2026-04-08
Johannes 1:41-42 NLV
Wat het Billy Graham en die Campus Crusade for Christ-stigter Bill Bright en die Young Life-stigter Jim Rayburn en die Navigators-stigter Dawson Trotman in gemeen? ‘n Sondagskoolonderwyseres genaamd Henrietta Mears. Toe Henrietta agt-en-dertig jaar oud was, het sy van Minnesota na ‘n ontluikende dorp genaamd Hollywood, Kalifornië, verhuis. Sy het Sondagskool by die Eerste Presbiteriaanse Kerk aangebied en uiteindelik ‘n verstommende 6500 studente gehad. Vir vier dekades lank het sy haar getrou aan haar passie om ‘n Sondagskool te bou, gewy. Sy het ook ‘n uitgewery genaamd Gospel Light en ‘n suksesvolle konferensiesentrum genaamd Forest Home begin. Daarbenewens het sy ‘n boek, What the Bible Is All About, geskryf wat meer as drie miljoen eksemplare verkoop het.
Dit is onmoontlik om te skat hoeveel miljoene mense die evangelie deur hierdie vrou en die Christelike leiers wat sy vir God gementor en gevorm het, aangehoor het. Kyk na die bediening van net een van haar studente, Bill Bright. Hy het Campus Crusade for Christ begin, wat volgens die laaste telling 20 000 voltydse personeel plus 663 000 opgeleide vrywilligers in 181 lande het. Grootliks danksy The Jesus Film-projek, het Bill Bright se organisasie meer as 3,4 miljard mense met die evangelie bereik – die helfte van die wêreldbevolking.
Jy mag dalk nie soveel mense beïnvloed nie, maar jy mag dalk een persoon beïnvloed, wat uiteindelik baie ander beïnvloed. Andreas, een van die twaalf dissipels, het dit gedoen. Hy het sy broer Simon Petrus na Jesus gebring en Simon Petrus het uiteindelik ‘n menigte mense na Jesus gelei. Jy kan ‘n verskil maak. Al wat jy moet doen is om jouself vir God beskikbaar te stel.
Sielskos: Jer 36:27-40:16; Luk 24:25-35; Ps 25:8-15; Spr 10:1-3
2026-04-07
Spreuke 6:2-3 AFR20
In 1755 het ‘n drie-en-twintigjarige kolonel van die weermag ‘n beledigende opmerking as deel van een van sy politieke veldtogtoesprake gemaak. Dit was op ‘n humeurige man, genaamd Payne, gemik, wat gereageer het deur die kolonel met ‘n stok te slaan. Soldate het die kolonel te hulp gesnel en dit het gelyk of ‘n volskaalse geveg op die punt was om uit te breek. Die voornemende politikus het egter opgestaan, homself afgestof, die soldate weggestuur en die toneel stilweg verlaat.
Die volgende oggend het die kolonel aan Payne geskryf en sy teenwoordigheid by ‘n plaaslike taverne versoek. Payne het ingestem, maar hy het gewonder watter eise die kolonel sou stel – miskien ‘n verskoning of selfs ‘n tweegeveg. Tot Payne se verbasing het die kolonel hom met ‘n verskoning begroet, vergifnis vir sy neerhalende opmerkings gevra en ‘n handdruk aangebied. Ander mense mag dalk die gebaar as polities gemotiveerd afgemaak het, maar kolonel George Washington het dit ter wille van sy innerlike vrede nodig geag, terwyl hy met sy politieke veldtog op pad om Amerika se eerste president te word, voortgegaan het.
Jesus het gesê: ‘As jy dus jou offer na die altaar toe bring en dit val jou daar by dat jou medemens ‘n grief teen jou koester, los jou offer net daar voor die altaar en gaan maak eers vrede met daardie persoon. Kom dan terug en bring jou offer. Sorg dat jy baie gou op goeie voet met jou teenstander kom…’ (Matteus 5:23-25 NLV). Salomo het gesê: ‘as jy in ‘n strik getrap het deur die woorde van jou mond… doen dan dit… Gaan – verneder jouself!’ (Spreuke 6:2-3 AFR20). Die woord vir jou vandag is: Word nederig en probeer om dit reg te maak.
Sielskos: Jer 33:1-36:26; Luk 24:19-24; Ps 25:1-7; Spr 9:17-18
2026-04-06
Efesiërs 4:23 NLV
Ons is drieledige wesens: gees, siel en liggaam. Wanneer ons Jesus Here van ons lewe maak, word ons van die geestelike dood genees. Daar is egter steeds twee areas wat Christus se genesende aanraking nodig het: ons siele (verstand, emosies en wil) en ons fisiese liggame. God se Woord leer ons dat ons fisiese gesondheid en geestesgesondheid onherroeplik met mekaar verbind is. ‘Want soos hy in sy siel bereken, so is hy’ (Spreuke 23:7 AFR53). Wat ons van onsself dink, is wat ons word. Ongesonde denke lei tot ‘n ongesonde lewe.
Johannes het geskryf: ‘…ek hou aan bid dat dit in alle opsigte met jou goed mag gaan en dat jy nét so gesond sal wees soos dit geestelik goed met jou gaan’ (3 Johannes 1:2 NLV). Enige area waarin ons siel ongesond is – of dit nou ‘n lae selfbeeld, negatiewe gedagtes of vernietigende gewoontes is – kan deur God se Woord genees word.
Die meerderheid van Satan se aanvalle begin in ons verstand. Hy gebruik verkeerde gedagtes en indrukke om ons van God se beste weg te lei. Die enigste manier om hierdie aanvalle teen te werk, is om op God se Woord te staan en toe te laat dat sy gesonde gedagtes ons daaglikse denke deurdring. Gedagtes van vrees kan met gedagtes van geloof vervang word. Gedagtes van gebrek kan met gedagtes van voorsiening vervang word. Gedagtes van mislukking en depressie kan met gedagtes van sukses en vreugde vervang word.
Hoe kan ons dit regkry? Paulus gee ons die antwoord: ‘Julle moet op ‘n nuwe, geestelike manier leer dink. Ja, trek die nuwe mens soos skoon klere aan, die mens wat na God se beeld geskape is: iemand wat werklik reg lewe voor God en werklik aan Hom toegewy is’ (Efesiërs 4:23-24 NLV).
Sielskos: Jer 31-32; Luk 24:13-18; Ps 32; Spr 9:10-16
2026-04-05
Matteus 28:6 NLV
Eendag sal jou hart ‘n laaste pols gee en jou longe ‘n laaste asemteug uitblaas. Tensy Christus alreeds teruggekeer het, sal jy sterf. Die Psalmdigter het gevra: ‘Watter mens kan lewe sonder om die dood te sien? Wie kan homself red uit die mag van die doderyk?’ (Psalm 89:49 NLV). Jonk en oud, goed en sleg, ryk en arm; geen mens word daarvan vrygestel nie. ‘Niemand het die mag om die wind te beheer nie. Net so kan mense nie bepaal wanneer hulle doodgaan nie…’ (Prediker 8:8 NLV).
Die wyses, die rykes, die armes – niemand kan daarvoor weghardloop of die dood uitoorlê nie. Ons almal sal sterf. ‘Soos elke mens bestem is om net een keer te sterf…’ (Hebreërs 9:27 NLV). Oefen soveel as wat jy wil. Eet net gesonde kos en drink handevol vitamienes. Bly uit die son en weg van alkohol en van dwelms af. Doen jou bes om aan die lewe te bly en jy sal steeds sterf.
Die dood lyk soos ‘n doodloopstraat, totdat ons Jesus se opstandingsverhaal lees: ‘Hy is nie hier nie, want Hy is opgewek uit die dood, presies soos Hy gesê het… En gaan sê nou dadelik vir sy dissipels… Hy gaan julle solank vooruit Galilea toe. Julle sal Hom dáár sien… Hulle het toe haastig van die graf af weggegaan… om die boodskap aan sy dissipels te gaan gee… Die elf dissipels het toe na Galilea toe gegaan, na die berg soos Jesus hulle beveel het. Toe hulle Hom sien, het hulle Hom aanbid…’ (Matteus 28:6-17 NLV).
Vir die verloste kind van God is die dood nie die einde nie, maar die begin van ‘n glorieryke lewe in die hemel wat geen einde sal hê nie.
Sielskos: 1 Kor 15; Luk 24:1-12
2026-04-04
Johannes 19:30 NLV
In die Ou Testamentiese tye het jy vergifnis van God ontvang deur ‘n offerlam na die altaar toe te bring, waar ‘n priester die bloed daarvan sou vergiet en dit as versoening sou aanbied. Die eerste persoon in die Skrif wat dit gedoen het, was Kain se broer, Abel (sien Genesis 4:4). Toe Salomo sy manjifieke tempel ingewy het, het hy honderd-en-twintigduisend skape en twee-en-twintigduisend osse as ‘n offer vir die hele volk gebring. Die offervuur in die tabernakel in die Ou Testament is nie toegelaat om dood te gaan nie; dit moes aan die brand gehou word. Daar word geskat dat daar tydens die Paasfees amper honderdduisend lammers geoffer is, wat die Kidronstroom letterlik rooi gekleur het.
Nie een milliliter van die bloed wat vergiet is, kon egter vir ons versoening van ons sondes bring nie. Ons moes wag vir ‘n lam wie se offer alle offers sou beëindig, ‘n priester wie se voltooide werk eens en vir altyd vir ons sonde versoening sou bring. Dit is wat gebeur het toe Jesus uitgeroep het: ‘Dit is volbring.’ In Hebreeus beteken die frase: ‘Volledig betaal.’ Op daardie oomblik het die gordyn in die tempel wat die mense van God geskei het, van bo tot onder geskeur.
Gevolglik kan ons nou enige tyd by die plek ingaan, waar slegs die hoëpriester een dag per jaar in die teenwoordigheid van God kon ingaan, met die wete dat ons geliefd, aanvaar en deur die bloed van Christus as regverdig beskou sal word. Met dit in gedagte: ‘Kom ons gaan dan met volle vrymoedigheid na die troon van ons genadige God. Hy sal aan ons sy deernis en onverdiende goedheid bewys sodat ons op die regte tyd gehelp sal word’ (Hebreërs 4:16 NLV).
Sielskos: Jer 28-30; Luk 23:50-56; Ps 72:12-20; Spr 9:7-9
2026-04-03
Romeine 5:20 NLV
Net oomblikke voor Hy sy laaste asem uitgeblaas het, het Jesus van die kruis af uitgeroep: ‘Tetelestai!’ Dit word vertaal as: ‘Dit is volbring.’ Dit is dieselfde woord wat in die Nuwe Testamentiese tyd op kwitansies geskryf is, wat aangedui het dat ‘n skuld ten volle betaal is. Jesus se dood aan die kruis was die finale paaiement om vir die sonde te betaal. Die volle skuld van elke sondaar wat na Hom toe vir verlossing kom, is ten volle by Golgota betaal.
Paulus het geskryf: ‘…Maar hoe meer die sonde geword het, hoe oorvloediger het God se genade geword.’ Die genadebank is nooit gesluit nie en daar is nooit onvoldoende fondse nie. In ‘n breukdeel van ‘n sekonde nadat ons ons sonde bely het, vind ‘n wonderbaarlike transaksie plaas. Al ons sonde word na Christus se rekening oorgeplaas en ten volle betaal.
Daar vind egter ook ‘n tweede oordrag plaas. Al Christus se geregtigheid word ook na ons rekening toe oorgedra! Paulus het dit as volg verduidelik: ‘Die boodskap van versoening bestaan daarin dat God deur Christus die wêreld met Homself versoen het en nie die mense se oortredings teen hulle hou nie… God het Hom wat nie sonde geken het nie, sonde gemaak ter wille van ons sodat ons, op grond van ons eenheid met Christus, deur God vrygespreek kan word’ (2 Korintiërs 5:19, 21 NLV).
Om ‘in Christus’ te wees, beteken dat ons in sy geregtigheid, eerder as ons eie, geklee is. Dus, wanneer ons voor God staan, hoef ons nie rekenskap van ons sonde te gee nie, want dit is reeds aan die kruis verreken. Die Vader sal die geregtigheid van sy Seun wat aan ons rekening oorgedra is, sien.
Sielskos: Jes 53; Luk 23:26-49; Ps 22
