap vir ewig gerewolusioneer. Wanneer dit by dissipelskap kom, het Jesus dieselfde ding gedoen. ‘…maak die koningsheerskappy van God en dit wat voor Hom reg is, julle heel eerste prioriteit; dan sal God vir julle al hierdie ander dinge as ‘n bonus byvoeg.’ Sondigheid is in wese selfsugtigheid. Dis om jouself op ‘n troon te plaas, om jou begeertes, behoeftes en planne bo alles anders te stel. Jy mag dalk steeds vir God soek, maar jy soek Hom nie eerste nie. In plaas van om te probeer om sy doelwitte te vervul, probeer jy Hom sover kry om joune te vervul. Wie volg wie dan? “Jesus het toe vir sy dissipels gesê: ‘As julle my volgelinge wil wees, moet julle julle eie, selfsugtige ambisie prysgee, julle kruis op julle skouers neem, en agter My aankom. As julle probeer om julle lewe vir julleself te bewaar, sal julle dit verloor. Maar as julle julle lewe ter wille van My prysgee, sal julle ware lewe vind'” (Matteus 16:24-25 NLV). D.L. Moody het gesê, ‘Die wêreld het nog nie gesien wat God met, vir, deur en in die man of vrou sal doen wat volledig en geheel en al aan Hom gewy is nie.’ As jy bereid is om jouself aan God oor te gee, is daar geen perke aan dit wat Hy met jou sal doen nie.
Sielskos: Esra 6-8; Luk 10:13-24; Ps 78:9-16; Spr 19:24-26
