2026-02-15
Jesaja 64:1 NLV
Jesus het die volgende vir die dissipels gesê net voordat Hy hierdie aarde verlaat het om terug te keer hemel toe: ‘En kyk, Ek sal die belofte van my Vader aan julle stuur. Julle moet in die stad bly totdat julle van God af met krag bemagtig is’ (Lukas 24:49 NLV). As verloste kind van God woon die Heilige Gees in jou (sien Romeine 8:9). Hierdie belofte dui egter daarop dat jy ook die Heilige Gees wat jou rus en jou krag gee, op jou kan hê. Hoe het die dissipels op hierdie belofte gereageer? ‘Hulle het almal saam aanhou bid…’ (Handelinge 1:14 NLV).
Larry Sparks sê: ‘Vir te lank duld die Westerse kerk al ‘n gebedskultuur wat deur ‘n gebrek aan resultate gedefinieer word.’ Dan gee hy ons hierdie strategie om ‘n goddelike besoek te ontvang: “Hersien God se beloftes wat handel oor die uitstorting van die Heilige Gees. Word daardeur beheers. Talm in toegewyde, volgehoue, volhardende gebed totdat herlewingsbeloftes herlewingswerklikhede word. Dis presies wat die dissipels gedoen het.”
Ons maak die fout om aan te neem dat die Heilige Gees slegs op vaste datums op die hemel se kalender uitgestort gaan word. Een van die grootste beloftes wat God aan ons gemaak het, is die volgende: “Só sal dit in die laaste dae wees, sê God: ‘Ek sal my Gees uitstort op elke mens…'” (Handelinge 2:17 NLV). Solank as wat ‘elke mens’ nog nie hierdie uitstorting van die Gees beleef het nie, moet ons aanhou bid: ‘As U maar die hemel wou laat oopskeur en afkom!..’ Jy vra: ‘Wat kan ek doen?’ Doen wat die dissipels gedoen het: ‘Hulle het almal saam aanhou bid…’ Begin om elke dag vir ‘n goddelike besoek van God se Gees te bid.
Sielskos: Gal 5:22-23; Deut 7:9; Spr 3:3-4; Luk 16:10-12
2026-02-14
Josua 9:14 NLV
Leef met jou ore op die hemel gespits: ‘Kom hierdie geleentheid van U, God?’ ‘Is U betrokke by hierdie onderneming, God?’ ‘Moet ek hierdie pad neem, God?’ Eenkeer het Josua dit nie gedoen nie en duur daarvoor betaal. ‘n Groep vreemdelinge het die kamp van Israel binnegegaan en gesê: ‘…Ons kom van ‘n baie ver land af…’ (vers 9 NLV). Hierdie vreemdelinge het klaarblyklik geweet dat God se wet spesiale voorsiening gemaak het vir stede buite Kanaän (sien Deuteronomium 20:10-12).
Enige stad wat instem om ‘n vredesverdrag met Israel te sluit, sou gespaar word. Dus het hierdie vreemdelinge besluit om die Israeliete te mislei. Drie dae het verbygegaan voordat Josua besef het dat hulle vir hom gelieg het. Hierdie mense was nie van ‘n verre land nie; hulle was van Gibeon, net ‘n dag se stap weg. Josua het dus ‘n verdrag met die vyand gesluit, omdat hy nie eers vir God geraadpleeg het nie.
Ons moet uit Josua se fout leer. Ons vyand vermom homself ook om ons kamp binne te kom: ‘…Die Satan self gee immers voor dat hy ‘n engel van die lig is’ (2 Korintiërs 11:14 NLV). Hy is listig. Daarom is dit noodsaaklik dat ons God in alles raadpleeg. Ons moet God by elke besluit en kruispad erken, na Hom luister en vir Hom vra: ‘Moet ek regs of links draai?’
Dawid het gesê dat God se Woord ‘n lamp vir ons voete is (sien Psalm 119:105), nie ‘n kollig op die toekoms nie. Hy gee ons genoeg lig om die volgende stap te neem. Wanneer ons bid, spreek Hy tot ons harte: ‘Jy sal ‘n stem hoor sê: ‘Hier is die regte pad. Draai om en loop hierlangs’ (Jesaja 30:21 NLV). Raadpleeg God dus oor alles.
Sielskos: Heb 1-4; Luk 9:57-62; Ps 149; Spr 4:25-27
2026-02-13
Josua 23:6 NLV
Toe die Israeliete die Beloofde Land binne gegaan het, het God vir Josua gesê: ‘Staan sterk en doen haarfyn alles wat geskryf staan in die wetboek van Moses.’ Jy moet jou kernwaardes identifiseer en daarvolgens leef. Die Switserse filosoof Henri-Frederic Amiel het gesê: ‘Die man wat geen innerlike lewe het nie, is ‘n slaaf van sy omgewing.’ Jou kernwaardes is die beginsels waarvolgens jy leef. Dit is die lig wat jou lei. Dit gee stabiliteit en struktuur aan jou innerlike wêreld.
Wanneer jou kernwaardes in orde is, kan jy jou pad deur amper enigiets vind. Het jy al ooit gewonder hoekom God na sy Woord as ‘n ‘wetboek’ verwys? Omdat dit jou gedagtes en dade beheer, jou in die regte rigting lei en jou teen moeilikheid beskerm. Kernwaardes orden jou lewe; daarsonder word jy met chaos en verwarring gekonfronteer. God het sy wette vir ons beswil ingestel. Wanneer ons hulle nie gehoorsaam nie, ly ons; wanneer ons hulle eerbiedig, slaag ons. Jy kan nie kies watter wette jy wil gehoorsaam en van die res vergeet nie. God sê: ‘…Voer al die opdragte uit… Jy sal dan suksesvol wees in alles wat jy doen’ (Josua 1:7 NLV).
Baie talentvolle mense wat die kollig haal, bly nie lank daar nie. Hoekom? Omdat hulle nie daarin slaag om ‘n sterk karakter te ontwikkel nie. Hul gebrek aan integriteit pootjie hulle, omdat hulle nie verder as die beperkings van hul karakter kan klim nie. Talent mag jou na ‘n hoër vlak van sukses neem, maar sonder karakter sal jy nie die druk wat met sukses gepaardgaan, kan hanteer nie. Daarom is dit so belangrik om volgens die beginsels van God se Woord te leef.
Sielskos: 2 Tess 1-3; Luk 9:46-56; Ps 145:14-21; Spr 4:23-24
2026-02-12
Spreuke 8:14 AFR83
Die vrees vir sukses ontspoor baie drome. Soms raak diegene naby aan jou wrokkig wanneer jy sukses behaal. Om suksesvol te wees, kan jou ook angstig laat voel en laat vrees dat jy nie jou sukses sal kan handhaaf nie. Dan is daar ook die vrees dat jy mense sal aantrek wat jou sukses wil misbruik. Salomo het ons gewaarsku: ‘Rykdom bring baie mooiweersvriende…’ (Spreuke 19:4 NLV).
Dan is daar die vrees om met voortdurende versoeke vir geld gebombardeer te word. Wat as jy nee sê? Jy moet jou hart volg, gee soos God jou lei en die res aan Hom oorlaat. Dawid het gesê: ‘…u genade is vir hulle soos ‘n skild’ (Psalm 5:13 NLV).
Die guns van God kan van jou ‘n teiken maak. Alhoewel jy altyd moet probeer om deur jou gedrag regverdig teenoor ander mense te wees, kan jy nie God se guns verwerp net om te keer dat ander afgunstig raak nie. Jy moet God se guns as deel van jou lewensdoel omhels.
Miskien is daar vir jou gesê dat jy nooit sukses sal behaal nie, dus voel jy dalk dat jy dit nie verdien nie en dat dit nie sal hou nie. Jy mag dan op so ‘n manier optree dat jy jouself saboteer, wat jou eie ergste vrese bevestig en dit tot verwesenliking bring. Wat moet jy dus doen?
Eerstens, dank God dat jy die wortel van jou probleem verstaan. Tweedens, praat met ‘n goeie luisteraar daaroor. Soos jy jouself hoor praat en die probleem in perspektief plaas, mag jy jouself bevind waar jy jou met die woorde van Salomo begin identifiseer: ‘Wie my het, het raad en behaal sukses, ek verleen insig, ek is die een wat die mag gee.’
Sielskos: 1 Tess 1-5; Luk 9:37-45; Ps 145:1-13; Spr 4:20-22
2026-02-11
Josua 8:30 NLV
Die Bybel sê: ‘Josua het daarna ‘n altaar op die Ebalberg vir die Here, die God van Israel, gebou… soos… voorgeskryf… ‘Maak vir my ‘n altaar met klip wat nie met ‘n ysterinstrument bewerk is nie.’ Hulle het op die altaar brandoffers vir die Here gebring… Al die Israeliete… is in twee groepe verdeel… Een deel het by die Gerisimberg gestaan en die ander deel by die Ebalberg… Josua het toe vir hulle alles wat die wet sê oor seën en straf voorgelees, soos in die boek van die wet geskryf staan’ (Josua 8:30-34 NLV).
Daar is twee belangrike lesse uit hierdie gebeurtenis te leer. Eerstens, ‘…’n altaar met klip wat nie met ‘n ysterinstrument bewerk is nie…’ spreek van God se onverdiende genade teenoor ons – daar is geen menslike pogings betrokke nie. ‘Dit is mos dié onverdiende goedheid wat julle gered het toe julle tot geloof gekom het. En julle geloof kom nie uit julleself nie, maar is ‘n gawe van God. Dit is nie as gevolg van julle dade nie…’ (Efesiërs 2:8-9 NLV).
Tweedens, let op waar hierdie altaar gebou is. Die helfte van Israel het by Gerisimberg en die ander helfte by Ebalberg gestaan. Diegene by Gerisimberg het hom die seëninge hoor lees en diegene by Ebalberg het hom die strawwe hoor lees. Die altaar is egter nie op Gerisim, die berg van seëninge, gebou nie, maar op Ebal, die heuwel van straf.
Die boodskap is duidelik: selfs wanneer jy foute maak, is God genadig teenoor jou. C. S. Lewis het gesê: ‘Gehoorsaamheid is die sleutel wat elke deur oopmaak.’ Selfs wanneer jy dus misluk en aan God ongehoorsaam is, kan jy terugkeer na die altaar van genade by Ebalberg. Dit is gebou vir mense soos jy.
Sielskos: Jona 1-4; Luk 9:28-36; Ps 141; Spr 4:18-19
2026-02-10
Psalm 34:7 NLV
Dit was vyf-en-twintig jaar sedert Fontella Bass se enkelsnit, ‘Rescue Me,’ nommer een op die trefferlyste gehaal het. Sy het geen loopbaan meer gehad nie, sy was bankrot, moeg en koud. Die enigste hitte in haar huis het van die gasstoof in die kombuis gekom. Sy het van haar geloof en die kerk waar sy as kind gospelliedjies begin sing het, afgedwaal.
Terwyl sy gebid het, het Fontella God gevra vir ‘n teken om te bevestig dat Hy haar gebede gehoor het. Skielik het sy haar trefferliedjie ‘Rescue Me’ op ‘n televisie-advertensie gehoor! Vir haar was dit asof ‘die Here reguit in my wêreld ingestap het!’ Fontella was onbewus daarvan dat American Express haar liedjie in ‘n advertensie begin gebruik het en haar nie kon opspoor om tantième aan haar oor te betaal nie.
Nie net het sy uiteindelik die tantième ontvang nie, maar nuwe geleenthede om te sing het ook vir haar begin oopgaan. Kort daarna het sy ‘n nuwe album vrygestel. Die beste nuus was egter dat sy haar verhouding met die Here hernu het. ‘Vir soveel jare het ek probeer om alles op my eie te doen, maar dit het nie gewerk nie,’ het sy gesê. ‘Toe het ek dit uit my hande geneem en aan Hom oorhandig, en nou gebeur alles vanself.’
Die Psalmdigter Dawid het geskryf: ‘Hierdie geringe mens het geroep, en die Here het gehoor. Hy het hom uit al sy benoudheid gered… Beproef en sien dat die Here goed is. Geseënd is die persoon wat op Hom vertrou!’ (Psalm 34:7,9 NLV). Wat God vir Dawid en Fontella Bass gedoen het, sal Hy ook vir jou doen wanneer jy na Hom toe draai.
Sielskos: Num 34-36; Luk 9:18-27; Ps 138; Spr 4:14-17
