2026-01-22
Jakobus 4:2 NLV
Sommige mense dink dat ons nie veronderstel is om God vir te veel te vra nie; andersins is ons selfsugtig. God wil egter hê dat jy Hom moet vra. ‘…en eintlik is die rede hoekom julle nie het wat julle wil hê nie, die feit dat julle God nie daarvoor vra nie.’ Wanneer jy nie vra nie, gee jy nie jou geloof vrye teuels nie. Jesus het gesê: ‘…Soos julle geglo het, sal dit vir julle gebeur’ (Matteus 9:29 NLV). Jy moet leer om vrymoedige gebede te bid en van God groter dinge te verwag en te glo. ‘Vra My, en Ek gee vir jou nasies as erfporsies, die einde van die aarde as jou besitting’ (Psalm 2:8 NLV). Dis ‘n vrymoedige gebed! As God egter vir jou sê om dit te bid, is dit omdat Hy gewillig is om jou gebed te beantwoord.
Jy mag dalk ‘n droom in jou hart hê, maar kan nie insien hoe dit ooit sal kan gebeur nie. Jesus het vyfduisend mense met vyf brode en twee vissies gevoed. Hy is ‘n God van vermenigvuldiging. Hy kan jou tyd vermenigvuldig en jou help om meer gedoen te kry. Hy kan jou wysheid vermenigvuldig en jou help om beter besluite te maak. Hy kan jou finansies vermenigvuldig: ‘God wat saad voorsien aan die saaier… sal ook aan julle saad gee en dit laat toeneem en die vrugte van julle goedhartigheid lieflik laat groei’ (2 Korintiërs 9:10 NLV).
In plaas daarvan om met blote oorlewing tevrede te wees, wil God hê jy moet floreer. ‘n Oorlewingsmentaliteit sal jou van God se beste weerhou. Skud dit af en sê: ‘God, U het belowe dat U dit wat vir my skade sou beteken, tot my voordeel sal gebruik (sien Romeine 8:28). Ek mag dalk deur die vuur, die hongersnood en die vloed gegaan het, maar ek weet dis my tyd van guns. Dis my tyd om meer van u goedheid in my lewe te sien.’ Glo God vir groter dinge.
Sielskos: Jak 1-2; Luk 5:1-11; Ps 91; Spr 3:3-4
2026-01-21
1 Tessalonisense 5:11 NLV
Om iemand op te bou beteken om hulle te versterk, aan te moedig en te motiveer. Daar is waarskynlik mense in jou lewe wat tans iemand nodig het om seën oor hulle uit te spreek. Jy weet nie hoeveel dit sal beteken wanneer jy hulle jou goedkeuring gee, vir hulle sê dat jy trots is op hulle en dat jy dink hulle groot dinge kan vermag, nie. Almal het iemand nodig wat hulle kan opbou.
Watter tipe sade plant jy dus in jou kinders, in jou man of vrou, in jou vriende? Glo jy in hulle? Het jy dit al vir hulle gesê? Stel jy belang om hulle lewe te probeer verbeter? Het jy na hul drome geluister? Het jy uitgevind wat hulle glo God in hul harte geplaas het? Het jy hulle al verseker dat jy by hulle staan? Dis wat ‘n opbouer doen!
Henry Ford is aan Thomas Edison voorgestel as ‘die man wat probeer om ‘n motor te bou wat op petrol loop.’ Toe Edison dit hoor, het hy gesê: “‘n Motor wat sy eie kragbron het; dis ‘n briljante idee!” Tot op daardie stadium het niemand Ford aangemoedig nie en hy het amper besluit om sy idee te staak. Toe het Edison egter ingegryp en geloof in sy idee gehad. Dit was ‘n beslissende oomblik in Henry Ford se lewe. Hy het gesê: ‘Ek het gedink dat ek ‘n goeie idee het, maar ek het aan myself begin twyfel. Toe kom een van die grootste denkers wat ooit geleef het en gee my sy goedkeuring.’
Jy verstaan nie die mag wat jy het of hoeveel dit beteken as jy vir iemand sê: ‘Ek glo in jou. Jy het wat dit verg. Ek is 100 persent by jou,’ nie.
Sielskos: Dan 11-12; Luk 4:31-44; Ps 89:38-52; Spr 3:1-2
2026-01-20
Matteus 5:12 AFR83
Die historikus Edward Gibbon het die vinnige vooruitgang van die Christendom in die dae van die Romeinse Ryk nagespoor en vyf redes daarvoor opgemerk: 1) Die ywer van die vroeë Christene. 2) Die krag van wonderwerke. 3) Die suiwer beginsels van die Christene. (4) Die kompakte kerkorganisasie. 5) Die geloof in toekomstige belonings.
Die Bybel praat dikwels oor ons beloning in die hemel. Hier is ‘n paar voorbeelde daarvan: ‘Geseënd is julle wanneer die mense julle ter wille van My beledig en vervolg en valslik al wat sleg is van julle sê. Wees bly en verheug, want julle loon is groot in die hemel…’ (verse 11-12 AFR83). ‘Die Seun van die mens gaan saam met sy engele kom. Hy sal beklee wees met dieselfde heerlikheid as sy Vader en sal elkeen volgens sy dade vergeld’ (Matteus 16:27 AFR83). ‘…as enigiemand vir julle ‘n beker water gee omdat julle van die Messias se mense is, sal God hom daarvoor beloon’ (Markus 9:41 NLV). ‘Laat niemand julle van jul prys beroof nie…’ (Kolossense 2:18 AFR53). ‘…Kyk, Ek kom gou! My loon kom saam met My om almal te beloon volgens wat hulle gedoen het’ (Openbaring 22:12 NLV).
Hier is die volgorde van gebeure: Die Here sal afkom aarde toe, die dooies in Christus sal opgewek word, die verlostes wat nog op aarde leef sal saam met hulle weggeraap word en ons sal ons verheerlikte liggame en ons ewige belonings ontvang. ‘…Dié vuurtoets sal elkeen se werk beproef – of dit standhou. Die mense wie se bouwerk standhou, sal deur God beloon word’ (1 Korintiërs 3:13-14 NLV). ‘…Gee altyd julle allerbeste vir die Here se werk, want julle weet voor die Here is alles wat julle doen die moeite werd’ (1 Korintiërs 15:58 NLV).
Sielskos: Dan 8-10; Luk 4:14-30; Ps 89:15-37; Spr 2:21-22
2026-01-19
Efesiërs 2:8 NLV
Jack Welch, wat die General Electric-maatskappy deur van sy winsgewendste jare gelei het, het ‘n boek genaamd Winning geskryf. Hy het baie van die verskillende vrae wat mense hom gereeld gevra het en sy antwoorde daarop geneem en ‘n boek oor bestuursbeginsels geskryf. Een vraag was: ‘Dink jy jy sal hemel toe gaan wanneer jy sterf?’ In reaksie hierop het Jack ‘n paar van die foute wat hy in besigheid en in die lewe gemaak het, insluitend twee egskeidings, genoem. Toe het hy gesê: ‘Dus, wat die hemel betref, wie weet? As daar egter enige punte toegeken word vir omgee oor ander mense en om alles elke dag uit die lewe te probeer put, dan dink ek dat ek dalk ‘n kans staan!’
Om hemel toe te gaan gaan egter nie daaroor om vir mense om te gee en om elke dag die lewe aan te gryp nie. Dit gaan daaroor om jou vertroue in Jesus Christus te plaas – en in Hom alleen. Miskien is dit moeiliker vir suksesvolle sakelui as vir ander mense om hierdie waarheid te verstaan, omdat hulle eie dryfkrag, visie en energie hulle gehelp het om sukses te behaal.
Wanneer dit egter by die hemel kom, tel daardie eienskappe nie. Niemand verdien die hemel nie; dit is ‘n gawe. ‘Want wat die sonde uitbetaal, is die dood. Maar God se genadegeskenk is die ewige lewe wat ons deel word deur Christus Jesus ons Here!’ (Romeine 6:23 NLV). Hebreërs 6:4 (NLV) noem dit ‘…die wonderlikheid van God se geskenk…’ Die apostel Paulus skryf: ‘Dit is mos dié onverdiende goedheid wat julle gered het toe julle tot geloof gekom het. En julle geloof kom nie uit julleself nie, maar is ‘n gawe van God. Dit is nie die gevolg van julle dade nie. Niemand kan daaroor grootpraat nie’ (Efesiërs 2:8-9 NLV).
Sielskos: Dan 5-7; Luk 4:1-13; Ps 89:1-14; Spr 2:20
2026-01-18
Spreuke 10:9 NLV
Ter voorbereiding van aandete het ‘n vrou by ‘n klein slaghuis gestop om vleis vir die ete te koop. Sy het besluit om gebraaide hoender as hoofgereg te maak. Sy het die man by die toonbank vir die grootste hoender wat hy het, gevra. Hy het na die koelkamer toe geloop, die laaste hoender wat hy gehad het gegryp en dit op die toonbank se skaal geplaas. ‘Hierdie een weeg twee kilogram, mevrou.’ Die vrou het ‘n oomblik daaroor nagedink en toe gesê: ‘Ek is nie seker of dit genoeg sal wees nie. Het u nie dalk ‘n groter een nie?’
Die man het die hoender terug na die koelkamer geneem, gemaak of hy deur die ys vir nog ‘n hoender soek en toe dieselfde hoender weer uitgebring. Toe hy die hoender weer op die skaal sit, het hy skelmpies met sy vinger ‘n bietjie druk op die skaal toegepas. ‘Aha,’ het hy met ‘n glimlag gesê, ‘hierdie een weeg amper drie kilogram!’ Die vrou het gefrons, ‘n paar somme in haar kop gedoen en gesê: ‘Ek is ook nie seker of dit genoeg gaan wees nie. Ek sê jou wat – draai hulle albei vir my toe!’
Daar is geen twyfel daaroor nie – eerlikheid is die beste beleid. Dis waar van hierdie lewe, sowel as die lewe wat kom. Die Bybel sê oor hierdie lewe: ‘Die een wat opreg lewe, staan vas. Die een wat kronkelpaaie loop, kom tot ‘n val.’ Die Bybel sê ook die volgende oor die lewe wat kom: ‘Julle moet dus nie voortydig ‘n oordeel vel voordat die Here kom nie. Hý sal sy lig laat skyn op die dinge wat in die donker verborge lê, en Hý sal die motiewe van ons harte aan die lig bring…’ (1 Korintiërs 4:5 NLV).
Sielskos: Gal 5:22-23; Jes 26:3; Rom 5:1-2; 2 Kor 13:11
2026-01-17
Markus 3:25 NLV
‘Here, u Woord sê: ‘En as daar onderlinge stryd in ‘n huisgesin heers, kan daardie huisgesin dit tog nie oorleef nie!’ Satan val my familie aan en ek wend my tot U vir hulp. U Woord sê: ‘Wanneer die teëstander aanstorm soos ‘n rivier, jaag die Gees van die Here hom op loop’ (Jesaja 59:19 AFR83). Raak die harte en gedagtes van elke lid van hierdie familie aan en bring hulle nader aan U.
U het gesê: “Gelukkig is die vredemakers, want God sal vir hulle sê: ‘Julle is mý kinders'” (Matteus 5:9 NLV). Ek verbind myself daartoe om ‘n vredemaker in hierdie situasie te wees en vra U vir die wysheid om te weet wat om te sê en te doen. Bevry my familie van selfsug, trots en bitterheid. Gee ons die soort liefde wat alle sondes en swakhede bedek (sien Spreuke 10:12).
Help ons om te weet wanneer ‘n meningsverskil op die punt staan om ‘n sluis oop te maak en gee ons die genade om die saak te laat vaar voordat die rusie buite beheer raak (sien Spreuke 17:14). U Woord sê dat om ‘n geveg te vermy eerbaar is en dat net dwase rusie soek (sien Spreuke 20:3). Here, maak ‘n einde aan die twis wat verwoesting in ons familie saai. Ek neem gesag oor elke twisgierige gees.
Ek vra U om my familie te help om dinge wat vrede bring en die dinge wat ons kan gebruik om mekaar op te bou en te versterk, na te streef (sien Romeine 14:19). U Woord sê dat daar niks te moeilik is vir U nie (sien Jeremia 32:17). Dus bid en glo ek vir genesing en herstel in my familie. In Jesus se Naam. Amen.’
Sielskos: Dan 3-4; Luk 3:21-38; Ps 84; Spr 2:16-19
