2020-04-21
Lukas 10:42 NLV
Daar is twee vyande wat jou geestelike lewe kan bedreig: 1) Verveling. Die sendeling en opvoeder, Frank Laubach, het gesê: ‘As jy moeg is vir ‘n vervelige vorm van toewyding, is God heel waarskynlik net so moeg daarvoor soos jy.’ Om saam met God die pad te stap is die lonendste lewe. ‘…in u teenwoordigheid is vreugde, en aan u regterhand is daar blydskap vir altyd’ (Psalm 16:11 NLV). 2) Besig wees. Jesus het vir Marta gesê: ‘…jy kwel jou tog oor so baie dinge! Daar is regtig net een ding wat die moeite werd is om oor besorg te wees. Maria het dit ontdek…’ (Lukas 10:41-42 NLV). Wat was Maria besig om te doen? Sy het by sy voete gesit en na Hom geluister! Marta het Jesus liefgehad en kon nie genoeg vir Hom doen nie. Sy was egter so besig om Hom te dien, dat sy nie geweet het hoe om te ontspan en tyd saam met Hom te geniet nie. Miskien dink jy, soos Marta, dat as jy nie die werk self doen nie, dit nie reg gedoen sal word nie. Jy mag dalk reg wees. God sal jou egter nooit vra om iets te doen wat sy plek in jou lewe inneem nie. Hy wil jou top prioriteit wees. Dawid het gesê: ‘Een ding vra ek van die Here, en dit sal ek bly soek; om in die huis van die Here te bly al die dae van my lewe, om my te verbly in sy goedheid, en in sy tempel daaroor na te dink’ (Psalm 27:4 NLV). Kan jy jou indink om ‘een ding’ te alle tye aan die toppunt van jou agenda te hê: die behoefte om tyd saam met God te spandeer? Dink net hoe dit jou lewe kan omkeer.
Sielskos: Fil 1-4; Mark 2:23-3:6; Ps 103:13-22; Spr 10:14
2020-04-20
Filippense 4:13 NLV
Die Bybel sê: ‘Moenie te veel praat oor wat môre kan gebeur nie. Jy weet glad nie wat môre gaan oplewer nie’ (Spreuke 27:1 NLV). Die waarheid is dat jy elke oggend wanneer jy wakker word, geen idee het wat daardie dag met jou gaan gebeur nie. Jy hoop vir ‘n dag sonder moeilikhede waar al jou verwagtinge en wense vervul sal word – maar jy weet uit ervaring dat dit nie altyd die geval is nie. Ons lewe in ‘n regte wêreld met regte probleme. Jou vyand, die Duiwel, bestaan regtig en hy werk op elke moontlike manier om ontmoediging, vrees en mislukking mee te bring. Met hierdie kennis het die Psalmdigter geskryf: “As die Here jou toevlug is… sal geen kwaad jou tref, en geen ramp naby jou tent kom nie. Want Hy sal sy engele beveel om jou te beskerm oral waar jy gaan… ‘Omdat hy My liefhet, sal Ek hom verlos; omdat hy my Naam ken, sal Ek hom beskerm. Hy sal roep, en Ek sal antwoord; in nood sal Ek by hom wees. Ek sal hom red en in eer herstel. Ek sal hom ‘n lang lewe gee, en hy sal my verlossing sien'” (Psalm 91:9-16 NLV). Maak nie saak wat oor jou pad kom nie, jy moet vertrou dat wanneer dit arriveer, God jou die genade sal gee om dit te kan hanteer. Onthou, Satan is lief daarvoor om diegene wat in lyn vir God se seën is, aan te val. Dis hoekom Paulus geskryf het: ‘Ek kan onder alle omstandighede regkom deur Hom wat my krag gee.’ Innerlike krag is beter as uiterlike krag. Solank as wat jy innerlik sterk bly, kan jy enigiets wat uiterlik teen jou is hanteer en aanhou vorentoe beweeg. Wees dus vandag gereed.
Sielskos: Lev 26-27; Mark 2:13-22; Ps 103:1-12; Spr 10:13
2020-04-19
Spreuke 11:14 NLV
Om sukses in die lewe te behaal, het jy wyse en bevoegde mense, mense wat hulself reeds bewys het en wat jou kan help, rondom jou nodig. Wees egter gewaarsku: Die beste mense met die meeste kennis sal jou uitdaag, jou strek en jou sienswyse konfronteer! Dit beteken nie dat jy hulle moet vermy nie. Dis juis hoekom jy hulle nodig het! Jy moet oor jou vrees vir mense wat slimmer, talentvoller en meer ervare as jy is, kom en eerder van hulle leer. Ons word baie keer daarvan weerhou om bevoegde mense te nader, omdat ons onkundig voel wanneer ons rondom hulle is. Dis in orde om onkundig te wees – maar dis nie in orde om onkundig te bly nie! Moenie aanhou terughardloop na die bekende, middelmatige interaksies met mense wat jou nie uitdaag om te groei nie. Hoe meer jy nuwe areas in die lewe betree, hoe meer het jy ‘baie raadgewers’ nodig wat jou sal druk om meer te word as wat jy is, selfs al is dit aan die begin ongemaklik. Gaan waar hulle is, luister na wat hulle sê en evalueer hulle opinies. As jy jouself geestelik, emosioneel en finansieel wil opbou, moet jy buite jou gemaksone beweeg. As jy dit nie doen nie, sal jy nie die inligting hê om verby die bekende te beweeg en jou toekomsdrome te behaal nie. Net diegene wat bereid is om uitgedaag te word, bereik hulle drome. Onthou, die mense wat jy nodig het, is gewoonlik die besigste mense. Hulle sal oor die algemeen nie na jou uitreik nie, dus moet jy na hulle uitreik. Wees egter voorbereid; sommige van hulle sal jou aanbod van die hand wys, terwyl ander jou honger na wysheid en kennis sal herken, daarop sal reageer en jou sal help om sukses te behaal.
Sielskos: Matt 5:7; Matt 18:21-35; Ps 103:8-18; Klaagl 3:22-24
2020-04-18
Romeine 10:8 NLV
As jy nie versigtig is nie, is dit maklik om woorde van twyfel te spreek wat dit wat God in sy Woord sê, weerspreek. Paulus skryf: ‘Die boodskap is hier by jou, op jou lippe en in jou hart. Want as jy met jou mond bely dat Jesus die Here is en met jou hart glo dat God Hom uit die dood opgewek het, sal jy gered word’ (verse 8-9 NLV). Spreek dus God se Woord oor jou situasie uit en kyk hoe Hy namens jou aan die werk spring. Jy moet in lyn met God se Woord kom en leer om te sê wat Hy sê, maak nie saak hoe sleg dinge op die oomblik lyk nie. As dit wat jy sê nie is wat God sê nie, is dit teenproduktief. As dit egter is wat God sê, word jou woorde kragtige wapens. Die Bybel sê: ‘Hoe kragtig is opregte woorde…’ (Job 6:25 AFR53). Die woord ‘kragtig’ kom van die Hebreeuse woord ‘marats’, wat beteken ‘om te druk.’ Net soos die koning se seëlring sy seël van outoriteit op ‘n dokument afdruk, seël jou belydenis van geloof die saak voor God. Jesus het gesê: ‘Dit verseker Ek julle, julle kan vir hierdie berg sê: ‘Mag God jou oplig en in die see gooi,’ en dit sal so gebeur. Al wat nodig is, is dat julle regtig sal glo en nie in julle harte twyfel nie. Daarom verklaar Ek vir julle, alles wat julle in die gebed vra, sal julle ontvang, mits julle God daarmee vertrou’ (Markus 11:23-24 NLV). Moenie net met God oor jou berg praat nie, praat met jou berg deur God se Woord te gebruik! Wanneer jy God se Woord jou woord maak, sal jou berg begin beweeg.
Sielskos: Lev 23:26-25:55; Mark 2:1-12; Ps 130; Spr 10:12
2020-04-17
1 Johannes 2:1 NLV
Die maan en die sterre wat jy op ‘n helder nag kan sien, is maar druppels in die grootse see van die heelal. Ons son is maar een van meer as 100 biljoen sterre waaruit die Melkweg bestaan. Daar mag dalk soveel as 100 biljoen ander sterrestelsels wees – biljoene wat moontlik uit honderde miljoene planete soos ons s’n bestaan. Die Hubble-ruimteteleskoop kan sterrestelsels so ver as twaalf biljoen ligjare weg optel – dis twaalf biljoen maal ses triljoen myle! Dit alles is geskep omdat God dit so beveel het (sien Genesis 1). Wat nog wonderbaarliker as dit is, is dat die Een wat dit alles geskep het, lief is vir jou en oor elke detail van jou lewe omgee. Wanneer jy swak is, is Hy sterk. Wanneer jy droogmaak, vergewe Hy jou. Die Bybel sê: ‘…As iemand egter sonde doen, ons het ‘n Helper by die Vader wat ons saak stel, Jesus Christus, die regverdige. Hy is die versoeningsoffer vir ons sondes…’ (verse 1-2 NLV). God se genade is wonderbaarlik en jy hoef nie iets te doen om dit te verdien nie. Omdat God jou Vader is, kan jy Hom enige tyd kontak en welkom voel. Jy is aan die Een gekonnekteer wat ‘…ten volle met ons in ons swakhede saamvoel, want Hy moes presies dieselfde versoekings as ons trotseer – behalwe dat Hy nie voor die sonde geswig het nie. Kom ons gaan dan met volle vrymoedigheid na die troon van ons genadige God. Hy sal aan ons sy deernis en onverdiende goedheid bewys sodat ons op die regte tyd gehelp sal word’ (Hebreërs 4:15-16 NLV). Jy is aan oneindige genade gekonnekteer – hoe wonderlik is dit nie?
Sielskos: Lev 21:1-23:25; Mark 1:35-45; Ps 127; Spr 10:11
2020-04-16
Spreuke 15:14 NLV
Daar word gesê dat ons meer as 80 persent van dit wat ons op skool en universiteit leer, vergeet. Hoekom dan moeite doen? Is opvoeding dan regtig die belegging werd? Dit is. Daar is baie geldige redes om te leer, selfs al vergeet ons baie daarvan. Hier is vyf van die belangrikste redes: 1) Die belangrikste funksie van die leerproses is die selfdissipline en beheer wat dit kweek. Goeie studente leer om aanwysings te volg, opdragte uit te voer en hulle intellektuele kapasiteit tot ‘n konstruktiewe resultaat aan te wend. Dis vaardighede wat jy nodig het om sukses in die lewe te behaal. 2) Selfs al kan jy nie die feite en konsepte oproep nie, weet jy dat dit bestaan en waar om dit te kry. Jy kan dus die informasie vind wanneer jy dit later nodig kry. 3) Ou leringe maak nuwe leerprosesse makliker. Elke intellektuele oefening gee jou meer leidrade wat toekomstige idees en konsepte aan mekaar skakel en jy word deur die leerproses verander. 4) Jou brein is soos die programmering op jou rekenaar. Jy vergeet nie regtig dit wat buite die bereik van jou geheue is nie. Die inligting word steeds in jou brein gestoor en sal weer na vore tree wanneer jou brein behoorlik gestimuleer word. 5) Jy word deur die invloed van die mense wat jou leer, gevorm. Die Bybel sê: “‘n Gelowige smag altyd na nog meer kennis en insig…” (DB). Miskien wens jy dat daar ‘n makliker manier was om die menslike gedagtes te vorm, eerder as die stadige, pynlike ervaring van onderwys. Totdat daar egter ‘n ‘kennispil’ ontwerp word, sal die outydse benadering die ding moet doen.
Sielskos: Lev 18-20; Mark 1:21-34; Ps 43; Spr 10:10
