2020-04-27
Psalm 35:13 NLV
Misplaaste gebede. Sommige mense maak die gebed voor ete ‘n geleentheid om hulle frustrasies in die publiek te lug. Ander mense bons hulle gebede van God af in die hoop dat dit die persoon oorkant die tafel sal tref – die een wat hulle vir Christus probeer wen. Moenie dit doen nie. Jesus het gesê: ‘Wanneer julle bid, dan moet julle nie soos die skynheilige mense bid nie… Hulle doen dit sodat die mense hulle kan sien…’ (Matteus 6:5 ABA). Veroordelende gebede. In een kerk het ‘n kinderlose egpaar vir ‘n baba gebid. Die gebedsgroep het sommer besluit dat die man nie ‘goddelik’ genoeg was om ‘n pa te wees nie, dus het hulle gebid dat God hom moet verander. As God net aan perfekte ouers kinders gegee het, sou die mensdom uitgesterf het! Die Bybel sê: ‘…Ons vra dit nie omdat ons regverdig is nie, maar ons smeek U omdat U barmhartig is’ (Daniël 9:18 NLV). Kworum-gebaseerde gebede. Jy dink daar is ‘n beter kans dat jou gebede beantwoord word wanneer jy ‘n klomp mense betrek, soos om ‘n kworum in ‘n vergadering te hê. Die geloof waarmee jy bid, nie die aantal mense nie, is egter wat vir God saak maak. Jesus het gesê: ‘…Al wat nodig is, is dat julle regtig sal glo en nie in julle harte twyfel nie’ (Markus 11:23 NLV). Wanneer jy egter voor ‘n situasie te staan kom wat te groot is om alleen te hanteer, is dit wys om na iemand wat God waarlik ken en wat in ooreenstemming met jou kan bid, uit te reik. ‘…As twee van julle hier op aarde sou saamstem oor enigiets wat julle van God behoort te vra, sal my hemelse Vader dit vir julle doen’ (Matteus 18:19 NLV). Het jy gebedsvennote na wie jy kan uitreik? Is jy ‘n gebedsvennoot vir iemand anders?
Sielskos: Dan 11-12; Mark 4:26-41; Ps 144:9-15; Spr 10:22-23
2020-04-26
Markus 11:25 NLV
Wanneer iemand ons seermaak, is ons natuurlike reaksie om hulle óf terug seer te maak, óf om te hoop dat hulle sal ly vir dit wat hulle ons aangedoen het. As verloste kinders van God is dit egter die verkeerde reaksie. Dis dan wanneer ons besef dat vergifnis nie maklik of natuurlik kom nie; dit verg bonatuurlike genade van ons kant af. Waar kry ons dit? Deur gebed! Jesus het gesê: ‘Maar wanneer julle besig is om te bid, vergewe eers enigeen teenoor wie julle ‘n grief het. Dan sal julle hemelse Vader ook julle oortredings vergewe.’ Wanneer jy God se genade teenoor jou onthou, het jy geen keuse as om dieselfde genade aan die persoon wat jou seergemaak het, te bewys nie. Iemand het een keer gesê: ‘Vergifnis is ‘n besluit om ‘n gevangene vry te laat en dan agter te kom dat die gevangene jy is.’ As jy dus die begeerte het om iemand te vergewe, raak opgewonde; die Heilige Gees het alreeds die helfte van die werk gedoen. Om die ander helfte te doen, moet jy nederig word en bid: ‘Vader, ek staan elke begeerte wat ek het om wraak te neem, teë. U het die situasie gesien voor dit gebeur het en in u oneindige wysheid het U toegelaat dat dit gebeur. U Woord sê dat U ‘…alles ten goede laat saamwerk vir hulle wat [U] liefhet…’ (Romeine 8:28 NLV), dus, met die hulp van die Heilige Gees, vergewe ek hulle van hierdie oomblik af vorentoe. Ek sal nie oor die situasie tob nie, maar eerder u Woord daaroor spreek.’ Dit word ‘n ‘gebed van bevryding’ genoem. Jy bevry nie net jou oortreder nie; jy bevry en herposisioneer ook jouself om in God se seën te stap. Dis hoekom jy hulle moet vergewe!
Sielskos: Matt 5:8; Ps 24:3-6; 2 Pet 3:3-14; Ps 51:10
2020-04-25
Efesiërs 6:7 NLV
As jy dink dis moeilik om met jou baas oor die weg te kom, dink net hoe moeilik was dit om vir Dawid se baas, koning Saul, te werk. Hoe meer Dawid hom probeer help het, hoe meer het Saul hom probeer doodmaak. Wat het Dawid dus gedoen? Elke keer as sy baas ‘n jaloerse woedebui gehad het en spiese na hom toe gegooi het, het Dawid gekoes en aangehou om hom te dien. Hoekom? 1) Want Dawid het geweet dat God hom geroep het om koning te wees en die beste plek om touwys daarvoor te raak, in Saul se paleis was. Die waarheid is dat jy soms meer uit foute en mislukkings as die prestasies van sukses, leer. Dawid het dus sy kop laat sak en aangehou leer en groei. 2) Dawid het geweet dat God vir Saul in sy posisie as koning geplaas het en dus was dit God, nie Dawid nie, se werk om hom uit sy posisie te verwyder. Was dit moeilik om dit te doen? Ja. Dawid het egter verstaan dat die manier wat jy mense hanteer wanneer hulle in moeilikheid is, die manier wat God jou hanteer wanneer jy in die moeilikheid is, bepaal. Dawid het op die ou einde telkens God se genade broodnodig gehad! Paulus skryf: ‘Doen julle werk entoesiasties, asof julle dit vir die Here doen en nie vir mense nie.’ In plaas daarvan om te kla en te kerm, werk hard om in jou werk uit te blink en bid vir guns. Onthou: ‘Die Here stuur die koning soos Hy wil. Dit is soos ‘n stroom water wat Hy afkeer’ (Spreuke 21:1 NLV). Omdat Dawid met genade en integriteit teenoor ‘n baas, wat ‘n nagmerrie was, opgetree het, het God hom die baas gemaak! Wanneer jy God in jou werk eer, kan Hy dieselfde vir jou doen.
Sielskos: Dan 8-10; Mark 4:13-25; Ps 144:1-8; Spr 10:19-21
2020-04-24
Romeine 12:10 NLV
Tydens die somer van 1986, het twee skepe in die Swartsee langs die kus van Rusland gebots. Honderde passasiers het gesterf nadat hulle oorboord in die ysige water geval het. Nuus van die ramp het erger geword toe ‘n ondersoek die oorsaak van die ongeluk onthul het. Dit was nie as gevolg van ‘n tegnologiese probleem soos ‘n radar wat nie gewerk het of digte mis nie. Die oorsaak was menslike hardkoppigheid. Altwee kapteins was bewus van die ander skip se teenwoordigheid en kon toegang aan mekaar verleen het. Nuusverslae het egter berig dat nie een van die kapteins vir die ander een wou plek maak nie, omdat beide te trots was om toe te gee. Teen die tyd dat hulle tot hulle sinne gekom het, was dit te laat. As jy iemand met ‘n sterk wil is, iemand wat dinge laat gebeur, moet jy dink aan wat jy nou net gelees het. As jy die argument wen, maar die verhouding seermaak of verloor, wat het jy dan regtig bereik? As jy reg is maar die verhouding verloor, is dit ‘n verlies. Die woord vir jou vandag is dus: ‘As broers en susters in God se huisgesin moet julle mekaar in liefde koester en voor in die ry staan om mekaar met respek te hanteer… Konsentreer op dit wat onderlinge eensgesindheid bevorder. Moenie belangrik probeer wees nie, maar vind julle geluk by die nederiges. Moenie dink dat net julle altyd reg is nie. Moenie vir enigiemand kwaad met kwaad terugbetaal nie; wees positief teenoor alle mense. Sover dit vir julle moontlik is, moet julle goeie verhoudings handhaaf met alle mense. Geliefdes, julle moet julleself nie wreek nie. Laat die straf aan God oor… Moenie toelaat dat die slegte julle onderkry nie, maar deur goed te doen moet julle die slegte te bowe kom’ (verse 10; 16-19; 21 NLV).
Sielskos: Dan 5-7; Mark 4:1-12; Ps 7:10-17; Spr 10:17-18
2020-04-23
Filippense 2:14 NLV
Dis amper onmoontlik om kroniese klakouse te help. Jy kan hulle nooit tevrede stel nie, maar hulle wil nie hê dat jy moet ophou probeer nie. Later voel jy vasgevange. As jy eers ‘n reputasie as ‘n kroniese klakous gekry het, sal mense jou soos die plaag vermy en sal jy eensaam en ongewaardeerd voel. Die kans is goed dat jy nooit regtig sal verstaan hoekom nie! Gesindhede gebeur nie net nie – jy kies hulle. Paulus skryf: ‘Wees altyd bly omdat julle Christene is…’ (Filippense 4:4 NLV). Die Psalmdigter het geskryf: ‘Dit is die dag wat die Here gemaak het. Laat ons daaroor juig en bly wees’ (Psalm 118:24 NLV). Let op dat hy nie sê: ‘Gister was die dag wat die Here gemaak het, hoe gelukkig was ek nie toe nie,’. Of: ‘Môre sal die dag wees wat God gemaak het, ek sal uithou tot dan,’ nie. Nee, hierdie dag is ‘n gawe van God! ‘n Klaery is dikwels self-gesentreerd; dit gaan oor dit waarvan jy hou en nie hou nie. Dit is self-gefokus. Ware vreugde is ‘n keuse. Dit is die voorreg van diegene wat hulle aan iets groters as hul eie geluk toewy. Daar is besluite wat jy elke dag moet maak, soos wat jy gaan eet, wat jy gaan aantrek – en die gesindheid wat jy gaan uitstraal. Paulus was in die tronk met geen vooruitsig om vrygelaat te word nie, toe hy geskryf het: ‘Wees altyd bly omdat julle Christene is…’ Sy omstandighede het nie sy vreugde gedikteer nie, sy fokus het! Dieselfde geld vir jou. ‘Wees altyd vol blydskap. Moenie ophou bid nie. Wees in alle omstandighede dankbaar, want dit is wat God van julle as Christene verwag’ (1 Tessalonisense 5:16-18 NLV). Kies dus vandag vreugde!
Sielskos: Dan 3-4; Mark 3:20-35; Ps 7:1-9; Spr 10:16
2020-04-22
Galasiërs 1:10 NLV
Wanneer jy mense tevrede probeer stel, gebeur twee dinge: 1) Dit veroorsaak dat jy jou eie behoeftes tweede stel sodat jy aan hulle behoeftes kan voldoen. 2) Dit veroorsaak dat jy jou besluite op hulle goedkeuring baseer. In beide gevalle kan jy soos ‘n deurmat begin voel. Miskien het jy vroeg in jou lewe begin probeer om mense tevrede te stel, om sodoende die aandag te kry waarna jy gesmag het en wat jy nie andersins sou kry nie. Of miskien het jy nooit geleer om jou eie oordeel te vertrou nie. Die Bybel sê: ‘Jy stel vir jouself ‘n slagyster as jy vir mense bang is…’ (Spreuke 29:25 NLV), omdat dit jou altyd in die steek laat. Nie net raak ander mense ontsteld met jou nie, jy stel jouself teleur wanneer dinge nie uitwerk nie. Dink aan die aand voor die kruisiging, toe ‘n diensmeisie nader kom en vir Petrus sê: “‘Jy was mos ook saam met Jesus die Galileër?’ Hy het dit egter voor almal ontken. ‘Ek weet nie waarvan jy praat nie,’ het hy verklaar” (Matteus 26:69-70 NLV). Na die tyd het hy oor sy eie mislukking gehuil. Toe Samuel vir Saul oor sy besluit om nie al die Amalekiete te vernietig nie gekonfronteer het, het Saul bely: ‘…Ek was ongehoorsaam aan die Here se opdrag en u voorskrifte, want ek was bang vir die manskappe en het aan hulle versoeke toegegee’ (1 Samuel 15:24 NLV). Dis goed om bedagsaam, liefdevol en geduldig te wees, maar jy moenie jouself laat intimideer en manipuleer nie. Wanneer jy aan jou vrees vir ander toegee, laat jy toe dat hulle, en nie God nie, jou lewe beheer. God wil nie hê dat jy mense uit vrees moet dien nie, maar uit liefde vir hulle – en vir Hom.
Sielskos: Dan 1-2; Mark 3:7-19; Ps 16; Spr 10:15
