2025-10-07
Psalm 55:17 KAB23
‘n Antieke Europese klooster wat op ‘n hoë krans met ‘n diepe afgrond gebou is, kon slegs deur middel van ‘n mandjie, wat deur ‘n enkele tou wat deur ‘n reeks katrolle beheer is, bereik word. Op ‘n dag het ‘n besorgde besoeker opgemerk dat die tou op verskeie plekke uitgerafel is. In die hoop om sy angs te verlig, het hy die monnik wat die rit met hom gedeel het gevra: ‘Hoe gereeld vervang julle die tou?’ Onverstoorbaar het die monnik geantwoord: ‘Wanneer dit breek!’
Net soos masjinerie, gesondheid en verhoudings voortdurende aandag en instandhouding vereis, moet jy dieselfde met jou geestelike lewe doen. Roetine en herhaling kan geestelike lewensredders wees. Geestelike uitnemendheid is nie ‘n daad nie; dis ‘n gewoonte! Kyk na gebed en meditasie. Dit is veronderstel om gewoontes te wees wat jy elke dag beoefen; dis nie veronderstel om die uitsondering te wees nie. Moenie wag totdat die tou breek voor jy dit in jou lewe inkorporeer nie! Gebed moet eerstens ‘n geestelike dissipline wees. God se Woord bepaal dat dit nie net bloot ‘n daad nie, maar ‘n lewenslange gewoonte moet wees.
Paulus beveel ons om ‘…alles deur gebed en smeking [te doen]. Laat die Gees julle elke keer in die gebed lei…’ (Efesiërs 6:18 NLV). ‘Moenie ophou bid nie’ (1 Tessalonisense 5:17 NLV). Die Psalmdigter Dawid het hierdie beginsel verstaan. ‘Ek sal saans en môre en middag bid en hardop roep…’ Daniël het ook hierdie beginsel beoefen: ‘…Hy het daar drie maal ‘n dag op sy knieë gegaan om vir sy God te bid en om Hom te loof, soos hy gewoond was om te doen’ (Daniël 6:11 NLV). Dis ‘n roetine wat kragtig en effektief vir beide mans was – en dis een wat ook vir jou sal werk!
Sielskos: 2 Sam 7:18-11:27; Joh 2:1-11; Ps 110; Spr 23:6-9
2025-10-06
Psalm 90:12 NLV
‘n Vrou het een keer ‘n droom gehad waarin ‘n engel vir haar hierdie boodskap gegee het: ‘As ‘n beloning vir jou deugde, sal die bedrag van $1440 elke oggend in jou bankrekening inbetaal word. Hierdie bedrag kom met net een voorwaarde. Aan die einde van elke werksdag sal enige balans wat nie gebruik is nie, gekanselleer word. Dit sal nie na die volgende dag oorgedra word of rente verdien nie. Elke oggend sal ‘n nuwe $1440 aan jou gekrediteer word.’
Die droom was so helder dat sy toe sy wakker word, die Here gevra het om te verduidelik wat dit beteken. Hy het haar laat verstaan dat sy elke oggend 1440 minute – die aantal minute in ‘n vier-en-twintig-uur-dag – ontvang. Wat sy met hierdie deposito van tyd doen, is belangrik, want 1 440 minute per dag was al wat sy ooit sou ontvang! Jy het ‘n soortgelyke rekening. Aan die einde van elke dag behoort jy met vreugde en tevredenheid te kan terugkyk en sien dat daardie goue minute verstandig belê is.
Iemand het gesê: ‘Tyd is God se gawe aan jou, maar wat jy egter met jou tyd doen, is jou gawe aan God.’ Dis waar. Die Psalmdigter het geskryf: ‘Die getal van ons jare kan 70 wees, of as ons sterk is, 80. Maar selfs die beste daarvan is vol swaarkry en verdriet. Die lewe is gou verby, en ons bestaan nie meer nie… Leer ons ons dae só gebruik dat ons wysheid kan bekom… En mag die Here ons God sy goedheid aan ons bewys en die werk van ons hande bevestig…’ (verse 10, 12, 17 NLV).
Sielskos: Lev 23:33-44; Joh 7:1-40; Sag 14:16-21; Heb 11:8-16
2025-10-05
Eksodus 4:4 NLV
Moses het sy herderstok op die grond neergegooi en dit het in ‘n slang verander (sien vers 3). Hy was so bang dat hy wou weghardloop. Toe het God egter vir hom gesê: ‘Gryp dit aan sy stert!’
Een Bybelonderwyser wys die volgende uit: ‘Gedurende jou opleidingsreis deur die wildernis, sal jy waarskynlik dink dat God jou op die verkeerde pad lei; dat Hy goed sê wat nie sin maak nie. Sy bevele gaan nie gewoonlik met ‘n verduideliking gepaard nie. Wanneer jy nie kan agterkom wat Hy besig is om te doen nie, moet jy Hom vertrou. Nadat Moses die slang aan sy stert opgetel het, het dit weer ‘n herderstok geword. Dit het van ‘n eenvoudige herderstok in ‘n stok waarmee God vir Moses ‘n teken gegee het, verander (sien Eksodus 4:1-20; 17:9).
God het die slang in Moses se herderstok verwyder. Moses moes die een ding waarop hy kon staat maak – sy ou, bekende, beproefde herdersstok – prysgee. God mag jou van sekere dinge stroop sodat jy jou afhanklikheid aan Hom kan besef. Hierdie stroping gaan egter met krag gepaard. Daar is dinge waaraan jy wil vashou wat jy moet loslaat, sodat God die slang daarin kan verwyder.’
Waaraan hou jy vandag vas? ‘n Begeerte om ‘n onderwyser te wees?’n Musikale talent? ‘n Aanleg vir besigheid? Leierskapseienskappe? Neem jou gawe, wat dit ook al mag wees, en gooi dit voor God op die grond neer. Hy is die enigste een wat weet of daar ‘n slang daarbinne skuil. Hy kan die ‘vleeslike’ element verwyder, dit seën en vir jou ‘n instrument wat vir diens geskik is, teruggee.
Sielskos: Est 4:9-5:3; Heb 4:7-16
2025-10-04
1 Johannes 4:18 NLV
God het jou te alle tye onvoorwaardelik lief – maar jy moet sy liefde ontvang. Eers wanneer jy dit doen, kan jy God terug liefhê en sy liefde aan ander bewys. Met ander woorde, jy kan nie dit wat jy nie het, weggee nie! ‘…[God] het sy liefde mos in ons harte uitgestort deur sy Heilige Gees wat Hy aan ons gegee het’ (Romeine 5:5 NLV). Dit beteken dat wanneer jy jou lewe aan Christus wy, die Heilige Gees in jou hart kom bly en God se liefde saam met Hom bring.
Die vraag is: Wat doen jy met daardie liefde? Verwerp jy dit omdat jy dink dat jy nie goed genoeg is nie? Johannes sê: ‘Ware liefde het nie plek vir vrees nie; volwasse liefde dryf die vrees uit…’ (1 Johannes 4:18 NLV).
Een skrywer sê: “Ek het jare lank probeer om in ‘volmaakte liefde’ te wandel en het daagliks daarin misluk. Ek het gedink volmaakte liefde verwys daarna om ander mense perfek lief te hê. Toe het God egter vir my gewys dat die enigste ‘volmaakte liefde’ sy liefde vir my was – Hy is die enigste een wat perfek kan liefhê! Toe dit vir my duidelik begin word het, het ek begin bely: ‘Ek is nie lief vir alles wat ek doen nie, maar ek is lief vir myself soos ek is, want God het my so lief. Ek weet ek moet verander en ek wil verander. Trouens, ek glo dat God my daagliks verander. Ek sal egter intussen dit wat God aanvaar, nie verwerp nie. Ek sal myself aanvaar soos ek tans is, met die wete dat ek nie altyd so sal bly nie.'”
God het jou lief – glo dit en ontvang dit!
Sielskos: 2 Sam 3:22-7:17; Joh 1:43-51; Ps 23; Spr 23:4-5
2025-10-03
Galasiërs 5:25 AFR20
Die Bybel sê: ‘Aangesien ons deur die Gees leef, laat ons ook met die Gees in pas bly.’ Probleme ontstaan wanneer jy geestelike dinge met jou vleeslike gedagtes probeer verstaan. Paulus sê: ‘…die Gees deurvors alle dinge, ook God se diepste geheime (1 Korintiërs 2:10 NLV). Die Gees openbaar dit op verskillende maniere aan ons.
Die skrywer Jon Walker sê: “Om een met Jesus te word, beteken om geestelike onderskeidingsvermoë te ontwikkel en die soms oënskynlik onlogiese dinge wat van die Gees kom, te aanvaar. God praat met ons op verskeie maniere. Hier is drie maniere waarop ons bedag moet wees:
1) Stoptekens. Dit is rooi vlae wat jou waarsku om nie iewers heen te gaan nie. ‘n Hond wat ek eens besit het, het my gehelp om dit te verstaan. Hy was gewoond daaraan om aan ‘n leiband te wees, maar as ek hom na ‘n buurman se veld geneem het om sonder die leiband rond te hardloop, het ek eenvoudig nee gesê as hy op pad was na waar hy nie mag gaan nie. Die hond het niks verkeerd gedoen nie en my waarskuwing was nie ‘n teregwysing nie; dit was ‘n waarskuwing vir sy eie beskerming.
2) Aansporing. ‘n Stamp in die ribbe van die Gees af, kan jou op dreigende gevaar attent maak. Eendag het ‘n vriend van my ‘n groen verkeerslig genader toe hy sterk aangespoor voel om te rem. Hy het dit gedoen – net voor ‘n trok oor die rooi lig gejaag het! As dit nie vir sy onmiddellike gehoorsaamheid was nie, sou hy ‘n noodlottige ongeluk gemaak het.
(3) Stilmaak. Wanneer ons met ander gesels, waarsku God ons dikwels wanneer ons te naby aan ‘n sondige onderwerp, ‘n onregverdige opmerking of skinderpraatjies beweeg. Wanneer God jou stilmaak – moet jy ophou praat!”
Sielskos: 2 Sam 1:1-3:21; Joh 1:29-42; Ps 131; Spr 23:1-3
2025-10-02
Hebreërs 12:2 AFR83
‘n Sondagskoolonderwyser het die verhaal van hoe Jona ongehoorsaam aan God was en deur ‘n groot vis ingesluk is, aan haar klas vertel. Vir drie dae lank het Jona uit die dieptes van die oseaan uitgeroep en na drie dae en drie nagte het God die vis beveel om hom op die strand uit te spoeg. Aan die einde van die les het die onderwyser die kinders gevra wat hul geleer het en ‘n klein seuntjie het uitgeroep: ‘Dit wys jou net; you can’t keep a good man down!’
Jy verdrink nie deur in die water te val nie; jy verdrink deur in die water te bly. Dawid het gesê: ‘Die Here bepaal die rigting van die mens… Al sou so een struikel, hy sal nie val nie, want die Here hou sy hand vas’ (Psalm 37:23-24 NLV).
Wanneer jou drome en planne in die wiele gery word, bly gefokus en ‘…hardloop met volharding…’ (Hebreërs 12:1 NLV). Wanneer jy op iets fokus, bemagtig jy dit en gee dit momentum; dis hoekom Satan wil hê dat jy op dinge wat nie saak maak nie, moet konsentreer.
Jesus het verder as die kruis gekyk. Hy het op dit wat aan die ander kant van die kruis gelê het, gefokus. Die Bybel sê vir ons om ons oë op ‘…Jesus, die Begin en Voleinder van die geloof…’ te vestig. Onthou, God betaal nie weekliks nie; Hy betaal aan die einde. Jy sal jou beloning volgens hoe jy geëindig het, nie volgens hoe jy begin het nie, ontvang. Paulus sê: ‘Ons swaarkry op die oomblik is gering en tydelik, maar dit bewerk vir ons ‘n heerlikheid wat alles verreweg oortref en vir altyd vas sal staan’ (2 Korintiërs 4:17 NLV). Bly dus gefokus en hou aan beweeg!
Sielskos: Ef 4:17-6:24; Joh 1:14-28; Ps 29; Spr 22:26-29
