2018-06-19
Job 23:12 NLV
Die Gees van God maak ons soos die Seun van God, deur die Woord van God! Dis hoekom Satan honderde padversperrings in jou pad sal plaas om te keer dat jy jou Bybel lees. Paulus skryf, ‘…[God se] boodskap kan julle geloof sterk maak en dit kan julle help om te weet dat God vir julle die dinge sal gee wat Hy belowe het om vir al die gelowiges te gee’ (Handelinge 20:32 ABA). God se Woord is soos ‘n saadjie; dis met potensiaal gevul. Jesus het gesê, ‘…Die woorde wat Ek aan julle gerig het, is Gees en lewe’ (Johannes 6:63 NLV). ‘n Wonderbaarlike ding gebeur wanneer jy die Skrif bestudeer. Jou verstand verhelder, jou hart resoneer en die waarheid begin in jou lewe. Die Bybel is meer as net ‘n doktrinale handboek. Dit skep geloof, produseer verandering, veroorsaak wonderwerke, genees seer, bou karakter, transformeer omstandighede, dra vreugde oor, oorkom teenstand, verslaan versoeking, bou hoop, stel krag vry, reinig gedagtes, bring dinge tot stand en waarborg jou toekoms. Jy kan nie daarsonder oorleef nie. Dis so noodsaaklik soos kos vir jou lewe. Dis hoekom Job gesê het, ‘…Wat Hy sê, het ek in my hart bewaar.’ God se Woord is die geestelike voedsel wat jy nodig het om jou lewensdoelwit te vervul. Die Bybel word as melk, brood, vaste kos en soeter as heuning beskryf (sien 1 Petrus 2:2; Matteus 4:4; 1 Korintiërs 3:2; Psalm 119:103). Hierdie viergang maaltyd is die Gees se spyskaart vir daaglikse krag en groei. Paulus skryf, ‘Hiervoor moet julle genoeg geestelike melk inkry. Smag daarom daarna… sodat julle daardeur kan groei tot volwasse gereddenes’ (1 Petrus 2:2 NLV). Maak dus ‘n verbintenis om elke dag tyd te spandeer om God se Woord te lees.
Sielskos: Eseg 40:10-42:20; Luk 1:26-38; Ps 73:17-28; Spr 15:22-24
2018-06-18
2 Petrus 3:18 NLV
Om met grasie te wen kan moeiliker wees as om met grasie te verloor. Wanneer ons wen, word ons deur arrogansie, mag, onsensitiwiteit, spoggery en om ons suksesse te herleef lank nadat almal anders al verveeld is daarmee, versoek. Grasievolle wenners onthou altyd hoe dit voel om te verloor. Hulle is by meer as hulle eie oorwinnings en verliese betrokke. Abraham Lincoln het die wysheid gehad om die sukses van sy land bo sy eie ego te stel en het sy ergste politieke kritici, Edwin Stanton, aangestel om die Oorlogsdepartement te bestuur. Stanton, ‘n briljante regsgeleerde, was geneig om kortaf en neerhalend te wees. Soos Frederick Douglass dit gestel het, ‘Beleefdheid was nie een van sy swakpunte nie.’ Lincoln, aan die ander kant, was ten volle bewus van sy eie voorkoms en tekort aan opvoeding. (Toe iemand gedurende ‘n veldtog hom daarvan beskuldig het dat hy ‘n twee-gesig is, het hy geantwoord: ‘As ek twee gesigte gehad het, dink jy ek sou hierdie een gedra het?’). As die uittredende prokureurgeneraal van die verlorende party, het Stanton Lincoln as die ‘oorspronklike gorilla’ verkleineer. Hoe Lincoln Stanton hanteer het, het egter geskiedenis gemaak. Lincoln het hom in sy vertroue geneem, op hom geleun en op hom staatgemaak. Stanton het met onfeilbare lojaliteit en toegeneentheid gereageer. Op die oggend van 14 April 1865, is Lincoln oorlede nadat hy die vorige aand geskiet is. Die bekendste woorde wat al ooit na ‘n president se afsterwe gesê is, is daardie oggend gespreek: ‘Now he belongs to the ages.’ Edwin Stanton het dit gesê. Robert Lincoln, Abraham Lincoln se seun, het vertel hoe Stanton hom twee weke lank elke dag besoek het en die eerste tien minute van elke besoek net gehuil het. Wanneer niks anders werk nie, bewys genade!
Sielskos: Eseg 37:1-40:9; Luk 1:11-25; Ps 73:1-16; Spr 15:18-21
2018-06-17
2 Petrus 3:18 NLV
Samuel en Susanna Wesley (John Wesley se ouers), was een aand by die aanddiens toe Susanna nie ‘amen’ op haar man se gebed vir Willem van Oranje, wat toe Engeland se koning was, sê nie. Toe hy haar vra hoekom nie, het sy verduidelik dat haar simpatie by die afgesette James die Tweede gelê het. Sy skryf oor wat volgende gebeur het: ‘Hy het onmiddellik gekniel en goddelike wraak op homself en sy nageslag gesweer as hy my ooit weer sou aanraak voor ek nie vir God en sy eie vergifnis gesmeek het nie.’ Hierdie omstandighede het ses maande geduur en is slegs verbreek toe ‘n tragiese brand twee-derdes van hulle huis vernietig het. Mense wat aan hulle wrokke vashou, nie weet hoe om teleurstelling met grasie te hanteer nie, wat ‘n lang geheue het, wat nie kan jammer sê nie en wat kerm en kla en dikmond is, trek altyd aan die kortste ent. Om goed te kan verloor is ‘n kuns wat al die genade wat ons kan bymekaar kan skraap, verg. Dit beteken om die nederigheid te hê om die realiteit sonder verskonings in die gesig te staar, maar met die selfvertroue om nie toe te laat dat verlies ons identiteit definieer of ons minderwaardig laat voel nie. Dit beteken geen verskonings, geen blaam, geen self-bejammering en ook geen self-veroordeling nie. Dit beteken dat jy die onderskeid kan tref tussen wanneer om op te gee en wanneer om te volhard. Dit beteken om ander mense te kan geluk wens. Dit beteken om ‘n uitkoms wat ons nie kan verander nie, te laat gaan, maar om vas te hou aan die wil om voluit en goed te lewe en om God met alles wat ons doen, te eer.
Sielskos: Matt 5:4; Jes 51:1-16; Ps 30; 2 Kor 1:3-7
2018-06-16
2 Petrus 3:18 NLV
Die sielkundige Henry Cloud doen baie korporatiewe konsultasies. Soms vra hy vir die bestuurders: ‘Wanneer, in jou besigheids- of universiteitsopleiding, het jy ‘n kursus geneem oor hoe om op ‘n goeie manier te verloor?’ Om te verloor is ‘n onlosmaaklike deel van die lewe. Dit gee ons ‘n onskatbare insig in die ontwikkeling van ons karakter. Wat doen ons wanneer ons deel is van ‘n span wie se besluit teengestaan word? Hoe hanteer ons dit wanneer die bevordering waarvoor ons aansoek gedoen het, na iemand anders toe gaan? Wat doen ons wanneer ons idee, voorstel of uitnodiging om op ‘n afspraak te gaan, verwerp word? Om te lewe is om te verloor. Om egter sleg en onfatsoenlik te verloor, kan dodelik wees. Die president van ‘n organisasie het ‘n agenda vir verandering wat niemand wil aanvaar nie. Hy is egter hardkoppig en wil nie nee aanvaar nie, dus kry hy kwaadwillige instemming. Mense staan hom nie openlik teë nie, maar hulle saboteer sy agenda. Hy verloor hulle respek en hulle lojaliteit. Hy kon dit nie aanvaar om sy agenda te verloor nie; dus het hy eerder dit wat belangriker is, verloor. ‘n Pastoor wil sy kerk verander op maniere wat sy gemeente nie aanstaan nie. Dus preek hy kwaai preke wat hulle kasty omdat hulle nie sy leierskap volg nie. Hy probeer druk op die ouderlinge uitoefen. Hy dreig, hy kla, hy manipuleer. Uiteindelik vra die ouderlinge hom om die kerk te verlaat. Omdat hy nie uit sy verliese kan leer nie, verloor hy alles. Petrus, wat daarvoor bekend was dat hy baie hardkoppig was, het wyser en meer volwasse geword, en ons aangemaan om in genade te groei. Wanneer jy nie kry wat jy wil hê nie – aanvaar dit!
Sielskos: Eseg 34-36; Luk 1:1-10; Ps 80:12-19; Spr 15:15-17
2018-06-15
Filippense 3:20 NLV
Elke jaar kry die Stille Oseaan-salm, wat vyf tot ses jaar in die oseaan geleef het, skielik die drang om na die water van hul geboorte-rivier terug te keer. Met vissermanne, bere en enorme hidro-elektriese damme wat in hulle pad staan, veg hulle hul weg stroom-op om by hulle tuiste uit te kom. Wetenskaplikes weet nie hoe die salm dit regkry om na die presiese rivier waar hulle gebore is, terug te keer nie. Sommige wetenskaplikes dink hulle doen dit omdat hulle die vars water van hulle rivier kan proe of ruik. Ander wetenskaplikes dink dat hulle dalk die sterre gebruik om te navigeer. Ongeag hoe hulle dit doen, weet ons dat hulle nie kaarte en kompasse gebruik nie; hulle reis is instinktief. Hulle het ‘n verlange na ‘n spesifieke rivier en hulle sal nie rus totdat hulle die rivier vind nie. Dis presies hoe dit met ons is. God het ons vir die hemel geskep en niks in ons lewe sal daardie verlange stil nie (sien Prediker 3:11). Net soos daardie salm, is ons in hierdie wêreld, maar nie van hierdie wêreld nie. Ja, ons vind vreugde daarin om die lewenstaak wat God vir ons gegee het te vervul, maar dit is niks teenoor die vreugde wat in die hemel vir ons wag nie. Paulus stel dit so: ‘Ons daarteenoor het ons burgerskap in die hemel. Van dáár verwag ons ook die Here Jesus Christus as Redder. Hy sal ons vernederde liggame verander in liggame met goddelike heerlikheid, soos sy eie. Hiervoor sal Hy dieselfde krag gebruik as dié waarmee Hy alle dinge onder sy gesag bring’ (Filippense 3:20-21 NLV). Soos jou geredde geliefdes die aarde verlaat om hemel toe te gaan, sal jou verlange om by hulle aan te sluit, net groter word.
Sielskos: Eseg 31-33; Mark 16:1-20; Ps 80:1-11; Spr 15:11-14
2018-06-14
Kolossense 4:6 NLV
Bid: ‘Here, ek sluit by die psalmdigter Dawid aan en vra: ‘Mag die woorde van my mond en die gedagtes van my hart vir U aanneemlik wees…’ (Psalm 19:15 NLV). Ek besef dat die woorde wat ek spreek geweldige krag het, in beide my eie lewe en in my verhoudings. U Woord sê, ‘Die tong het mag oor dood en oor lewe…’ (Spreuke 18:21 NLV). Leer my om woorde te spreek wat altyd getrou aan u Woord is en wat U verheerlik. Help my om versigtig te wees om woorde te spreek wat ander mense opbou in plaas van afbreek, wat komplimenteer eerder as kritiseer, wat in liefde en waarheid gespreek word en nie deur my eie verwagtings en begeertes verdraai word nie, en wat vertroue en nie mismoedigheid meebring nie. Waar ek woorde gespreek het wat negatief of skadelik vir iemand anders was, vergewe my. Weerhou my daarvan om dinge te sê wat ander mense op enige manier seermaak of afkraak. Ek wil vriendelik met my woorde wees en ‘n tong hê wat genesing en seën bevorder (sien Spreuke 12:18). Help my om geloof in u Heerskappy oor my lewe te hê dat ek ‘…alles sonder kla of teëpraat’ (Filippense 2:14 NLV) kan doen. Help my om nie negatiewe dinge van myself te sê nie. Help my om onmiddellik op te hou wanneer ek ‘n kritiese woord begin sê. U woord sê, ‘Met woorde wat altyd vriendelik en sinvol is, moet julle gereed staan om die regte antwoord vir elke mens te gee.’ Laat my woorde U vandag eer en verheerlik. In Jesus se naam bid ek dit. Amen.’
Sielskos: Eseg 27:25-30:26; Mark 15:33-47; Ps 143; Spr 15:8-10
