2025-08-08
1 Korintiërs 9:25 AFR83
Wanneer die Bybel ons hemelse beloning beskryf, word daar van krone gepraat. Kom ons kyk na elkeen en wat ons daaruit kan leer.
Die eerste is die oorwinnaarskroon. ‘Almal wat aan ‘n wedstryd deelneem, ontsê hulleself allerlei dinge. Hulle doen dit om ‘n verganklike oorwinnaarskroon te verkry, maar ons ‘n onverganklike. Ek hardloop dan ook soos een wat nie van sy doel onseker is nie; ek slaan soos ‘n bokser wat nie in die lug slaan nie. Maar ek oefen my liggaam en bring dit onder beheer, sodat ek nie ander tot die stryd oproep en self nie kwalifiseer nie’ (verse 25-27 AFR 83). Paulus noem dat atlete wat wil wen, aktief daarvoor moet oefen. Net so moet ons selfbeheersing oor dinge wat, alhoewel dit nie inherent boos is nie, maar ons toewyding aan God kan verswak, uitoefen.
‘n Pastoor verduidelik dit as volg: ‘Soms moet ons die televisie afskakel sodat ons Bybelstudie kan doen. Ons moet vroeër in die oggend opstaan om ons dagstukkie te lees. Ons moet selfbeheersing oor dit waarmee ons ons gedagtes vul, uitoefen. Ons kan baie van vandag se televisieprogramme en rolprente – en nog te meer die materiaal wat op ons fone en rekenaars beskikbaar is – nie kyk sonder om Bybelse standaarde van persoonlike heiligheid te oortree nie. Ons kan nie ons liggame aan dwelm- of alkoholmisbruik onderwerp of toelaat dat onsedelikheid in ons verhoudings insluip nie. Ons moet ons humeure en tonge onder die beheer van die Heilige Gees hou. Ons moet op God staatmaak om ons in ons besluite om ‘n gedissiplineerde lewe te lei, te versterk.’
Die Bybel sê: ‘Hulle doen dit om ‘n verganklike oorwinnaarskroon te verkry, maar ons ‘n onverganklike.’ Werk om die oorwinnaarskroon te ontvang.
Sielskos: Rig 1-3; Matt 15:29-39; Ps 119:49-56; Spr 17:18-21
2025-08-07
1 Korintiërs 6:20 NLV
Ann Landers skryf: ‘Geen meisie behoort haar liefde te moet bewys deur ongeoorloofde seksuele verhoudings aan te knoop nie. Enige ou wat jou vra om jou liefde te bewys, probeer jou vir die grootste, maklikste dwaas wat ooit bestaan, uitvang. Daardie ‘bewys jy is lief vir my’ gesegde is een van die vuilste truuks wat al ooit uitgedink is. Iemand wat jou werklik liefhet, wil die beste vir jou hê. Dink mooi hieroor. Hy wil hê jy moet ‘n ongeoorloofde daad pleeg, jou deug prysgee, jou selfrespek weggooi, jou kosbare reputasie vernietig, die risiko loop om swanger te raak of ‘n siekte op te doen of in groot moeilikheid beland. Word wakker! Hy wil hê wat die beste is vir hom; hy soek opwinding waaroor hy ten koste van jou kan spog.
Liefde? Wie probeer vir wie flous? ‘n Ou wat ‘n meisie werklik liefhet, sal eerder sy regterarm afkap as om haar skade aan te doen. In werklikheid bewys hierdie selfsugtige individu dat hy jou glad nie liefhet nie. Wat is die voorspelbare nagevolge? Don Juan raak gou moeg vir sy speletjies. Dan los hy jou, tel sy visstok weer op en gaan vang elders ‘n ander ewe niksvermoedende vis. As hy jou liefhet, laat hom sy liefde by die altaar bewys.’
Hier is Skriftuurlike raad oor seks: ‘Het julle dan vergeet dat julle liggaam die blyplek van die Heilige Gees self is?.. Dit beteken dat julle nie julle eie baas is nie en dat julle nie maar met julle liggaam kan doen wat julle wil nie. Die Here het baie duur betaal om julle Syne te maak. God moet dus ook trots kan wees op julle liggaam – daarvoor moet julle sorg deur die manier waarop julle julle gedra’ (verse 19-20 DB).
Sielskos: Rut 1-4; Matt 15:15-28; Ps 119:41-48; Spr 17:17
2025-08-06
Prediker 3:1 NLV
Waarom verander ‘n gelukkige twaalfjarige wat maklik saamwerk skielik in ‘n nukkerige, depressiewe dertienjarige? Daar is twee sterk kragte wat vir sommige van die tienergedrag wat jou as ouer mal maak, verantwoordelik is. Die eerste word aan sosiale druk, wat algemeen op daardie ouderdom voorkom, gekoppel. Daar is egter ‘n tweede bron van ontwrigting. Dit hou verband met hormonale veranderinge wat nie net die fisiese liggaam transformeer nie, maar ook ‘n omwenteling in hoe kinders dink, veroorsaak.
Sommige (nie alle) tieners ontwikkel ‘n chemiese wanbalans wat vir ‘n paar jaar ‘n toestand van wanbalans, opwinding, uitbarstings en selfs depressie veroorsaak. Hierdie omwenteling kan ‘n seun of meisie motiveer om dinge te doen wat absoluut geen sin vir die volwassenes wat angstig op die kantlyn toekyk, maak nie. Hierdie hormonale vuurstorm kan hul selfkonsep destabiliseer. Ouers ervaar dikwels wanhoop tydens hierdie irrasionele tydperk. Dit lyk asof alles wat hulle vir hul kinders probeer leer het, verdwyn het. Selfdissipline, netheid, respek vir gesag en algemene hoflikheid kan plek vir risiko’s en lighartigheid maak.
As jou kind vandag hom- of haarself daar bevind, is daar goeie nuus – beter dae is op pad! Jou onvoorspelbare tiener kan ‘n toring van krag en goeie oordeel word – mits hulle nie iets vernietigends doen voordat hul hormone weer tot bedaring kom nie.
Wat staan jou as ouer te doen? Eerstens, moenie langtermyn gevolgtrekkings op grond van ‘n korttermyn seisoen maak nie. Tweedens, laat hulle weet dat jy vir hulle lief is, wees geduldig en bid vir gemoedsrus. ‘…Omdat julle aan Christus behoort, sal die vrede van God julle harte en gedagtes soos ‘n veiligheidswag oppas’ (Filippense 4:7 NLV).
Sielskos: Obadja; 2 Joh; Matt 15:1-14; Ps 119:33-40; Spr 17:16
2025-08-05
Romeine 12:10 NLV
Een van die ware toetse van karakter en volwassenheid is hoe jy op iemand anders se sukses reageer. Dis veral waar wanneer hulle in ‘n area waarin jy misluk het of gefrustreerd is omdat jy nie groter sukses behaal het nie, presteer.
F.B. Meyer, ‘n bekende skrywer en dominee in Engeland, het een keer die volgende ervaring gedeel: ‘Dit was maklik om vir G. Campbell Morgan se sukses te bid terwyl hy in Amerika was. Toe hy egter na Engeland terugkeer en by ‘n kerk naby myne begin preek het, was dit egter ‘n ander storie. Ek het my jaloesie onderdruk en was vasbeslote om reg teenoor my vriend op te tree. My kerk het ‘n onthaal vir hom gereël en ek het erken dat indien dit nie nodig vir my was om die Sondagaand te preek nie, ek graag na hom sou wou gaan luister. My optrede teenoor hom het dus vir my reg gevoel. Die liewe Here het my egter uit my moeilikheid gehelp. Charles Spurgeon het by die kerk aan die een kant van my kerk gepreek, en G. Campbell Morgan het by die kerk aan die ander kant van myne gepreek. Hulle was beide so populêr en het sulke groot skares gelok dat ons kerk die oorloop van mense kon bedien. Ons kerk was propvol.’
Maak nie saak hoe goed jy iets doen nie, daar sal altyd iemand anders opdaag wat dit beter doen. Hier is dus jou opsies: Vergelyk jouself met hulle, kompeteer met hulle, kritiseer hulle of komplimenteer hulle en werk saam met hulle. Dis wat Paulus bedoel het toe hy geskryf het: ‘As broers en susters in God se huisgesin moet julle mekaar in liefde koester en voor in die ry staan om mekaar met respek te hanteer’ (vers 10 NLV).
Sielskos: 1 Pet 1-5; Matt 14:22-36; Ps 119:25-32; Spr 17:11-15
2025-08-04
Handelinge 26:16 NLV
In bofbal probeer die vanger die kolwer se aandag aftrek. By een geleentheid, toe dit Yogi Berra se beurt was om te vang, het Hank Aaron opgedaag om te kolf. Yogi het begin: ‘Hank, jy hou die kolf verkeerd vas. Die woorde op die kolf moet na jou kant toe kyk.’ Yogi het aangehou: ‘Jy beter seker maak jy hou die kolf reg vas. Jy moet die woorde op die kolf kan lees.’ Hank het nie ‘n woord gesê nie. Hy het net die volgende bal oor die middelveldheining geslaan. Hy het rondom die basisse gehardloop, die tuisbasis bereik en na Yogi Berra gekyk en gesê: ‘Ek het nie hierheen gekom om te lees nie, ek het gekom om te wen.’
Dit is noodsaaklik om te weet hoekom jy hier is. Deesdae sê mense dat hulle hulself probeer vind. So ‘n soektog is nutteloos. Soos een pastoor sê: ‘As jy nie weet wie jy is nie, hoe weet jy waarna om te soek? Hoe sal jy weet wanneer jy dit gekry het, aangesien jy nie weet waarna jy soek nie? Broodroosters vind nie hulself nie. ‘n Broodrooster moet eenvoudig net doen wat die vervaardiger vir hom in gedagte gehad het.’
Paulus het ‘n bonatuurlike ervaring op die Damaskuspad gehad toe Christus vir hom gesê het: ‘…Ek het juis hiervoor aan jou verskyn om jou as my dienskneg en getuie aan te stel. Jy moet vertel hoedat jy My gesien het en van wat Ek jou nog sal laat sien’ (vers 16 NLV). Om jou lewensdoel te vind, moet jy met God as jou verwysingspunt begin. Hy het jou gemaak; Hy het jou verlos; Hy het ‘n plan vir jou lewe – en Hy sal dit aan jou openbaar.
Sielskos: Deut 32:29-34:12; Matt 14:13-21; Ps 119:17-24; Spr 17:7-10
2025-08-03
Johannes 5:6 NLV
Wat ‘n wonderbaarlike vraag het Jesus vir hierdie verlamde man gevra: ‘Wil jy graag gesond word?’ Wie sal nie wil nie! Jy mag dalk verbaas wees. Kay Arthur vertel hoe sy eendag verby ‘n bedelaar in ‘n straat in Jerusalem geloop het. Terwyl hy gesit en bedel het, het hy sy broekspyp opgetrek om die verskriklike sere op sy been te wys.
Sy skryf: ‘My verpleegsterhart het my voete tot stilstand gebring. Ek wou af buk en die oop wonde teen die stof beskerm. Dit moes gewas, ontsmet en verbind word deur iemand wat omgee. My vriendin het my saggies aan my elmboog gevat en weggedraai na ons bestemming toe. Sy het aan my verduidelik dat hierdie man nie gesond gemaak wou word nie. Hy het sy bestaan uit sy wonde gemaak! Toe ek terugkyk, het ek een laaste blik gekry van iemand wat minder was as wat hy kon wees.’
Die man wat hulpeloos langs die waterbad genaamd Betesda gelê het, was al agt en dertig jaar daar. Hoe lank neem dit voordat ‘n probleem ‘n manier van lewe word? Jesus het vir hom gesê: ‘…Staan nou op… en loop!’ (vers 8 NLV), wat impliseer dat dit tyd is om op te staan en aan die werk te spring – om ‘n vader vir jou kinders, ‘n man vir jou vrou, ‘n bydraer tot jou gemeenskap, ‘n oplossing vir iemand anders se probleem te wees – dit is tyd om verantwoordelikheid vir jou lewe te neem.
Laat jy jou verlede of jou huidige omstandighede toe om jou vas te hou en jou te verhoed om vorentoe te beweeg? As Jesus jou sou vra: ‘Wil jy emosioneel, fisies en geestelik gesond wees?’ wat sou jou antwoord wees? Laat Jesus jou vandag heelmaak!
Sielskos: 1 Sam 17:4-51; Ef 6:10-18
