2018-06-25
Spreuke 18:24 DB
Die Bybel sê, ‘In tye van nood leer jy jou vriende ken. Sommige praat net, maar doen niks nie. Ander sal alles vir jou doen. Hulle is nader aan jou as ‘n broer.’ Gloria Gaither wys uit dat ware vriende besorg is oor wat jy besig is om te word. Hulle kyk verby die huidige en gee diep om oor jou as algehele persoon. Terwyl dit tyd en energie neem om hierdie tipe vriendskap te bou en te onderhou, is die voordele veel meer as die belegging daarin. Ware vriende: 1) Help jou op wanneer jy geval het. ‘Twee is beter as een… As een mens val, kan sy vriend hom ophelp. Maar as een val wat alleen is, is daar niemand om hom op te help nie’ (Prediker 4:9-10 NLV). 2) Haal die druk van jou af. Maak nie saak hoe lief hulle vir jou is en wil help nie, soms is jou familie te naby aan die situasie om objektief te wees. Oor sulke gevalle, sê die Bybel, ‘Eerlike raad van ‘n vriend is so aangenaam soos parfuum…’ (Spreuke 27:9 NLV). 3) Laat jou lag. Wanneer ‘n goeie lagsessie presies is wat jy nodig het, sal vriende jou help om die humor in ‘n situasie te sien – gewoonlik omdat hulle al self daar was! Soos Hazel C. Lee sê, ‘Om vir onsself en saam met ander mense te lag, bring ‘n verrassende gevoel van samesyn mee.’ 4) Hou jou aanspreeklik. Het jy al agtergekom wanneer jy in teenstelling met God se Woord optree, dit maklik is om jouself te flous? Dis dan wanneer die teregwysing van ‘n vriend jou weer op die regte pad kan bring. Dank God dus vir goeie vriende wat jou lief genoeg het om eerlik met jou te wees, selfs wanneer dit seermaak.
Sielskos: 2 Kor 9:1-11:15; Luk 2:8-20; Ps 144:9-15; Spr 16:4-7
2018-06-24
Psalm 23:5 NLV
Toe die Psalmdigter gesê het, ‘Die Here is my herder…’ (vers 1 NLV), het hy bevestig dat hy ‘n baie persoonlike verhouding met God gehad het; een wat uniek was. God het vir elkeen van ons ‘n unieke persoonlikheid, gawes, doelwitte en roeping gegee. Hy wil met jou ‘n verhouding hê wat heeltemal anders is as die verhouding wat Hy met enigiemand anders het. Net soos jou vingerafdrukke uniek is, so is God se interaksie met jou uniek. Jy moet dus leer hoe om sy stem te hoor en te weet wanneer Hy spesifiek met jou praat. Die Psalmdigter gaan voort om te sê, ‘U berei vir my ‘n feesmaal voor…’ Dink so daaroor na. Wanneer jy by ‘n restaurant vir ‘n tafel wag en jou naam is op die waglys, gee die gasvrou soms vir jou ‘n toestel om vas te hou. Wanneer daar vir jou ‘n tafel oopgaan, sal hierdie toestel vibreer of ‘n liggie laat flikker. Intussen is jy seker dat hulle besig is om vir jou ‘n tafel voor te berei en as jy geduldig is, sal die toestel, wanneer die tafel gereed is, begin vibreer en jou laat weet. Kry jy die idee? As jy God se Woord lees en tyd met Hom in gebed spandeer, begin iets in jou gees vibreer en laat dit liggies flikker. Dis God se ‘toestel’ wat jou lei, rig en die omstandighede vir jou voorberei. Paulus skryf, ‘Omdat Christus Jesus dit verdien het, sal my God uit sy ontsaglike rykdom vir julle voorsien in elke behoefte wat julle het’ (Filippense 4:19 NLV). Hoeveel van jou persoonlike behoeftes sal God voorsien? Almal van hulle! Hou dus op om jouself so baie te bekommer en plaas jou vertroue in Hom!
Sielskos: Matt 5:5; Num 12:1-15; Ps 37:1-9; Fil 2:5-11
2018-06-23
Johannes 13:17 NLV
Om God se Woord te lees, te ontvang, te onthou en daaroor te reflekteer is belangrik, maar ons moet daarop reageer en ‘…mense word wat dóén wat die woord sê…’ (Jakobus 1:22 NLV). Jy kan so besig wees om na die volgende kerkvergadering te gaan, dat jy vergeet om dit wat jy by die laaste een geleer het, uit te oefen. Jesus het gesê, ‘Elkeen wat na my woorde luister en daarvolgens handel, is soos ‘n verstandige persoon wie se huis op soliede rots gebou is’ (Matteus 7:24 NLV). God sal jou nie seën omdat jy die waarheid weet nie, maar omdat jy dit gehoorsaam. ‘As julle hierdie dinge insien en julle eie maak, sal julle gelukkig wees as julle dit ook doen.’ Ons is geneig om persoonlike toepassing te vermy, omdat dit nie net moeilik is nie – in sommige gevalle is dit ronduit pynlik! Jesus het gesê, ‘…die waarheid sal julle vrymaak’ (Johannes 8:32 NLV), maar dit mag jou dalk aan die begin ongemaklik maak. God se Woord openbaar ons beweegredes, stel ons foute bloot, wys ons sondes tereg en eis verandering. Dis hoekom dit goed is om jou persoonlike insigte met ander mense te bespreek. Ons leer waarhede van ander mense wat ons nooit op ons eie sou leer nie. Hulle help ons om dit wat ons miskyk te sien en toe te pas. Hulle hou ons aanspreeklik. Een van die beste maniere om iemand wat die Woord dóén te word, is om ‘n aksieplan neer te skryf. Dit moet persoonlik wees (met betrekking op jou); prakties wees (iets wat jy kan doen) en bewysbaar wees (met ‘n maatstaf of sperpunt). In die woorde van D.L Moody: ‘Die Bybel is nie aan ons gegee om ons kennis te vermeerder nie, maar om ons lewens te verander.’
Sielskos: 2 Kor 5-8; Luk 2:1-7; Ps 144:1-8; Spr 16:1-3
2018-06-22
Psalm 119:97 NLV
Mens bewaar God se Woord op drie maniere: 1) Deur dit na te vors. Dit beteken dat jy jou gedagtes daaroor neerskryf. Dit behels ook dat jy vrae soos: Wie? Wat? Wanneer? Waar? Hoekom? Hoe? moet vra. Met ander woorde, jou Bybelstudie moet jou insig gee, nie net inligting nie. 2) Deur dit te onthou. Jy mag dalk dink dat jou geheue sleg is, maar jy het alreeds miljoene idees en feite gememoriseer. Die waarheid is dat ons dit onthou wat waarlik vir ons belangrik is! Daar is enorme voordele daaraan verbonde om die Skrif te memoriseer. Dit sal jou help om versoeking te weerstaan, om beter besluite te maak, stres te verminder, jou selfvertroue op te bou en jou in staat te stel om jou geloof met ander te deel. Begin deur ‘n vers neer te skryf wat jou gehelp het en dra dit op ‘n klein kaartjie saam met jou rond. Sê dit hardop vir jouself terwyl jy werk, oefen, wag en voor jy gaan slaap. Die kuns daarin om Skrifgedeeltes te memoriseer, is om dit aanhoudend te hersien! 3) Deur daarop te reflekteer. Geen ander gewoonte sal jou meer geestelik volwasse laat word as om daagliks oor God se Woord te reflekteer nie. Soos jy dit doen, word jy letterlik ‘…al hoe meer verander om soos die Here te lyk…’ (2 Korintiërs 3:18 NLV). God het Dawid ‘…’n man na my hart…’ (Handelinge 13:22 NLV), genoem. Hoe het hy daardie onderskeiding gekry? Omdat hy lief was daarvoor om oor God se Woord te reflekteer: ‘Hoe lief het ek u gebooie! Ek oordink dit die hele dag.’ Die sleutel tot ‘n suksesvolle Christelike lewe is joune, wanneer jy leer om God se Woord te bewaar.
Sielskos: 2 Kor 1-4; Luk 1:67-80; Ps 139:13-24; Spr 15:31-33
2018-06-21
Kolossense 3:16 NLV
Soos jy jou gedagtes met God se Woord vul, sal die Heilige Gees dit gebruik om jou te verander. ‘Laat die rykdom van alles wat Christus ons leer, julle leefstyl bepaal…’ Hoe doen jy dit? 1) Deur dit te lees. As jy die koerant maar nie die Bybel lees nie, sal jy nie geestelik groei nie. Jy kan nie televisie vir drie of vier ure kyk, dan jou Bybel vir drie of vier minute lees en groei verwag nie. Hoe kan jy sê jy glo die Bybel van begin tot einde, as jy dit nog nie deurgelees het nie? ‘…[Ons moet] dit elke dag lees so lank as wat [ons] lewe…’ (Deuteronomium 17:19 NLV). As jy jou Bybel net vyftien minute elke dag lees, sal jy dit teen die einde van die jaar heeltemal deurgelees het. As jy elke dag net een dertig-minute televisieprogram uitsny, kan jy dit twee keer ‘n jaar deurlees. Daaglikse Bybelstudie hou jou binne die bereik van God se stem. Wil jy geestelik groei? Ontwikkel dan ‘n daaglikse Bybel leesplan en hou daarby. 2) Deur dit te ontvang. In die gelykenis van die saaier praat Jesus van drie onontvanklike houdings: ‘n geslote gees (harde grond), ‘n oppervlakkige gees (vlak grond) en ‘n deurmekaar gees (grond met onkruid) (sien Lukas 8:5-15). Hy gaan dan verder om te sê, ‘Gee aandag aan wat jy hoor…’ (vers 18 NLV). Enige tyd wat jy nie besig is om te leer nie, kyk na jou houding, want God kan selfs deur die verveligste onderwyser met jou praat as jy nederig en ontvanklik daarvoor is. Jakobus sê ‘…aanvaar nederig die woord wat God in julle geplant het. Hierdie woord het die mag om julle te red’ (Jakobus 1:21 NLV). Hierdie is nie net goeie idees nie; dis lewensveranderende beginsels!
Sielskos: Eseg 46-48; Luk 1:57-66; Ps 139:7-12; Spr 15:28-30
2018-06-20
Johannes 8:31 NLV
Johannes skryf, ‘…ek hou aan bid dat dit in alle opsigte met jou goed mag gaan en dat jy nét so gesond sal wees soos dit geestelik goed met jou gaan’ (3 Johannes vers 2 NLV). Om God se Woord te lees moet een van jou eerste prioriteite wees, sodat dit ‘in alle opsigte goed mag gaan’ met jou. Jesus het gesê, ‘…As julle in ‘n noue verbintenis aan my boodskap leef, is julle my egte navolgers.’ Om in noue verbintenis met God se Woord saam te leef, beteken dat jy vreugde, aanvaarding, aanmoediging, ondersteuning, beskerming, doelwitte, identiteit en rus daarin vind. Om God se Woord te ‘bewaar’ beteken dat jy dit as jou hoogste outoriteit, jou kompas vir rigting, jou berader wanneer jy besluite maak en jou maatstaf wanneer jy elke verhouding en aksie evalueer, aanvaar. Met ander woorde, die eerste en laaste woord in jou lewe. Baie van ons moeilikhede ontstaan omdat ons ons keuses op onbetroubare outoriteite baseer, soos: Kultuur – ‘Almal doen dit.’ Tradisie – ‘Ons het dit nog altyd so gedoen.’ Rede – ‘Dit lyk logies.’ Emosie – ‘Dit voel net reg.’ Al hierdie outoriteite is foutief omdat hulle vanuit onsself kom, nie van God af nie. Wat ons nodig het is ‘n perfekte standaard wat ons nooit in die verkeerde rigting sal lei nie, en net God se Woord voldoen aan daardie kriteria. Salomo het geskryf, ‘Elke woord van God is getoets…’ (Spreuke 30:5 NLV). Dit beteken dat wanneer sy Woord vir jou sê om iets te doen, moet jy dit doen, of dit nou vir jou sin maak of nie en of jy lus is om dit te doen of nie. Jy moet soos Paulus sê, ‘…Ek handhaaf alles… wat geskryf staan’ (Handelinge 24:14 NLV).
Sielskos: Eseg 43-45; Luk 1:39-56; Ps 139:1-6; Spr 15:25-27
