2021-07-12
Lukas 5:5 NLV
Les drie: Werk saam met God se plan vir jou lewe. ‘Toe Hy klaar gepraat het, het Hy vir Simon gesê: ‘Vaar nou dieper in en gooi jou nette uit, en jy sal baie vis vang.’ ‘Meneer,’ het Simon geantwoord, ‘ons het die hele nag hard gewerk en het niks gevang nie. Maar as u so sê, sal ons weer probeer.’ En hierdie keer was hulle nette so vol dat dit begin skeur het!’ (verse 4-6 NLV).
Jesus het die dissipels geleer waar om vis te vang, wanneer om vis te vang en hoe om vis te vang. Hy sal jou ook leer om sukses in die lewe te behaal. Soos Petrus, sal jou plan egter soms moet misluk voordat jy gewillig word om God se plan te aanvaar.
Let twee dinge op: 1) Petrus het nie met Jesus gestry nie, hy het Hom eenvoudig gehoorsaam. As professionele visserman mag hy dalk gedink het: ‘Here, wie is U om my te vertel hoe om vis te vang?’ Hy mag dalk selfs gedink het dat as hy niks in die nag wanneer die visse gewoonlik byt gevang het nie, sou hy sekerlik nie iets in die middel van die dag gevang het met die son wat op die water bak nie. Hy het egter nie gestry nie; hy het net gehoorsaam. Jy moet dit ook doen.
2) Hy het nie na sy gevoelens geluister nie. Hy was seker doodmoeg nadat hy die hele nag gewerk het. Hy het egter nie gevra: ‘Wat is die punt? Hoekom moet ek aanhou probeer?’ nie. In plaas daarvan om deur sy gevoelens gelei te word, het hy geloof in Christus se belofte uitgeoefen – en die resultate was wonderbaarlik. As jy vandag jou geloof in Jesus plaas, sal Hy dieselfde vir jou doen.
Sielskos: Hand 3:11-5:42; Luk 6:37-49; Ps 109:16-31; Spr 15:23-26
2021-07-11
Lukas 5:9 NLV
Les twee: God is geïnteresseerd in jou sukses. Petrus het geweet dat Jesus ‘n wonderlike leermeester is en dat Hy selfs die siekes gesond kon maak. Petrus het heel waarskynlik die beste nette gehad, ‘n goeie boot besit en presies geweet waar om die meeste vis te vang. Sy inkomste het van ‘n goeie vangs afgehang. Nadat hy egter heelnag niks gevang het nie, het Petrus die beste skuif van sy lewe gemaak: Hy het Jesus by sy besigheid betrek!
Het jy geweet dat God wil hê dat jy sukses moet behaal? Wil jy nie graag hê dat jou kinders sukses moet behaal nie? Net so, wil God dit ook hê. Die vraag is: Neem jy God saam werk toe? Is jou besigheid beskikbaar vir Hom om enige tyd te gebruik? Laat jy Hom toe om mense deur jou te bereik? Ons probeer dikwels om die sekulêre apart van die geestelike te hou; ons hou ons Christelike lewe mooi afgesonder van ons loopbaan. Dit verhoed God egter om jou besigheid of werk te seën.
Wanneer jy dit besef, sal jy wys wees om volgens die beginsels van die Skrif te begin optree. Hier is een van God se suksesbeginsels vir jou besigheid of loopbaan: ‘Hou hierdie wetboek altyd by jou. Dink dag en nag daaroor na sodat jy alles kan doen wat daarin geskryf is. Jy sal dan sukses behaal op jou pad. Jy sal voorspoedig wees’ (Josua 1:8 NLV). God, wat die hoof uitvoerende beampte van die heelal is, sê: ‘…Ek is die Here jou God wat jou leer wat vir jou reg is. Ek lei jou op die pad waarop jy moet loop’ (Jesaja 48:17 NLV). Eis vandag hierdie belofte op!
Sielskos: Rut 1:3-18; Joh 6:41-69
2021-07-10
Lukas 5:3 NLV
Les een: Nooi Jesus aanboord jou boot. Dis altyd die beginpunt! Niks het ‘n groter invloed op jou persoonlike sukses as wanneer jy Jesus Christus in jou lewe het nie. Petrus het heelnag alleen op sy skuit probeer visvang, maar niks gevang nie. Toe hy egter vir Jesus aanboord bring, het hy meer vis as ooit tevore gevang.
Jesus het altyd sy wonderwerke gebruik om beginsels te illustreer. Hierdie insident leer jou dus wat om te doen wanneer jy misluk het, of wanneer jou beste nie goed genoeg is nie. Petrus se boot het sy lewensbestaan verteenwoordig. Wanneer jy ‘n visserman is, is jou boot jou besigheid! Dis beduidend dat Petrus vir Jesus in sy besigheid ingenooi het en dat Jesus dit as ‘n platform vir sy bediening gebruik het.
Is jy gewillig om te doen wat Petrus gedoen het? As jy is, sal die Here jou besigheid seën. Hy sal inderwaarheid alles wat jy vir Hom gee, seën. As jy jou hele lewe vir Hom gee, sal Hy alles daarvan seën. As jy egter net ‘n deel daarvan vir Hom gee, sal Hy net daardie een deel seën.
Wanneer jy Jesus in jou boot het, elimineer dit die vrees vir mislukking en verminder dit jou bekommernisse. Toe Petrus vir Jesus sy visvangvennoot gemaak het, was die resultate wonderbaarlik. Moet egter nie die volgorde miskyk nie. Eerstens, het Petrus sy boot vir Jesus se doelwitte gebruik. Toe het Jesus Petrus se boot geseën en dit gebruik om aan al Petrus se behoeftes te voldoen. Jesus het gesê: ‘Nee, maak die koningsheerskappy van God en dit wat voor Hom reg is, julle heel eerste prioriteit; dan sal God vir julle al hierdie ander dinge as ‘n bonus byvoeg’ (Matteus 6:33 NLV). Het jy mooi gelees? ‘Al hierdie ander dinge.’
Sielskos: Hand 1:1-3:10; Luk 6:27-36; Ps 109:1-15; Spr 15:22
2021-07-09
Spreuke 3:5 NLV
In 1987 het die Minnesota Twins-bofbalster, Kirby Puckett, sy kinderdroom gesien waar word toe hy sy span na ‘n Wêreldreeks-kampioenskap gelei het. Greg Gagne, die Twins se kortstop, het die toneel in die klubhuis na hulle oorwinning beskryf. Hy het vertel van die omhelsings, die gejuig, die gelag en die oorhandiging van die trofee. Die herinnering wat hom egter altyd sou bybly, het hy gesê, het tien minute in die feesvieringe plaasgevind toe hy vir Kirby Puckett stil op ‘n stoel, weg van almal, sien sit het. Gagne het sy weg deur die media, die spelers en die afrigters gedruk, langs Puckett gaan sit en hom gevra waaraan hy dink. Met ‘n diep hartseer in sy oë, het Puckett geantwoord: ‘As dit al is waaroor die lewe gaan, is die lewe maar bra leeg.’
Kan jy jouself daarmee vereenselwig? Jy mag dalk ‘n wonderlike werk, ‘n uitstekende salaris, ‘n mooi huis, ‘n wonderlike familie, goeie gesondheid en selfs ‘n lae gholf-voorgee hê – maar geen ware vrede nie. Indien dit die geval is, is jy nie alleen nie. Daar is baie mense in die wêreld wat net soos jy voel.
Koning Salomo was regoor die wêreld beroemd. In sy tyd het hy meer geld as Bill Gates, Warren Buffett en Donald Trump saam gehad. Tog het hy geskryf: ‘Ek het daarna nagedink oor alles wat ek bereik het, oor al die moeite wat ek gedoen het. En ek het besef hoe sinloos dit alles is…’ (Prediker 2:11 NLV). Tot watter gevolgtrekking het Salomo gekom? ‘Vertrou op die Here met alles wat jy het. Moenie staatmaak op jou eie insigte nie. Vra na die wil van God in alles wat jy doen. Hy sal die regte pad vir jou wys’ (Spreuke 3:5-6 NLV).
Sielskos: Joël 1-3; Luk 6:17-26; Ps 79; Spr 15:18-21
2021-07-08
Spreuke 12:23 NLV
Sukkel jy om jouself daarvan te weerhou om ongevraagd raad te gee? Gebruik jy gereeld uitdrukkings soos: ‘Jy moet,’ of ‘Jy moenie’? Mense is geneig om iemand kwalik te neem wat altyd aanneem dat hulle weet wat die beste vir hulle lewens is. Selfs wanneer jy voel dat jy die reg verdien het om kommentaar op iemand anders se lewe te lewer, moet jy versigtig te werk gaan. Deur te sê: ‘Het jy dit oorweeg?’ sal makliker ontvang word as om vir iemand te sê: ‘Jy moet,’ of ‘Jy mag nie.’
Soos een skrywer opmerk: ‘Selfs wanneer jy kennis en insig in ‘n sekere situasie het, is dit soms verstandig om stil te bly en iemand anders die vreugde en vervulling te gee om dit te verduidelik.’ Om ‘n ‘kundige’ oor byna elke onderwerp te wees, is ‘n duidelike aanduiding van trots, wat afstootlik vir God en mense is. Selfs as jy briljant maar nederig is, kan jou teenwoordigheid diegene met ‘n lae selfbeeld ongemaklik en minderwaardig laat voel. Deur jou intellektuele meerderwaardigheid ten toon te stel, vervreem jy mense en veroorsaak jy dat hulle vir swakplekke soek om jou van jou troontjie af te stamp.
As jy geneig is om beterweterig te wees, is dit dalk nodig om jou siel eerlik te ondersoek. Is jou vertoon van kennis ‘n front vir onsekerheid? Verlang jy na aandag en waardering van ander, omdat jy dit nie by die bron kry van wie jy dit af soek nie?
Probeer die volgende: Luister aandagtig, vra vir idees, vermy dit om ander te korrigeer of te weerlê en beperk jou opinie tot een of twee punte. Mense geniet ‘n dialoog, nie ‘n monoloog nie, lewe dus volgens die volgende Skriftuurlike beginsel: “‘n Verstandige mens bly stil oor sy kennis…”
Sielskos: Jer 51-52; Luk 6:1-16; Ps 137; Spr 15:15-17
2021-07-07
Psalm 119:11 NLV
Senator Bill Nelson het op ‘n ses-dag ruimtetuigmissie aanboord die Columbia, net voor die Challenger ramp, gevlieg. In sy boek, Mission, verduidelik hy hoe moeilik dit is om ‘n behoorlike wentelbaan in die ruimte te handhaaf. Daar is geen weerstand in die ruimte nie, dus kan ‘n ruimtevaarder daardie groot wentelbaan letterlik self omkeer. Om in die regte wentelbaan te bly, maak die rekenaars aanboord voortdurend koers- en hoogteregstellings deur klein vuurpyle af te vuur wat klein aanpassings maak, terwyl groter vuurpyle brandstof verbrand om groot aanpassings te maak. Hierdie vuurpyle is van kritieke belang, want as hulle nie konsekwent op die regte tyd afgevuur word nie, kan die ruimtetuig uit sy wentelbaan beweeg en in die buitenste ruim rondtuimel of in die aarde se atmosfeer neerstort.
Daar is ‘n belangrike les hieruit te leer. As ons aan onsself oorgelaat word, is ons geneig om uit ons geestelike wentelbaan na louheid en onverskilligheid te tuimel. Of nog erger – ons eindig in sonde en rebellie op. Dis hoekom die vuurpyle van geloof en Bybelstudie, wat op ‘n aanhoudende en konsekwente basis ‘afgevuur’ word, ons help om op koers te bly en ons lewens keer om uit geestelike beheer te tuimel.
Bybelstudie en gebed gaan hand aan hand. Jy moet bid voor jy die Bybel lees om God te vra om jou te help om dit te verstaan. Jy moet ook na jy Bybel gelees het bid, om God te vra om jou te help om dit wat Hy vir jou gesê het, toe te pas. Soos met ‘n geliefde wat ver is, is die Bybel God se liefdesbrief aan jou en gebed is die telefoon wat jy optel en met Hom praat. Dis hoekom dit noodsaaklik is om jou daaglikse gebed en Bybelstudie te handhaaf.
Sielskos: Jer 49-50; Luk 5:27-39; Ps 122; Spr 15:10-14
