2021-04-01
Maleagi 2:6 NLV
Vanaf die heel eerste hoofstuk in Genesis, is dit duidelik dat ‘n verhouding met God die fondasie is waarop alles in ons lewens gebou moet word. As ons dit op enigiets anders probeer bou, bou ons dit op dryfsand. Hoekom? Omdat ons verhouding met ons kinders, ons sibbe, ons eggenoot, ons ouers en ons vriende dan later sal ineenstort.
Indien ons nie verstaan dat ons geskape is met ‘n intense honger na ‘n verhouding met God nie, sal ons nie verstaan waar die innerlike leemte en eensaamheid vandaan kom nie. Gevolglik sal ons (onsuksesvol) probeer om die leemte met drie dinge te vul:
1) Mense. Die regte persoon in jou lewe kan jou behoefte aan liefde en emosionele intimiteit vervul, maar niemand anders as God kan die geestelike leemte binne-in jou vul nie.
2) Dinge. Materiële dinge kan ons vertroosting en gemak bied. Geld bied aan ons die geleentheid om dinge te kan doen – dinge waarvan die minderbevoorregtes net kan droom. Jy kan egter materiële dinge hê en steeds eensaam en ongelukkig wees.
3) Godsdiens. God is nie in godsdiens geïnteresseerd nie; Hy is in ‘n verhouding met jou geïnteresseerd. Godsdiens word net betekenisvol wanneer dit daardie verhouding verbeter, wat dit nie altyd doen nie. Dikwels word godsdienstige reëls en regulasies ‘n afskrikmiddel vir ‘n verhouding met God. Die Bybel is gevul met godsdienstige mense wat die skakel met God heeltemal misgeloop het. Soms is ons so behep met ons godsdienstige ideologieë, leerstellings, doktrines en beginsels, dat ons nie verstaan dat die belangrikste ding in die lewe ‘n persoonlike, intieme, daaglikse, gesels-en-luister verhouding met God is nie.
Sielskos: Lev 1-4; Matt 26:47-68; Ps 31; Spr 8:34-36
2021-03-31
Jakobus 1:3 DB
Dit neem ‘n lang tyd en ontsettend baie druk om ‘n waardelose stuk koolstof in ‘n waardevolle diamant te omskep. Dis hoekom Jakobus skryf: ‘My liewe mede-Christene, wees opgewonde as julle geloof by elke geleentheid getoets word… Die slegte dinge wat met julle gebeur, toets of julle werklik die Here vertrou. As dit met julle sleg gaan, leer julle juis om nader aan die Here te leef. Julle moet die Here toelaat om julle deur hierdie dinge te leer wat dit beteken om altyd net op Hom te vertrou… So sal julle geestelike grootmense word wat weet hoe om in elke situasie reg op te tree’ (verse 2-4 DB).
Sodra jy hierdie Skriftuurlike waarheid begryp, sal jy God se hand in jou hele lewe sien. Die waarheid is dat jy jouself óf tans in ‘n toets bevind, óf pas uit ‘n toets uit kom, óf op pad is na die volgende een toe. Hierdie toetse kom in elke moontlike gedaante. Soos die briewe wat jy in die posbus kry, is sommige van hulle net aan: ‘Die Inwoner,’ geaddresseer.
Will Rogers het een keer ‘n koerantopskrif gelees wat gelui het: ‘Onskuldige omstander in New York geskiet.’ Hy het geskerts: ‘Wat daarvan? Al wat jy moet doen om in New York geskiet te word is om onskuldig te wees en rond te staan!’ Dis hoe dit ook met die lewe se toetse gaan. Staan net rond – en jy sal getref word.
Die feit bly egter staan dat dit teenspoed neem om geestelike volwassenheid te produseer. Jesus het gesê: ‘…In die wêreld sal julle swaarkry beleef, maar skep moed: Ek het die wêreld reeds oorwin’ (Johannes 16:33 NLV). Jesus was ‘n oorwinnaar en omdat Hy vandag in jou leef, kan jy ook ‘n oorwinnaar wees.
Sielskos: 2 Tess 1-3; Matt 26:30-46; Ps 6; Spr 8:32-33
2021-03-30
Job 23:10 NLV
Job het sy familie en sy fortuin in ‘n enkele dag verloor. Tog, toe hy terugkyk daarop, het hy geskryf: ‘…Wanneer Hy my toets soos goud in ‘n vuur, sal Hy my onskuldig verklaar.’ Dit verg baie meer vuur om goud te produseer as wat nodig is om tin te produseer. Watter een van die twee sal jy eerder wil wees?
Om die seën wat God vir jou in gedagte het te geniet, moet jy die lewe se toetse slaag. In die vroeë dae van televisie, is skedules gereeld deur ‘n dertig-sekonde toets van ‘Die Nooduitsending Sisteem,’ onderbreek. Daardie toetse is baie soos die toetse waarvoor ons in die lewe te staan kom – ongeskeduleerd, onwelkom en gewoonlik op die slegste moontlike tyd. In teenstelling met die televisie toetspatrone, duur die lewe se toetse nie net dertig sekondes en gaan dan weg nie. Nee, hulle kan vir weke, jare en in sommige gevalle, vir ‘n leeftyd duur.
Die rede daarvoor mag ook nie altyd vir jou duidelik wees nie. Daar is egter ‘n aspek van die toets wat jy kan beheer – hoe jy daarop reageer. Die waarheid is dat toetse ‘n onskatbare, integrale en onontbeerlike deel van jou geestelike groei is. Sonder hulle sal jy nooit soveel groei en volwasse word soos wat jy moet nie. Hoe jy jou ‘toetse’ hanteer, bepaal ook jou ‘getuienis.’
Paulys skryf: ‘Al hierdie dinge wat met ons gebeur, help vir julle. So kan God genadig wees vir meer mense. Dan kan meer mense dankie sê vir God. En so kry God al die eer, God wat die Koning is. Daarom word ons nie moedeloos nie. Ons liggame is besig om te sterf, maar God maak ons geestelike lewe elke dag nuut’ (2 Korintiërs 4:15-16 ABA). Jy het genade vir hierdie toets ontvang.
Sielskos: Est 5-10; Matt 26:1-17; Ps 18:1-29; Spr 26:24-27
2021-03-29
Johannes 15:3 NLV
Jou nuwe natuur is geprogrammeer om God te wil gehoorsaam, op dieselfde manier soos ‘n sakrekenaar geprogrammeer is om syfers te bereken. Wanneer jy die regte informasie insit, kry jy die regte antwoord. Wanneer jy jou nuwe natuur met God se Woord voed, is dit ontwerp om jou die regte antwoord te gee. Dis hoekom Satan jou so besig met ander dinge probeer hou, dat jy nie tyd bestee om jou Bybel te lees nie. Paulus skryf: ‘Ons almal weerspieël die heerlikheid van die Here… Ons word al meer verander om soos die Here te lyk…’ (2 Korintiërs 3:18 NLV).
‘n Spieël is net ‘n reflekteerder. Hoe meer tyd jy met God se Woord deurbring, hoe meer begin jy sy beeld reflekteer. Dit sal egter nie gebeur deur hier en daar ‘n vers te gryp of om deur ‘n hoofstuk te blaai nie. Nee, jy moet jou gedagtes elke dag met God se Woord vernuwe, tot so ‘n mate dat die Heilige Gees met jou gees konnekteer en ‘n Christelike lewenstyl produseer.
Jesus het gesê: ‘Julle is reeds skoon gesnoei deur die boodskap wat Ek met julle gedeel het. Julle moet aan My verbonde bly soos Ek aan julle. ‘n Loot kan nie uit sy eie vrugte dra as dit nie aan die druiwestok verbind bly nie, en só julle ook nie as julle nie voluit aan My verbonde bly nie’ (Johannes 15:3-4 NLV).
Wanneer kos op ‘n bord uitdroog, moet die bord eers in warm seepwater geweek word voor al die gemors daarop verwyder kan word. Dis hoekom jy jou gedagtes in God se Woord moet week. Dit verwyder nie net al die aaklige sonde nie, maar ook geharde, hardnekkige houdings wat jou daarvan weerhou om in genade te groei.
Sielskos: Est 1-4; Matt 25:41-46; Ps 69:19-36; Spr 8:30-31
2021-03-28
Jakobus 1:22 NLV
Jakobus skryf: ‘Doen wat God vir jou sê. Daar wag ‘n groot verrassing op jou as jy maar net daarna sit en luister en niks daaraan doen nie… Iemand wat net na God se woord luister sonder om te doen wat dit vra, is soos ‘n man wat na homself in ‘n spieël kyk. Hy sien daar hoe deurmekaar sy hare is. Hy draai dan om en stap weg sonder om sy hare te kam, omdat hy dadelik vergeet hoe deurmekaar sy hare is.
Hoe anders is dit nie met iemand wat moeite doen om alles van God se wil te leer nie… Iemand wat so ernstig in God se wil belangstel en dit wat hy daar hoor ook gaan doen, het die ware geluk en sin van die lewe ontdek’ (verse 22-25 DB). Hoekom is hierdie Skrifgedeelte betekenisvol? Omdat daar ‘n verskil is hoe mans en vrouens ‘n spieël gebruik.
Mans kyk oor die algemeen net gou in die spieël om die basiese gedoen te kry; terwyl vrouens oor die algemeen meer besorg is oor hoe hulle lyk en dikwels ‘n spieël in hulle handsakke dra om deur die dag seker te maak hulle voorkoms lyk nog versorg. Dit gaan egter nie oor die verskil hoe mans en vrouens spieëls gebruik nie. Nee, dit gaan daaroor dat jy nie ‘n paar gejaagde oomblikke met die Skrif moet deurbring voor jy by die deur uithardloop om jou dag te begin nie, maar dat jy oor die Skrif moet mediteer totdat dit jou gedagtes vernuwe en jou karakter na Jesus se beeld omvorm.
Soos jy die Skrif lees, hou die Heilige Gees ‘n spieël voor jou op sodat jy die nodige aanpassings kan maak. Om in God se seën te wandel, moet jy sorg vir die ‘doen,’ en Hy sal sorg vir die ‘seën.’
Sielskos: Ps 118:19-29; Matt 21:1-16
2021-03-27
Job 22:21 NLV
Vandag het ons nie net gewone stres nie, ons het kuberstres. E-posse vermeerder soos hase. As jy jou selfoon net vir ‘n paar ure afskakel, weeg dit sommer vyf kilogram swaarder wanneer jy dit weer aansit as gevolg van al die boodskappe wat ingekom het. Dan het ons hiperstres. Gaan na die kruidenierswinkel toe en sien hoeveel geselsies die kassier, wie se spoed en effektiwiteit deur ‘n rekenaar gemeet word soos hy of sy jou kruideniersware elektronies skandeer en jou totale bedrag uitroep, met jou wil maak.
In ‘n vyf-jaar studie, het 88 persent van drieduisend salaristrekkers gesê dat hulle ‘baie hard’ werk. Agt-en-sestig persent het gesê dat hulle ‘baie vinnig’ werk. Sestig persent het gesê dat hulle ‘nie al die werk klaarkry nie.’ Een-en-sewentig persent het gesê dat hulle ‘opgebruik’ voel.
Selfs pastore is nie immuun daarteen nie. Amper die helfte van hulle bedank uiteindelik en 80 persent van hulle gee die effek van pastorale bediening op hulle familielewe, as die rede daarvoor.
Wat is dus die oplossing vir ons stres? Vrede! Waar kan jy vrede kry? Die Bybel sê vir ons: ‘Onderwerp jou aan God, dan sal jy vrede hê en sal alles met jou goed gaan.’ Hier is hoe dit werk: Wanneer jy weet dat God lief is vir jou en jou onvoorwaardelik aanvaar, stel dit jou vry om dieselfde vir jouself te doen. Gevolglik word jy nie meer deur ‘n behoefte aan aanvaarding, verkryging en prestasie gedryf nie. Ja, wanneer jy volgens die beginsels wat duidelik in die Bybel uiteengesit is lewe, kan jy vrede en voorspoed hê!
Sielskos: Eks 12:1-14; Matt 26:17-29; 1 Kor 11:20-34; Ps 49
