2025-12-29
Romeine 8:37 NLV
Jy sal in sommige van die wêreld se grootste suksesverhale hoofstukke van mislukking en ontmoediging vind. Dr Seuss se eerste kinderboek is deur sewe-en-twintig verskillende uitgewers afgekeur. Die agt-en-twintigste uitgewer het egter seshonderd miljoen kopieë van die boek verkoop en dr Seuss se volharding het gehelp om miljoene kinders te leer lees. Tydens hul eerste jaar het die Coca-Cola maatskappy net nege koeldranke per dag verkoop. Hulle het egter volhard en is vandag die wêreld se grootste verkoper van koeldranke.
Henry Ford het twee keer in sy eerste drie jaar in die motorindustrie bankrot gespeel. Hy het egter volhard en vandag is Ford die tweede grootste motorhandelaar in Amerika en die vyfde grootste in die wêreld. In 1905 het die Universiteit van Bern in Switzerland ‘n proefskrif van ‘n student, genaamd Albert Einstein, verwerp en dit as ‘irrelevant en vol giere’ beskryf. Was hy teleurgesteld? Natuurlik – sou jy nie ook gewees het nie? Het hy tou opgegooi? Nee, hy het aanhou skryf.
Oorweeg die volgende: As verloste kind van God het jy ‘n groot voordeel – ‘…omdat God aan [jou] kant is…’ (Psalm 56:10 NLV). Dit verander die vergelyking en kantel die skaal in jou guns. Paulus skryf: ‘Kan enigiets ons ooit van Christus se liefde skei? Sal dinge soos lyding of benoudheid of vervolging, honger of koue, of gevaar of doodsdreiging dit regkry?… Tog is ons ten spyte van al hierdie dinge besig om ‘n superoorwinning te behaal – oorwinnaars deur Christus wat sy liefde so duidelik aan ons bewys het’ (Romeine 8:35, 37 NLV).
Met God aan jou kant is dit altyd te vroeg om tou op te gooi, maak nie saak waarvoor jy te staan kom nie. Byt vas, want sy genade en krag is altyd op pad.
Sielskos: 1 Tess 1-3; Matt 3:7-10; Ps 75; Spr 31:30
2025-12-28
1 Tessalonisense 5:24 NLV
Wanneer dit by jou lewensroeping kom, is hier nog twee mites wat jou kan saboteer:
1) Wanneer jy die verkeerde keuse maak, kan jy op een of ander manier God se wil dwarsboom. Jy hoef nie hieroor bekommerd te wees nie. Die Bybel sê vir ons: ‘Hy wat julle roep, is getrou. Hy sál dit doen!’ Dis altyd prysenswaardig om die beste besluit wat jy kan, te probeer neem. Die feit bly egter staan dat jy op ‘n punt gaan moet kom waar jy ‘n keuse gaan moet maak. Geen keuse wat jy maak is buite God se beheer nie. Selfs al weet jy nie waarheen die pad wat jy gekies het gaan lei nie, kan jy in die versekering rus dat: ‘…God alles ten goede laat saamwerk vir hulle wat Hom liefhet, hulle wat geroep is volgens sy doel vir hulle lewe’ (Romeine 8:28 NLV).
2) Jou roeping staan vas. Om jou roeping te vind is nie iets wat jy noodwendig een of twee keer in jou lewe doen nie. Dis nie iets wat jy van ‘n lysie kan afmerk en aanbeweeg nie. Die lewe van ‘n Christen is ‘n deurlopende proses waarin jy jou roeping ontdek. Net omdat God jou op ‘n spesifieke tyd vir ‘n spesifieke doel geroep het, beteken nie dat sy planne vir jou nie sal verander nie. Wie weet wat die volgende fase van jou lewe gaan inhou? Elkeen se roeping lyk uniek en elke hoofstuk van jou lewe sal ‘n nuwe proses van onderskeiding meebring. Die belangrikste is om te onthou dat God in beheer is, dat Hy jou liefhet en dat dit sy wil is om jou altyd nader aan Hom te bring.
Soul food: Heb 11:1-6; Matt 21:18-22; Matt 8:5-13; Mark 6:1-6
2025-12-27
Romeine 11:29 NLV
Indien jy jou roeping bevraagteken, identifiseer die skrywer Diane Paddison twee denkpatrone wat jou gedagtes mag saboteer.
1) Dit gaan alles oor jou. Jou roeping gaan nie oor selfvervulling nie; dit gaan daaroor om jou aan God se wil te onderwerp. Baie mense ervaar bevrediging deur hulle God-gegewe gawes uit te oefen. Dis egter ‘n resultaat van God se wil, nie die doelwit nie. Om God se wil te onderskei, moet jy deur gebed en Bybelstudie jou verhouding met Hom ontwikkel. Jy moet ook verhoudings met jou eweknieë en mentors ontwikkel wat vir jou sal bid en die waarheid in jou lewe sal spreek.
2) As dit ongemaklik is, is dit nie jou roeping nie. Om te weet wat jy veronderstel is om te doen, is dikwels net die begin van ‘n lang, veeleisende reis. Moses se roeping het nie vir hom baie wonderlik gelyk nie. Wat was sy reaksie daarop? ‘Wie is ek dat ek moet gaan?’ Hy het God bevraagteken, maar God het geantwoord: ‘Ek sal by jou wees.’ Tog het Moses aanhou vra: ‘Maar wat as hulle my nie glo nie?’ Selfs toe God hom van wonderbaarlike tekens voorsien het, was dit nie goed genoeg nie. Hy het weer gestry: ‘Maar ek kan nie goed praat nie.’
Moses was duidelik ongemaklik met die taak waarvoor God hom geroep het. Moses het alles probeer om God te oortuig dat hy die verkeerde man vir die werk was. Toe dit nie werk nie, het hy God gevra om iemand anders te stuur! (sien Eksodus 4). Kan jy jouself met Moses vereenselwig? Indien wel, hou die volgende in gedagte: Ongemak beteken nie outomaties dat jy op die verkeerde pad is nie. Die waarheid is dat ongemak gewoonlik groei vooruitgaan.
Sielskos: 1 Kor 15-16; Matt 3:1-6; Ps 116; Spr 31:29
2025-12-26
Jeremia 33:3 NLV
Dr Ernest Sachs wou ‘n verskil in die lewe maak, en hy het. Jare gelede was die meeste breingewasse noodlottig. Sachs het ‘n chirurg hoor voorspel dat daar eendag ‘n uitvinding sou wees wat al daardie lewens sou kon red en hy het besluit dat dit sy lewenstaak sou wees. Destyds was die voorste kenner van die brein se anatomie sir Victor Horsley. Sachs het toestemming gekry om onder hom te studeer, maar het gevoel dat hy vir die ervaring moes voorberei deur ses maande lank onder van die bekwaamste dokters in Duitsland te studeer.
Daarna is hy na Engeland toe, waar hy twee jaar lank dr. Horsley in lang en ingewikkelde eksperimente op dosyne ape bygestaan het. Toe Sachs na Amerika terugkeer, is hy deur die mediese gemeenskap gespot omdat hy versoek het om uitsluitlik breingewasse te behandel. Jare lank het hy struikelblokke en ontmoediging beveg, gedryf deur ‘n passie om in sy soeke te slaag. Hy het dit reggekry! Vandag, grootliks danksy dr. Sachs, kan die meerderheid breingewasse genees word. Sy boek, Diagnosis and Treatment of Brain Tumours, word as die voorste gesag oor die onderwerp beskou.
Net omdat iets tans nie gedoen word nie, beteken dit nie dat dit glad nie gedoen kan word nie. Miskien is jy die een wat dit gaan doen! Dink net aan die voordeel wat jy as verloste kind van God het: ‘Vra My, en Ek sal vir jou ‘n antwoord gee. Ek sal jou van ongelooflike dinge vertel. Dit is nou nog vir jou ‘n geheim, en jy weet niks daarvan nie.’ ‘Dit is tog die Here wat wysheid gee. Sy woorde gee kennis en insig’ (Spreuke 2:6 NLV). Gebruik jou geloof en glo God vir groot dinge.
Sielskos: 1 Kor 12-14; Matt 2:13-23; Ps 139:13-24; Spr 31:28
2025-12-25
Lukas 2:12 NLV
Met sy aankoms by die kerk een Kersoggend het ‘n pastoor stilgehou om die Kersfees geboortetoneel te bewonder. Die figure, liefdevol aanmekaargesit, was op ‘n klein verhoog uitgestal… herders… wyse manne… diere… en in die middel, die Heilige gesin. Toe merk hy op dat die krip leeg was; die baba Jesus was vermis! Nadat hy die kerk deursoek het, het hy die mede-pastoor en die ouderlinge gebel, maar hulle het niks geweet nie. Die baba was duidelik gesteel.Hy het die diefstal plegtig by sy gemeente aangemeld, teleurgesteld om te dink dat een van hulle dalk betrokke was. “As die baba teen die einde van die dag terugbesorg word, sal daar geen vrae gevra word nie,” het hy gesê.
Maar die krip het die hele dag leeg gebly, en daardie middag, swaarmoedig en mismoedig, het die pastoor ‘n entjie deur die winterstrate gestap. Voor hom het hy die sesjarige Tommy opgemerk, toegedraai teen die koue, waar hy ‘n helderrooi wa rondsleep. Bewus van die feit dat Tommy se familie finansieel gesukkel het, was die pastoor geraak deur hul opoffering en het hy vinnig tot by Tommy gestap om hom ‘n geseënde Kersfees toe te wens en sy blink nuwe wa te kon bewonder. Toe hy nader kom, het hy egter opgemerk dat die wa nie leeg was nie – binne, toegedraai met ‘n kombers teen die koue, het die baba Jesus gelê!
Die pastoor het langs Tommy gehurk. Hy was maar net ‘n klein seuntjie, maar oud genoeg om te weet dat steel verkeerd was. Terwyl die pastoor dit so aan Tommy verduidelik het, het die kind se oë vol trane geword. “Maar pastoor,” het die seuntjie geantwoord, “ek het nie vir Jesus gesteel nie. Dit was glad nie so nie. Ek vra Hom al baie lank vir ‘n nuwe rooi waentjie vir Kersfees – en ek het belowe as ek een kry, sal ek Hom op die eerste rit neem.”
Sielskos: Jes 9:1-7; Matt 2:1-12; Miga 5:2-5a
2025-12-24
Johannes 1:14 NLV
Hier is ‘n wonderlike verhaal wat in die Presbiteriaanse Kerk in New York afgespeel het. Dit gaan oor ‘n alkoholis, genaamd Jim, wat op die herstelpad was. Dit was sy eerste Kersfees alleen en toe ‘n jong gesin langs hom in die kerkbank gaan sit, kon hy dit nie hanteer nie. Op pad by die kerk uit, het hy pastoor Thomas Tedwell ontmoet, wat gevra het waarheen hy gaan. ‘Uit vir ‘n drankie,’ het Jim geantwoord. Tedwell het gesê: ‘Jy kan nie dit doen nie. Waar is jou AA borg?’ ‘Op vakansie,’ het Jim geantwoord. ‘Ek het vanaand hierheen gekom op soek na ‘n woord van hoop en het langs daardie gelukkige gesin beland. As my lewe nie so ‘n gemors was nie, sou ek hier saam met my familie gesit het.’
Terwyl die pastoor na die kansel gestap het, het hy gebid: ‘God, gee my ‘n woord van hoop vir Jim.’ Nadat hy die gemeente verwelkom het, het hy gevra: ‘Ek het ‘n ongewone versoek. As iemand hier ‘n vriend van Bill W. is, ontmoet my asseblief in die konsistorie. (Bill Wilson was die medestigter van Alkoholiste Anoniem). Onmiddellik het mense begin reageer en Jim het stadig omgedraai. Soos dr Tedwell opgemerk het: ‘Terwyl ek besig was om te preek, het die Woord voor my oë vlees geword!’
Hierdie Kersfees ly sommige van die mense rondom jou; hulle het hoop verloor. Laat die Woord dus vlees word. Hef diegene wat geval het op, bemoedig die wanhopiges en bedien die siekes, die eensames en die vergetenes. Jesus het gesê: ‘…As julle iets hiervan vir een van my broers of susters gedoen het… het julle dit vir Mý gedoen’ (Matteus 25:40 NLV). In plaas daarvan om jouself hierdie jaar eenkant te hou, reik na iemand uit. Probeer dit – dit sal jou beste Kersfees ooit wees!
Sielskos: 1 Kor 10-11; Matt 1:18-25; Ps 139:1-12; Spr 31:25-27
