2025-06-04
Markus 2:22 NLV
As nuwe skepping, word jy nie meer deur jou ou gedrag nie, maar deur jou verhouding met Christus beheer. Jon Walker skryf: “‘n Paar kilometer van my huis af is daar ‘n winkel wat ‘n opknapping ondergaan het. Die werknemers het egter moontlik nie die memo ontvang nie. Die werker agter die toonbank het ‘n nuwe uniform gedra, maar hy het ook dieselfde nors voorkoms gehad wat ek voorheen gesien het. Dit het my laat dink oor hoe ons probeer om nuwe wyn in ou leersakke te gooi. Jesus sê ons sal beslis misluk, want ‘…doen jy dit tog, gaan die wyn die sakke laat skeur en die wyn sowel as die sakke sal daarmee heen wees…’ (vers 22 NLV).
Doen ons egter nie dieselfde as dit by ons Christelike wandel kom nie? Die nuwe wyn van onvoorwaardelike liefde, geskink in die ou leersak van haat vir die gesin wat twee deure van ons af bly. Die nuwe wyn van aanbidding, gegiet in die ou leersak van verafgoding van geld, mag, musiek of die nuutste videospeletjie. Die nuwe wyn van Bybelstudie, gegooi in die ou leersak van besig wees met onbenullighede. Die nuwe wyn van nederigheid, geskink in die ou leersak van verwaandheid. Die nuwe wyn van vergifnis, geskink in die ou leersak van bitterheid. Die nuwe wyn van ander eerste plaas, gegiet in die ou leersak van selfsugtige ambisie. Die nuwe wyn van vreugde, geskink in die ou leersak van jaloesie. Die nuwe wyn van vrede, geskink in die ou leersak van onenigheid.”
As enigiets hiervan bekend klink, is dit tyd om die ou leersak weg te gooi en God toe te laat om jou ‘n kragtige, nuwe, skoon skepping te maak.
Sielskos: 2 Kon 4:18-6:33; Mark 12:1-12; Ps 48; Spr 13:2-3
2025-06-03
Handelinge 1:8 NLV
Jy vra: ‘As Christus in my woon, hoekom dink en tree ek steeds op hierdie manier op?’ ‘n Christelike leier verduidelik: ‘Die antwoord word in ‘n storie oor ‘n dame wat ‘n klein huisie aan die begin van die eeu gehad het, geïllustreer. Sy was redelik ryk, maar ook redelik spaarsamig. Mense was verbaas toe sy besluit het om onder die eerstes te wees wat elektrisiteit by haar huis te laat aanlê. Etlike weke na die installasie het ‘n meterleser by haar deur verskyn. Hy het haar gevra of haar elektrisiteit goed werk en sy het hom verseker dat dit doen. ‘Ek wonder of jy iets vir my kan verduidelik,’ het hy gesê. ‘Jou meter wys skaars enige gebruik. Gebruik jy enigsins die elektrisiteit?’ ‘Natuurlik,’ antwoord sy. ‘Elke aand as die son sak, sit ek my ligte net lank genoeg aan om my kerse aan te steek; dan skakel ek dit weer af.’ Sy het die krag aangeskakel, maar dit nie gebruik nie. Haar huis was aan elektrisiteit gekoppel, maar nie verander nie.
Maak ons nie dieselfde fout nie? Ons vertrou op Christus vir verlossing, maar weerstaan transformasie. Ons speel soms met die skakelaar, maar die meeste van die tyd is ons met skaduwees tevrede. Wat sou gebeur as ons die lig aanlos? Watter veranderinge sou plaasvind wanneer ons besluit om in Christus se glans te woon? God het ambisieuse planne vir ons; daar is geen twyfel daaroor nie. Dieselfde Een wat jou siel gered het, verlang daarna om jou hart te omskep. Sy plan is niks minder as ‘n totale transformasie nie.’ ‘… God het elkeen wat Hy vir Hom uitgesoek het se lewe nuutgemaak. Nou kan hulle die beeld van sy Seun weerkaats…’ (Romeine 8:29 DB). Gebruik vandag jou Godgegewe krag.
Sielskos: 2 Kon 1:1-4:17; Mark 11:27-33; Ps 1; Spr 13:1
2025-06-02
1 Samuel 16:7 NLV
Jesus was veroordelend oor die Fariseërs: ‘So lyk julle ook van buite vir die mense baie vroom, maar van binne is julle vol skynheiligheid en minagting van die wet’ (Matteus 23:28 NLV). Hulle het ‘n goeie front voorgehou, maar was heeltemal van genade, barmhartigheid en medelye ontbloot. Jesus het hulle daaroor aangespreek!
Omdat ons in ‘n samelewing wat op voorkoms gefokus is leef, waarsku Jesus ons oor die gevare wat voortspruit wanneer ons op die uiterlike lewe, ten koste van die ontwikkeling van die innerlike lewe, fokus. Hoe kan ons keer dat dit gebeur?
1) Volg Jesus se voorbeeld. Hy het sy lewe gewy om diegene wat verlore, vergete en eensaam was, te bedien.
2) Hou in gedagte dat selfs wanneer jy ‘n Christen is, jy in sekere areas sal sukkel, moet dus nie voorgee dat jy alles onder beheer het nie.
3) Vra God om gedragspatrone wat om voorkoms, eerder as die hart wentel, te verander.
4) Omring jouself met mense wat jou aanmoedig om opreg te wees en jou korrigeer wanneer jy dit nodig het.
Marybeth Whalen skryf: ‘Die verwers het die muur by die trap wat na onder lei, wit geverf. Ons gewoontes het egter nie verander nie. Die kinders het steeds hul vuil hande oor die muur gesleep en die skoon wit muur, vuil en grys gemaak. As ek nie versigtig is nie, kan ek soos daardie muur dinge onder ‘n laag verf probeer wegsteek. Ek kan my Bybel onder die arm dra, glimlag asof alles wonderlik is en oor my wandel met die Here spog. Sodra die lewe egter deurmekaar raak, wag die lelike gewoontes binne-in my om uit te kom. Ek kan dan soos ‘n hedendaagse Fariseër begin fokus op die wit muur en die vuiligheid daaronder ignoreer.’ Wees dus opreg.
Sielskos: Op 19-22; Mark 11:12-26; Ps 129; Spr 12:27-28
2025-06-01
2 Korintiërs 4:7 NLV
Maak seker om onderskeid tussen die ‘breekbare kleipot’ en die ‘skat’ te tref. Paulus sê: ‘Ons het hierdie skat,’ hy sê nie: ‘Ons is hierdie skat,’ nie! Elke keer wanneer jy mense toelaat om aan jou as die skat te dink, is God nie tevrede nie en stel jy jouself vir mislukking bloot. Wanneer God ‘n skat in jou deponeer, beteken dit twee dinge: (1) Hy verwag ‘n opbrengs op sy belegging. (2) Jy word tot ‘n hoër vlak van verantwoordelikheid en aanspreeklikheid geroep.
Soms dink mense leiers is immuun teen die lewe se toetse en beproewings. Dis nie so nie! Net omdat iemand talent het, beteken nie dat hulle nie op sekere gebiede sukkel nie. Hulle stryd is dalk onsigbaar, maar hulle sukkel steeds.
God gebruik ook mense wat ons sou afgekeur en weggegooi het, soos Ragab wat as ‘n prostituut in Jerigo gewerk het. Toe sy haar geloof egter in God plaas, het Hy haar gebruik om die slag van Jerigo te help wen. Hy het haar ook toe in die familielyn van Christus ingesluit (sien Hebreërs 11:31). Wat van Jefta? Sy ma was ongetroud, hy is deur sy halfbroers en -susters as buite-egtelik verwerp en het uiteindelik saam met ‘n bende in ‘n grot gewoon. Tog het God hom gebruik om Israel te verlos en een van sy jongste leiers te word (sien Hebreërs 11:32).
God spesialiseer daarin om gebroke kleipotte te herstel. Hy neem dinge wat nie produktief is nie – huwelike wat nie werk nie, mense met probleme – en leer hulle hoe om oorwinnend en vrugbaar in sy diens te staan. Hierdie wete gee jou die krag en volharding om enigiets teen te staan, want jy verstaan dat wanneer God sy skat in jou plaas, Hy dit sal beskerm, gebruik en seën.
Sielskos: Eks 20:16; Deut 19:15-20; Op 21:8
2025-05-31
Matteus 7:11 NLV
Probeer jou die oorvloedigheid wat God vir jou voorberei het, indink (sien 1 Korintiërs 2:9). Besluit dan dat die taal van jou hart die ‘baie meer’ van geloof gaan wees en nie die ‘baie minder’ van ongeloof nie. Let die volgende op:
1) Jou verlossing oortref jou sonde. Maak nie saak hoe sondig jou verlede is nie, ‘…die genade van God, ja, sy genadegeskenk wat Hy deur Jesus Christus aan baie mense gee, oortref alles!’ (Romeine 5:15 NLV). Wees bly! Jy is ‘baie meer’ vergewe.
2) Christus wat in jou lewe, red jou voortdurend. As Hy in jou bly, werk sy verlossing aktief in jou. ‘Want as God ons, terwyl ons nog sy vyande was, deur die dood van sy Seun tot sy vriende gemaak het, hoeveel te meer sal Hy ons nie noudat ons sy vriende is, deur Hom, die lewende Jesus, van die oordeel red nie!’ (Romeine 5:10 NLV).
3) Die Heilige Gees sal oorvloedig in jou wees. ‘As julle sondige mense dan weet om goeie gawes aan julle kinders te gee, hoeveel te meer sal julle hemelse Vader die Heilige Gees gee vir hulle wat Hom vra’ (Lukas 11:13 NLV).
4) Jy kan in oorwinning deur Jesus lewe. ‘…almal wat God se oorvloedige genadegeskenk van vryspraak ontvang, sal koninklik oor die sonde en die dood triomfeer’ (Romeine 5:17 NLV). Jy kan deur God se genade ‘baie meer’ in oorwinning wandel.
5) Alles wat jy nodig het, sal Hy voorsien. ‘As sondige mense soos julle dan goed weet om goeie dinge aan julle kinders te gee, hoeveel te meer sal julle hemelse Vader goeie dinge gee aan hulle wat dit van Hom vra!’ (Matteus 7:11 NLV).
As jy ‘n ‘baie meer’ mentaliteit ontwikkel, sal jy begin om die ‘goeie dinge’ wat God voorsien, te geniet.
Sielskos: Op 15-18; Mark 11:1-11; Ps 124; Spr 12:26
2025-05-30
Romeine 5:20 NLV
Die volgende uitdrukking word dwarsdeur die Skrif gebruik om God se voorsiening aan ons te beskryf: ‘baie meer.’ Dit verseker ons dat daar geen behoefte is wat nie deur sy oorvloedige hulpbronne vervul kan word nie. Ons neiging is egter om ons behoeftes met ‘n houding van ‘baie minder’ te benader. Dit neem aan dat God nie aan hulle kan voldoen nie of onwillig is om aan hulle te voldoen. Nee, God wil hê dat ons ‘n ‘baie meer’ houding moet inneem. Baie minder is die taal van sigbare dinge; dit laat toe dat omstandighede en gebrek ons lewens beheers. Baie meer is die taal van onsigbare dinge; dit nooi ons uit om in die versekering van God se oorvloedigheid te lewe.
‘n Treffende illustrasie van hierdie beginsel kan in 2 Kronieke 32 gevind word. Koning Sanherib van Assirië se leër het gedreig om Israel uit te wis. Nadat hy hulle vertel het wat hy aan die mense van ander lande gedoen het, het hy bygevoeg: ‘…Hoeveel minder is die kans dat julle God julle uit my mag sal red!’ (vers 15 NLV). Koning Hiskia het egter sy geloof op God se hulpbronne gevestig en die Israeliete as volg bemoedig: ‘…Moenie bang wees vir die koning van Assirië of sy magtige leër nie, want daar is ‘n baie groter mag aan ons kant! Hy het dalk ‘n groot leër, maar hulle is maar net mense. Die Here ons God is by ons en Hy sal vir ons veg!..’ (verse 7-8 NLV).
Dis tyd dat jy ‘n ‘baie meer’ mentaliteit in jou lewe ontwikkel want God kan ‘…oneindig meer doen as wat ons vra of dink om te vra’ (Efesiërs 3:20 NLV).
Sielskos: Op 10-14; Mark 10:35-52; Ps 4; Spr 12:25
