2025-03-08
Jakobus 4:8 NLV
Ons sê dat ons God vertrou, maar ons vrees dikwels dat Hy nie daar vir ons gaan wees wanneer ons Hom die nodigste het nie. Dus neem ons verkeerdelik aan dat as ons aanhou om aan die probleem te dink en ons genoeg daaroor bekommer, sal ons op ‘n manier dit self kan oplos, net vir ingeval God nie opdaag en iets volgens ons tydrooster doen nie. Dit bring ons nader aan ons probleme, maar nie aan die Een wat dit kan oplos nie. Wanneer ons egter kies om te glo dat God in beheer van ons lewens is en enige situasie waarin ons onsself bevind kan hanteer, beweeg ons nader aan God en lyk ons probleme nie meer so kommerwekkend nie.
Dit werk as volg: Hoe nader jy aan die probleem beweeg, hoe kleiner lyk God en hoe nader jy aan God beweeg, hoe kleiner lyk die probleem. Die Bybel sê: ‘Vertrou op die Here met alles wat jy het. Moenie staatmaak op jou eie insigte nie’ (Spreuke 3:5 NLV). Deur op God te vertrou, sal jou daarvan weerhou om dinge te probeer uitpluis waarvoor jy nog nie antwoorde het nie. In plaas daarvan om na die neulende stem te luister wat sê: ‘Wat gaan jy doen?’ beweeg eerder nader aan God en sê: ‘Ek gaan op God vertrou om my te wys wat ek moet doen.’
Dawid het verklaar: ‘My liggaam en my hart kan kwyn, maar God is my blywende krag en my erfdeel vir altyd… dit is goed om naby God te wees!..’ (Psalm 73:26, 28 NLV). Waar is God wanneer jy Hom die nodigste het? Reg langs jou!
Sielskos: Eks 39-40; Luk 15:11-32; Ps 135; Spr 7:21-23
2025-03-07
Esegiël 37:1-2 NLV
God het vir Esegiël gesê om sy Woord aan ‘n vallei vol bene te profeteer, wat toe ‘n magtige leër geword het. Hierdie bene was oud, droog en het die hele valleivloer vol gelê. Dit mag dalk beskryf waar jy vandag is. Jou hoop is dood, jou siel is droog, jou lewe is in wanorde. Wat is die antwoord?
1) Jy het nodig dat God dinge in jou lewe skud. ‘…Skielik was daar ‘n gedreun… Die bene van elke liggaam het bymekaargekom’ (vers 7 NLV). Wanneer dit voel of dinge in jou persoonlike lewe, jou huislewe en jou werkslewe geskud word, moet jy bly wees; dit beteken dat God groot planne vir jou het.
2) Jy het nodig dat God deur sy Woord met jou praat. ‘…Droë bene, luister na die woord van die Here!’ (vers 4 NLV). God se Woord het ‘n klomp bene in ‘n leërmag wat kon verower, oorwin en sy doelwitte vervul, verander. God se Woord kan dieselfde vir jou doen.
3) Jy het nodig dat God sy Heilige Gees in jou blaas. ‘…Blaas in hierdie dooie liggame sodat hulle lewend kan word!’… Hulle het lewend geword en op hulle voete gaan staan, ‘n groot klomp mense’ (Esegiël 37:9-10 NLV). Wanneer jy deur sy Gees bemagtig word, sal jy jou eie verwagtinge oorskry en groot dinge vir God doen.
Esegiël kon nie die potensiaal in daardie bene sien nie, totdat God dit vir hom gewys het. Maak dus nie saak wat ander mense sê nie, God sien potensiaal in jou en dis hoekom Hy besig is om jou te skud.
Sielskos: Eks 36-38; Luk 15:1-10; Ps 27; Spr 7:10-20
2025-03-06
1 Konings 18:19 NLV
Die grootste hoofstuk in Elia se lewensverhaal het op Karmelberg plaasgevind. Dis toe hy vuur uit die hemel laat afkom het, die profete van Baäl verslaan het en die harte van die Israeliete na God teruggedraai het. Die woord ‘Karmel’ beteken ‘vrugbare grond.’ Voor Elia egter by Karmelberg kon uitkom, moes hy eers na twee ander plekke toe gaan:
Eerstens het God hom na die Kritspruit toe gestuur. Die woord ‘Krit’ beteken ‘om ‘n verbond te sluit met.’ Dit was hier waar Elia besef het dat God ‘n verbond maak en sy Woord hou, wat jou deur die moeilikste tye kan bring. Dit was hier waar die kraaie vir Elia tydens ‘n droogte en hongersnood daagliks kos gebring het en waar hy die verfrissende water uit die spruit kon drink. Die Bybel sê egter: ‘Na ‘n tyd het die spruit egter opgedroog…’ (1 Konings 17:7 NLV). Wanneer God toelaat dat jou spruit opdroog, is dit om jou sodoende na die ware bron, Homself, terug te dryf waar jy verdere instruksies kan ontvang.
Tweedens, het God hom na ‘n weduwee in Sarfat gelei. Die woord ‘Sarfat’ beteken ‘om in ‘n smeltkroes te suiwer.’ Goud, in sy oorspronklike vorm, is nie suiwer nie. Dit moet gesuiwer word deur dit tot kookpunt te verhit. Die hitte skei die onsuiwerhede van die goud, wat dan na die oppervlak kom en afgeskep kan word. God sal dieselfde vir jou deur die hitte van beproewinge doen om die goud in jou lewe van die skuim te skei. Hy weet watter ervarings jy nodig het om jou na Karmelberg, die plek van vrugbare grond, te bring. Vertrou dus op Hom. Hy weet wat Hy doen.
Sielskos: Eks 33-35; Luk 14:25-35; Ps 112; Spr 7:6-9
2025-03-05
Jesaja 55:8 NLV
‘n Deel van ons voel asof daar iets geestelik met ons verkeerd is wanneer ons onsekerheid ervaar. Dit is egter presies wat Jesus ons beloof het wanneer ons uit die Gees gebore word en Hom begin volg: ‘Die wind waai waar hy wil. Jy hoor sy suising, maar jy weet nie waarvandaan hy kom en waarheen hy op pad is nie. Só is dit met elkeen wat uit die Gees gebore is’ (Johannes 3:8 NLV).
Wanneer jy deur die Gees van God gelei word, kan jy dikwels nie beskryf hoe dit gebeur nie. Selfs wanneer jy dag en nag daaroor nagedink het, sê God: ‘My gedagtes is anders as julle s’n, en julle paaie is nie my paaie nie.’ Enigiets kan dus gebeur wanneer jy God volg. Jy weet nooit wie jy gaan ontmoet, waarheen jy gaan of wat jy gaan doen nie. Hoe vinniger jy vrede met hierdie geestelike waarheid maak, hoe meer sal jy die reis geniet. Andersins sal jy met ‘n selfbehepte geestelikheid wat jou leeg laat voel, opeindig.
In plaas daarvan om die Gees te volg, nooi jy dan die Gees uit om jou te volg. In plaas daarvan om God se doelwitte te dien, wil jy hê dat Hy jou doelwitte moet dien. Alhoewel dit na ‘n subtiele onderskeid mag lyk, maak dit ‘n massiewe verskil.
Hier is dus jou opsies: 1) Volg die pad van sekerheid, wat jou in beheer hou, maar die avontuur wat God vir jou in gedagte het, by jou steel. 2) Aanvaar die onsekerheid van die ‘hoe’ en ‘waar’ wanneer jy besluit om God te volg en staan op hierdie belofte: ‘Op u ontferming kan mens altyd vertrou. Dit is elke oggend nuut’ (Klaagliedere 3:23 NLV).
Sielskos: Eks 30-32; Luk 14:15-24; Ps 106:24-48; Spr 7:3-5
2025-03-04
1 Petrus 5:7 NLV
Charles Weigle was ‘n rondreisende evangelis wat daarvan gehou het om te reis en te preek, ten spyte van die swaarkry op die pad. Sy vrou het egter met haar dikwels afwesige man ontnugter geraak. Een dag het Charles by die huis opgedaag en ‘n nota gekry: ‘Charlie, ek was ‘n dwaas. Ek het sonder baie dinge klaargekom, maar van nou af gaan ek alles kry wat die wêreld my skuld. Ek weet jy sal aanhou om ‘n dwaas vir Jesus te wees, maar vir my is dit totsiens!’
Charles was geskok en depressie het soos ‘n groot golf oor hom gespoel. Een dag, toe hy op die stoep van sy kothuis sit, het hy selfdood oorweeg, ‘n Stem binne hom het gefluister: ‘Jou bediening is klaar. Niemand gee meer om nie.’ ‘n Ander stem het egter deur die swart wolk gebreek: ‘Charlie, Ek het nie van jou vergeet nie; Ek gee vir jou om.’ Charles het onmiddellik op sy knieë neergeval en sy lewe opnuut aan Christus toegewy.
Later het hy die woorde van een van die mees geliefde gesange geskryf: ‘I would love to tell you what I think of Jesus, since I found in Him a friend so strong and true; I would tell you how He changed my life completely, He did something that no other friend could do. No one ever cared for me like Jesus, there’s no other friend so kind as He; no one else could take the sin and darkness from me, o how much He cared for me.’
Het die verantwoordelikhede wat jy dra jou tot by ‘n breekpunt gebring? Is die hartseer meer as wat jy kan hanteer? Die woord vir jou vandag is: ‘Gee al [jou] bekommernisse aan God oor, want Hy gee vir [jou] om.’
Sielskos: Eks 28-29; Luk 14:1-14; Ps 106:1-23; Spr 7:1-2
2025-03-03
Handelinge 13:2 NLV
‘n Groep gelowiges het gereeld bymekaar gekom en baie tyd daaraan bestee om te bid, te vas en God te aanbid. Gevolglik het die Heilige Gees gesê: ‘…Sonder Barnabas en Saulus vir My af om die werk te doen waarvoor Ek hulle geroep het.’ Hoe het hulle geweet dat die Heilige Gees dit vir hulle gesê het? Die Skrifgedeelte maak nie melding daarvan nie. Dit mag dalk ‘n dramatiese oomblik gewees het. Dit mag dalk wees dat hulle eers later, toe hulle daarop teruggekyk het, besef het dat die Gees hulle gelei het. Wat egter seker is, is dat hulle saam leiding van God ontvang het.
Wanneer dit by leiding kom, loop ons soms as gevolg van beperkte denke die hele reeks opsies wat God voor ons plaas mis. ‘n Christelike skrywer verduidelik: “Ons vra dinge soos: ‘Moet ek hierdie verhouding beëindig of nie?’ in plaas van: ‘Hoe kan ek hierdie verhouding beter maak?’ Of ‘Moet ek dit koop of nie?’ in plaas van ‘Wat is die beste manier waarmee ek hierdie geld kan gebruik?’ Ons is geneig om aan bevestigingsvooroordeel te ly. Ons soek na inligting wat dit wat ons reeds wil hê bevestig, eerder as om na die waarheid te soek. Ons gee voor asof ons die waarheid wil hê, maar wat ons werklik wil hê, is gerusstelling oor die standpunte wat ons reeds ingeneem het.”
Jesaja het vir die mense gesê: “Hulle sê vir die sieners: ‘Bly stil, ons wil niks meer hoor van wat julle sien nie!’ En vir die profete sê hulle: ‘Ons wil nie die waarheid hoor nie! Sê vir ons wat ons wil hoor, dat goeie dinge met ons gaan gebeur. Vertel vir ons leuens!'” (Jesaja 30:10 NLV). Wanneer jy leiding soek, moet jy dus eerlik, oop en gewillig wees.
Sielskos: Eks 25-27; Luk 13:18-35; Ps 136; Spr 6:30-35
