2025-07-16
Johannes 2:17 NLV
Probeer om die vuur in Jesus se oë en die bulting van sy spiere terwyl Hy die tafels van die geldwisselaars in die tempel omgooi, voor te stel. Hy doen dit terwyl Hy ‘n sweep swaai wat Hy self gemaak het. “Jesus se dissipels het onthou dat daar geskryf staan: ‘Die ywer vir u huis brand in my binneste.'” Jesus was die wysste en barmhartigste mens wat ooit gelewe het. Hy was ook die passievolste. Diegene wat Hom volg, behoort ook die passievolste mense op die aarde te wees.
Die woord entoesiasme kom van twee Griekse woorde af: en en theos, wat ‘in God’ beteken. Hoe meer jy ‘in God’ word, hoe groter passie ontwikkel jy vir God se dinge. ‘Wees bly in die Here, en Hy sal jou hartsbegeertes aan jou gee’ (Psalm 37:4 NLV). Ja, jy is veronderstel om jou vleeslike begeertes daagliks te kruisig. God neem egter nie jou kapasiteit vir begeerte weg nie; Hy heilig en herlei dit. Wanneer jy jouself in die Here verbly, verander jou begeertes.
C.S. Lewis het gesê: ‘Ons is halfhartige wesens wat eerder met drank en seks en ambisie omgaan, as die oneindige vreugde wat aan ons gebied word.’ ‘n Pastoor voeg by: ‘Sonde is ‘n vermorsing van energie, en dit is ook ‘n dubbele vermorsing. Nadat jy jou energie op dinge soos wellus en trots en woede gemors het, moet jy nog meer energie op dinge soos skuld en skaamte en spyt mors. Niks vermors meer energie as sonde nie, maar op dieselfde manier verskaf gehoorsaamheid meer energie as enigiets anders. Dit is pure energie.’
Sielskos: Hand 18-19; Matt 10:11-20; Ps 146; Spr 16:4-5
2025-07-15
Jakobus 3:14 NLV
Die Bybel sê: ‘…As iets jou in sy mag het, is jy mos sy slaaf’ (2 Petrus 2:19 NLV). Dis veral waar van jaloesie. Chuck Swindoll skryf: ‘Jaloesie en afguns word dikwels as dieselfde beskou, maar daar is ‘n verskil: Afguns ontstaan uit leë hande; dit rou oor dit wat jy nie het nie. Jaloesie ontstaan uit vol hande; dit word deur die pyn aangesproor om dit wat jy het aan iemand anders af te staan, ten spyte van jou pogings om dit te behou. Kaïn was jaloers op Abel. Hy was wrokkig as gevolg van God se aanvaarding van sy broer; en eers toe Abel se bloed oor Kaïn se wrede hande uitgegiet is, het sy jaloesie bedaar.
Enigiemand wat bevryding van hierdie helse reus ervaar het, weet goed hoe jaloesie ‘n vriendskap kan vernietig, ‘n romanse kan ontbind, ‘n huwelik kan vernietig, spanning deur die geledere van professionele persone kan saai, eenheid in ‘n span tot niet kan maak, ‘n kerk kan verwoes, mededinging onder die koor kan bevorder en bitterheid en vingerwysers onder talentvolle instrumentaliste kan bring. Jaloesie bevraagteken beweegredes en betreur ‘n ander se sukses.’
Die Bybel sê: ‘As julle bitter jaloers is… moenie dan spog dat julle wysheid het nie. Dis om teen die waarheid in te lieg!’ Besluit eerder dat jy deur die genade van God uit jaloesie se beheer gaan losbreek. Swindoll voeg by: ‘Ek het baie jare gelewe deur jaloesie se bevele te gehoorsaam. Dit was aaklig. Uiteindelik het ek besef dat ek nie in duisternis hoef te lewe nie. Ek het die reus doodgemaak. Die sonlig van vryheid het my hart verbly. Die lug was so vars en skoon. O, die verskil wat dit gemaak het! Dis volslae genot.’
Sielskos: Hand 16-17; Matt 10:1-10; Ps 140; Spr 16:3
2025-07-14
Romeine 15:4 NLV
Daar is ‘n oulike verhaal van ‘n meisie wat haar ouerhuis verlaat het om universiteit toe te gaan. Aan die einde van haar eerste semester, het sy vir haar ma die volgende e-pos gestuur: ‘Ek dink dit is tyd dat ek Ma op datum bring oor wat in my lewe aangaan. Kort nadat ek by die universiteit aangekom het, het ek met die koshuislewe verveeld geraak en vyfhonderd rand uit my kamermaat se beursie gesteel. Met die geld het ek ‘n motorfiets gehuur, maar naby die koshuis daarmee teen ‘n telefoonpaal vasgery. Ek het my been in die ongeluk gebreek en kan nie klasse bywoon nie, so ek kom huis toe om by Ma en Pa te kom bly.’
Nadat sy die e-pos gestuur het, het sy dadelik ‘n tweede een gestuur: ‘Ma, ek maak net ‘n grappie. Ek het nie enige geld gesteel, of ‘n motorfiets gehuur, of daarmee teen ‘n telefoonpaal vasgery, of my been gebreek nie. Ek kom ook nie huis toe om by julle te bly nie. Ek het egter ‘n D in wiskunde en ‘n F in letterkunde gekry en ek wou hê julle moet my punte in die regte perspektief beskou!’
Op ‘n ernstiger noot, kan ‘n Bybelse perspektief op die lewe se uitdagings jou uit wanhoop en moedeloosheid lig. Paulus skryf: ‘…Die standvastigheid en die bemoediging wat die Skrif aan ons gee, help ons om aan ons toekomsverwagting te bly vashou.’ Vir elke probleem waarvoor jy in die lewe te staan kom, het God se Woord ‘n beginsel om uit te oefen en ‘n belofte om op te eis. Die manier om dus moedeloosheid te oorkom, is om in God se Woord te delf en dit ter harte te neem.
Sielskos: Hand 14-15; Matt 9:27-38; Ps 133; Spr 16:2
2025-07-13
Jakobus 2:26 NLV
Kan dit wees dat die negatiewe persepsie wat mense van die kerk het, uit die negatiewe energie wat ons uitstraal spruit? Kan dit ook wees dat ons negatiewe energie uit ons negatiewe siening van geregtigheid spruit? Ons beskou geregtigheid verkeerdelik as om niks verkeerd te doen nie. Die probleem met so ‘n benadering is dat jy niks verkeerd kan doen nie en steeds nie die regte ding doen nie; die ding wat God jou roep om te doen. Dink jy regtig dat dit God se groot droom vir ons is dat ons niks verkeerd doen nie? Jy hou daarvan as jou kinders ‘n moeilike besluit maak om iets nie te doen wat hulle weet verkeerd is nie. Dit bring egter groter vreugde mee as jy sien hoe hulle hul talente ontwikkel en hulle potensiaal begin uitleef. Dis wat God vir elkeen van ons wil hê.
Die Bybel leer ons van twee soorte sondes: die sonde van bedryf, wat is om iets te doen wat jy nie moes doen nie en die sonde van versuim, wat al die dinge is wat ons kon en moes gedoen het om God se koninkryk te bevorder, maar nie gedoen het nie. ‘n Pastoor skryf: ‘In God se ekonomie is om gelyk te breek, ‘n totale verlies. Is dit nie die les van die gelykenis van die talente nie? Die slaaf met een talent het gelyk gebreek, maar Jesus het hom ‘n slegte slaaf en ‘n lamsak genoem (sien Matteus 25:26). Geregtigheid is om al jou God-gegewe gawes te gebruik om jou God-gegewe potensiaal ten volle te bereik. Liefde speel nie veilig nie; dit neem risiko’s. Liefde maak nie verskonings nie; dit neem verantwoordelikheid. Liefde sien nie probleme nie; dit gryp geleenthede aan om op te staan en in te tree.’
Sielskos: 1 Sam 21:1-6; Hosea 6:4-6; Matt 12:1-14
2025-07-12
Prediker 3:1 NLV
Jou lewensdoel word aan ‘n spesifieke tyd en seisoen gekoppel. Sommige van God se doelwitte kan binne ‘n kort tydjie bereik word, terwyl ander ‘n leeftyd neem. Jy sal nie in staat wees om altyd dit te doen wat jy vandag doen nie, of ten minste nie in dieselfde mate as wat jy dit tans doen nie. Die Bybel leer ons: ‘…soos jou dae, so sal jou krag wees’ (Deuteronomium 33:25 KAB23). Dis hoekom sommige van die wêreld se beste sportspelers die oorgang na afrigting maak.
Drie belangrike waarnemings:
1) Jy moet verstaan in watter seisoen jy tans is en die meeste daaruit put.
2) Wanneer een seisoen eindig, moet jy met grasie na die volgende seisoen beweeg.
3) Jy moet leer om die seisoen waarin jy jou tans bevind, te geniet.
Hier is ‘n interessante verskynsel: Elia het sy mantel van krag aan Elisa oorgedra, maar nêrens lees ons dat Elisa dit aan iemand anders oorgedra het nie. Toe Paulus egter sy mantel aan Timoteus oorgedra het, het dit nie daar geëindig nie. Paulus het vir hom gesê: ‘Jy het my baie dinge hoor leer wat bevestig is deur baie betroubare getuies. Leer hierdie groot waarhede aan betroubare mense wat bekwaam is om dit aan ander deur te gee’ (2 Timoteus 2:2 NLV).
In plaas daarvan om te treur dat sy tyd besig is om uit te loop, het Paulus hom in die wete dat God hom gehelp het om sy opdrag te vervul, verheug. ‘Ek het die goeie stryd gestry, ek het die wedloop voltooi, en ek het gelowig gebly. En nou wag die prys vir my: die lourierkrans van geregtigheid…’ (2 Timoteus 4:7-8 NLV). God gee jou genade vir die seisoen waarin jy is. Let dus op en weet wanneer om aan te beweeg!
Sielskos: Hand 12-13; Matt 9:14-26; Ps 123; Spr 16:1
2025-07-11
Matteus 5:41 NLV
Verbeel jouself die volgende: Jy is in ‘n restaurant met iemand wie se rekening R100 is en jy sien hoe hulle die fooitjie uitwerk. Hulle het R20 oor en weet dat ‘n 10 persent fooitjie as die absolute minimum gesien word. Hulle mors vyf minute om kleingeld vir daardie R20 te kry sodat hulle presies R10 as fooitjie kan los, eerder as om bietjie ekstra te gee. Wat sou gebeur het as hulle die volle R20 as fooitjie gelos het? Hulle mag dalk die kelner of kelnerin se dag gemaak het. R10 mag dalk nie soos baie klink nie, maar die boodskap wat daarmee gepaardgaan kan die wêreld vir iemand beteken, veral as hulle ‘n slegte dag het. Dit sê: ‘Dankie, jy het ‘n goeie werk gedoen, ek waardeer jou, jy is kosbaar.’ Miskien gaan die boodskap verlore – jou kelner raap net die fooitjie op sonder om dit te tel – maar God seën jou in elk geval omdat jy dit gedoen het.
‘…Wie suinig saai, sal karig oes; wie ruimhartig saai, sal volop oes’ (2 Korintiërs 9:6 NLV). Dink daaroor: Jy kan iemand anders gelukkig maak en jouself seën. Dit is net een klein voorbeeld van die verskeie maniere waarin die klein dingetjies wat ons doen, verrassend groot nagevolge kan hê. Klein dade van goedhartigheid gee die toon van jou dag aan. Om die ekstra myl te gaan – of dit nou ‘n ekstra fooitjie of ‘n onverwagte kompliment of geskenkie is – kos baie min en gee jou baie terug.
Hier is nog ‘n belangrike gedagte: Ons kan geloof hê wat berge versit, al die diep leerstellings van die Bybel verstaan en verduidelik en uitblink in persoonlike heiligheid, maar God se Woord sê dat ons niks, sonder liefde, is nie (sien 1 Korintiërs 13:2).
Sielskos: Hand 10-11; Matt 9:1-13; Ps 118:19-29; Spr 15:33
