2019-04-04
1 Korintiërs 10:13 NLV
Sommige mense bly hulle hele lewe lank in hopelose situasies sonder om ooit die besluit te neem om God se krag te soek om daar deur te kom. Paulus sê: ‘Moenie julle leefstyl aanpas by die gedragspatrone van hierdie wêreld nie, maar laat God julle omvorm deurdat Hy julle denkpatrone vernuwe. Dan sal julle goed kan onderskei wat Hý wil hê dat julle moet doen, naamlik dit wat werklik goed en aanvaarbaar en volmaak is’ (Romeine 12:2 NLV). Wanneer jy jou gedagtes met God se Woord vernuwe, sal Hy vir jou sy wil wys en jou versterk om – vir eens en vir altyd – deur dit wat jy jare al deurmaak, te kom. Die skrywer John Mason sê: ‘Moenie jou huidige, tydelike situasie as jou toekomstige permanente situasie aanvaar nie. Besluit om met die lewe aan te beweeg en jou roeping te vervul. Paulus sê: ‘… ons leef deur te glo en nie deur te sien nie’ (2 Korintiërs 5:7 NLV). Ons word nie deur die ooglopende aangespoor nie, maar deur die werklike. As jy al vir jare sê: ‘Ek gaan deur hierdie situasie kom,’ staan op en verklaar: ‘Ek het genoeg gehad. Dis tyd om deur hierdie gemors te kom!’ Die Vyand wil hê dat jy glo dat jy nooit oorwinning sal behaal of jou huidige omstandighede sal oorkom nie. God se Woord sê egter: ‘…God is getrou. Hy sal keer dat die versoeking te sterk vir julle word. Midde-in die versoeking sal Hy vir ‘n uitweg sorg…’ (1 Korintiërs 10:13 NLV). Neem hierdie teksvers en staan daarop. Hy sal vir ‘n uitweg sorg.’ Jou omstandighede mag dalk nie dadelik verander nie, maar wat God betref, is jy reeds aan die ander kant daarvan.
Sielskos: Lev 15-17; Luk 21:8-11; Ps 25:8-15; Spr 10:1
2019-04-03
Romeine 1:16 ABA
Een Sondag het ‘n dame in die kerk aan die slaap geraak. Die pastoor het na die man langs haar gewys en gesê: ‘Maak asb daardie dame wakker.’ Die man het geantwoord: ‘Jammer pastoor. Jy het haar aan die slaap gepraat – jy kan haar wakker maak!’ Paulus sê vir ons: ‘…Die Goeie Boodskap is God se krag, dit red almal wat glo…’ Die Griekse woord vir ‘krag’ is dynamis, waarvan ons die woord dinamiet kry. Praat van impak! Die evangelie verander mense heeltemal. Chuck Swindoll sê: ‘Die evangelie is soos ‘n swaard wat op die klip van die Skrif geslyp is en in die vuur van realiteit, toepaslikheid en behoefte getemper is. Van al die reaksies wat ‘n persoon daarop kan hê, kan ek aan niks ergers as ‘n gaap, ‘n slaperige ‘wat daarvan,’ of ‘n verveelde ‘wie gee om,’ dink nie. Jesus se Woord het rou senuwees aangeraak. Hy het skynheiligheid en vooroordeel aangeval. Hy het mense waar hulle was, ontmoet, nie waar hulle behoort te wees nie. Woedende jong mans, blinde bedelaars, trotse politici, prostitute, onkundige vissermanne, naakte slagoffers van demone en ouers wat rou – Hy het by hulle almal aanklank gevind. Sy vyande het Hom nie verstaan nie, maar hulle kon Hom nie ignoreer nie. Hulle het Hom gehaat, maar hulle was nooit verveeld by Hom nie. Jy faal die Here wanneer jy die evangelie gebruik om mense te verveel! Die evangelie is nie ‘n vae godsdienstige konsep nie; dis ‘n opwindende verhouding met God wat in jou alledaagse lewe werk.’ Die mense rondom jou het dit ook nodig, deel dit dus met hulle.
Sielskos: Lev 13:38-14:57; Luk 21:1-7; Ps 25:1-7; Spr 9:17-18
2019-04-02
Josua 1:11 NLV
Wanneer God sê dat Hy iets vir jou ‘gegee’ het, beteken dit dat jou naam op die titelakte is. Wanneer Hy vir jou sê om dit ‘in besit te neem,’ beteken dit dat jy dalk daarvoor sal moet baklei. As jy dit nie doen nie, sal jy nie ontvang wat Hy jou belowe het nie. Op hierdie oomblik mag baie mense in jou ‘droom huis’ bly en in jou ‘droom beroep’ werk. Moet hulle nie kwalik neem nie, verbly jou! God kan dieselfde vir jou doen! As jy moeg is om oor die dinge te praat wat jy nie het nie, staan op en begin dit najaag. Wanneer jy dit egter kry, moet jy onthou dat dit nie gebeur het omdat jy so wys en wonderlik is nie, maar omdat God dit vir jou gegee het (sien Deuteronomium 8:18). Die Bybel sê dat Hy ‘…ons alles laat kry wat ons nodig het om naby aan Hom te lewe…’ (2 Petrus 1:3 NLV). Jy moet egter eers hierdie belofte innerlik aanneem, voordat jy dit uiterlik kan begin ervaar. Jou uitdaging kan byvoorbeeld wees om in jou gees te glo dat jy genees is, voordat jy dit fisies begin ervaar. Wanneer ons byvoorbeeld God vir ‘n eikeboom vra, gee Hy vir ons ‘n akker. Op daardie oomblik mag ons dink dat God nie ons gebed gehoor en beantwoord het nie. Nee, die eikeboom is in die akker; dis net ‘n kwessie van tyd voordat dit wat binne is na buite uitbars. Die sade van dit wat God aan jou beloof het, is reeds binne jou. Gee hulle water, versorg hulle en laat niemand toe om hulle deur ongeloof te ontwortel nie. Begin God met ander woorde dank vir wat Hy in jou lewe gaan doen.
Sielskos: Lev 11:1-13:37; Luk 20:41-47; Ps 32; Spr 9:10-16
2019-04-01
Romeine 8:28 NLV
Paulus begin hierdie vers deur te sê: ‘En ons weet…’ Daar is soveel dinge in die lewe wat ons nie weet nie. Ons weet nie wat die ekonomie gaan doen of hoe ons kinders gaan uitdraai nie. Ons weet nie eers ‘…wat en hoe ons moet bid nie…’ (vers 26 NLV). Ons kan egter die volgende vier dinge weet: 1) God werk. Selfs al kan jy Hom nie sien nie, is Hy agter die skerms besig. Hy werk onophoudelik en sonder om moeg te word. 2) God werk ten goede. Nie vir ons gemak, plesier of vermaak nie, maar sodat dinge vir ons ten goede sal uitwerk. Hy is immers wonderbaarlik goed, so hoekom sal jy minder van Hom verwag? 3) Hy werk ten goede vir die wat Hom liefhet. Wat ‘n voordeel deur ‘n liefdevolle God! Maak sy verhaal jou verhaal en jou verhaal sal ‘n gelukkige einde hê. 4) God werk met alles. God werk nie net met ‘n paar dinge, of die goeie dinge, of die beste dinge, of die maklike dinge nie. Hy werk met alles. Hy maak ook nie die plan op soos Hy vorder nie. Die Bybel sê: ‘…Ons was vooraf daartoe bestem! Dit was God se doel! Hy het alles laat uitwerk soos Hy dit beplan en wou gehad het’ (Efesiërs 1:11 NLV). Die beste deel is dat God se plan jou insluit! Hou dus op knies, stres en slaap verloor. Gee dit aan God oor en glo dat Hy alles ten goede vir jou en vir sy heerlikheid sal laat uitwerk.
Sielskos: Lev 8-10; Luk 20:34-40; Ps 72:12-20; Spr 9:7-9
2019-03-31
Spreuke 23:24-25 NLV
Jou doelwit as ouer moenie wees om perfekte kinders groot te maak nie, maar om aan hulle die wysheid te gee wat nodig is om suksesvol te kan leef. Dit kan twee uitdagings veroorsaak: ouerlike verwaarlosing of ouerlike obsessie. Die tweede een kom voor by ouers wat obsessief oor hulle kinders is en geen tyd vir ontspanning, romanse of rus laat nie. Hierdie mense sal nie eers Moeder Teresa as ‘n kinderoppasser oorweeg nie! Die beweegredes van obsessiewe ouers mag dalk goed wees, maar hulle beheptheid kan tot drie ernstige probleme lei: 1) Hulle maak hulle kinders die spil waarom alles draai, wat nie in die kinders se beste belang is nie. As jy jou kinders die middelpunt van die heelal maak, wag ‘n groot skok op hulle wanneer hulle die regte wêreld betree. 2) Emosionele en fisiese moegheid lei tot ‘ouerlike uitbranding.’ Net soos ‘n battery nie aanhoudend gedreineer kan word nie, het jy tyd nodig om fisies, emosioneel en geestelik te herlaai. Wanneer jy dit nie doen nie, voel almal om jou die negatiewe effek daarvan. 3) ‘Superouerskap’ kan vernietigend in ‘n huwelik wees, veral wanneer die ma die een is wat daartoe neig. ‘n Pa kan sy kinders begin verwyt omdat hulle sy vrou van hom af wegneem, of die vrou mag dalk dink dat haar man selfsugtig is omdat hy nie so toegewyd soos sy aan hulle kinders is nie. In beide gevalle word ‘n wig tussen hulle ingedryf, wat die familie uiteindelik kan vernietig. Matigheid of balans, is die sleutel tot ‘n gesonde en gelukkige familielewe.
Sielskos: 1 Kor 9:24-27; Num 6:1-8; Spr 25:28
2019-03-30
Psalm 118:6 NLV
Jy sal altyd vrees in een of ander vorm moet hanteer. Jou vrese sal ook verskil in jou verskillende lewenseisoene. Sodra jy dit aanvaar, kan jy vooruitgang maak. Julius Ceasar het byvoorbeeld die wêreld oorwin, maar hy was bang vir donderweer. Petrus die Grote van Rusland, het soos ‘n kind gehuil wanneer hy brûe moes oorsteek. Die gevierde Britse skrywer, dr Samuel Johnson, moes met sy linkervoet ‘n kamer binnegaan. As hy per ongeluk sy regtervoet gebruik het, het hy uitgegaan en weer met sy linkervoet binne gekom. (Praat van jou beste voetjie voorsit!). As jy toelaat dat vrees jou beheer, sal vrees jou daarvan weerhou om jou lewe ten volle uit te leef. Vrees teel onaktiwiteit, onaktiwiteit teel gebrek aan ervaring, gebrek aan ervaring teel onkunde en onkunde teel vrees. As jy in hierdie siklus vasgevang is, is hier ‘n paar Skrifgedeeltes wat jou kan help: 1) ‘U bewaar elkeen wat op U vertrou in vrede, die mense wie se gedagtes op U gerig is’ (Jesaja 26:3 NLV). 2) ‘Ek laat vir julle my vrede na; my vrede deel Ek met julle. Ek gee nie soos die wêreld gee nie. Julle moet regtig nie ontsteld of beangs word nie’ (Johannes 14:27 NLV). 3) ‘As die Here gelukkig is met die manier waarop iemand lewe, sal Hy selfs sy vyande in vrede met hom laat lewe’ (Spreuke 16:7 NLV). 4) ‘…in God is my vertroue; ek sal nie vrees nie. Wat kan mense aan my doen?’ (Psalm 56:5 NLV). 5) ‘Want God het ons nie ‘n gees van skugterheid gegee nie, maar van krag, liefde en selfbeheersing’ (2 Timoteus 1:7 NLV). Verpersoonlik hierdie Skrifgedeeltes in gebed, steun op hulle en moenie ‘n sentimeter aan vrees toegee nie.
Sielskos: Lev 5-7; Luk 20:27-33; Ps 72:1-11; Spr 9:1-6
